Owawa ko thsitawo kwa Krisitu
3
Ko ku manenena, andengenu, mu roere mwa Fumu. Kwithsa okaru ku kwange ku hukera ku mi ñorera enu yofoci, inene yaa mi nyunga.2 Mu cinyunge kwethzo mbwa, awo anu wetenda yoimango, awa ootera ku amba ci mu thze ku mukanda ci mu yoyithsiwe. 3 Yatwe twakwa mukanda o shemwa kadi awo, inene atwe po twaa rombera Nyambi ko Mupepo wenthzi. Twaa cishangara mwa Krisitu Yesu, ka tu kuruperire enu yo ku kwama munu. 4 Name ni di neyi nga ni kuruperera ekwama yange. Ngeci kwaa di munu oyu anekera ci o di neyi yoingi yo ku kurupera ekwama yenthzi, ame naa mu pita nene.
5 Kuma na twariwire ku mukanda o ku ni di no mayuwa mutanu na ahatu ku tunda pa ku shamurukiwa. Name no mwanahoka wa Isiraele o mu mukuta wa Benjamini, no Muheveru shemwa o kuyara. Keyi yo ku hengeka murao o Thsijuda nekarire Mufarithsi. 6 Na shimine nene ku nyandithsa kereke, keyi yo ku fota kwikara omuwawa ko ku hengeka murao, nekarire o kupira kapongonyi.
7 Uno honi enu eyi na shimbire ci ikuru mu thsivaka, pano naa i mona ci ka i kwathsire thsimweya mukaci ko ku dimuka Krisitu. 8 Yoshemwa, naa shimba ci enu yoihe ka i kwathsire thsimweya ku kwange mukaci kodimukero oukuru mu thsivaka o ku dimuka Krisitu Yesu Fumu wange. Mukaci kenthzi na ni tundu kwinu yoihe no ku i shimba ci imango ci nga ni wane Krisitu, 9 no kwikara mu mwenthzi. Ka ni cishimbire honi ci no muwawa ko ku hengeka murao, unone ko thsitawo kwa Krisitu, owawa o ku piwa kwa Nyambi ko thsitawo. 10 Naa fota ci ni dimuke Krisitu, nokoro o kupinduka kwenthzi kwafu. Naa fota ku nyanda nenthzi no kwikara eci aye mu kufa kwenthzi. 11 Kokurupero o kuninga ci name kenge na ku pinduriwa kwafu.
Kucirera ku mamaneneno
12 Ka ni ningire ci na ni kumu ku mamaneneno, nji ci no mukwa kwononoka, dyombo! Unone naa twara ku rupara ci ni wane muyambo ou naa nithsera Krisitu Yesu. 13 Andengenu, ame ka ni anekerire ci ou muyambo na ni u wana. Uno honi ethsi ni tenda po ethsi, naa thsia yo ku manyima no ku pakera maano yo ku rupara. 14 Naa twara ku rupara ku kuma ku mamaneneno ci na ku wane muyambo o ku wiru ou naa nithsera Nyambi mwa Krisitu Yesu.
15 Twahe atwe tu na kuru mu Mupepo kweyi enu twaa roera ku anekera kengeyo. Karo ngeci kwa di awa a na anekerera mwamo ku kwenu, Nyambi kenge a ku i mi hokwera nawanawa.
16 Shaanga kengeyo, twaa roera ku twarerera ku enda mu dikuñwa omu na tu ende shime ku na kuma rerodino.
17 Andengenu, mu ni temunune, karo mu cirongithse kowa a shupwera dikuñwa dyodiwa edi na tu mi monithsa. 18 Na ni mi tongwera kare rorungi, pano naa hukera karo ku mi tongwera o ku ni hoyithsa mihothzi ci awa anu aa yoya eci akwethzimbo yo mbinda thza Krisitu. 19 Mamaneneno o po ku nongithsiwa, inene dira yo nyambi wo. Karo aa cishangara kenu yo ku fithsa honyi no ku anekera pohuma yo muno mu kaye. 20 Uno honi atwe ku diumbo po ku wiru, oku tu na taterera Muyoyithsi ku tundererako, aye Fumu wetu Yesu Krisitu. 21 Kenge a ku pirura erama yetu yo ku faratera ku i paka mu kutethzima eci edi i di erama yenthzi, kokoro ou u mu twethsithsa ku reta enu yoihe mushi thzoendithsi wenthzi.