Kuciroithsera kukeya kwa Fumu
5
Uno honi, andengenu, ka tu roerire ci shime nga tu na mi ñorera keyi yekati no myaka edi ya ku tendahara. 2 Inene namwe mu na dimuka nawa ci diyuwa dya Fumu kenge dya ku keya eci mwithzi othsiku. 3 Popa a kuninga anu ci: “Pano honi ko thsi di thsiyaro, nenu i di nawa,” popo no dikarara podiyo dya ku wa wanena. Kenge ya kwikara eci kunyatithsa edi ku neyanga pa mbuyama oyu di poremu, kwithsa oyu wa ku para.4 Andengenu, uno honi amwe ka mu di mu mirema ci edyo Diyuwa dya Fumu dya ku mi wane ko thsiundumukera eci mwithzi. 5 Inene mwaheno mwana mwethzi, karo mwana mutenya. Kadi twana othsiku nji ana mirema. 6 Mweyo, ka tu roerire ku cipitura eci amweya awa di pa turo, uno honi tu kothsoroke no ku cihenga. 7 Inene awa a rara aa raranga othsiku, nakwakupenda warwa aa pendanga othsiku. 8 Uno honi atwe po twakwa mutenya twaa roera ku cihenga. Karo twaa roera ku vata thsitawo no thsishimo eci thsicandekithso thso pa mbando thza dishwarare, nokurupero wetu o kuyoyithsiwa wikare eci thsikoko.
9 Nyambi ka a tu hangwerire humbithso thzoanthzi wenthzi, unone aa tu hangwera ci twa ku yoyithsiwe, ko ku cikwathsithsa Fumu wetu Yesu Krisitu. 10 Aye kuma a tu fererire ci twa ku twethse ku yoya nenthzi diyere, ikare o ku tu yoya nji o ku tu na fu. 11 Mweyo, mu citanarithse micima oandu no ku cikwatithsa oandu eci edi mu na kwamanga.
Erongithsa yo mamaneneno no kuvumenena
12 Andengenu, twaa mi romba ku remeka awa na kwama nene mu kaci kenu, awa a na mi endithsa mweyi ya Fumu no ku mi rongithsa dikuñwa dyodiwa. 13 Mwaa roera ku wa remeka nene no ku wa monithsa thsishimo mukaci kekwama eyi a kwama. Karo mu yoye ko thsiyaro mu kaci kenu.
14 Andengenu, twaa mi romba karo ci mu kuturure awa a na cikarera kwithsa ku kwama no ku tanarithsa awa a na faratera. Mu kwathse awa di no thsitawo thsothsipu, karo mu kwate mucima kwanu wahe. 15 Mu mone ci ku kwenu katere ku waniwe munu o ku huthsera omango komango, uno honi mu citanarithse thsikati thsothsihe ku citenda nawa mu kaci kenu, karo mu i tende kwanu wahe.
16 Mu roere thsikati thsothsihe. 17 Karo mu rombere thsikati thsothsihe. 18 Mu kanderere mwinu yoihe, inene eyi po yeshima ya Nyambi ku kwenu amwe mu di mwa Krisitu Yesu.
19 Mwa kwangithsa Mupepo Oukenu ku kwama. 20 Karo mwa shomorora okethzi, 21 unone mu fotithsithse eyi a ambire. Mu hengeke yoiwa, 22 mu tunde kwinu yoimango yoihe.
Kuvumenena kwa Paulu ko mamaneneno
23 Nyambi oyu na tu panga thsiyaro a mi kenithse kwinu yoihe. Mupepo wenu ouhe no mwoyo nerama i hengekiwe nawa ko kupira kapongonyi, shime ku ka kuma pa kukeya kwa Fumu wetu Yesu Krisitu. 24 Inene oyu naa mithsi wa ku rurama, kenge mba a i tenda.
25 Andengenu, mu tu romberere natwe.
26 Mu civumenenange nawa ko thsitawo naenthzenu wahe akwakutawa.
27 Naa mi adikanena mu dithzina dya Fumu ci mu varere edi diñoro pa meho akwakutawa wahe.
28 Thsihemo thsa Fumu wetu Yesu Krisitu thsikare nenu.