23
Yẹ́zụ̃ ni Pĩlátũ ní ándra
1 Ongo ongakî kpộdrú ojikî Yẹ́zụ̃ ni Pĩlátũ ní ándra. 2 Iꞌdókî ani ịsịkị̃ka ꞌdí ni, “Ãmẹsụ́ mãꞌdị́ ꞌdĩ ká ꞌbá ãmadrị́ ã drị̃ ivolõ, olẽ ꞌbá kõkwẽ mũsórõ Cẹ́zẹrọ̃ drị́ isâ ku vúa ọꞌjọ ani Kị̃rị́sịtọ̃ ni Ópí ꞌi.”
3 Pĩlátũ ọzị Yẹ́zụ̃ ni, “Nyi Ópí Yụ̃dẹ́ị̃ꞌbá drị́ ꞌi yã?”
Yẹ́zụ̃ aꞌị̃, “Õo, õndo nyâ ꞌjọka rĩ áni.”
4 Pĩlátũ ẹcọru amba tã azĩka Rũbãngã ní rĩ drị́ laki trõ, ọꞌjọ, “Mệsụ́ enzĩ mãꞌdị́ ꞌdĩ írụ kurũ.”
5 Kí kákî ụrị́a, ọꞌjọkî, “Ká ꞌbá drị̃ ivolõ anâ lịnị̃ sĩ Yụ̃dẹ́ã ni ndụtụ, iꞌdójó Gãlị̃lẹ́ã ꞌa ndị̃ ꞌdíꞌa.”
Yẹ́zụ̃ ni ọzẹ Hẹ̃rọ́dẹ̃ drị́
6 Lẹꞌjọ́ ꞌdĩ erika sĩ, Pĩlátũ ọzị, “Mãꞌdị́ ꞌdĩi Gãlị̃lẹ́ãgọ́ yã?”
7 Eri Yẹ́zụ̃ ni Gãlị̃lẹ́ãgọ́ ni ꞌdĩ, ọzẹ ani Hẹ̃rọ́dẹ̃ ni Gãlị̃lẹ́ã ni aseꞌdi, kí lọ̃fọ́ nã sĩ ẹmụ́ꞌdi Yẹ̃rụ́sãlẹ́mẹ̃ ꞌa rĩ drị́.
8 Hẹ̃rọ́dẹ̃ ásị́ engwí ẹ̃ꞌbwẹ́ Yẹ́zụ̃ ni ndreka sĩ, ãꞌdusĩ ãtị́tị́ sâ orĩ ani ndreka ni ụtẹ̃re. Tã anâ erílé Yẹ́zụ̃ ní drị rĩ sĩ, ịgẹnị̃ ani ká Yẹ́zụ̃ ã nyúmá idéka isâ ndre rá. 9 Hẹ̃rọ́dẹ̃ ọzị Yẹ́zụ̃ ni lãzị́ ũꞌbí sĩ, kí Yẹ́zụ̃ aꞌị̃ tị ani ãlu sâ kurũ. 10 Amba tã azĩka Rũbãngã ní rĩi lãpọ̃nyịã cárá drị̂ trõ kákî angalã trõ Yẹ́zụ̃ ni ịsịkị̃. 11 Kí Hẹ̃rọ́dẹ̃ tị lê anâ ãsĩkãriã trõ kákî ani inyaꞌdĩ. Osukî rụarụ́ lõꞌbú opĩ drị́ ꞌi, oko ọzẹkî Yẹ́zụ̃ ni vúlé Pĩlátũ drị́. 12 Ọꞌdụ́ ãluá nã sĩ, Pĩlátũ tị Hẹ̃rọ́dẹ̃ trõ engwíkî ozí ẹsụ́ ãꞌi óꞌjáꞌbâzí sâ ꞌi.
Álị Yẹ́zụ̃ ní drị drã
13 Pĩlátũ ụngwẹ amba tã azĩka Rũbãngã ní rĩ ꞌbá vũ aseka rĩi vúa laki trõ, 14 ọꞌjọ ãꞌi ní, “Ãnyejí má drị́ ꞌdíꞌa mãꞌdị́ laki drị̃ ivolõꞌdi rĩi, mụ́zị ani ãnyã andra gá, kí mệsụ́ enzĩ ãnyã ani ịsịkị̃jó rĩi kurũ. 15 Hẹ̃rọ́dẹ̃ isâ ẹsụ́ enzĩ kurũ sĩ, ingwi ani vúlé ꞌbá drị́. Ãnyã ndreka ọ̃tẹ rĩ áni idé tã drã alịjó drị̃arụ́ ni kurũ. 16 ꞌDĩsĩdrú má aní ní lãmgbá kwẽ, kí má ani eꞌbe rá.” 17 (Oꞌbãru ị̃tụ́ ọ́gbọ́rọ́ alịka drị̂ andra dũbãsĩ kólẽ keꞌbe mãꞌdị́ ãlu mãꞌbụ́sụ̃gọ́ rĩi rá.)a
18 Laki oza ọ́lọ́ꞌbọ́ éré sĩ, “Yẹ́zụ̃ ꞌi lê ku! Nyĩꞌdị ani kpó, nyeꞌbe ãma ní Bãrábã ꞌi.” 19 (Bãrábã ni ósu mãꞌbụ́sụ̃ ꞌa rĩi lase tị ọndịka vúa ꞌbá ꞌdịka sĩ.)
