10
Andengenu, eshima yo mucima wange no thsirombero thsange kwa Nyambi po ci aenthzange Maisiraele nga yoyithsiwe. 2 Naa pa ombangi ci aa shima nene Nyambi, uno honi oko ku shima nene kwo ka ku nungiwire podimukero o shemwa. 3 Inene ka na yuvithsithsa omu a tendera Nyambi anu kwikara owawawa. Awo ko ku fota dikuñwa dyo athsinda, ka cihuthsire kushi thzowawa wa Nyambi. 4 Inene Krisitu yodiyo ohura weanekera yo murao wa Mushe eyi wa piwerire. Mweyo, yomuhe o ku tawa ku kwenthzi, aa tendiwa omuwawa pa meho a Nyambi.Kuyoyithsiwa po kwanu wahe
5 Inene Mushe wa ñorire kenge keyi yowawa o ku tunderera ku ku shupwera Murao ci: “Munu o ku tenda eyi u amba Murao, kenge a ku yoya kayo.” 6 Uno honi owawa ko thsitawo waa amba ci: “Wa amba mu mucima woe ci: ‘Edye oyu wa ku thzina mu wiru?’” (ci a ka rete Krisitu pa kaye), 7 “inji ci: ‘Edye oyu wa ku thza kushi thzo kaye?’ ” (ci a ka pindure Krisitu kwafu). 8 Unone waa amba ine? Eyi u na amba po eyi, “Diywi dya Nyambi pepi di di nenu, mu kanwa koe di di no mu mucima woe,” adyo diywi dyo thsitawo edi tu honga. 9 Inene ngeci owepo citawera ko kanwa koe ci Yesu po Fumu, no ku tawa mu mucima woe ci Nyambi wa mu pindurire kwafu, kenge wa ku yoyithsiwa. 10 Inene ko mucima munu aa tawa no ku tendiwa omuwawa, karo ko kanwa munu aa citawera no ku yoyithsiwa. 11 Eci edi amba Mañoro ci: “Yomuhe o ku tawa ku kwenthzi ka a ku fithsiwa honyi.” 12 Inene kwithsa thsiano mu kaci ko Majuda nAnukenge, waheno Fumu wo yofoci, oyu na panga thsiyauthzi wahe awa na mu rombanga. 13 Eci edi ku na ñoriwa ci: “Munu yomuhe oyu wa kwithsa pa dithzina dya Fumu kenge a ku yoyithsiwa.”
14 Uno honi, ngepi nga a rombera koyu a na kana ku tawa? Karo ngepi nga a tawa koyu a na kana ku yuva yenthzi? Karo ngepi nga a yuva yenthzi ngeci kwithsa oyu na wa hongo. 15 Karo ngepi edi nga a honga munu ngeci ka a tumiwire? Eci edi ku na ñoriwa ci: “Kadi owa noko edyato eyi i reta Muthzimbu Ouwa.”a
16 Uno honi kadi cingwa anu wahe a na tawa Muthzimbu Ouwa. Inene Mukwakukethza Isaya wa ambire ci: “Fumu, edye oyu naa tawa muthzimbu wetu?” 17 Mweyo, thsitawo thsaa keya ko ku yuva, ako ku yuva Muthzimbu Ouwa keyi ya Krisitu. 18 Uno honi naepura ci: “Ene ka na yuvu ya Krisitu nji? Dyombo, yoshemwa na yuvu, inene ku na ñoriwa ci:
“Muvumo o diywi dyo na u thzi ñua mu kaye kokahe,
mane maywi o na a ka kuma ku hura thzo kaye.”
19 Karo naepura ci: “Ene Maisiraele ne ka yuvithsithsire nji?” Thso kutanga, Mushe aa amba ci:
“Kenge na ku mi tendithsa mbamba kanu awa a di ci kadi ditunga.
Kenge na ku mi anthzipithsa kanu watomba.”
20 Karo Isaya wa ambire kondume ou a ambire ci:
“Na ni waniwa kowa na kana ku ni fotafota,
Na ni cihokora kowa na kana ku nipaura.”
21 Unone keyi ya Isiraele a amba ci:
“Na ni orora moko ange diyuwa mutumbi,
kwanu o kukana kuyuvera, awa na ni pirukera.”