Cha ni cuchi ra Jacoob
50
Tacan cuu,
ta ni chacunumi ndaa ra José chi cuñu ñuhun sutu ra,
ta tayuhu ra chi ra,
ta ndahyu xaan ra.
2 Yaha chacan,
ta tava tiñu ra chi ra savaha rimedi,
vati cua tiso vaha ra cuñu ñuhun ra Jacob ti cua cuchi tiñu chi ra.
3 Ta queta uvi xico quivi nducuee ra ta ra nu ni savaha ra tiñu can.
Tacan,
ta maan quivi cuu chi cha tiso vaha ra ta ra cuñu ñuhun ñivi cua cuchi.
Ta ñivi ñuhun Egipto can,
chacoo cuihya tahan ini ñi cuenda ra Jacob uni xico uchi quivi.
4 Ta nu ni queta tiempu cha iyo tu cuihya ini chi ñivi can,
cahan ra José chi ñivi cha cutahan chi ra faraón,
ta cati ra ti:
―Tu cha cuu savaha ndo tu manini ti cua cahan ndahvi ndo cuenda yu chi ra faraón,
na cuhva ra ndatu ti cua cuhin cucuchi yu cuñu ñuhun suti,
5 vati ndoi tiñu chihin ra quivi cha ni ndito ra cha cua cuchi yu chihin ra nu nañu ra yavi yuu ñuhun Canaán,
vati ican tiso vaha ra cha cua cuchi ra.
Ta yaha chacan,
ta cua quichi ndique ―cati ra José chi ra cutahan chi ra faraón can.
―Na cua savaha ra cuhva cha ni cati ra chi sutu ra,
ta na cucuchi ra chi ra cuhva ndoo ra tiñu,
cua cati ndo ―cati ra chi ra ta ra.
7 Tacan cuu,
ta cuahan ra José cua cuchi ra cuñu ñuhun sutu ra,
ta cutahan ndihi ra satiñu nuun ra rey can chihin ra chi ndihi ra chanihin iyo ñuhun Egipto can.
8 Ta cutahan tahan ndihi ñivi ra José chi ra,
ta ni cuhva cutahan tahan ndihi yani ra chi ra.
Ta nandoo ndicha cuii ve cuati ni chi mbee ñi chi chivu ñi chi sundiquin ñi nu cuu chi ñuhun Gosén.
9 Ta tuvi xaan ñivi cuu ñi cuahan chihin ra,
ñi cuahan chi carreta chi ñi yoso quiti.
Tuvi xaan ñivi cuu ñi.
10 Ta nu ni queta ñi inga chiyo yuta Jordán can chiyo cana nicandi nu cuu chi Ataad,
ican sanduvaha ñivi chiti trigu,
ta chini ñi cha candahyu xaan ñi cuenda ra Jacob,
ta chacoo tu cuihya ini chi ra José inga ucha quivi cuenda ndii sutu ra.
11 Ta ñivi ñuhun Canaán cha iyo ican,
ndehe ñi cha iyo xaan ndahyu ñivi can nu cuu chi Ataad can,
ta cati ñi ti:
“¡Cahnu xaan tu cuihya ini iyo ñivi ñuhun Egipto cha cuenda ra ndii cha cua cuchi ñi!”,
cati ñi ta ñi.
Ta chacan sacunani ñi Abeel-mizraiim ican cha ndoo chi inga chiyo yuta Jordán.
12 Ta ndihi sehe ra Jacob,
ni sacuinu ra ta ra cuhva cha cati sutu ra ta ra,
13 cha cha naan ra ta ra cuñu ñuhun ra,
ta cuchi chi ñuhun Canaán nu iyo nduhva cha nani Macpela yatin nu cuu chi Mamre nu ni sata ra Abraham chi ra Efrón ñivi ñuun Het,
vati cuu chi nu cuchi ra ta ra.
14 Ta nu ni yaha cuchi sutu ra ta ra,
ra José chi ndihi yani ra chi ndihi ñivi cha chahan cha cutahan chihin ra,
cuahan ndico ra ta ra iti ñuhun Egipto.