20 Pĩlátũ ã lẽka ani keꞌbe Yẹ́zụ̃ ni rá sĩ, aꞌị́ laki dị́. 21 Kí liri sâ kákî uzá, “Nyepa ani kwealala drị! Nyepa ani kwealala drị!” 22 Vú inajóa rĩ sĩ Pĩlátũ ọꞌjọ ãꞌi ní, “Kí gbá mãꞌdị́ ꞌdĩ idé ãꞌdu? Mẹ́sụ̂ tã zị̃ drã lịjó drị̃arụ́ rĩi kurũ. ꞌDĩsĩdrú má aní ní lãmgbá kwẽ, oko má ani eꞌbe rá.”
23 Kí ọ́lọ́ꞌbọ́ éré sĩ kákî ụrị́a, keparu kwealala drị vúa tã ãꞌiã ụrị́lé rũ rĩi eriru rá. 24 ꞌDĩsĩdrú Pĩlátũ ọlị Yẹ́zụ̃ ní drị drã ãꞌiã lẽka rĩ áni. 25 Pĩlátũ eꞌbe Bãrábã ni sulé mãꞌbụ́sụ̃ ꞌa lase tị ọndịꞌdi vúa ꞌbá dịka sĩ rĩi rá ãꞌiã zịka rĩ áni, okwẽ Yẹ́zụ̃ ni ãꞌiã drị́ gá ꞌdịlé ãꞌiã lẽka rĩ áni.
Épa Yẹ́zụ̃ ni kwealala drị
26 Ãꞌiã Yẹ́zụ̃ ni jire epalé kwealala drị rĩi ẹsụ́kî Sị̃mọ́nẹ̃ Cị̃rẹ́nẹ̃gọ́ rĩi, ẹmụ́ꞌdi Yẹ̃rụ́sãlẹ́mẹ̃ ꞌa rĩi, oꞌbãkî ọnzị̃ kwealala Yẹ́zụ̃ drị́ rĩi, ongo ọmụ étrõ Yẹ́zụ̃ ã vú gá sĩ. 27 ꞌBá ãmgbụ́ ekó vú ani, ũkú owóka aní sĩ rĩ trõ. 28 Yẹ́zụ̃ eyẽ ãꞌi, ọꞌjọ ãꞌi ní, “Ĩzõnzi Yẹ̃rụ́sãlẹ́mẹ̃ drị̂, ôwó má sĩ ku, ãnyowó ãnyi sĩ vúa ãnyã ꞌbácírí sĩ. 29 Ãꞌdusĩ sáã asẽ gã ꞌbá kộꞌjọa, ‘Ũkú õndo ꞌbácírí tịka kurũ rĩ ã andra loso, ꞌbá koka aá kurũ vúa indruka kurũ sĩ!’ 30 Kákî ꞌjọa ꞌbẹ́ ní, ‘Ãnyẹzọ̃ ãma ídrị,’ vúa ọ́tụ́ ni, ‘Ãnyĩse ãma rá!’ 31 Jõ tã ꞌdĩ ni rĩ kidéru kwe ẹ̃bị rĩ írụ rĩ, kwe ãꞌwí rĩ írụ lê ká ridé íngó ni?”
32 Ãgo zị̃ị ẹ̃rị̃ enzĩ trõ rĩi, óji ãꞌi epalé kwealala drị Yẹ́zụ̃ tị trõ. 33 Ecákî kãré ụngwẹlé Drị̃kwã ní gá ꞌdĩ, epakî ãꞌi kwealala mgbị́mgbị rĩ ídrị, ꞌbá unzi ꞌdĩ trõ ꞌi, ãlu rĩi anâ lẽji gá, zị̃ jó rĩi anâ nyãré gá. 34 Yẹ́zụ̃ ọꞌjọ, “Mâ Átâ, nyeꞌbe ãꞌi ni rá, ãꞌdusĩ ọnị̃kî tã ãꞌiã idélé rĩi ku.” Ongo ãsĩkãriã ꞌdĩ anzukî anâ bõngú ni ãꞌi ílọ̃fọ́, oꞌbekî ãgĩ sĩ.
35 ꞌBá umbaka náꞌa rĩi kákî ndrea, amba Yụ̃dẹ́ị̃ꞌbá drị́ kákî gụa ani edeka trõ, ọꞌjọkî, “Ari ꞌbá zị̃ lê rá, kari ani sâ ani, jõ ani lọ́kụ Kị̃rị́sịtọ̃ ni Rũbãngã ã upẽlé nĩ rĩ ꞌi.”
