Mayuwa o mahurerero
3
Uno honi o dimuke kenge ci: Kenge kwa kwikara ekati yoikaru nene mu mayuwa o mahurerero. 2 Anu kenge a ku cishima awo athsinda pohuma, kenge mba shima nene madi, kenge mba cishangara, kenge mba cinuneka, kenge mba yengwera Nyambi, kenge mba shwahura ashemi wo, kenge mba pira okanderero, karo mbera kekara owakenu. 3 Mbera ka shimi amweya, mbera ka tetera amweya, kenge mbepithsa amweya mathzina, kenge mbekara no ruthziho, kenge mbekara no ñore, kenge mba thzimba yoiwa. 4 Kenge mba omba ambusho, kenge mbekara mangurunde, kenge mbekara o mununa nene, karo kenge mba shima nene ecikora kupita ku shima Nyambi. 5 Kenge mba monahara eci a di no mwoyo o thsitawo, unone kenge mba kana okoro wao. O tunde kwanu o kengeyo.6 Inene amweya ku kwo aengenanga mu manthzio anu no ku othza ambuyama awa faratera, no ku remena mipango thzevi yo, karo aa endithsiwa kecikumbwethza yoimango yo ku cithsiathsia. 7 Ambuyama o kengeyo aa ereka ku cirongithsa enu yoipe thsikati thsothsihe unone dyawaca ku twethsa kwikara nodimukero oshemwa. 8 Dyodi a kanenine Mushe a Janesi na Jamburesi, nowa anu awa dya na kana oshemwa. Anu weanekera yo kwipa awa a di no thsitawo thso mbango. 9 Unone mbera ka henye kokure, inene anu wahe kenge a ku mona otomba wo eci edi ya tendaharire kwa Janesi na Jamburesi.
Ethsiurura imweya
10 Uno honi, owe Timoti po, no shupwera erongithsa yange, muyoyero wange, thsisheteka thsange mu mwoyo, thsitawo thsange, kukwatamucima kwange, thsishimo thsange, nothzui wange. 11 Karo o na dimuka kunyandithsiwa kwange, no makando ange. O na dimuka othzui wange mu makando uya na nyandithsiwire mu Antioke, mu Ikoniamu no mu Lisitira. Unone Fumu wa ni amwenine kweyi yoihe. 12 Yoshemwa, munu yomuhe oyu fota ku yoya mwoyo o thsitawo mwa Krisitu Yesu kenge a ku nyandithsiwa. 13 Unone akwetenda yoimango nakwakwangera kenge a ku hambakana mwitenda yo. Kenge a kwangera amweya, karo nawo kenge a kwangeriwa.
14 Uno honi eciko owe po, o tanarithse eyi no cirongithsa neyi no tawa shemwa, inene o na dimuka oyu naa i ku rongithsa. 15 Karo ku tunda ku wanuke woe o na dimuka Eñora yo Shokenu, eyi i twethsa ku ku pa onyanyami o kuyoyithsiwa ko thsitawo mwa Krisitu Yesu. 16 Mañoro oahe a ñoriwire kotangereroa o Mupepo wa Nyambi, aa kwathsa ku rongithsa oshemwa, ku kuturura, ku thsiurura no ku ronga munu ci a yoye kowawa, 17 ci mupika Nyambi a ciroithsere nawa ku tenda ekwama yoihe yoiwa.