Shiremeka murao wa Nyambi
2
Andengenu, keyi yo kukeya kwa Fumu wetu Yesu Krisitu neyi yo ku kungurweriwa kwetu ku kwenthzi, twaa mi romba, 2 mwa ku yapithsiwa wangu nji ku cithzekera yo diyuwa dya Fumu ci di na kumu kare. Mwa ku i tawa shaanga wa ku mi tongwere ci yo na tu kethza, nji ku i amba ko muthzimbu o mu kanwa, nji ci yo na tu ñoro mu diñoro edi a ninga ci dyaa tunda ku kwetu. 3 Mwa tawa munu ku miangera ko dikuñwa dipi nji dipi, inene edyo diyuwa o ku di shime ku keya, anu owangi kenge a ku pirukera Nyambi tango. Karo Shiremeka murao wa Nyambia kenge a ku hokoriwa, oyu na roera ku nongithsiwa.b 4 Kenge a ku cithzineka no ku rwithsa yoihe eyi a rombera anu neyi a na remeka yoihe mu dithzina dya Nyambi. Mweyo, kenge a kwingena mu Tembere thza Nyambi no kwikara, no ku cithsa ci yodiyo Nyambi.5 Ene ka mu vurukire ci o ku ni di nenu shime naa mi tongweranga eyi enu nji? 6 Uno honi mu na dimuka ethsi thsi mu ñaña ci a ku hokoriwe thsikati ethsi thsi na roera. 7 Okoro o diano dyo ku shwahura murao wa Nyambi u di no ku kwama pano tu di. Oyu na u ñaña kenge a ku twarerera ku tenda kengeyo shime ou a ku tunda mu dikuñwa. 8 Munyima thzeyo, Shiremeka murao wa Nyambi mbeci a ku hokoriwe, oyu a kwipaa Fumu [Yesu] ko muñu o mu kanwa kenthzi no ku mu nongithsa ou mba a hokoka o ku keya ko kutethzima kwenthzi.
9 Kukeya koyu Munu Shiremeka murao kenge kwa ku keya kokoro wa Satana. Kenge a ku tenda emonithso yo mishovoshovo nekomokithsa yo mbango. 10 Karo kenge a ku cikwathsithsa mishovo thzothzihe thzomango kwangera awa a ku cithzira. Kenge a ku cithzira pa kukana ku shima no ku tambura oshemwa ci nga a ku yoyithsiwe. 11 Mweyo, Nyambi kenge a ku wa tumena kwangera kokukoro ci nga a tawe yo mbango, 12 ci wahe awa na kana ku tawa oshemwa, awo no ku nyanyukera omango a ku raturiwe.
Na mu hangweriwa kuyoyithsiwa
13 Twaa roera ku kanderera kwa Nyambi thsikati thsothsihe mukaci kenu, andengenu, amwe mu na shimiwa kwa Fumu, inene Nyambi wa mi hangurire ci mwikare mutomwa mu ku yoyithsiwa, ko kukenithsiwa ko Mupepo Oukenu ko ku tawa oshemwa. 14 Nyambi yodiyo a mithserire ko Muthzimbu Ouwa ou twa mi rongithsire ci mu twethse ku tambura kutethzimac kwa Fumu wetu Yesu Krisitu.
15 Mweyo honi, andengenu, mwimane mu tanare, karo mu kwate erongithsa eyi twa mi rongithsire ko maywi o mu kanwa nji o mu diñoro dyetu. 16 Uno honi, aye shemwa Fumu wetu Yesu Krisitu, na Nyambi Tata wetu oyu wa tu shimine no ku tu pa ko thsihemo thsenthzi kutanarithsiwa ko diyere nokurupero ouwa, 17 a mi tanarithse micima no ku mi pa okoro o ku tenda yoiwa yoihe ketenda no maywi.