4
Eyi ni amba po eyi, shwana o ku di wanuke aa cishoka no mupika, shaanga ikare ci enu yoihe yenthzi. 2 Uno honi o ku di wanuke, mushi thzowa a na mu nyungu nowa a na mu monena yenthzi a di shime ku ka kuma mu thsikati ethsi a hangurire Tata wenthzi. 3 Mofoci, natwe ou twekarire wanuke kuma twa pikuriwire kukoro o mipepo thzo kaye.4 Uno honi thsikati ethsi thsi na roera ou thsa kumine, Nyambi wa tumine Mwane, oyu werekiwire kwa mbuyama no ku yoya mushi thzo murao. 5 Nyambi wa mu tumine ku na patura awa ekarire mushi thzo murao o Thsijuda, ci nga twañuriwe kwikara ana Nyambi. 6 Mukaci ko kwikara anenthzi, Nyambi naa tu tumena Mupepo wa Mwane mu micima thzetu, ou u kumba ci: “Aba, Tata!” 7 Mweyo, ko di honi mupika, unone o mwane, karo pakuninga ci o mwane, Nyambi na a ku tende shwana.
Paulu yaa mu korithsa ku mucima yAkwaGalatia
8 Kare o ku mu shime ku dimuka Nyambi, mwa pikuriwire kwinu eyi i di ci kadi anyambi shemwa. 9 Uno honi na mu dimuka Nyambi, nji ni ambe ci uno naa mi dimuka Nyambi ne, ine honi eyi mu hukera kweyi yo ku faratera karo i shikwathsa thsimweya yokoro o mipepo thzo kaye? Ine eyi mu fotera kwikara apika ku kwayo karo? 10 Mwaa mamera yo mayuwa, yo maonda, yekati neyi yo myaka. 11 Naa yapa keyi yenu, ci ngwa ekwama eyi na ni kwama mu mwenu ya kenge.
12 Andengenu, naa mi adikanena, mwikare eci ame, inene name ni nekara eci amwe. Kwithsa ethsi na mu nipithsera. 13 Mu na dimuka ci uya na mi hongire Muthzimbu Ouwa pa kutanga po nedi mukaci kekora yerama. 14 Shaanga ci ekora yange yerama yekarire iereka ku kwenu, ka mwa ni nyengwire nji ku ni kana, unone mwa ni tamburire eci kangeru ka Nyambi, nji eci no Krisitu Yesu. 15 Thsiya thsinyanyu thsenu ne kupi thsi di honi? Naa twethsa ku pa ombangi ci nga kuma ya tawire, nga mwa thzongorire meho enu no ku a ni pa. 16 Ene ni nekara honi mukwathsithzimbo thsenu pa ku mi tongwera oshemwa nji?
17 Awo anu amweya aa mi monithsa thsihemo ci nga mu shime awo, unone eanekera yo kadi iwa. Eyi a fota pohuma awo po ku mi pandura ku kwange ci mu were kukwo. 18 Ngeci munu aa takamithsa ku tenda enu yoiwa, eyo po i di nawa, unone aa roera ku tendanga kengeyo thsikati thsothsihe, kadi o ku ni di pohuma nenu.
19 Anange awa na shima, naa yuva karo ku kora mukaci kenu eci mbuyama oyu nyatithsa, karo kenge ya kwikara kengeyo shime ku ka kuma apa mwa kwikarera eci Krisitu ko kuyara. 20 Kadi edi ni na cikumbwethza ci nga ni di nenu pano no ku cinja diywi dyange, inene ni na karupera nene mukaci kenu.
Hagare na Sara
21 Mu ni tongwere amwe mu fota kwikara mushi thzo murao, ene ka mu yuvithsithsire eyi u na amba murao nji? 22 Inene ku na ñoriwa ci Aburahama wekarire nana aidi wakwerume, yumweya kwa mbuyama o mupika, yumweya kwa mbuyama o kurukuruka. 23 Uno honi mwane koya mbuyama o mupika werekiwire kekwama yerama, koya o kurukuruka aye werekiwire ko thsikumbwethzo.
24 Eyi kenge nga tu i shimba ci yaemanena enu. Awa ambuyama po eyuvano idi. Hagare aemanena thsiyuvano thso pa Mukinya wa Sinai. Ethso thsiyuvano thsaereka ana wapika. 25 Hagare aemanena Mukinya wa Sinai mu Arabia, karo a enderera no thsikuña thsa Yerusalema o rerodino, inene mupika a di nanenthzi. 26 Uno honi Yerusalema o ku wiru po wa kurukuruka, karo yodiyo mama wetu. 27 Inene ku na ñoriwa ci:
“O roere owe o mbuyama o mvumi,
owe wa kana kwereka mwana!
O humwerere no ku kumba ko thsinyanyu,
owe wa kana ku nyatithsa.
Inene mbuyama oyu wa kaniwire o di nana owangi honi,
kupita mbuyama oyu di na munuwenthzi.”
28 Andengenu, amwe honi po mwana o thsikumbwethzo eci edi ekarire Isaka. 29 Uno honi kethsiya thsikati, mwana oyu werekiwire kekwama yerama wa nyandithsire oyu werekiwire kokoro o Mupepo. Dyo i di no rero. 30 Uno honi Mañoro ne aa amba ine? Aa amba ci: “O cithze mbuyama o mupika na mwane, inene mwana mupika mbera ka a shwana na mwana o mbuyama o kurukuruka.” 31 Mweyo, andengenu, kadi twana mbuyama o mupika, unone twana mbuyama o kurukuruka.