Diñoro dya Paulu dyo Kutanga kwa
AkwaTesalonika
Kuvumenena
1
Yatwe twa Paulu, Silasia na Timoti. Twaa ñorera amwe mwakwa kereke thzo mu Tesalonika, amwe mu di kwa Nyambi Tata noku kwa Fumu Yesu Krisitu. Thsihemo no thsiyaro thsa Nyambi ikare nenu.Thsitawo thsakwakutawa o mu Tesalonika
2 Twaa kandereranga kwa Nyambi thsikati thsothsihe mukaci kenu mwahe no ku mi vurukanga mwirombero yetu. 3 O ku tu rombera kwa Nyambi, aye Tata wetu twaa vurukanga etenda yenu yo thsitawo, ekwama yenu yo thsishimo, no kucithzua kwenu micima mukaci kokurupero wenu kwa Fumu wetu Yesu Krisitu.
4 Andengenu, tu na dimuka ci Nyambi aa mi shima, karo na a mi hangura ci mwikare anuenthzi. 5 Inene uya na tu mi tongwera Muthzimbu Ouwa, shime twaa u mi tongwera kadi ko maywi pohuma, unone kokoro no Mupepo Oukenu no ku rakwa shemwa kokukuru. Mu na dimuka edi na tu na yoyo mu kaci kenu no ku mi kwathsa. 6 Na mu tu temununa atwe na Fumu. Na mu tambura diywi ko thsinyanyu thso ku tunda ku Mupepo Oukenu shaanga ci nedi mu kaci ko makando oakuru. 7 Mukaci keyo, na mu nekara muro kwakwakutawa wahe o mu thsikiriti thsa Masedonia no mu Akaya.
8 Mukaci keyi na mu tende, diywi dya Fumu ka di thzire ñua pohuma mu Masedonia no mu Akaya, unone thsitawo thsenu kwa Nyambi na thsi dimukiwa kokuhe, mweyo, kwithsa karo eyi nga tu amba keyi yenu. 9 Wahe a amba yodi mwa na tu tamburire nedi na mu thsiurukera kwa Nyambi ku thsia ku rombera ekupuro no ku kwamena Nyambi shemwa oyu yoya. 10 Karo aa tongaura edi mu na taterera kukeya kwa Mwane Yesu ku tunda ku wiru, oyu a pindurire kwafu, oyu na a tu amwena kuanthzi ou u keya.