Ku fa ku thsivi, no ku yoya mwa Krisitu
6
Uno honi ine tu amba? Ene tu twarerere ku tenda thsivi ci thsihemo thsa Nyambi thsi monahare kongi? 2 Dyombo, kadi kengeyo! Ngepi edi nga tu twarerera ku yoya mu thsivi atwe na tu fu ku thsivi? 3 Ene ka mu dimukire ci twahe atwe na tu korovethziwa mwa Krisitu Yesu, na tu korovethziwa mu kufa kwenthzi nji? 4 Mweyo, ou twa korovethziwire, twa fire no ku vumbekiwa nenthzi ci nga dyodi a pinduriwire Krisitu kwafu ko kutethzima kwa Nyambi Tata, natwe twa ku yoye mwoyo oupe.5 Pakuninga ci na tu ciwaneka nenthzi pofoci mu kufa kwenthzi, kenge twa ku pinduriwa kwafu eci edi a pinduriwire. 6 Tu na dimuka ci onu wetu o kare mwirama yetu wa pamareriwire na Krisitu pa mbinda, ci okoro o thsivi wekara peuru thzo myoyo thzetu, ci nga twekara karo apika ku thsivi. 7 Inene munu yoihe a fa, na rukururiwa kukoro o thsivi.
8 Uno honi ngeci na tu fu na Krisitu, twaa tawa ci kenge mba tu yoya karo nenthzi. 9 Inene tu na dimuka ci Krisitu ko ku pinduriwa kwafu, mbera ka a fu karo. Kufa ka ku di nokoro karo pa penthzi. 10 Inene kufa oku a fire, kuma a fire ku thsivi rofoci pohuma karo ro mamaneneno, uno honi mwoyo ou a yoya aa yoya kwa Nyambi.
11 Mweyo, namwe kengeyo mwaa roera ku civara ci na mu fu ku thsivi no ku yoya kwa Nyambi mwa Krisitu Yesu. 12 Thsivi thsa endithsa mwirama yenu yo ku twethsa ku fa, thsa mi tenda ci mu shupwere ecikumbwethza yathso yoimango. 13 Karo mwa pa thsivi epo yerama yenu ci i kwamithsiwe mu makuñwa oamango. Unone mu cipake kwa Nyambi eci anu awa na tundithsiwa mu kufa no ku retiwa mu mwoyo. Karo mu pe epo yerama yenu ku kwenthzi ci a i cikwathsithse mu mwenu ku tenda enu yowawa. 14 Thsivi ka thsi di honi nokoro pa penu, inene ka mu di mushi thzo murao, unone mushi thzo thsihemo thsa Nyambi mu di.
Apika kuwawa
15 Ngepi honi? Ene tu tende thsivi pakuninga ci ka tu di mushi thzo murao, unone mushi thzo thsihemo thsa Nyambi? Dyombo, kadi kengeyo! 16 Ene ka mu dimukire ci munu aekara mupika kweyi a na shupwera nji? Mwaa twethsa kwikara apika thsivi athso thso ku twara ku kufa, nji ku cihangwera ku yuvera Nyambi ayo yo ku twara kuwawa. 17 Uno honi tu kanderere kwa Nyambi, inene amwe mwekarire apika thsivi, pano honi na mu tawa ko micima thzenu thzothzihe erongithsa eyi na mu piwa. 18 Na mu paturiwa honi ku thsivi karo na mu pikuriwa kuwawa.
19 Naa amba ko ku cikwathsithsa miambero thzanu mukaci ko ku faratera kwenu mu kuyuvithsithsa. Pa kutanga mwa citendire apika kwinu yo dithziro nomango o kupiterera, pano honi mu cipe mwathsinda kwikara apika kuwawa ci mwikare owakenu. 20 Ou mwekarire apika thsivi, mwa rukurukire kweyi yowawa. 21 Uno honi owa mwine mwa waninepo ku tenda enu eyi i mi fithsa honyi thsino thsikati? Inene mahurerero weyo po kufa. 22 Pakuninga honi ci na mu paturiwa ku thsivi no ku piruka apika Nyambi, eyi na mu wana po yaa twara ku kukenithsiwa no ku piwa mwoyo o diyere ku hura. 23 Inene muyambo o thsivi po kufa, unone thsipa thso kengekenge thso thsihemo thsa Nyambi po mwoyo o diyere mwa Krisitu Yesu Fumu wetu.