Ngudi keyi yo maruo
7
Pano honi tu kenge eamba eyi na mu ni ñorera ci: “Ku di nawa ci mukwerume a rara no mbuyama.” 2 Uno honi mukaci ko ruthziho ku di nawa ci mukwerume yomuhe ekare no munuwenthzi, karo mbuyama yomuhe ekare no munuwenthzi.3 Mukwerume aa roera ku tenda ekwama yenthzi yo maruo kwa munuwenthzi, no mbuyama naye a tende kengeyo kwa munuwenthzi. 4 Mbuyama ka a di nokoro perama yenthzi, unone munuwenthzi yo di nokoro. Mofoci, no mukwerume naye ka a di nokoro peuru thzerama yenthzi, unone munuwenthzi.
5 Mwa cikanena shime o ku mu na ciyuvu ku tenda kengeyo ci mu rombere. Munyima thzeyo, mu ciwane ku yapithsa Satana ci katere a mi tumaure mukaci ko kukana ku twethsa kwenu ku cihenga. 6 Ethsi naa thsi amba ko ku tawethza ci kwikare kengeyo, kadi ko thsiraerera. 7 Naa cikumbwethza ci anu wahe nga aekara eci ame. Uno honi munu no munu o di no thsipa thsenthzi ethsi a mu pire Nyambi, yo ku cithsiathsia.
8 Pano honi naa amba kwathzike no mafakathzi, ku di nawa kwikarerera mu uthzike eci ame. 9 Mweyo, ngeci ka twethsa ku cihenga a yeke nji ku yekiwa, inene ku di nawa ku yeka kupita ku cipaithsa ku cikumbwethza. 10 Kwaka ku yeka naa mi raerera (ka di ame, unone Fumu) ci: mbuyama oyu na yekiwa a kana munuwenthzi. 11 Unone ngeci ayepo kana munuwenthzi, ekare kengeyo kwithsa ku yekiwa, shime ngeci aa cihuthsa na munuwenthzi. Karo naye mukwerume a rukurura munuwenthzi.
12 Ku kwenu mwamweya mwahe naa amba (ame, kadi Fumu) ci, ngeci mukwerume o ku tawa o di no munuwenthzi o kukana ku tawa, karo aye munuwenthzi aa shima kwikara na munuwenthzi, a mu kana oyo mbuyama. 13 Karo ngeci mukwakutawa o mbuyama aa yekiwa ku mukwerume o kukana ku tawa, karo aye aa shima kwikara nenthzi, a mu kana oyo mukwerume. 14 Inene mukwerume o kukana ku tawa aa tendiwa o mukenu mukaci ka munuwenthzi o mukwakutawa, no mbuyama o kukana ku tawa aa tendiwa o mukenu mukaci ka munuwenthzi o mukwakutawa. Ngeci kadi kengeyo anenu kenge a kwikara o kukana kukena, uno honi eci edi i di po akenu.
15 Shaanga kengeyo, ngeci mukwerume nji mbuyama o kukana ku tawa aa fota ku kana munuwenthzi o ku tawa, a tende omu a na anekerera aye thsinda. Mwinu yo kengeyo, mukwakutawa o mukwerume nji o mbuyama ka angiwire. Nyambi naa mithsa ku yoya ko thsiyaro. 16 Inene waa dimuka ngepi, owe o mbuyama, ci kenge wa ku yoyithsa munuwoe? Karo owe o mukwerume ne waa dimuka, ci kenge wa ku yoyithsa munuwoe?
Mu yoye komu a na fotera Nyambi
17 Munu no munu a yoye eci edi a mu pire Fumu ko ku ninga eci edi ekarire ou a mwithsire Nyambi. Ngeyi ni na rongithsa mu makereke oahe. 18 Ngeci munu kuma ethsiwire o ku wa thza ku mukanda, a tundithsa edimukithso yo mukanda. Ngeci munu kuma ethsiwire o ku wa kana ku thza ku mukanda, a thza ku mukanda. 19 Inene ku thza nji kukana ku thza ku mukanda ka i kwathsire thsimweya. Eyi i na fotahara po ku hengeka eraerera ya Nyambi.
