Kurukuruka mwa Krisitu
5
Krisitu na a tu rukurura ci twikare o kurukuruka shemwa. Mweyo, mu tanare karo mwa tawa ci mu hukere kwangiwa kupika o murao karo.2 Mu teerere! Ame no Paulu naa mi ambera ci ngeci mwaa tawa yo mukanda, apo honi Krisitu ka a kwathsire thsimweya ku kwenu. 3 Naa hukera karo ku amba ci munu yomuhe o ku tambura mukanda nangiwa ku shupwera murao wa Mushe ouhe. 4 Amwe mu fota ku citenda mwathsinda owawawa pa meho a Nyambi ko ku shupwera murao wa Mushe, mu na tetiwa kwa Krisitu. Mu na tundu ku thsihemo thsa Nyambi. 5 Inene ko Mupepo, twaa taterera nene ko thsitawo okurupero o ku ninga ci Nyambi kenge a ku tu tenda owawawa. 6 Inene mwa Krisitu Yesu, ku thza ku mukanda nji kukana ku thza ku mukanda ka i kwathsire thsimweya. Thsothsikuru mu thsivaka po kwikara no thsitawo ethsi thsi kwama ko thsishimo.
7 Shime mwaa tateka nawa. Edye oyu na a mi kwangithsa ku shupwera oshemwa? 8 Kadi cingwa Nyambi oyu na a mithsi, oyu na a mi tende kengeyo. 9 “Mamene oapu aa tundurukithsa dikende dyodihe.” 10 Naa kurupera shemwa mwa Fumu ci ka mwa ku tawa yayo. Oyu mi pambanithsa, ikare edye nji edye, Nyambi kenge a ku mu ratura. 11 Andengenu, ngeci ame ko ku honga ni honga yo mukanda ne, ine honi eyi ni nyandithsiwera? Nga dyo i di kengeyo po mbinda nga ka thzipithserire munu. 12 Naa cikumbwethza ci awo anu a reta mikwangarakanyi mu kaci kenu nga aa cifaura athsinda.
13 Eciko amwe, andengenu, kuma mwethsiwire ci mwikare o kurukuruka. Uno honi mwa cikwathsithsa oko kurukuruka kwenu kwingena mwicikumbwethza yerama, unone mu cikwamene oandu mu thsishimo. 14 Inene murao ouhe u na cipundeka mu thsiraerera thsofoci thso ku amba ci: “O shime muenthzoe eci edi wa cishima othsinda.” 15 Uno honi ngeci mwaa cihumaura no ku cipapaura eci ekondwama, mu mamere ci kenge mwa ku cithzirithsa mwathsinda.
Mu endithsiwe ku Mupepo
16 Mweyo, naa amba ci, mu thsie Mupepo u endithse myoyo thzenu. Apo honi ka mu tendanga ayo ecikumbwethza yerama. 17 Inene ecikumbwethza yerama yaa rwithsa yo Mupepo, karo yo Mupepo yaa rwithsa yerama. Eyo idi yaa cirwithsa ci mu kwange ku tenda eyi mu na foto ku tenda. 18 Unone ngeci mwaa endithsiwa ku Mupepo, ka mu di mushi thzo murao.
19 Ekwama yerama i na dimukiwa: ruthziho, yodithziro, ongurunde, 20 ku rombera ekupuro, orothzi, ethzimbo, dikanyi, mbamba, oanthzi nene, oñondi, mikwangarakanyi, kucitepatepa, 21 thsipururu, otakwa, mashambirera o kaye, nevi imweya yo ku cipitura eci eyi. Naa mi nomenithsa eci diya na ni mi nomenithsa pa kutanga ci yomuhe oyu na yoyo mwoyo o kengeyo ka a ku tambura Kutumina kwa Nyambi.
22 Uno honi thsima thso Mupepo po: thsishimo, thsinyanyu, thsiyaro, kukwatamucima, thsihemo, owa, orurami, 23 kuwamucima, kucinyunga. Kwithsa murao ou u na kanithsa eyo. 24 Awa a di kwa Krisitu Yesu nepaa ecikumbwethza nefota yerama. 25 Ngeci twaa yoya ko Mupepo, tu twarererenu ku enda ko Mupepo. 26 Twa cinuneka, nji ku cianthzipithsa mu kaci ketu, nji ku citendera thsipururu.