22
Yụ́dã aꞌị̃ Yẹ́zụ̃ ni azịka rá
1 Ẹsụ́ ị̃tụ́ ọ́gbọ́rọ́ mũgãtĩ ꞌdilé ãkụ́kwị́ ãkó rĩ drị̂ ụngwẹlé ani sâ ị̃tụ́ ọ́gbọ́rọ́ alịka drị́ ꞌdĩi ecá ĩré ꞌdĩ, 2 amba tã azĩka Rũbãngã ní rĩi vúa lãpọ̃nyịã cárá drị̂ trõ orĩkî lẹ́tị ndrụ̃re Yẹ́zụ̃ ni kojó cí, kí adrĩ ꞌbá ãmgbụ́ Yẹ́zụ̃ ã olújó ãꞌi tị trõ rĩ drị́ sĩ, ọrị̃ oko ãꞌi cí.
3 Mgbe sĩtánĩ okwi mãju mụdrị́lị́mbị́ ẹ̃rị̃ ꞌdĩ ã ãlu ní ụngwẹlé Yụ́dã Ĩsĩkãrị̃yọ́tị̃ ní rụ. 4 Oko Yụ́dã ọmụ amba tã azĩka Rũbãngã ní rĩ drị́ ꞌdĩ drị́ vúa amba ãsĩkãriã jó Rũbãngã drị́ ã lãga ụtẹ̃ka rĩ trõ tã tị uꞌbãre aní ní Yẹ́zụ̃ ni azịjó ãꞌi drị́. 5 Anzõ oko ãꞌi cí vúa aꞌị̃kî aní ní sítĩ kwẽka rá. 6 Aꞌị̃ vúa iꞌdó lẹ́tị ndrũka Yẹ́zụ̃ ní kwẽjó ãꞌiã drị́ gá sáã ꞌbá ãmgbụ́ ị̃yọ rĩ sĩ.
Lonya ũndrwé tã tị asẽjó rĩ ꞌi
7 Ọꞌdụ́ mũgãtĩ ãkụ́kwị́ ãkó rĩ drị́ bị̃lọ̃ ị̃tụ́ ọ́gbọ́rọ́ alịka drị́ rĩ drị̂ azĩjó rĩ ecá rá. 8 Yẹ́zụ̃ ọzẹ Péturũ tị Yõánã trõ, ọꞌjọ, “Ãnyĩvũ ãnyidé lonya ꞌbá ní ị̃tụ́ ọ́gbọ́rọ́ ni nyajó kãré ãlu gá.” 9 Ọzịkî ani, “Ĩlẽ ãmidé lonya ni íngõá?” 10 Yẹ́zụ̃ ingwi, “Jõ ãnyî kwi ganyi Yẹ̃rụ́sãlẹ́mẹ̃ ní ꞌa, ãnyi rẹsụ́ ágó kére ẹ̃yị́ trõ rĩ nzị̃ꞌdi rĩ trõ, ãnyĩko vú ani jó anâ kwire rĩ íꞌa. 11 Ãnyĩzị jóꞌdị́pị ní, ‘Lãpọ́nyị́ ọꞌjọ, ꞌdị́ jó amụ drị́ ãꞌi ní tã nyajó anâ mãju trõ ị̃tụ́ ọ́gbọ́rọ́ alịka drị́ rĩ sĩ rĩi íngõ yã?’ 12 Ká ãnyi ní jó ã fãlãfãlã ọrụ ẽsi rĩi ịtẹꞌdẹ̃ áwu, kãré idélé bábá rĩ ꞌi. Ãnyidé lonya ni láka náꞌa.” 13 Ovũkî ꞌdĩ ẹsụ́kî tã ni õndo Yẹ́zụ̃ ã ꞌjọka ãꞌi ní rĩ áni. Mgbe idékî ị̃tụ́ ọ́gbọ́rọ́ ã lonya ni láka.
