Ekwama ya Paulu mu Tesalonika
2
Andengenu, mu na dimuka ci kuhungera kwetu ku kwenu nedi kadi kwa mbango. 2 Eci dyodi mu na dimuka, shime twaa nyandithsiwa no ku tukathzaniwa mu Filipi. Unone Nyambi na a tu pa ondume o ku mi tongwera Muthzimbu Ouwa keyi yenthzi, shaanga ci kuma na tu rwithsiwa nene. 3 Mweyo, kuhonga kwetu ka na kwikara ko ku cireka, nji ku tunderera kwianekera yoimango nji ku ereka ku miangera.4 Shaanga apa i di kengeyo, twaa amba ko ku tu tawethza Nyambi, aye pa ku tu mona ci twaa roera ku tongora Muthzimbu Ouwa wenthzi. Ka tu tendire eyi ci tu nyanyukithse munu, unone ku nyanyukithsa Nyambi oyu na erekanga eanekera yo mu micima thzetu. 5 Mu na dimuka namwe ci na dituci ku ereka ku mi kwatakwata pohuma pa meho. Nyambi aye shemwa na dimuka ci ka na tu miangera ku horeka rununa. 6 Ka na tu foto ci nga mu tu shangare, nji munu yomuhe ku tu shangara.
7 Ko kwikara tunganda twa Krisitu, shime twaa roera ku mi romba ci mu tu kwathse. Shaanga apa i di kengeyo, kuma na tu cihenge eci mbuyama edi a na vavareranga anenthzi. 8 Mweyo, pa ku mi shima nene, na tu foto nenenene kadi ku ciera nenu pohuma Muthzimbu Ouwa wa Nyambi, unone mofoci kengeyo no myoyo thzetu, inene mwaa shimiwa nene ku kwetu.
9 Andengenu, ene ka mu vurukire ekwama nekarupa yetu mu kaci kenu nji? Mwaa vuruka edi na tu na kwama othsiku no mutenya ku wana po ku yoyera, ci twekara mupango ouremu kwa munu yomuhe o ku tu honga Muthzimbu Ouwa wa Nyambi. 10 Amwe po mwa mambangi weyo, no Nyambi naye na dimuka ci twa nekarire owakenu, owawawa no kupira kapongonyi ou twa nekarire mu kaci kenu amwe mwakwakutawa. 11 Namwe mu na dimuka ci shime twaa shimba munu no munu ku kwenu eci tata wa munu edi a kwama anenthzi. 12 Shime twaa mi tanarithsa, no ku mi hengawethza, no ku mi koñomeka ci mu yoye mwoyo ou u na roera kwa Nyambi, aye oyu mithsera mu Kutumina kwenthzi no mu kutethzima.
13 Karo twaa kanderera kwa Nyambi thsikati thsothsihe ci ou na mu tambura diywi dyenthzi edi mwa yuvire ku kwetu, ka na mu di tambura eci diywi dya munu. Uno honi na mu di tambura dyodi di di shemwa ci diywi dya Nyambi, pano honi dyodiyo edi di kwama ku kwenu amwe mwakwakutawa.
14 Andengenu, amwe po na mu temununa makereke a Nyambi o mu Judea, aa a di kwa Krisitu Yesu. Kuma na mu nyandithsiwa kwanuenu eci dyodi a nyandithsiwire kwaenthzo Majuda. 15 Awo Majuda epaire Fumu Yesu nakwakukethza, karo wodiyo awa na tu nyandithsa. Ka roerithsire Nyambi, karo akwethzimbo yanu wahe, 16 pa ku tu kwangithsa kwo ku rongithsa diywi kwAnukenge ci nga a yoyithsiwe. Mweyo, aa ciungumekera evi yo ko kupiterera. Oanthzi wa Nyambi waa keya kukwo ku mamaneneno.
Paulu aa fota ku hungerithsa kereke karo
17 Andengenu, ku tunda paya na tu tundithsiwera ku kwenu kamanana, ka na tu thsii ku mi anekera. Mu ku fota nene ci nga tu na mi hungerithsa, na tu ereka momuhe omu tu na twethsera ci tu mi hungerithse. 18 Shime twaa fota nene ci nga tu na keya ku kwenu, yoshemwa ame no Paulu na ni ereka rorungi, unone Satana na a tu kwangithsa. 19 Mweyo, okurupero wetu ne upi, no thsinyanyu thsetu, nji muyambo wetu ou twa ku cishangarera pa meho a Fumu wetu Yesu ou mba a ka huka? Ene kadi yamwe nji? 20 Yoshemwa yamwe awa tu cishangarera ko thsinyanyu!