Edya yo ku tupwera ekupuro
8
Honi keyi yo ngudi thzenu thzedya yo ku tupwera ekupuro, tu na dimuka ci twaheno tu di nodimukero. Uno honi ou odimukero waa tu retera ci tu ciyuve ci twa kuru mu thsivaka, unone thsishimo athso thsaa tu umba. 2 Yomuhe oyu na anekera ci ko i di eyi a na dimuka, shime ku dimuka omu a na roera ku dimukera. 3 Uno honi munu oyu na shimi Nyambi yodiyo a na dimuka Nyambi.4 Mweyo, keyi yo ku dya edya yo ku tupwera ekupuro, tu na dimuka ci “Thsikupuro ka thsimanenine thsinu ethsi thsekarako, karo tu na dimuka ci ku di Nyambi yofoci pohuma.” 5 Inene shaanga ci ko i di eyi i nethsiwa anyambi mu wiru nji pano pa kaye, karo yoshemwa kwa di anyambi no mafumu oangi, 6 uno honi atwe tu na dimuka ci kwaa di Nyambi yofoci pohuma, aye Tata wetu, oku ya tundererire enu yoihe, karo yodiyo tu na yoyera. Karo kwaa di pohuma Fumu yofoci, aye Yesu Krisitu, aye kenthzi Nyambi wa kwamine enu yoihe, karo kenthzi aye na tu piwa mwoyo.
7 Uno honi kadi cingwa munu no munu na dimuka kengeyo. Anu amweya shimbi a eirerera ekupuro kuninga ci mane yoihe a dya edya yo ku tupwera ekupuro, aa i shimba eci ya ku tupwera nyambi shemwa, karo pakuninga ci mumoneno wo wa ku faratera, wa epithsiwa. 8 Edya tumba i tu reta po pepi na Nyambi, tumba tu yawa thsimweya ngeci ka tu dire, karo kwithsa ethsi nga tu wana shaanga yatwe tu dya.
9 Uno honi mu mamere ci oko kurukuruka kwenu kwekara thsikuñu kowa na faratera. 10 Inene ngeci oyu di no mumoneno o ku faratera, aa mona owe na dimuka nawa o ku dyera mu tembere thzo thsikupuro, ene nga ka i retera oyu di no mumoneno o ku faratera ci a dye edya yo ku tupwera ekupuro? 11 Mweyo, mukwakutawa o ku faratera oyu a fererire Krisitu kenge a kwipithsiwa mukaci kodimukero woe. 12 Mweyo, yoihe mwipithsera akwakutawa amweya no ku kurura mumoneno wo o ku faratera, mwa epithsera Krisitu. 13 Mweyo, ngeci ethsi ni dya thsaekara thsikuñu kwa muenthzange, mbera ka ni di karo nyama, ci katere ya kwikare thsiparaka ku kwenthzi.