Mukwathsitawo na rukururiwa ku mirao thzo Thsijuda
7
Aenthzange mu thsitawo, pakuninga ci naa amba nowa a na dimuka murao, ene ka mu dimukire ci murao po wa anga pohuma munu o ku yoya nji? 2 Mweyo, mbuyama a angiwa ku murao kwa munuwenthzi, o ku yoya munuwenthzi. Uno honi ngeci munuwenthzi ayepo fa, oyo mbuyama na rukuruka ku murao ou na u mwanga kwa munuwenthzi. 3 Uno honi kenge a kwithsiwa o mirembe ngeci ayepo yekiwa kwa mukwerume wao munuwenthzi o ku yoya. Unone munuwenthzi o ku na fu, oyo mbuyama ko murao na rukuruka, karo ngeci ayepo yekiwa kwa mukwerume wao, tumba ethsiwa ci wa mirembe.4 Uno honi aenthzange, dyo i di noku ku kwenu. Namwe kengeyo mu na fu ku murao, inene mwepo yerama ya Krisitu. Pano honi mu nekara anuenthzi, aye oyu naa pinduriwa kwafu ci nga tu twethse kwimena Nyambi ima. 5 Ou twa yoyire kerama, ecikumbwethza yo thsivi yo ku shangumuniwa ku murao ya kwamine mwirama yetu, unone ya tu twarire ku kufa. 6 Uno honi na tu rukururiwa ku murao, inene na tu fu ku thsinu ethsi thsa twangire. Mweyo, Mupepo Oukenu kenge a tu kwathsa ku kwamena Nyambi ko dikuñwa dyodipe, karo kadi ko dikuñwa dyo ku shupwera murao o ku ñoriwa.
Murao no thsivi
7 Wangu tu ambe ine? Ene tu ambe ci murao po thsivi nji? Dyombo, kadi kengeyo! Uno honi murao odiyo u na tu dimukithsa thsivi. Inene napoci u ambe ci: “Wa cikumbwethza thsinu thsa muenthzoe,” nga ka ni dimuka ci ku cikumbwethza thsinu thsa muenthzange po imango. 8 Unone mukaci ko thsiraerera, thsivi na thsi wana dikuñwa dyo ku ni retera ci ni cikumbwethze enu yo mishovoshovo. Inene ko kupira murao, thsivi thsi na fu. 9 Shime naa yoya ou kwa pirire murao, unone thsiraerera ou thsa keyire, thsivi thsa pwethzumukire ame no ku fa. 10 Na monine ci athso thsiraerera ethsi thsa roerire ci nga thsi na reta mwoyo thsa retire kufa. 11 Thsivi thsi na wana ndau thzo ku niangera ko ku cikwathsithsa thsiraerera, thsi na nipaa kethso thsiraerera. 12 Mweyo, ao murao po ukenu karo no thsiraerera thsao thsikenu, thsiwawa karo thsiwa.
13 Ene thsiya thsinu thsothsiwa ne na thsi ni retera kufa nji? Dyombo! Thsivi thsodiyo na thsi tende kengeyo. Ko ku kwamithsa thsinu thsothsiwa, thsivi na thsi ni retera kufa ci thsi monahare nawa ci thsivi. Mweyo honi, ko thsiraerera thsivi thsi nekara thsivi nene ku piterera.
14 Inene tu na dimuka ci Murao waa tunda kwa Nyambi, uno honi ame po no munu oyu yoya mu nyama, o ku urithsiwa eci mupika ku thsivi. 15 Ka ni yuvithsithsire eyi ni tenda, inene ka ni tendire eyi ni fota ku tenda, unone naa tenda ethsi ni na thzimbi. 16 Ko ku tenda ethsi ni na kana ku fota ku tenda, naa tawa ci murao po uwa. 17 Mweyo, kadi cingwa yame oyu tenda kengeyo, unone thsivi ethsi thsi di mu mwange.
18 Inene ni na dimuka ci mu mwange mwithsa thsinu thsothsiwa, ame konu wange. Inene naa fotanga ci ni tende yoiwa, unone naa kwanga ku tenda kengeyo. 19 Inene kadi no mukwa ku tenda owa ou ni fota ku tenda, unone naa tenda omango ou ni na kana ku fota ku tenda. 20 Ngeci naa tenda thsinu ethsi ni na kana ku fota, kadi cingwa yame ni thsi tenda, unone thsivi ethsi thsi di mu mwange.
21 Mweyo, naa wana murao o kenge ci, yoihe ni fota ku kwama yoiwa, omango waekara nange. 22 Inene mucima wange waa nyanyukera murao wa Nyambi, 23 unone naa mona murao umweya ou u kwama mu mwange, ou u rwithsa maano ange no ku ni tenda thsinthzinda thso murao o thsivi ethsi thsi kwama mu mwange. 24 Mayuwane othsimo wange! Edye oyu wa ku ni amwena kweyi erama i ni twara ku kufa? 25 Naa kanderera kwa Nyambi, aye oyu ni patura ka Yesu Krisitu Fumu wetu!
Mweyo, mu na mono edi i di: Mu maano ange naa fota shemwa ku hengeka murao wa Nyambi, uno honi mwirama yange yo thsivi no mupika ku murao o thsivi.