Dishwarare dyodiwa dya Krisitu Yesu
2
Eciko owe mwanange, o tanarithsiwe ko thsihemo ethsi thsi di mwa Krisitu Yesu. 2 Enu eyi no yuvu o ku ni amba pa meho o mambangi oangi, o i pake mu moko anu o ku rurama awa a ku twethsa nawo ku i rongithsa amweya.3 O nyandere pofoci nange eci dishwarare dyodiwa dya Krisitu Yesu. 4 Kwithsa dishwarare dyo kwingena mwinu yayo yo mwoyo, pakuninga ci eshima yenthzi po ku roerithsa ñathsire wenthzi. 5 Mofoci no munu o kwikara mu rakaraka, tumba a wana muyambo shime ngeci aa shupwera mirao. 6 Njimi o ku tanara ku kwama yo na roera ku wana dicora dyo kutanga. 7 O cikupure nawa eyi ni amba, inene Fumu kenge a ku ku pa mathsaano mwinu yoihe.
8 O anekere Yesu Krisitu o mu mukuta wa Davida oyu wa pinduriwire kwafu. Ou po odiyo Muthzimbu Ouwa ou ni honga. 9 Mukaci ko ku honga ou Muthzimbu Ouwa, naa nyandithsiwa no kwangiwa no madyenge eci no thsikeremi. Unone diywi dya Nyambi po ka dyangiwire. 10 Mweyo, naa cithzua mucima mwinu yoihe mukaci kowa na a hangura Nyambi, ci nawo a wane kuyoyithsiwa no kutethzima ko diyere mwa Krisitu Yesu.
11 Edi diambo dya shemwa dyo kuninga ci,
“Ngeci twaa fa nenthzi,
no ku yoya kenge twa ku yoya nenthzi,
12 ngeci atwepo tu cithzua mu makando,
no ku tumina kenge twa ku tumina nenthzi.
Ngeci atwepo tu mu hamura,
naye kenge a ku tu hamura.
13 Ngeci ka tu ruramine,
aye kenge a kwikarerera kengeyo o mururami,
inene tumba a cihamura yothsinda.”
Mukwakukwama o muwawa
14 O wa vurukithse eyi enu. Karo o wa nomenithse pa meho a Nyambi ci a cikanyeka yo maywi, edyo dikanyi dyo kengeyo tumba di kwathsa thsimweya, dya epithsa pohuma awa i teerera. 15 O kwame momuhe omu o na twethsera ku cipa pa meho a Nyambi ko kwikara oyu na tawethziwa, mukwakukwama o kukana ku fa honyi, o ku tongonona nawa muthzimbu oshemwa. 16 Unone o tunde kwiambaura i shiremeka Nyambi, inene enu yo kengeyo po yaa twara pohuma anu ku miyoyero thzo kupira thsitawo. 17 Erongithsa yo kenge ya ku yanduruka eci thsironda thso mbongora. Amweya kukwo po Himenea na Fileto, 18 awa na yemburuka ku thsia oshemwa. A amba ci kupinduka kwafu po na ku tendahara kare, karo aepithsa thsitawo thsa amweya.
19 Shaanga kengeyo, mushisho oukoro wa Nyambi ou naa shishi u na tanara, ou u na pakiwa thsitamba ko ku ñoriwa kenge ci: “Fumu na dimuka anuenthzi shemwa.” Karo ci “Yomuhe oyu na citawera ci wa Fumu a thsie omango ouhe.”
20 Mu nthzio thzothzikuru ka mu waniwire pohuma etenga yo gauda no silivera, unone mwaa waniwa netenga yetondo noma, imweya ya ku kwamithsa enu yo direma, imweya ya ku kwamithsa yo kupira direma. 21 Mweyo, munu yomuhe o ku cikenithsa kweyi yo kupira direma, kenge a kwikara thsitenga thso ku kwamithsa yo direma, karo o mukenu, no ku kwathsa nene kwa ñathsire wenthzi, karo o na ciroithsera ku kwama ekwama yoiwa.
22 O yembuke kwicikumbwethza yoimango yoshumba, unone o koñomeke owawa, thsitawo, thsishimo no thsiyaro, pofoci kengeyo nowa ethsa Fumu ko mucima oukenu.
23 Unone wa vanda ku dikanyi dyotomba no kukana ku dimuka thsimweya, inene nowe o na dimuka ci yaereka mandwa. 24 Karo mupika Fumu ka a roerire marwamvu, unone aa roera kwikara no thsihemo kwanu wahe, karo aa roera ku twethsa ku rongithsa no ku kwatamucima. 25 Aa roera ku thsiurura ko kuwamucima awa mu rwithsa, kuinashimi Nyambi kenge a wa pa ndau thzo ku cera ci a dimuke oshemwa, 26 apo honi maano o kenge a ku hukera nawa no ku thsevuka kwiteama ya shamaonga, oyu na a wa pukura ci a tende eshima yenthzi.