Ku henyena kwa Nyambi
4
Ine eyi i reta makanyi no mandwa mu kaci kenu? Ene kadi yaa tunderera kwicikumbwethza yenu yoimango eyi i cirwithsa mu micima thzenu? 2 Mwaa cikumbwethza enu unone ka mu di nayo, mweyo, mu na ciroithsera shaanga kwipaa. Mwaa tendera mbamba eyi a di nayo amweya, unone kadi mwakwa ku i wana, mweyo, mwaa tenda mikwangarakanyi no ku rwa. Ka mu di nayo inene ka mu rombangire kwa Nyambi. 3 Karo shaanga yamwe mu romba, tumba mu piwa, inene mwa i rombera eanekera yenu yoimango ci mu ka i cikwathsithse mweyi nga i mi retera kucikora.4 Amwe mwanu o kukana ku rurama! Ene ka mu dimukire ci ombusha no kaye po yaa mi retera thsithzimbo na Nyambi? Mweyo, munu yomuhe o ku cihangwera ku cimbusheka no kaye aekara mukwathsithzimbo na Nyambi. 5 Nji mwaa anekera ci ya mbango eyi a amba Mañoro ci: “Aa fota nene ko difupa Mupepo ou na a paka mu mwetu”? 6 Unone aa tu monithsanga thsihemo thsothsikuru kupiterera. Eyo ngeyi a na ambera Mañoro ci,
“Nyambi wa ku rwithsa o mununa,
uno honi aa monithsanga thsihemo kowa a na cihuthsa kushi.”
7 Mu cihuthse kushi thza Nyambi honi ne. Mu kanene shamaonga, apo kenge a mi yembuka. 8 Mu henyene kwa Nyambi, naye Nyambi kenge a henyena ku kwenu. Mu yoe moko enu, amwe mwanu o thsivi, karo mu kenithse micima thzenu amwe mwakwa micima thzidi. 9 Mwikare no mathsiwa, mu dire no ku kuana! Tuheko twenu tu piruke thsidiro, no thsinyanyu thsenu thsi piruke mathsiwa! 10 Mu cihuthse kushi pa meho a Fumu, aye kenge a mi yerura ku mi ku rithsa.
Mwa ratura amweya
11 Andengenu, mwa cipithsa oandu mathzina. O kwipithsa dithzina muenthzenthzi nji ku mu ratura, aa rwithsa murao no ku u ratura. Unone o ku ratura murao, ka a u hengekire uno honi na piruka mwene mukwa ku u ratura. 12 Nyambi yodiyo yofoci pohuma Mukwakupaka murao no Mukwakuratura. Aye yofoci yodiyo o ku twethsa ku yoyithsa nji kwipaa. Uno honi owe ne yowe odye ci o rature muenthzoe?
Mwa cinunekera yo ku rupara
13 Mu ni teerere, amwe mu na ambanga ci: “Rero nji peunthza kenge tu thza mothzi mbongi nji thziya no ku kekaramo mwaka o ku tu tendamo miuro no ku wana rukuru.” 14 Unone ka mu dimuka ci ine ya ku tendahara peunthza. Mwoyo woe po waa cipitura eci dyundu edi di na monaharanga thsikati thsothsipu pohuma no ku pwa. 15 Mwaa roera ku ambanga kenge ci: “Ngeci wa i shime Fumu, kenge tu yoya no ku kwama eyi nji iya.” 16 Unone amwe mwaa cinuneka no ku cishangara, uno honi ouhe oo mununa o kengeyo po omango.
17 Munu yomuhe o ku dimuka owa ou a na roera ku kwama, unone kadi wa ku u kwama, na tende thsivi.