O honge diywi dya Nyambi
4
Naa ku raerera pa meho a Nyambi no pa meho a Krisitu Yesu, oyu wa ku ratura ayumi nafu ou a ku hokoka ku na tungithsa Kutumina kwenthzi, 2 o ciroithsere ku honga diywi dya Nyambi mwikati yoiwa no mwikati yoimango. O thsiurure, o kuturure no ku tanarithsa ko kukwatamucima kokukuru no kurongithsa.3 Inene thsikati thsaa keya ethsi a ku kana anu ku cithzua erongithsa yoshemwa. Kenge a ku shupwera eshima yo, no ku ciungumekera arongithsi owangi awa a ku wa tongwera eyi a fota awo ku yuva. 4 Kenge a ku thsia ku teerera oshemwa, no ku thsiurukera ku matangu.
5 Uno honi owe o cihenge mwinu yoihe. O citanarithse mu makando, o kwame ekwama yo ngambi o diywi dya Nyambi, karo o kwanithserere ekwama yoe eyi no piwa.
6 Inene eci ameko po mwoyo wange na u tupuriwa kare eci thsiyambero kwa Nyambi, karo thsikati thsange thso ku thsia uno mwoyo pepi thsi di. 7 Na ni ru ndwa thzothziwa, na ni kumu ku hura thzo rakaraka, karo na ni hengeka thsitawo. 8 Pano honi, muyambo owawa u na ni taterera, ou a ku ni pa Fumu mwedyo diyuwa, aye mukwakuratura o kwononoka. Karo, ka a ku u pa ame pohuma, unone nowa wahe awa a na taterera nene ko thsishimo kuhokoka kwenthzi.
Maywi kwa Timoti
9 O ereke momuhe omu o na twethsera ku keya ku kwange ko wanguwangu, 10 inene Demasi, mu ku shima nene kwenthzi kano kaye, na a ni yeuka no ku thza ku Tesalonika. Kiresensi aye na a thzi ku Galatia, karo Tite na a thzi ku Dalumatia. 11 Luka pohuma yodiyo di nange. O shimbe Mareka o keye nenthzi, inene aa twethsa ku na ni kwathsa mwikwama yange. 12 Tikike aye na ni mu tumu ku Efese. 13 Ou wa ku keya wa ku ni pitwere canthzi wange oya na ni thsii mu Toroasi kwa Kapasi. Karo wa ku ni pitwere no mavuka, nenepo mavuka etumba.
14 Alekisanda mukwakufura efu na a ni yuvithsa nene kukora. Fumu kenge a ku mu huthsera eci edi naa tende. 15 O mu mamere nowe, inene naa shomorora nene maywi etu.
16 Pa kuthzekithsiwa kwange ko kutanga kwithsa oyu wa nikarithsireko, unone wahe a ni yeukire. Nyambi a varera oo murandu kukwo. 17 Unone Fumu wekarire nange no ku ni tanarithsa, ci nga ni twethse ku honga Muthzimbu Ouwa ko kuyara ci Anukenge wahe nga a u yuve. Karo na amweniwire ku kanwa ko nyime. 18 Fumu kenge a ku ni amwena kumango ouhe, no ku ni twara nawa mu Kutumina kwenthzi ko ku wiru. Ku kwenthzi kwikare kutethzima ko diyere na diyere! Ameni.
Kuvumenena ko mamaneneno
19 O ni vumenenene Purisila na Akwila no mwanda wa Onesifora. 20 Erasito na a thsiara mu Korinte, unone Tirofimo aye na ni mu thsii mu Mileta o ku kora. 21 O ereke nene ci wa ku na kume kuno kufu o ku shime ku kuma. Yubulo, Pudenisi, Linusi, Kilaudia naenthzetu akwakutawa wahe aa ku vumenena.
22 Fumu ekare noe. Thsihemo thsa Nyambi thsikare nenu mwahe.