3
Uno honi ou na tu kwanga ku i cithzua, ku hura na tu ciyuvu ci twikare twafoci mu mbongi thza Atene. 2 Ngou honi na tu tumu muenthzetu Timoti oyu tu na kwama nenthzi ekwama ya Nyambi no ku rongithsa Muthzimbu Ouwa wa Krisitu, ci naa mi tanarithse micima no ku mi kwathsa mu thsitawo thsenu. 3 Inene ka tu fotire ci ku hukere munyima shaanga munu yofoci mukaci ko makando aa tu di nao. Unone namwe mu na dimuka ci Nyambi yodiyo naa i tawethza kengeyo ci tu nyandithsiwe. 4 Mane no uya na twikara nenu shime twaa i mi tongwera, ayo o ku i shime ku tendahara ci kenge twa ku nyandithsiwa. Karo dyo na i dikara kengeyo, namwe mu na i dimuka nawa. 5 Mweyo, ou na ni kwanga ku taterera thsikati thsothsire, o na ni mi tumithsera Timoti ku na mona thsitawo thsenu edi thsi di. Kuma na ni yapa cingwa naa mi tumaura mukwakutumauraa no kwipithsa ekwama yetu yoihe.6 Pano honi Timoti naa na kumu ku tunda oko ku kwenu, karo naa na tu pa muthzimbu ouwa keyi yo thsitawo thsenu no thsishimo thsenu kengeyo. Kuma naa na tu tongwera karo ci mwaa tu vurukanga ko thsinyanyu no ku tu rura nene, eci edi tu na mi ruranga natwe. 7 Mweyo, andengenu, mukaci ko thsitawo thsenu, tu na tanara micima mwikarupa no mu makando yoihe omu tu di. 8 Na i tu pa mwoyo ou na tu yuvu ci mu na tanara nene kwa Fumu.
9 Ngepi tu mi kanderera kwa Nyambi mukaci ko thsinyanyu thsothsikuru ethsi tu di nathso pa meho a Nyambi mukaci kenu? 10 Twaa romberanga nene kwa Nyambi mutenya nothsiku ci tu wane thsikati thso ku na mi mona no ku na yarithserera eyi i na piri mu thsitawo thsenu.
11 Nyambi Tata wetu mofoci kengeyo na Fumu wetu Yesu a tu wanene dikuñwa dyo ku keya ku na mi mona. 12 Fumu a kurithse thsishimo thsenu mane shime ku hupathzoka, no ku shima anu wahe eci edi tu na mi shimi natwe. 13 Ou mwa ku tenda kengeyo, naye kenge a ku tanarithsa micima thzenu, karo kenge mwa kwikara o kupira kapongonyi no kwikara owakenu pa meho a Nyambi Tata wetu, mu diyuwa dyo kukeya kwa Fumu wetu Yesu nanuenthzi owakenu wahe.