Nu cahan mani ra Jose chi ndihi yani ra
15 Ta nu ni yaha chihi sutu ra ta ra,
ta quechaha ndatuhun tahan ra ta ra,
vati yuhvi xaan cuni ra ta ra ndehe ra chi ra José,
ta cati ra ta ra ti:
“Chito a ñavi ni xaan cuni ra yani yo ndehe ra chihin yo,
ta cua cahnda ndico yo cuenda cha savaha yo chihin ra”,
cati ra ta ra.
16 Tacan cuu,
ta tachi ra ta ra chi iin ra cha cahan tiñu cuenda ra ta ra nuun ra José,
vati cua cati ra ti:
“Xihna ca cha ña ta cuvi sutu ndo nacoo vaha ra tiñu cha na cua cati yani cun chihin cun ti:
17 ‘Chica ndahvi yu chihun,
vati na cua cucahnu ini cun ndihi cuati chi ndihi cha ña vaha savaha yani cun chihin cun’,
cati sutu ndo.
Ta chacan vitin,
chica ra ta ra tu manini ti na cua cucahnu ini cun ndihi cha ña vaha savaha ra ta ra,
vati musu ra Ndioo ra ni sacahnu sutu cun cuu ra ta ra”,
cati ra cha cahan tiñu can.
Ta nu ni chini ra José tuhun can ndahyu xaan ra.
18 Ta ndihi yani ra,
cha nanducu ra ta ra chi ra,
ta chahnu chiti ra ta ra nda nu ñuhun iti nuun ra,
cuhva cha iyo tahan maan ra ta ra,
ta cati ra ta ra chi ra José ti:
―Musu nuun cun cua cuu ndi,
ta ñahni yahvi cua quihin ndi ―cati ra ta ra.
19 Ta cati ra José chi ra ta ra ti:
―Ña cuyuhvi ndo,
vati ñavi Ndioo cui cha cua tachi tuni yu chihin ndo,
20 masi maan ndo,
nduinuun ndo cha cua sandoyo ñuhun ndo chihin yu,
soco ra Ndioo,
savaha ra cha quee chi iin cha vaha,
vati vitin ndehe yo cuhva cha tuvi xaan ñivi ni cacu cuenda cha chacoo tama.
Maan ra Ndioo savaha cha vaha can.
21 Ta chacan ña cuyuhvi ndo,
vati mai cua cuhva cha cua cachi ndo chi ndihi sehe ndo ―cati ra José.
Cuhva can ni cahan vaha ra José chi ndihi yani ra,
ta sa nduvaha cuni anima ra ta ra.
Queta quivi cha chihi ra Jose
22 Ta ra José chi ndihi ñivi ra chi ndihi ñivi sutu ra,
ndoo ñi ta ñi iyo ñi ñuhun Egipto.
Ta ra José chacoo ra cientu uchi cuiya,
23 ta ndehe ra chi ndihi sehe ra Efraín chi ndihi seyani ra chi sehe seyani ra,
ta ni iyo tahan ra quivi cha cacu sehe ra Maquiir cha cuu sehe ra Manasés,
ta maan ra José sacuahnu chihin ve ta ve.
24 Tacan cuu,
ta cha nduchahnu ca ra José,
ta cati ra chi ndihi ñivi ra ti:
“Cha cua cuvi yu vitin,
soco ra Ndioo,
cua cumi ra chihin ndo,
ta maan ra cua quichi tava chihin ndo nu ñuhun ya,
ta cua cundaca ra chihin ndo ñuhun Canaán cuhva cha tiso vaha ra tiñu chi ra Abraham chi ra Isaac chi ra Jacob”,
cati ra.
25 Ta cati ra José chi ndihi ñivi ra cha cuu tata ra Israel ti: ”
Quivi cha cua quichi tava ra Ndioo chihin ndo cua cuiso tahan ndo ndihi iquin yu nu cua cundaca ra Ndioo chihin ndo”,
cati ra.
Ta nduinuun ñi cuhva cha chaha ra tiñu chihin ñi ta ñi.
26 Ta cha iyo ra José cientu uchi cuiya ra,
ta chihi ra.
Tacan cuu,
ta tiso vaha ñivi can cuñu ñuhun ra,
ta tihi ñi chi tichi chatun,
ta ndoo chi ñuhun Egipto quivi can.