4
Mweyo, aenthzange awa na shima no ku rura, yamwe mwa thsinyanyu thsange no mushukwe wange, mu tanare mwa Fumu, ashimiwa ange.Maywi otanarithso
2 Ewodia na Sintike naa mi adikanena mu ciyuve mwa Fumu. 3 Nowe o muenthzange o shemwa owe na kwamanga nange, naa ku romba ci o kwathse awo ambuyama. Inene na ni kwathsa nene mu ku rongithsa Muthzimbu Ouwa wa Nyambi, mofoci kengeyo na Kilementi namweya wahe akwakukwama aenthzange, awa a na ñoriwa mathzina o mu vuka thzo mwoyo.
4 Mu roere thsikati thsothsihe mwa Fumu. Naa hukera karo ku amba ci mu roere! 5 Mu monithse kuwamucima kwenu kwanu wahe. Inene Fumu pepi a di no ku keya.
6 Mwa cithzekera thsimweya, unone mwinu yoihe mu rombere no ku romba kokanderero ci eyi mu fota i dimukiwe kwa Nyambi. 7 Thsiyaro thsa Nyambi ethsi thsi na piterera kuyuvithsithsa kokuhe, kenge thsa ku nyunga micima no maano enu mwa Krisitu Yesu.
8 Ko ku manenena, andengenu, mu pakere maano kwinu yoshemwa, yo ku remekiwa, yo kuoroka, yoikenu, yo ku roerithsa, yo ku shangariwa, yoiwa nene, neyi yo ku roera ku shangariwa. 9 Mu ereke ku tenda enu yoihe eyi na mu cirongithsa no ku i tambura ku kwange, neyi na mu yuvu ku kwange no ku mona o ku ni i tenda. Apo honi Nyambi o thsiyaro kenge a kwikara nenu.
Paulu aa kanderera ekunda yAkwaFilipi
10 Na roerire nene mwa Fumu ci munyima thzo kwikara thsikati thsothsire kwithsa ku ni kwathsa, na mu anekera ku ni kwathsa karo. Kadi cingwa kuma mwa ni vuramine, unone ka mwa wanine thsikati nawa thso ku i tenda. 11 Kadi cingwa ko i di eyi ni na piri ngeyi ni ambera kengeyo, unone na ni cirongithsa ku rakwa mwinu yoihe omu ni di. 12 Ame ni na dimuka kupira edi kwekara, no kwikara nenu yoingi edi kwekara. Na ni cirongithsa dyo ku yoya mwinu yoihe, ikare mu kwikuta nji mu nthzara, kwikara nenu yoingi nji mu kupira. 13 Naa twethsa ku tenda enu yoihe ka Krisitu oyu na ni tanarithsa. 14 Shaanga kengeyo, na mu tende nawa ku ni kwathsa mwikarupa eyi ni di nayo.
15 Karo amwe mwakwa Filipi mu na dimuka ci uya na tangire ku mi retera Muthzimbu Ouwa, ou na tundire mu Masedonia kwithsa kereke thzimweya ethzi thza cierire nange mu kupa no mu kutambura shime thzenu pohuma. 16 Mane shaanga uya nekarire mu Tesalonika shime mwaa ni tumithsera ekwathsa rorungi. 17 Kadi cingwa naa fota ci ni wane epa ku kwenu ngeyi ni ambera kengeyo, unone naa fota ci amwe mwathsinda mwa ku wane muyambo wenu.
18 Pano honi na ni wana yoingi eyi ni na foto yoihe mane ku piterera. I na ni kwana epa eyi na a ni retera Epafirodite eyi na mu ni tumithsera. I nekara eci munuko ouwa o thsiyambero ethsi thsi na tamburiwa kwa Nyambi no ku mu roerithsa. 19 Nyambi wange kenge a ku mi pa eyi mu na piri yoihe ko rufumo rwenthzi ro kutethzima mwa Krisitu Yesu.
20 Kutethzima kwikare kwa Nyambi Tata wetu diyere na diyere. Ameni.
Kuvumenena ko mamaneneno
21 Mu ni vumenenene anua Nyambi wahe awa di kwa Krisitu Yesu. Aenthzange awa di nange aa mi vumenena. 22 Nanua Nyambi wahe awa a di kuno aa mi vumenena nawo, thsikurupo o mu mwanda wa Sesare.
23 Thsihemo thsa Fumu Yesu Krisitu thsikare no mupepo wenu.