Mukwakutawa a fote yo ku wiru
3
Pakuninga honi ci na mu pinduriwa na Krisitu, mu fote yo ku wiru oku a nekara Krisitu ku dyoko dyo rudyo dya Nyambi. 2 Mu pakere maano enu kwinu yo ku wiru, kadi kwinu yo mu kaye. 3 Inene na mu fu, karo myoyo thzenu thzi na horekiwa na Krisitu mwa Nyambi. 4 Ou a ku monahara Krisitu, aye mwoyo wenu, namwe kenge mwa ku monahara nenthzi mu kutethzima.Mwoyo o kare nou oupe
5 Mweyo, mwipae enu yo mu kaye eyi i di mu mwenu yo kupitura eci ruthziho, yo dithziro, mirembe, ecikumbwethza yoimango no rununa, ako ku rombera ekupuro. 6 Mukaci keyi, oanthzi wa Nyambi waa keya kwanu awa na kana ku mu yuvera. 7 Namwe shime mwaa tendanga eyi ou na mu yoyanga mwoyo o kaye. 8 Uno honi mwaa roera ku thsia ku tenda yoihe eyi: oanthzi, kuanthzipa, ñore, kwipithsa amweya mathzina, no maywi oamango ku tunda mu tunwa twenu. 9 Mwa ciangangera, inene na mu cishupura onu o kare nekwama yao. 10 Mu na cishupeka honi onu oupe ou u hemuniwa thsikati thsothsihe, ci mu twethse ku dimuka nawa Nyambi oyu wa miumbire no ku shimba thsikupuro thsenthzi. 11 Mweyo, kwithsa karo ci Munukenge nji ci Mujuda, nji ci o ku thza ku mukanda nji o kukana ku thza ku mukanda, akwa kuthsiarera, akwakukana ku cirongithsa, apika nji akwa ku rukuruka, unone Krisitu mu mwo a di, inene aa yoya mu mwo wahe.
12 Mwanua Nyambi awa a shima, owakenu awa naa cihangwera. Mweyo, mu cishupeke ñekeñeke, thsihemo, ku cihuthsa kushi, kuwamucima no kukwatamucima. 13 Mu cikunde oandu karo mu cikwatere oandu ngeci yumweya o di no kooko kwa yumweya. Mu kwatere amweya eci Fumu edi naa mi kwatera namwe. 14 Peuru thzeyo yoihe mu cishupeke thsishimo, inene thsishimo thsodiyo thsi nanga enu yoihe pofoci mu thsicikwato thso kwononoka.
15 Thsiyaro thsa Krisitu thsi endithse mu micima thzenu, inene ko kwikara epo yerama, Nyambi kuma a mithserire kwikara mu thsiyaro. Mu kanderere thsikati thsothsihe. 16 Maywi a Krisitu ekare mu mwenu ko kuyara, mu cirongithse oandu no ku cikuturura oandu konyanyami ouhe. Mwimbe masamu, membo, no membo o ku tunderera ku Mupepo wa Nyambi ko micima thzenu thzo ku yara okanderero. 17 Karo yoihe eyi mu tenda, ikare mu kuamba nji etenda, mu tende enu yoihe mu dithzina dya Fumu Yesu, o ku mu kanderera kenthzi kwa Nyambi Tata.
Eraerera ku myanda thzo Makrisitu
18 Ambuyama, mu cipake kushi thzanuwenu, inene yo i na roera kowa a di mwa Fumu.
19 Akwerume, mu shime anuwenu, mwekara no thsirara kukwo.
20 Anuke, mu yuvere ashemienu mwinu yoihe, inene eyi yaa roerithsa Fumu.
21 Ashemi, mwa anthzipithsa anenu ci katere a huke munyima.
22 Apika, mu yuvere añathsirenu o pano pa kaye mwinu yoihe. Kadi o kwa na mi tanekera pohuma ku wa nyanyukithsa, unone mu kwame kengeyo ko ku rurama ko ku yapa Fumu. 23 Yoihe eyi mu tenda, mu i tende ko mucima ouhe eci mwaa kwamena Fumu Yesu kadi anu. 24 Mu dimuke ci Fumu kenge a ku mi pa muyambo. Inene mwaa kwamena Fumu Krisitu. 25 Unone yomuhe o kwipithsa, kenge a ku huthseriwa kokuthza keyi yoimango eyi naa tende, mweyo, Nyambi ka a wana mavwevwe.