Tutu xihna cuii
Cuhva cha quetuvi andivi ta ñuhun ñuñivi
1
Nda ni cha xihna cuii nu ni quichi tiempu saquetuvi ra Ndioo ndihi andivi ta ndihi ñuhun ñuñivi.
2 Ta nu ñuhun ñuñivi can ñahni cha iyo,
ta cha naan ni iyo nuun chi.
Ta chico ra Tati Ndioo nu iyo nduta cahnu can.
3 Tacan,
ta cati ra Ndioo ti:
“Na cua ndundichin.”
Ta ni ndundichin.
4 Ta ni ndehe ra Ndioo cha vaha cha ndichin can,
ta savaha ra cha siin chiyo ndoo nu ndichin,
ta siin chiyo ndoo nu naan.
5 Ta cati ra Ndioo ti:
Nu ndichin can cua cuu “chinucahni”,
ta nu naan can cua cuu “chacuaa”,
cati ra.
Ndihi tiñu can ni savaha ra quivi xihna cuii.
6 Ta cati ndico ra Ndioo ti:
“Na cua ndoo nuna sava mahñu nduta can,
ta na cua quee siin chi in chiyo ta inga chiyo”,
cati ra.
Tacan cuu chi.
7 Ta savaha ra cha ndoo nuna mahñu nduta can.
Sava chi ndoo iti xuu,
ta sava chi ndoo iti siqui.
Tacan ni cuu chi.
8 Ta nu ndoo nuna can sacunani ra “andivi”.
Chacan ni savaha ra quivi uvi can.
9 Ta cati ndico tucu ra Ndioo ti:
“Na nduiin nduta cha ndoo iti xuu in chiyo,
ta na ndoo nuna nu cuu chi ñuhun iti”,
cati ra.
Tacan cuu chi.
10 Ta nu iti can sacunani ra Ndioo “ñuhun”,
ta nu nduiin nduta can sacunani ra “tañuhun”.
Ta ndehe ra Ndioo ti vaha xaan chi.
11 Ta cati ndico ra ti:
“Na cana ndihi nuun cuhu,
ta na cua satata chi.
Ta na cua cana ndihi nuun yutun cha cua coo chiti,
ta siin siin tata chi cua coo,
ta na cua cana chi nu ñuhun ñuñivi”,
cati ra.
Tacan cuu chi.
12 Ni cana ndihi nuun cuhu cuhva in in tata chi,
ta cana ndihi nuun yutun cha chaha yucu vixin,
ta cua coo yava chi cuhva in in tata chi.
Ta ndehe ra Ndioo ti vaha ndihi cha ni savaha ra.
13 Chacan ni savaha ra quivi uni can.
14 Ta cati tucu ra Ndioo ti:
“Na cua coo cha cua cuhva cha ndichin iti siqui andivi,
ta na cua ndusiin in ri cha chinucahni,
ta na cua ndusiin inga ri chacuaa.
Ta na cuhva ri seña tiempu cahni ta tiempu savi ndaa quivi ta ndaa cuiya cuu chi.
15 Ta na cua coo cha cua sandundichin iti siqui andivi,
vati cua cuhva ri cha ndichin nu ñuhun ñuñivi ya”,
cati ra.
Tacan ni cuu chi.
16 Ta savaha ra Ndioo uvi tahan ri cha cua sandundichin,
in ri cha ndichin ri chinucahni ta inga ri cha ndichin cha chacuaa.
Ta savaha tahan ra ndihi ri tiñu ndichin.
17 Ta tiso tahan ra chi ri iti siqui andivi,
18 vati cua sandundichin ri nu ñuhun ñuñivi ya chinucahni ta chacuaa,
ta tacan ndusiin cha ndichin chi cha naan.
Ta ndehe ra Ndioo ti vaha chi.
19 Ndihi tiñu can savaha ra quivi cumi can.
20 Ta cati ndico tucu ra Ndioo ti:
“Na quetuvi ndihi nuun ri quiti cuhu cha cua coo tichi nduta,
ta na quetuvi ndihi ri saa cha cua tati iti siqui andivi”,
cati ra.
Tacan cuu chi.
21 Tacan ni savaha ra ndihi quiti cuhu nahnu xaan cha iyo tichi nduta tañuhun,
ta ni savaha ra ndihi nuun ri cha quetuvi ri ta ri tichi nduta can,
ta quetuvi ndihi nuun ri saa cha tati iti siqui.
Ta in in tata ri cuhva cha cua cuina ri ta ri ni savaha ra.
Ta ndehe ra Ndioo ti vaha xaan cha ni savaha ra.
22 Ta sacu-ii ra chi ndihi rican,
ta cati ra ti:
“Cuina ndo,
ta nducuaha ndo,
ta na cua coo ndo niniin cahnu tichi nduta tañuhun,
ta na cua nducuaha ndihi ri saa cha iyo niniin cahnu nu ñuhun”,
cati ra.
23 Ndihi tiñu can savaha ra quivi uhun can.
24 Ta cati ndico ra Ndioo ti:
“Na quetuvi ndihi nuun ri quiti cuhu cha ndito nu ñuhun ñuñivi cuhva cha iyo tata ri,
ta na quetuvi ndihi ri quiti cuhu cua cuu sana ñivi,
ta na quetuvi ndihi ri chica chi tichi,
ta na quetuvi ndihi ri iyo tichi cuhu in in tata ri”,
cati ra.
Tacan ni cuu chi.
25 Ni savaha ra Ndioo ndihi nuun ri quiti cuhu cha cua cuu sana ñivi ñuñivi,
ta ni savaha ra ndihi nuun ri chica chi tichi,
ta savaha tahan ra ndihi nuun ri iyo tichi cuhu.
Ta ndehe ra Ndioo cha vaha cha ni savaha ra.
26 Ta cati ndico ra Ndioo ti:
“Cua savaha yo in ñivi cuhva iyo maan yo,
ta cua cundaca ñahan ñi chi ndihi ri quiti cuhu nu ñuhun chi ndihi ri tiaca iyo tichi nduta.
Cua cundaca ñahan ñi chi ndihi ri saa cha tati iti siqui,
ta cua cundaca ñahan ñi chi ndihi ri quiti cuhu cha cuu sana ñivi ta ndihi ri chica chi tichi nu ñuhun ñuñivi”,
cati ra.
27 Tacan,
ta ni savaha ra Ndioo chi ñivi can.
Cuhva iyo maan ra ni savaha ra ñivi can,
rai ta ñahan ni savaha ra.
28 Ta sacu-ii ra Ndioo chi ñivi can,
ta cati ra ti:
“Na cua coo tuvi xaan sehe ndo,
ta na cua ndutuvi ndo,
ta na cua ndoo sehe ndo nu ñuhun ñuñivi,
ta cua cundaca ñahan ndo chi ndihi cha iyo nu ñuhun ya”,
cati ra Ndioo.
29 Ta cati ndico ra Ndioo ti:
“Ihya chahi ndihi yutun tata cha cua cuhva chi chiti chi ihya nu ñuhun ya,
ta chahi ndihi yutun cha chaha yucu vixin,
vati cua cuu cachi ndo chi.
30 Ta chahi ndihi yucu vaha chi ndihi ri quiti cuhu cha iyo nu ñuhun ñuñivi chi ndihi ri saa cha iyo iti siqui chi ndihi ri quiti cuhu cha chica chi tichi nu ñuhun ñuñivi ya,
ta chahi ndihi yucu vaha cha cua cuu cachi ri ta ri”,
cati ra.