9
Kangeru ko muthsitanu ka shikire torombita thzako. Ngou na monine ditungwethzi edi dya wererire pa kaye ku tunda ku wiru. Edyo ditungwethzi dya piwire dipao dyo ku dikwina dyo kupira ondanda. 2 Edyo ditungwethzi ou dya vukurire ku dikwina, mwa tundire mwithse eci mwithse o ku tunda mu dirungu dyodikuru. Diyuwa no diwiru yeraurithsiwire ku mwithse ou wa tundire omo mu dikwina.3 Omo mu mwithse mwa tundire dimba ku keya pa kaye, karo dya piwire okoro o kuninga eci o nge. 4 Dya amberiwire ci dyepithsa muhonyi o pa kaye, nji emena, nji ngara thsitondo, shime anu pohuma awa pirire thsitamba thsa Nyambi pa rupara. 5 Edyo dimba ka dya tawethziwire kwipaa awo anu, unone dya tawethzewire pohuma ku wa nyandithsa mu maonda o mutanu. Kukora kwadyo kwaa cipitura eci nge o ku na humu munu. 6 Mwao maonda o mutanu anu kenge a ku fotafota kufa, unone ka ku ku wana, kenge a ku fota ci nga a fe, unone kufa kenge kwa ku wa cira.
7 Edyo dimba dya monaharire eci tukambe otu tu na roithsiwera ndwa. Dyekarire neyi ya monaharire eci mishukwe thzo gauda ku mitwi thzadyo, karo rupara rwadyo rwa piturire eci munu. 8 Ohunga wadyo eci huki thzo mbuyama, maeo adyo eci o nyime. 9 Pa miidi thzadyo dyekarire necandekithso eyi ya cipiturire eci ecandekithso yo thsifu yo pa muidi. Muvumo o mando adyo wa yuvaharire eci muvumo o matemba no tukambe totungi eyi i cirera ku ndwa. 10 Dyekarire no mithsira no mamonya eci nge. Karo mu mithsira thzadyo dyekarire nokoro o ku kurura anu mu maonda mutanu. 11 Dyekarire no fumu oyu wa di endithsire, oyu fumu po nedi kaya kangeru ka tundire omo mu dikwina dyo kupira ondanda. Dithzina dyako mu Thsiheveru po “Abadoni,” mu Thsigerike po “Apolioni.” Edi dithzina dyaa amba ci “Mukwakwipithsa.”
12 Dikarara dyo kutanga di na piti, ku na thsiarera makarara edi.
13 Kangeru ko muthsitanu na kofoci ka shikire torombita thzako. Na yuvire diywi edi dya tundire ku manyia ane o katara ko gauda aka ka di pa rupara rwa Nyambi. 14 Dya amberire kangeru ko muthsitanu na kofoci aka ka kwatererire torombita ci: “O puture tungeru tune otu tu nangiwa ku Rware roshokuru rwa Yuferati.” 15 Tungeru tune otu twa roithsiwerire ethsi thsikati nedi diyuwa nethzi ngonda nou mwaka, ngou twa puturiwire kwipaa rwavu ro muthsihatu rwanu wahe mu kaye. 16 Na yuvire taro thzo mashwarare aa a pahamine apo pa tukambe, nedi 200 milioni (200,000,000).
17 Mu thsimona thsange na monine otu tukambe nowa a pahaminepo. Awa pahaminepo kuma vatire pa miidi ecandekithso yoikihu eci mudiro no muvara o nthziru nou o kavava eci sulufura. Mitwi thzoto tukambe thza piturire eci mutwi o nyime, mu tunwa twato mwa tundire mudiro, mwithse no sulufura. 18 Rwavu ro muthsihatu rwanu rwa paiwire kwao makarara ahatu o mudiro, mwithse no sulufura eyi ya tundire mu tunwa to tukambe. 19 Okoro oto tukambe wekarire mu tunwa twato no mu mithsira thzato, inene mithsira thzato thza piturire eci mayoka, karo thzekarire no mitwi ethzi thzekarire nokoro o ku kurura anu.
20 Unone anu wahe a wa kanine kwipaiwa koa makarara ka cerire ekwama yo moko o. Ka thsiire ku rombera mathzimu, ekupuro yo kumba pa gauda, pa silivera, pa kopa, pa mawe no petondo, anyambi o kukana ku twethsa ku yuva nji ku mona nji ku enda. 21 Awo anu awo karo ka cerire kwipaa kwo nji orothzi wo nji ruthziho rwo nji withzi wo.