6
Mweyo, tu tundenu mwirongithsa yo matatekero keyi ya Krisitu, tu tware ku rupara tu pye mwirongithsa keyi ya Krisitu. Ka tu roerire ku tateka karo ku shisha mushisho o kucera etenda yo ku twara ku kufa no ku tawa kwa Nyambi. 2 Ka mu roerire karo ku rongithsiwa yo makorovethzo, yo kukambekiwa moko, nji yo kupinduka kwafu no raturo thzo diyere. 3 Tu twarenu ku rupara! Karo eyi kenge twa ku i kwama ngeci Nyambi waa i tawethze.4 Inene tumba i tawa ku ka huthsa anu ku kucera awa na tundu mu thsitawo, awa na tanga ku munekiwera, awa na ereka ku thsipa thso mu wiru no ku eriwa ku Mupepo Oukenu. 5 Na dimuka owa o diywi dya Nyambi nokoro o kaye aka ka keya. 6 Uno honi na tundu mu thsitawo, tumba i tawa ku wa huthsa ku kucera karo, inene awo athsinda aa pamarera karo Mwana Nyambi pa mbinda no ku mu fithsa honyi ku mbunga.
7 Muve ou u na yamwa meyu o mvura oyu na rokerangapo no ku retera njimi dicora dyodiwawa, waa tambura thsiyauthzi kwa Nyambi. 8 Unone muve o ku menithsa miunga no kanyamukombwe ka u kwathsire thsimweya. Nyambi kenge a ku u kuta wangu, ku mahurerero kenge wa ku tumekiwa.
9 Ashimiwa ange, shaanga ou tu amba kenge, tu na dimuka shemwa ci amwe po mwaa tenda enu yoiwa nene, enu yo ku pitera ku kuyoyithsiwa. 10 Nyambi po ka a wana dipethso, ka a ku vurama ekwama eyi na mu mu kwamena no thsishimo ethsi na mu mu monithsa ou na mu kwathsa anuenthzi, no rerodino ko ku tenda mu tenda kengeyo. 11 Twaa fota nene ci munu no munu ku kwenu a twarerere ku koñomeka ku tenda kengeyo shime ku ka kuma ku mamaneneno, ci eyi mu na kurupera i tendahare ko kuyara. 12 Ka tu fotire ci mu vape, unone twaa fota ci mu taminene awa a di no thsitawo no kukwatamucima shime ku ka kuma apa a ku wa pera Nyambi eyi a wa kumbwethzire.
Thsikumbwethzo thsa Nyambi thsaa reta okurupero
13 Nyambi ou a kumbwethzire Aburahama, wa cethzerire mu dithzina dyenthzi aye Nyambi thsinda pakuninga ci kwithsa o mukuru ku mu pita oyu nga a cethzerire mu dithzina dyenthzi. 14 Wa ambire ci: “Yoshemwa kenge na ku ku fiyawera no ku ku pa anahoka owangi.” 15 Aburahama wa tatererire ko ku kwata mucima, mweyo, wa tamburire eyi a mu kumbwethzire Nyambi.
16 Inene anu a ethzanga ngoro mu dithzina dyo thsinu thsothsikuru mu thsivaka kupita awo athsinda, eyi anu a i tendanga ku tanarithsa eyi i na ambiwa no ku mana dikanyi mu kaciko. 17 Inene Nyambi kuma a fotire ci awa roerire ku tambura thsikumbwethzo thsenthzi a dimuke shemwa ci ka a ku tuturura eyi a anekerire ku tenda, ngou a i tanarithsire ko kucethzera ngoro. 18 Nyambi na a pa thsikumbwethzo thsenthzi no kucethzera kwenthzi. Eyi enu idi tumba i piruriwa inene tumba i tawa ci Nyambi angere. Mweyo, atwe na tu cirera ku kwenthzi ci tu wane macirero twaa twethsa ku tanarithsiwa micima uno tu tanarithsa okurupero ou tu di nao. 19 Ou okurupero po ukoro, karo odiyo dinjanga dyo myoyo thzetu, ukoro karo waa kuruperiwa. Waengena mu Tembere no ku ka piterera dimbatu ku kengena mu Ndau thzo Shokenu Nene. 20 Modiyo naa citangethza Yesu ku kengenamo mu ndau thzetu. Yodiyo mupurisita shokuru o diyere mu shayo thza Melekisedeki.