Kuyoya ko ku roerithsa Nyambi
4
Ko kumanenena, andengenu, na mu cirongithsa kare ku kwetu edi mu na roera ku yoya ci mu twethse ku roerithsa Nyambi. Ii, kwaa yuvahara ci dyodiyo mu na yoyo. Uno honi twaa mi romba no ku mi adikanena mu dithzina dya Fumu Yesu ci mu tware ku rupara ku piterera apo. 2 Namwe mu na dimuka eraerera eyi na tu mi pa kokoro wa Fumu Yesu.Kutunda ku thsivi thso ruthziho
3 Eshima ya Nyambi po ci nga mwikare anu owakenu, mu tunde ku thsivi thso ruthziho, 4 ci nga munu yomuhe ku kwenu a dimuke ku endithsa eramaa yenthzi no ku yoya ko kukena no ku ciremeka. 5 Ya mi endithsa ecikumbwethza yoimango eci mahedeni awa na kana ku dimuka Nyambi. 6 Mweyi enu eyi, katere o wipithsere muenthzoe nji ku mu pupirika, inene awa tenda kengeyo Fumu Yesu kenge a ku wa pa humbithso, eci diya na tu mana ku mi koñomeka no ku mi nomenithsa. 7 Nyambi kuma naa twithsi ci tu yoye ko kukena kadi ku yoya mwoyo o dithziro. 8 Mweyo, o ku kana eyi erongithsa ka a kanine munu, unone aa kana Nyambi oyu naa mi pa Mupepo wenthzi Oukenu.
Kucishima kwakwakutawa
9 Uno honi keyi yo ku cishima naenthzenu po ka tu roerire ku i mi ñorera, inene Nyambi naa mi rongithsa kare edi mu na roera ku cishima. 10 Dyo mu na tendanga naenthzenu o mu Masedonia yomuhe. Unone, andengenu, twaa mi adikanena ci kucishima kwenu ku piterere apo.
11 Mu mone ci mwaa yoya ko thsiyaro, munu no munu a dimuke yenthzi pohuma. Karo mu kwame ko moko enu ku ciyoyithsa eci diya na tu mi tongwera, 12 ci mu piwe direma kwanu awa a na kana ku tawa mukaci ko mikarero thzenu, ci katere mu kurupere enu yanu amweya.
Kukeya kwa Fumu
13 Andengenu, twaa fota ci mu dimukere nawa eyi ya ku tendahara kwafu,b ci mwekara mu mathsiwa eci edi a di amweya awa a na kana ku i kurupera. 14 Inene atwe twaa tawa ci Yesu wa fire no ku pinduka kwafu, mweyo, twaa tawa ci Yesu ou a ku ka huka, Nyambi kenge a ku ka huthsa nenthzi akwakutawa awa na fu.
15 Kokuthza ko maywi enthzi aye thsinda Fumu, twaa mi tongwera ci atwe twa ku yoya, atwe twa ku thsiarera shime ku ka kuma pa kukeya kwa Fumu, kadi cingwa yatwe twa ku tanga ku ka ciwana nenthzi ku thsia afu. 16 Inene Fumu aye thsinda kenge a ku keya ku tunderera ku wiru ko kakumbo ko ku raerera, ko diywi dyo mukuru o tungeru, no muvumo o torombita thza Nyambi. Awa fire o kwa na tawa kwa Krisitu wodiyo a kutanga ku pinduka kwafu. 17 Munyima thzeyo, atwe twa ku yoya mwethso thsikati, atwe twa ku thsiara pa kaye kenge twa ku humburiwa pofocino ku twariwa mu mavui ku ka ciwana na Fumu mu wiruwiru. Kenge twa ku kekara na Fumu diyere. 18 Mweyo, mu citanarithse micima kao maywi.