Yesu mupurisita wetu shokuru
8
Apa i nemana eyi ni amba po apa: tu di no Mupurisita Shokuru o kenge, oyu nekara ku rudyo ro ngunja thza Nyambi Shokuru mu wiru, 2 aye oyu na kwamena mu Ndau thzo Shokenu, mu tende thzo shemwa ethzi a vapurire Fumu, kadi munu.3 Inene mupurisita shokuru yomuhe aa hangweriwanga ku tupura nupu neyambero, mweyo, no mupurisita wetu shokuru naye aa roera ku tupura thsimweya. 4 Uno honi nga pa a di pano pashi, nga tumba ekara mupurisita shaanga kamanana, inene ko a di mapurisita aa a na tupuranga nupu ko murao o thsijuda. 5 Ekwama yopurisita eyi a tenda po thsikupuro no muthzimbimbi pohuma wenu yo ku wiru. Mofoci nedi yekarire kwa Mushe o ku fota ku umba tende, Nyambi wa mu raererire ci: “O tende enu yoihe ko ku piturithsa neyi wa monithsiwire pa mukinya.”
6 Uno honi Yesu na a piwa ekwama yopurisita yoikuru mu thsivaka kupita ekwama yo, inene thsiyuvano ethsi a nemanena po thsikuru kupita thso kare, pakuninga ci thsiyuvano thsothsipe po thsaa shishiwa pekumbwethzo yoiwa kupita thso kutanga.
7 Inene thsiyuvano thso kutanga nga kuma thsa pirire kapongonyi, nga ka kwa fotaharire karo thsiyuvano thso muthsidi. 8 Unone Nyambi wa wanine ci anu a di no kapongonyi, ngou a ambire ci,
“Fumu a amba ci thsikati pepi thsi di,
ethsi na ku tenda thsiyuvano thsothsipe,
nanu o mu Isiraele,
nowa o mu Juda.
9 Ka thsa ku cishoka eci thsiyuvano,
ethsi na tendire nakwathsañuru wo,
diyuwa edi na wa kwatererire ku dyoko,
no ku wa tangerera ku wa tundithsa mu ditunga dya Egepita,
pakuninga ci ka ruramine mu ku mamera thsiyuvano ethsi na cikwatireno,
na ni wa thsierera,
eyi yodiyo a amba Fumu.
10 Uno honi ethsi po thsodiyo thsiyuvano ethsi na ku tenda nanu a Isiraele
munyima thzao mayuwa, eyi yodiyo a amba Fumu.
Kenge na ku paka mirao thzange mu maano o,
no ku thzi ñora mu micima thzo.
Kenge na kwikara Nyambi wo,
karo kenge a kwikara anuange.
11 Okwithsa oyu wa ku rongithsa muenthzenthzi o ditunga dyofoci,
nji ku ambera mwapenthzi ci: ‘O dimuke Fumu!’
Inene wahe kenge a ku ni dimuka,
ku tatekera koyu shoonye shime ku ka kuma koyu shokuru.
12 Kenge na ku tetera omango wo,
karo mbera ka ni vuruka evi yo.”
13 Nyambi eyi a ambera yo thsiyuvano thsothsipe po aa monithsa ci thsiyuvano thso kutanga thsi na pakiwa ku mbadi. Mweyo, ethsi thsi na kurupara no ku pakiwa ku mbadi thsi tamba ku pwa.