Mwoyo ko Mupepo
8
Mweyo honi, kwithsa raturo kowa a di mwa Krisitu Yesu. 2 Inene murao o Mupepo o mwoyo na u mia patura mwa Krisitu Yesu ku murao o thsivi no ku kufa. 3 Inene Nyambi na a tende ethsi wa kanine ku twethsa ku tenda murao wa Mushe mukaci ko kufaratera kwerama. Naa ratura ethsi thsi endithsa erama ko ku tuma Mwanenthzi, oyu wa keyire mu thsikupuro thserama yo thsivi. Mweyo, wa na raturire thsivi mweyo erama. 4 Wa tendire kenge ci owawa ou u na fotahara mu murao ci nga u yarithsiwerere mu mwetu, ka tu shupwerire eshima yerama, unone twaa shupwera Mupepo.5 Inene awa a na yoyo keshima yerama aa pakera maano o kwinu yerama, uno honi awa a na yoyo ko Mupepo aa pakera maano o kwinu yo Mupepo. 6 Ku pakera maano efota yerama po kufa, uno honi ku yoya keyi a fota Mupepo po yaa twara ku mwoyo no thsiyaro. 7 Inene maano aa a na pakeriwa kwifota yerama aa rwithsa Nyambi, ka a cihuthsa kushi thzo murao wa Nyambi, karo tumba a tende kengeyo. 8 Awa shupwera efota yerama yo tumba twethsa ku roerithsa Nyambi.
9 Uno honi amwe ka mu yoyire keshima yerama yenu, unone ko Mupepo, ngeci shemwa Mupepo wa Nyambi mu mwenu a di. Ngeci munu ka a di no Mupepo wa Krisitu, ka a di kwa Krisitu. 10 Uno honi ngeci Krisitu mu mwenu a di, apo honi shaanga yoyi i fa erama yenu mukaci ko thsivi, Mupepo aa mi pa mwoyo, inene na mu tendiwa owawawa pa meho a Nyambi. 11 Ngeci Mupepo wa Nyambi, aye oyu wa pindurire Yesu kwafu po mu mwenu a di, aye oyu wa pindurire Krisitu kwafu kenge a ku pa kengeyo mwoyo kwirama yenu yo ku twethsa ku fa, ko Mupepo wenthzi oyu yoya mu mwenu.
12 Mweyo, andengenu, tu nangiwa, uno honi kadi kwirama, kadi ku yoya kefota yerama. 13 Ngeci mwaa yoya kerama kenge mwa ku fa, unone ngeci ko Mupepo mwa epaa etenda yoimango yerama, kenge mwa ku yoya. 14 Inene wahe awa a na endithsiwa ku Mupepo wa Nyambi po wodiyo ana Nyambi.
15 Ka mwa tamburire Mupepo o ku mi tenda apika ci nga mu yoye mu wowa karo, unone Mupepo oyu mwa tamburire wa miañurire kwikara ana Nyambi, aye kenthzi twaethsa Nyambi ci: “Aba, Tata!” 16 Aye Mupepo thsinda aa pa ombangi no mipepo thzetu ci twana Nyambi. 17 Apo honi ngeci twana, twashwana. Twashwana kutethzima kwa Nyambi, karo twaenthza Krisitu mu kushwana, ngeci twaa nyanda shemwa nenthzi ci nga natwe twa ku tambure kutethzima kwenthzi.
Kutethzima oku ku keya
18 Naa shimba ci makando o rerodino tumba nga a anekethziwa ku kutethzima oku kwa ku hokoriwa ku kwetu. 19 Kaye kokahe ka na taterera nene thsikati ethsi a ku hokora Nyambi anenthzi. 20 Inene yumbiwa ya pakiwire mu kutumina ko mbango, uno honi kadi keshima yayo, unone keshima yoyu wa i pakire kengeyo. Uno honi ko u di okurupero, 21 ci kaye ako kenge ka ku paturiwa ku kwangiwa ku kwipa no ku retiwa mu kurukuruka ko kutethzima kwana Nyambi.
22 Inene tu na dimuka ci kaye kokahe ku na kuma thsino thsikati na ka shiri mukaci ko kukora ko ku ninga eci mbuyama o ku nyatithsa. 23 Kadi kaye pohuma, unone natwe, atwe tu di no mutomwa o Mupepo, twaa shirera mu kaci o ku tu taterera nene kwañuriwa kwetu kwikara ana Nyambi, ako kupaturiwa kwerama yetu. 24 Inene kou okurupero twa yoyithsiwire. Uno honi okurupero o ku monahara po kadi okurupero. Edye o ku kurupera eyi a di nayo? 25 Uno honi ngeci twaa kurupera ethsi tu shime ku wana, twaa thsi taterera kothzui.
26 Mofoci kengeyo, Mupepo aa tu kwathsa mu kufaratera kwetu. Ka tu dimuka eyi tu na roera ku romberera, unone aye Mupepo aa tu romberera keshiro yo kukana ku twethsa ku tongonona. 27 Karo oyu na fotithsithsanga micima thzetu na dimuka maano o Mupepo, inene Mupepo aa direreranga akwakutawa kokuthza komu a na shimena Nyambi.
28 Karo tu na dimuka ci Nyambi aa tenda enu yoihe ku kwamena pofoci nawa kowa a na mu shimi, awa naethsa kokuthza kesheteka yenthzi. 29 Inene awa a dimukire cimo, wa wa hangurire cimo ci a ku shimbe thsikupuro thsa Mwane, ci Mwane ekare mwedi mu kaci kapenthzi owangi. 30 Karo awa a hangurire cimo, karo wa wethsire, awa ethsire, karo wa wa tendire owawawa, karo awa a tendire owawawa wa wa pire kutethzima kwenthzi.
Okuru o thsishimo thsa Nyambi
31 Uno honi ine tu amba keyi enu eyi? Ngeci Nyambi aa twimanena, edye nga o tu rwithsa? 32 Aye oyu wa kanine kwandwa Mwane shemwa unone wa u tu pire twahe, ngepi honi nga a ku kwanga ku tu pa ko thsihemo mofoci na Mwane enu yoihe? 33 Edye oyu wa ku thzekithsa awa naa hangura Nyambi? Nyambi yodiyo na tendanga anu kwikara owawawa. 34 Edye honi wa ku tu ratura? Kwithsa, inene Krisitu Yesu wa tu fererire karo wa pinduriwire kwafu, oyu di ku dyoko dyo rudyo dya Nyambi, aye oyu na tu rombereranga.
35 Edye oyu wa ku tu tepa ku thsishimo thsa Krisitu? Ene kenge ya kwikara dikando nji, nji dikarara, nji kunyandithsiwa, nji ndombo, nji wira, nji okaru, nji mwere? 36 Eci edi ku na ñoriwa ci: “Mukaci koe twaepaiwa diyuwa no diyuwa.
Twaa shimbiwa eci mangu aa a ka paiwa.”
37 Dyombo, mweyi enu yoihe eyi twaa pita awa na othzo kenthzi aye oyu naa tu shimi!
38 Inene naa tawa shemwa ci kwithsa ethsi nga thsi tu tepa ku thsishimo thsa Nyambi, ikare kufa, nji mwoyo, nji tungeru, nji yoikoro, nji enu eyi i diko pano nji eyi i keya, nji okoro, 39 nji ore, nji othzungi, nji ngara thsinu mu kaye, kwithsa ethsi thsa ku twethsa ku tu tepa ku thsishimo thsa Nyambi oku ku di mwa Krisitu Yesu Fumu wetu.