Jakovo 3

Kukwata rudimi

Andengenu, kadi cingwa ci owangi ku kwenu aa roera kwikara arongithsi, inene mu na dimuka ci atwe tu na rongithsanga kenge twa ku raturiwa nene shemwa kupita amweya. 2 Twaheno twa epithsanga mu makuñwa oangi. Munu yomuhe o kukana kwipithsa mwiambaura yenthzi po wa kwononoka, inene aa twethsa ku endithsa erama yenthzi yoihe.

3 Yoihe tu paka matumo mu tunwa to tukambe ci tu tu yuvere, twaa twethsa ku thsiurura erama yato yoihe. 4 Karo mu anekere okuru o dingunde, shaanga ci dyaa endithsiwa ku mupepo oukuru, dyaa thsiururiwanga ku kapepe kokaonye pohuma no ku twariwa kokuhe oku a na foto muvui. 5 Mofoci kengeyo no rudimi, kapo kokaonye perama yo munu, unone rwaa cishangara mwinu yoikuru. Karo mu anekere dikuruthsitu dyo ku twethsa ku tumekiwa ku kadiroana pohuma! 6 Rudimi naro rwaa cipitura eci mudiro, kaye komango perama yo munu. Rwaa twethsa kwipithsa erama yoihe, ku tumeka mwoyo o munu ouhe, aro no ku ka tumekiwa ku dihere.

7 Munu aa twethsa kwiethza, karo weethzapo mishovo thzothzihe thzekondwama, enyunyi, eharawi no yumbiwa yo mu meyu. 8 Unone kwithsa oyu weethza rudimi, inene ka rwa cihenga, karo rumango ru na yara ohungu o kwipaa.

9 Ko rudimi twaa shangara Fumu wetu aye Tata wetu, unone karo twaa ru cikwathsithsa ku kuya anu amweya awa ombire Nyambi mu thsikupuro thsenthzi. 10 Mu kanwa kofoci mwaa tunda kushangara no kukuya. Andengenu, ka i roerire kwikara kengeyo. 11 Ene mu dinowa dyofoci ne kenge nga mu va meyu oawa noa o kudyedya? 12 Andengenu, ene ku thsitondo thsokuyu ne kenge nga kwima miywera nji, nji ku veine kwimako ñuyu? Mofoci no dinowa dyo meyu o kudyedya, tumba mu vu meyu oawa.

Onyanyami o ku tunda kwa Nyambi

13 Ene kwaa di ku kwenu oyu di nonyanyami no kuyuvithsithsa? A i monithse ko mwoyo wenthzi ouwa, nekwama yenthzi yoiwa eyi a tenda ko ku cihuthsa kushi nonyanyami. 14 Unone ngeci micima thzenu thzi na yara mbamba noñondi, mwa cinuneka no kwangera ku amba yo kwithsa poshemwa. 15 Onyanyami o kengeyo kadi cingwa waa tunda ku wiru, unone wa muno mu kaye, kadi wa ku mupepo karo wa mathzimu. 16 Inene apa pa di mbamba noñondi paa wanahara mikwangarakanyi nekwama yoihe yoimango.

17 Uno honi thso kutanga, onyanyami o ku tunda ku wiru awo po ukenu, karo wa thsiyaro, wa kuwamucima, karo wa ku yuvera amweya. Wa ku yara ñeke nekwama yoiwa, ka wa wana mavwevwe nji mahetaheta. 18 Dicora dyowawa po dyaa kuniwa mu thsiyaro kowa a reta thsiyaro.