36 Ãsĩkãriã sâ ede ani sáã ãꞌiã aní ní vị́nọ̃ dãlãmgbáb kwẽre rĩ ꞌi, 37 ọꞌjọkî, “Jõ nyi ópí Yụ̃dẹ́ị̃ꞌbá drị́ ꞌi rĩ, nyari nyi nyâ ngá sĩ.”
38 Vúa osĩru drị̃lẹ́ arụ́, “ꞌDĩi Ópí Yụ̃dẹ́ị̃ꞌbá drị́ ꞌi.”
39 Mãꞌdị́ ãꞌi epa ꞌbâzí zị̃ ãlu rĩ isâ ede ani rá ọꞌjọ, “Nyi Kị̃rị́sịtọ̃ ꞌi ku yã? Nyari nyi nyâ ngá sĩ vúa nyari ãma sâ ãma trõ.”
40 Kí zị̃ rĩ lê iꞌjá ani, ọꞌjọ, “Drã mị sâ nyọ́rị̃ Rũbãngã ku yã? 41 Ru kpộ icandĩ ãluá rĩ íꞌa, kí ãma drị̂ lê cẽ, ãꞌdusĩ îdé enzĩ rá. Áꞌdi lãmgbá ẹsụ́ ãmã enzĩ ã vû sĩ, kí mãꞌdị́ ꞌdĩ lê idé tã ũnzí rĩi kurũ.”
42 Oko ọꞌjọ, “Yẹ́zụ̃, nyerã ma nyâ opĩ ní gá cí.”
43 Yẹ́zụ̃ aꞌị̃ ani, “Mãꞌjọ nyí ní lọ́kụdrú, endrũ nyôlú métrõ pãrãdịzọ̃c ꞌa!”
Drã Yẹ́zụ̃ drị́ ꞌi
44 Ori ĩré sáã ázíá oca ndị̃ sáã drị́cãlu, lọgọ nã ã drị̃ eci trị́kọ̃ trị́kọ̃, 45 ãꞌdusĩ ị̃tụ́ oka ku. Vúa bõngúd jó Rũbãngã drị̂ íꞌa rĩi sâ asĩru ẹ̃rị̃ engá jó ọrụ bị̃ vụ̃rụ́. 46 Yẹ́zụ̃ owó ọ́lọ́ꞌbọ́ éré sĩ, ọꞌjọ, “Mâ Átâ, ákwẽ mâ éndrî ni nyâ drị́ gá.” Lẹꞌjọ́ ꞌdĩ ívú, mgbe odrã rá.
47 Ãsĩkãri ãmbá rĩ ã tã ridéꞌdi rĩ ndreka sĩ, ẹcụ́ Rũbãngã okpõ sĩ, ọꞌjọ, “Lọ́kụdrú mãꞌdị́ ꞌdĩi ꞌbá ándá rĩ ꞌi.” 48 ꞌBá kpộdrú rutraka tã ridéꞌdi rĩ ndrere rĩ ocẽkî ãꞌi kõndré tã ridéꞌdĩ rĩi ꞌdĩ, ongwikî pí kákî vũ ásị́ lãzá sĩ ãꞌiã ágá ni dị sĩ. 49 Kí ꞌbá ani nị̃ka ọ̃tẹ rĩi, ũkûnzi anâ vû ni okoka engáka Gãlị̃lẹ́ã ꞌa rĩ trõ ombakî ãkwâ sĩ gwãdã kákî tã ridéꞌdi rĩ ndre.
Yẹ́zụ̃ ni seka ꞌi
50 Ẹsụ́ mãꞌdị́ zị̃ ãlu aꞌã rụ́ ani Yọ̃zẹ́fụ̃ ꞌi, ani ãmbá vụra drị́ lẹꞌjọ́ alịka Yẹ́zụ̃ ã drị̃gá rĩ ã ãlu ꞌi, kí ani mãꞌdị́ losó rĩ ꞌi, 51 vúa lẹꞌjọ́ alịlé Yẹ́zụ̃ ã drị̃ gá rĩ aꞌị̃ꞌdi kurũ rĩ ꞌi. Yọ̃zẹ́fụ̃ engá ganyi Yụ̃dẹ́ị̃ drị́ ẹ́ꞌị Ãrĩmãtéã drị̂ ígá vúa ani ẹmụ́ka Opĩ Rũbãngã drị̂ rĩi ụtẹ̃re. 52 Ọmụ Pĩlátũ drị́ Yẹ́zụ̃ ã rụ ĩmwâ ni aꞌị́re selé. 53 Ịsị́ rụ ni kwealala drị sĩ, óli bõngú pẹ́lẹ́rẹ́ rĩ sĩ oko oꞌbã ꞌbụ́ galé ọ́nị́ ꞌa rĩ íꞌa, ꞌbụ́ nãi ãtị́tị óse ꞌbá arụ́ kurũ rĩ ꞌi. 54 Tã ꞌdĩ idéru ị̃tụ́ tọ̃ụ́ sĩ, ẹsụ́ ĩré Sãbátũ kîꞌdó.