2
Naa fota ci mu dimuke edi ni mi vendanena amwe nakwa Laodisea, mofoci kengeyo nowa wahe awa a na kana ku ni dimuka ko thsihanga. 2 Naa fota ci a tanarithsiwe micima. Wahe a cikwate pofoci mu thsishimo, ci nga a dimuke shemwa ci aa yuvithsithsa diano dya Nyambi. Edi diano po Krisitu. 3 Mu mwenthzi modiyo ku na horekiwa rufumo roruhe ronyanyami nodimukero. 4 Naa mi tongwera eyi ci munu katere a ku miangere ko dikanyi dyenu yo mbango dyo ku kwama konyanyami. 5 Shaanga i ninge ci ka ni di nenu kerama, nenu ni di mu mupepo, karo ni na nyanyuka ku mona edi mu yoya omu mu na roera ku yoyera nedi thsi na tanara thsitawo thsenu kwa Krisitu.Kurukururiwa kupika no ku yoya mwa Krisitu
6 Mweyo, edi i di ci na mu tambura Krisitu Yesu kwikara Fumu wenu, mu twarerere ku yoya mu mwenthzi. 7 Mu shishe mithzithzi no ku umbera myoyo thzenu mu mwenthzi. Mu tanare mu thsitawo thsenu kokuthza komu na mu rongithsiwera, karo mwikare nokanderero oukuru.
8 Mu mamere ci munu a mi kweceka koshimodimukero no kwangera ko mbango, yo ku tunderera kwirongithsa yanu no kukoro o mipepo thzo kaye, yo kukana ku tunderera kwa Krisitu. 9 Inene mwa Krisitu modiyo a na yoyo Nyambi ko kuyara mwirama yonu. 10 Karo mwa Krisitu na mu kwanenena, aye mutwi o kutumina kokuhe neyi yoikoro yoihe.
11 Karo mu mwenthzi na mu thzi ku mukanda. Kadi mukanda o ku kwamiwa ko moko anu, unone mukanda wa Krisitu o Mupepo, ou u na rukurura anu kukoro werama yo thsivi. 12 Inene kuma mwa vumbekiwire na Krisitu ou mwa korovethziwire no ku pinduriwa kwafu nenthzi ko ku tawa kwenu okoro wa Nyambi, oyu wa mu pindurire kwafu.
13 Mwa fire mukaci kevi yenu no kuninga ci onu wenu o thsivi o ku u shime ku tetiwako. Nyambi honi naa mi huthsera mu mwoyo pofoci na Krisitu pakuninga ci naa tu tetera evi yetu yoihe. 14 Naa vundurura diñoro dyo mirandu thzetu edi na di twanga mukaci ko ku kwanga ku hengeka mirao. Naa pwithsa okoro wadyo ko ku di pamarera pa mbinda. 15 Krisitu wa pwithsire okoro wakwakutumina neyi yoikoro. Naa wa fithsa honyi pa mwanjanja ko ku wa othza ko ku fa kwenthzi pa mbinda.
16 Mweyo, munu a mi shomorora keyi yedya nji yenwa, nji yo thsidika, nji yo thsidika thso ku terama ko ngonda, nji yo diyuwa dyo Savata. 17 Eyo po nedi muthzimbimbi pohuma weyi ya tatereriwire, ayo shemwa po yaa waniwa mwa Krisitu. 18 Mwa tawethza ku mi shomorora munu yomuhe oyu cimonaharithsa thsinda ci aa cihuthsa kushi nji o ku rombera tungeru, oyu tongonona kothzungi yemona eyi naa mono. Maano enthzi o thsivi aa mu retera mununa. 19 Karo munu o kengeyo ka a cinungire kwa Krisitu aye mutwi werama. Inene Krisitu aa korera erama yoihe karo yaa nunganungiwa pofoci ko manunga no mithsipa, no ku kura kokuthza komu a na shimena Nyambi.
Mwoyo oupe mwa Krisitu
20 Na mu fu na Krisitu, no ku rukururiwa kukoro o mipepo thzo kaye. Ine honi eyi mu yoyera eci shimbi mwekarera mu kaye, ine eyi mu shupwerera mirao thzo kenge ci, 21 “Wa shimba ethsi, wa ereka ku dya ethso, wa kwata thsiya?” 22 Ethzo po mirao pohuma thzerongithsa yanu yenu yo ku twethsa kwipa o ku i kwamithsiwa. 23 Ethzi mirao thzaa monahara eci thza maano, ko thsitawo thso ku cikwamena no ku cihuthsa kushi no ku nyandithsa erama. Unone tumba thzi kwathsa thsimweya mu kukanithsa ecikumbwethza yerama.