Mathsiarethzi a Isiraele
11
Uno honi nipure ci: Ene Nyambi ne naa kana anuenthzi nji? Dyombo! Ame po no Muisiraele shemwa, mwanahoka wa Aburahama, ku tunderera ku mukuta wa Benjamini.2 Nyambi ka naa kana anuenthzi, awa a hangurire cimo ku tunda ku matatekero. Ene ka mu dimukire eyi a amba Mañoro keyi ya Eliya ou a dirererire kwa Nyambi Maisiraele ci: 3 “Fumu, nepaa akwakukethza oe no ku umburura tutara toe. Yame pohuma ni na thsiarapo karo name aa fota ku nipaa.”
4 Nyambi ne ngepi a mu tawire? Wa ambire ci: “Ni na cipakera nothsinda anu o 7,000 awa na kana ku rombera Baale.”
5 Mofoci no thsino thsikati, ko a di mathsiarethzi, awa na hanguriwa ko thsihemo thsa Nyambi. 6 Uno honi pakuninga ci na a wa hangura ko thsihemo thsenthzi, apo honi kadi cingwa aa wa hangura kekwama yo. Napoci kengeyo, thsihemo thsa Nyambi nga kadi thsihemo shemwa.
7 Ine ne honi? Maisiraele a kwangire ku wana eyi a koñine. Akwakuhanguriwa na i wana, uno honi amweya wahe na karupithsiwa micima. 8 Eci edi ku na ñoriwa ci:
“Nyambi naa wa pa mupepo o turo.
Meho o ka a monine,
no matwi o kadi a ku yuva,
ku na kuma no thsino thsikati.”
9 Davida aa amba ci:
Edika yo nga ikare thsiraha no kashaka,
ikare thsikuñu, a we no ku piwa murandu.
10 Meho o nga a thsikiwe ci a mona,
no miongo thzo thzi kundumane diyere.
Anukenge aa shomeneniwamo
11 Naepura karo, ene Majuda ne kuma kuñukire ci a wererere nji? Dyombo! Uno honi mukaci ko murandu wo, kuyoyithsiwa na ku keye kwAnukenge ci Majuda a tende mbamba. 12 Uno honi ngeci murandu wo na u retera rufumo kaye, karo ngeci kukwanga kwo na ku retera thsiyauthzi Anukenge, thsa ku kuma kupi thsiyauthzi ethsi thsa kwikarako taro thzo ou thza ku kwanenena?
13 Naa ambera amwe mwAnukenge. Edi ni di ci no kanganda kwAnukenge, naa cishangarera ekwama yange, 14 ko ku kurupera ci ngwa kenge nga ni tendithsa mbamba aenthzange Majuda, ci nga ni yoyithseko amweya. 15 Inene ngeci kukaniwa kwo po kuhuthsera kaye kwa Nyambi, ku tamburiwa kwo honi ne, kadi kenge ya kwikara mwoyo ku tunderera kwafu? 16 Ngeci mbaravura thzo dikende ethzi thzi piwa kwa Nyambi eci mutomwa thzikenu, dikende dyodihe dikenu. Karo ngeci muthzithzi ukenu, no mite nathzo thzikenu.
17 Uno honi ngeci mite thzimweya thza tetiwireko, owe honi, shaanga ci o muywera o mu murundu no shomeneniwa mu kaci ko Majuda, pano honi mwaa citapera ku kuyameniwa ku muthzithzi o muywera o mu diumbo, 18 mwa shwahura mite ethzi na thzi tetiwako. Ngepi nga o cinuneka, o dimuke ci kadi cingwa yowe o na tanarithsa muthzithzi, unone muthzithzi odiyo u na ku tanarithsa. 19 Ngwa kenge nga o amba ci: “Ethzo mite thza tetiwireko ci ame ni shomeneniwe mu ndau thzathzo.” 20 Ii, eyo ya shemwa. Unone o dimuke ci na thzi tetiwako mukaci ko kukana kwo ku tawa, owe o dimo mukaci ko thsitawo. Mweyo, wa cinuneka unone o yape. 21 Inene ngeci Nyambi ka andwire mite thzathso shemwa, namwe ka a ku miandwa.
22 Pano honi o mone thsihemo thsa Nyambi apa thsi kuma, nokaru wenthzi apa u kuma. Okaru kowa na u, unone thsihemo ku kwenu, ngeci amwepo mwikara pohuma mu thsihemo thsenthzi. Ngeci kadi kengeyo, namwe kenge mwa ku tetiwako. 23 Karo shaanga awo ngeci ka ku twarerera mu kukana ku tawa kwo, kenge a ku shomeneniwamo, inene Nyambi po o di nokoro o ku wa shomenenamo karo. 24 Owe po o mute ou wa tetiwire ku muywera o mu murundu. Ngeci Nyambi keshima yenthzi wa ku shomenenine ku muywera wenthzi o ku kuna, eyi ya kana ku enderera nenu edi yekara, athzo honi mite thzathso shemwa ne, kadi kenge a ku ciroithsera ku thzi shomenenamo karo!
Thsihemo thsa Nyambi kwanu wahe
25 Andengenu, ko di di diano edi ni fota ci mu di dimuke ci katere mwa ku cinuneke. Mukanayuva o Maisiraele ka wa kwikarerera, kenge wa kwikarako shime apa thza ku kwanena taro thzAnukenge ou a ku keya kwa Krisitu. 26 Kenge modiyo a ku yoyithsiwera Isiraele yomuhe, eci edi i na ñoriwa ci:
“Muamweni kenge a ku tunderera mu Sione,
kenge a ku tundithsa omango ouhe kwa Jakovo,
27 ethsi thsodiyo thsa kwikara thsiyuvano thsangeno,
ou na ku tundithsa evi yo.”
28 Ko ku vara omu na kanena Muthzimbu Ouwa, awo Majuda po akwethzimbo ya Nyambi mukaci kenu. Uno honi ko ku vara edi a hanguriwire, ashimiwa a Nyambi mukaci kakwathsañuru wo. 29 Inene epa no kwithsiwa kwa Nyambi ka ya huthsiwa. 30 Amwe mwAnukenge ka mwa yuverire Nyambi mwikati yo ku manyima, unone pano na mu tambura ñeke mukaci ko kukana kuyuvera ko Majuda. 31 Mofoci, nawo na tende mukanayuva ci nga ko ñeke ethzi thzi monithsiwa ku kwenu, nawo nga a tambure ñeke. 32 Inene Nyambi naanga anu wahe mu mukanayuva, ci nga a monithse ñeke kwanu wahe.
Ku shangariwe Nyambi
33 Mayuwane rufumo rwa Nyambi pongi! Onyanyami nodimukero wenthzi i thzungi nene.
Edye oyu nga twethsa ku tongonona maraturo enthzi?
Edye oyu nga yuvithsithsa makuñwa enthzi?
34 “Edye na dimuka maano a Fumu,
nji edye oyu nga mu honga?”
35 “Nji edye oyu wa mu pa thsinu,
ci Nyambi nga a thsi kure?”
36 Inene enu yoihe yaa tunda ku kwenthzi, karo ya ekarako kokoro wenthzi, karo yaa tendiwera aye.
Kutethzima kwikare ku kwenthzi diyere. Ameni.