Dinguana aa ramutura thsiramatera thso muthsitanu na idi
8
Dinguana ou a ramuturire thsiramatera thso muthsitanu na idi apo pa vuka, kwekarire kututwara mu diwiru thsikati thso ku fota ku kwana kaci ko thsitunde.2 Ngou na monine tungeru to mutanu na twidi otu tu nemananga pa rupara rwa Nyambi. Twa piwire matorombita o mutanu na edi.
3 Kangeru kamweya aka ka shimbire thsitumekerero thso gauda thso insense ka keyire no ku nemana pa katara. Ka piwire insense o mungi ku pakerera nerombero yakwakutawa wahe ci ka i kumithse pa katara ko gauda aka ka di pa rupara ro ngunja. 4 Mwithse o insense ku pakerera kengeyo nerombero yakwakutawa ya thzire mu wiru kwa Nyambi ku tunda mu dyoko dyo kangeru. 5 Kangeru ngou ka shimbire thsitumekerero thso insense no ku thsi yarithsa mudiro o pa katara no ku thsi kuhera pa kaye. Kwekarire kwethsa ko mvura no mishika, mivumo no kungangama ko kaye.
Matorombita o mutanu na edi
6 Oto tungeru to mutanu na twidi otu twa kwatererire matorombita o mutanu na edi ngou twa ciroithserire ku a shika.
7 Kangeru ko kutanga ka shikire torombita thzako. Mbwe no mudiro eyi ya cipakererire nonyinga ya kuheriwire pa kaye. Rwavu ro muthsihatu ro kaye rwa pire, rwavu ro muthsihatu rwetondo rwa pire, karo no muhonyi ouhe ouyu wa pire.
8 Kangeru ko muthsidi ka shikire torombita thzako. Thsinu ethsi thsa monaharire eci mukinya oukuru, ethsi thsa yuumine eci mudiro thsa kuheriwire mu diwate. Rwavu ro muthsihatu ro meyu o mu diwate rwa pirukire onyinga, 9 rwavu ro muthsihatu ro yumbiwa yoiyumi yo mu diwate ya fire, karo rwavu ro muthsihatu ro mangunde rwepithsiwire.
10 Kangeru ko muthsihatu ka shikire torombita thzako. Ditungwethzi dyodikuru edi dya yuumine eci mumunyi dya wire ku wiru, dya wererire rwavu ro muthsihatu ro marware no manowa o meyu. 11 Dithzina dyedyo ditungwethzi po Oruru. Rwavu ro muthsihatu ro meyu a rurire, nanu owangi a fire mukaci ko meyu ku rura.
12 Kangeru ko muthsine ka shikire torombita thzako, rwavu ro muthsihatu ro diyuwa rwa furiwire, mofoci kengeyo no rwavu ro muthsihatu ro ngonda no rwavu ro muthsihatu ro matungwethzi, ci rwavu ro muthsihatu rwayo rwiraure. Rwavu ro muthsihatu ro mutenya ka kwekarire mwethzi, mofoci kengeyo no rwavu ro muthsihatu ro othsiku.
13 Na kengire karo, ngou na yuvire ngonga oyu wa thzire ndongoro mu wiru o ku na rende oyu wa kumbire ko diywi dyodikuru ci: “Mayuwane, mayuwane, mayuwane othsimo wanu o kaye wahe, mukaci ko mivumo thzo matorombita aa a tamba ku shikiwa ku tungeru tumweya tuhatu!”