Nyambi no mbunga ethzi a cihangwerire
9
Naa amba oshemwa mwa Krisitu, ka niangerire. Mumoneno wange ou u endithsiwa ku Mupepo Oukenu waa pa ombangi ci ka niangerire. 2 Mathsiwa ange akuru, karo ni di no thsorokoto thzi shipu mu mucima wange. 3 Inene kenge nga ni cikumbwethza ci ame ni kutiwe no ku tetiwa kwa Krisitu mukaci ko mukuta wange, 4 awo Maisiraele. Kuma añuriwire kwikara ana Nyambi. Nyambi wa hokorire kutethzima kwenthzi kukwo, wa ciangireno eyuvano, wa wa pire Murao, wa wa pire ku rombera mu Tembere no ku wa pa ekumbwethzo. 5 Aa tunderera kwakwathsañuru, no Krisitu naye kodiyo a tunderera konu, aye Nyambi oyu tumina enu yoihe karo aa roera ku shangariwa diyere! Ameni.6 Kadi cingwa ci thsikumbwethzo thsa Nyambi thsi na kanga, unone kadi cingwa wahe anahoka a Isiraele Maisiraele. 7 Karo kwikara anahoka a Aburahama ka i ambire anenthzi shemwa. Mañoro aa amba ci: “Anahoka a Isaka pohuma wa ku variwa ci oe.” 8 Eyo yaa monithsa ci awa erekiwire kerama kadi cingwa wodiyo ana Nyambi, unone awa erekiwire ko thsikumbwethzo wodiyo a na variwa ci ana Aburahama. 9 Inene eyi yodiyo thsa ambire thsikumbwethzo ci: “Kenge na ku ka huka kethsino thsikati mwaka ou u keya, apo Sara kenge a kwikara no mwana o mukwerumeana.”
10 Kadi eyo pohuma, unone Rabeka ou a thzire poremu, wa shamurukire marambi, tata wo po mukwathsañuru wetu Isaka. 11 Unone o kwa shime ku shamurukiwa, o kwa shime ku tenda yoiwa nji yoimango, eanekera ya Nyambi yo ku hangura anu ya monaharire. 12 Nyambi a ethsanga anu kadi kekwama yo yoiwa nji yoimango. Nyambi wa amberire Rabeka ci: “Mwanoe shokuru kenge a ku kwamena shoonye.” 13 Eci edi ku na ñoriwa ci: “Na shimine Jakovo, unone na thzimbire Isau.”
“Kenge na kwikara no ñeke koyu ni na foto ku monithsa ñeke,
karo kenge na ku yuvera ñekeñeke oyu ni na foto ku yuvera ñekeñeke.”
16 Mweyo, ka imanine peshima nji ecikatathza yo munu, unone i nemana pa ñeke thza Nyambi. 17 Inene Mañoro aa amba ci Nyambi wa amberire Faro ci: “Na ku kwamine fumu ci nga ni monithse okoro wange mu moe karo ci dithzina dyange dya ku dimukiwe mu kaye kokahe.” 18 Mu na mono honi, Nyambi aa fera ñeke awa a na foto ku fera ñeke, karo aa karupithsa micima awa a na foto ku karupithsa micima.
19 Ngwa yumweya ku kwenu kenge a amba ci: “Ine honi eyi a na tu peranga murandu Nyambi? Inene edye nga kana eshima ya Nyambi?” 20 Uno honi yowe odye, owe o munu, ci o cihuthsahuthse na Nyambi? Ene ethsi thsi nombiwa ne kenge nga thsi ambera mukwakuthsumba ci: “Ine eyi o na niumbera kenge?” 21 Ene mukwakumba ne ka a di nokoro o kumba pa diinya dyofoci dyoma kafuma ko ku kwamithsa yo direma noka ko ku kwamithsa yo dingana nji?
22 Mofoci, shaanga ci Nyambi o di noroero o ku monithsa oanthzi wenthzi nokoro wenthzi, unone aa kwata mucima kowa u keyera oanthzi wenthzi, awa na roera ku thzirithsiwa. 23 Aa kwamanga kengeyo ci a monithse okuru o kutethzima kwenthzi kowa a na tambura ñeke thzenthzi, awa a roethsiwerire cimo kutethzima. 24 Yatwe ethsire, kadi ku tunderera pohuma ku Majuda, unone noku kwAnukenge. 25 Eci edi a ambire Nyambi ka mukwakukethza Hosea ci:
“Awa na kana kwikaranga anuange, kenge na ku wethsa ‘anuange’.
Karo kenge na ku shima awa na kanine ku shima.”
26 “Karo momuya mu ndau omu a amberiwire ci:
‘Kadi mwanuange,’
modiyo a kwithsiwera ci ‘ana Nyambi oyu yoya.’”
27 Karo keyi ya Isiraele, mukwakukethza Isaya wa ambire ci:
“Shaanga ci taro thzo Maisiraele thzikare eci ruheke ro pa dikambo dyo diwate,
kenge kwa ku yoyithsiwa pohuma mathsiarethzi.
28 Inene Fumu kenge
a ku ratura wanguwangu kaye kokahe.”
29 Eci Isaya edi okethzire ci:
“Nga Fumu Shokoro Ouhea ka a tu thsierire anahoka,
nga na twikara eci Sodoma,
no ku piruka eci Gomora.”bc
Kukanakutawa kwa Isiraele
30 Wangu tu ambe ine honi? Kenge tu amba ci Anukenge awa kanine ku koña owawa na tendiwa owawawa pa meho a Nyambi ko thsitawo. 31 Uno honi Maisiraele awa shupwerire murao ci ekare owawawa pa meho a Nyambi, ka na twethsa ku tenda kengeyo. 32 Thsine na thsi wa kwangithsa? Na kwanga, inene ka kwamine kengeyo ko thsitawo unone kekwama. A kuñukire pa diwe dyo ku kuñukithsa. 33 Eci edi i na ñoriwa ci:
“O mone, naa paka mu Sione diwe dyo ku kuñukithsa anu,
karo diwe dyo ku wa withsa,
unone o ku tawa ku kwenthzi mbera ka a fithsiwa honyi.”