20 Munu yomuhe ekarerere eci edi ekarire ou a mwithsire Nyambi. 21 Ene kuma wekarire mupika ou a kwithsire Nyambi nji? Eyo wa i cithzekera. Unone ngeci waa twethsa ku paturiwa o tende kengeyo. 22 Mweyo o vuruke ci ngeci wekarire o mupika ou a kwithsire Fumu, pano honi o mukwa ku rukuruka mwa Fumu. Karo ngeci kuma wekarire o kurukuruka ou a kwithsire Fumu, pano honi o mupika Krisitu. 23 Kuma mwa uriwire ko muuro oukuru, mweyo, mwa piruka apika anu. 24 Andengenu, munu no munu ekarerere na Nyambi eci edi ekarire ou ethsiwire.
Athzike no mafakathzi
25 Keyi yambanda awa shime ku yekiwa, kwithsa thsiraerera ku tunderera kwa Fumu, unone naa mi ambera eanekera yange ko kwikara oyu nga kuruperiwa ko ñeke thza Fumu. 26 Mukaci ko dikarara dyo thsino thsikati, naa mona ci ku di nawa munu ci ekarerere dyodi a di. 27 Ngeci o di no mbuyama, wa anekera ku mu kana. Karo ngeci ko di no mbuyama wa anekera ku yeka. 28 Uno honi ngeci waa yeka, ko tendire thsivi. Karo ngeci mumbanda aa yekiwa ka a tendire thsivi. Unone awa yeka kenge a ku wana okaru mo uno mwoyo, mweyo, naa fota ku mi amwena kweyi.
29 Andengenu, eyi ni i ambera eyi po thsikati ethsi thsi na thsiarako thsipu. Uno honi awa di nambuyama a yoye eci anu o kukana ku yeka. 30 Awa dira ekare eci ka di pa thsidiro. Awa a na nyanyuka ekare eci anu awa a na kana ku nyanyuka. Oyu ura ekare eci kwithsa ethsi a na uru, 31 awa cikwathsithsa enu yo kaye, ekare eci kwithsa ethsi a di nathso. Inene kano kaye ko rerodino kenge ka ku pwa.
32 Naa fota ci mu rukuruke kwicithzekera yo uno mwoyo. Mukwerume o kukana ku yeka wa ku mamera ekwama ya Fumu no ku anekera dyo ku mu roerithsa. 33 Uno honi o ku yeka wa ku anekera enu yo kaye nedi nga a roerithsa munuwenthzi. 34 Eshima yenthzi i na tepiwa. Mweyo mbuyama o kukana ku yekiwa nji mumbanda aa twethsa ku pakera maano ya Fumu ci ekare o mukenu mwirama yenthzi no mu mupepo. Uno honi mbuyama o ku yekiwa wa ku anekera enu yo kaye nedi nga a roerithsa munuwenthzi. 35 Eyi naa i amba ci ni mi kwathse. Ka ni erekire ku mi kanithsa, unone naa fota pohuma ci mu kwame ethsi thsi na roera ku kwamiwa ci mwa kwamena Fumu ko micima thzidi.
36 Ngeci mukwerume aa mona ci ka a kwamine nawa kwa diungu wenthzi, ecikumbwethza yenthzi ikuru nene karo aa ciyuva ci aa roera ku yeka, mu mu thsie a mu yeke omu a na fotera aye. Apo honi ka a tendire thsivi. 37 Uno honi yomuhe o ku tanarithsa mu mucima wenthzi ku cihangwera kukana ku yeka, karo kwithsa ethsi thsi na mu ootera ku tenda kengeyo, unone aa endithsa eshima yenthzi shemwa yo mu mucima wenthzi, apo aa tenda nawa kukana ku yeka diungu wenthzi. 38 Uno honi mukwerume o ku yeka diungu wenthzi aa kwama nawa, karo o kukana ku yeka diungu wenthzi aa kwama nawa ku piterera.
39 Mbuyama o ku yekiwa nangiwa ko murao kwa munuwenthzi o ku shime ku yoya. Uno honi o ku na fu, o na rukuruka no ku twethsa ku yekiwa kwa mukwerume wao oyu a na foto, uno honi aa roera kwikara mukwerume oyu na shimi Fumu. 40 Mwianekera yange, naa mona ci kenge a kwikara no thsihuno ci ekarerere ko kukana ku yekiwa. Naa anekera ci ni di no Mupepo wa Nyambi uno ni amba eyi.