14 Sáã lonya drị̂ ecá ꞌdĩ, Yẹ́zụ̃ tị anâ mãju trõ orĩkî lonya gá tã nyare. 15 Oko Yẹ́zụ̃ ọꞌjọ ãꞌi ní, “Árĩ ma ị̃tụ́ ọ́gbọ́rọ́ alịka drị́ ꞌdĩ nyaka ãnyetrõ kpá ni ụtẹ̃ tọndọ drú icandĩ má drị̂ ri odrĩ iꞌdó. 16 ꞌDĩ sĩ álẽ mãꞌjọ ãnyi ní, ánya lonya ꞌdĩ áni ꞌdĩ dị́ ku ndị̃ ká ridé Opĩ Rũbãngã drị̂ ã lẽka rĩ áni kpá.” 17 Ongo ọꞌdụ kọ́pọ̃ vị́nọ̃ trõ rĩi anzó Rũbãngã ni, oko ọꞌjọ, “Ãnyaꞌị́ ãnyamu ãnyi ílọ̃fọ́. 18 Mãꞌjọ ãnyí ní ámvu vị́nọ̃ dị́ ku pákã Opĩ Rũbãngã drị̂ kêcá kpá.” 19 Ọꞌdụ mũgãtĩ, anzó Ópí Rũbãngã ni, oko atĩ ꞌa ani, okwẽ anâ mãju drị́, ọꞌjọ, “ꞌDĩi mâ rụ ní azĩlé ãnyi ní rĩ ꞌi, ãnyidé tã ꞌdĩi ma erãjó.” 20 Ãluá rĩ áni lonya ũndrwé rĩ ã vú gá ọꞌdụ kọ́pọ̃ vị́nọ̃ trõ rĩi, ọꞌjọ, “ꞌDĩi laꞌị̃ úꞌdí Rũbãngã drị́ ãnyetrõ mâ ãrí ní osújó ãnyi sĩ rĩ ꞌi. 21 Kí rĩꞌdi lonya gá ꞌdíꞌa ãmetrõ kêndré õzí áni rĩ ká ma azị nĩ. 22 Ọ́rị Mãꞌdị́ kêyá kódrã Rũbãngã ã tị ani uꞌbãka rĩ áni rá, kí andra unzĩ rẹ̃tụ́ rĩi ká mãꞌdị́ azịꞌdia rĩ ụtẹ̃.” 23 Anâ mãju iꞌdókî ãꞌi ụzịka ãꞌiã lọ̃fọ́ gá ꞌdị́ ãꞌdi ká tã ꞌdĩ áni ꞌdĩ idé gbá nĩ yã ꞌi. 24 Ongo rirõka iꞌdó ãꞌiã lọ̃fọ́ gá ãꞌdi kôndẽa rẹtụ̃ sĩ nĩ ní drị. 25 Yẹ́zụ̃ ọꞌjọ ãꞌi ní, “Vũ ꞌdĩ ídrị õpi jụ̃rụ drị̂ ká tẹ́rị́ ꞌbã ꞌbá ãꞌiã aselé rĩ ídrị õzi ꞌdí ni rĩ kákî drị́de ani nya nĩ. 26 Kí olẽ ãnyolú nã áni ku. Rá rĩi, mãꞌdị́ ãnyã lọ̃fọ́ gá ãmbá rĩi kolú kêndré ꞌbarágwá áni vúa vũ aseꞌdi rĩi kolú kêndré ọ̃pị́gọ́ áni. 27 Ãꞌdi ni nza rĩi ni, rĩꞌdi lonya gá rĩ ꞌi yã nósĩ ejíꞌdia ꞌi? Ani vúa rĩꞌdi lonya gá rĩ ꞌi. Kí ma lê ma ãnyã lọ̃fọ́ gá kêndré ọ̃pị́gọ́ áni. 28 Ãnyi ꞌdĩi ꞌbá mâ olúre icandĩ ꞌa rĩ isâ ma eꞌbeka kurũ rĩ ꞌi. 29 Vúa kêndré mâ Átâ opĩ kwẽka má ní rĩ áni, ma sâ má opĩ ꞌdĩ kwẽ ãnyi ní. 30 Áwusĩ drú ãnyi sâ ãnyí tã nyâ vúa ãnyí tã mvụ mâ opĩ ní ꞌa. Vúa ãnyí rĩ mâ kómwî ní drị, lãlị́ lịre sụ́rụ́ mụdrị́lị́mbị́ ẹ̃rị̃ Ị́saraị́lị̃ drị́ rĩ ídrị.”
Yẹ́zụ̃ ịtẹꞌdẹ̃ Péturũ ã ani gãka ni rá
31 “Sị̃mọ́nẹ̃, Sị̃mọ́nẹ̃, sĩtánĩ ọzị ãnyi ecelé ãnya áni rá. 32 Kí mílegĩ nyí ní rá, Sị̃mọ́nẹ̃, nyâ aꞌị̃ keꞌdé dru ku. Vúa jõ nyêngwí Ópí drị́ rá, nyimbá nyâ adrụ̂nzi tị ã ásị́ ni vũjó andra gá.” 33 Kí Sị̃mọ́nẹ̃ ingwi, “Ópí, ma bábá mụjó nyetrõ mãꞌbụ́sụ̃ ꞌa vúa drãjó nyétrõ.” 34 Yẹ́zụ̃ aꞌị̃, “Mãꞌjọ nyí ní, Péturũ, drĩsó ãꞌụ́lọ́gọ́ oca cĩrá sõre endrũ ku, nyí ma nị̃ka ọ̃tẹ ni gã vú ina.”
35 Ongo Yẹ́zụ̃ ọzị ãꞌi, “Andrani azé ãnyi õfú losó rĩi nzere kũbẽngú, sítĩ kusâ mvũka ãkó rĩ, tã zị̃ ãnyi ní ị̃yọ rĩi aꞌã yã?” Aꞌị̃kî, “Ị̃yọ.”
36 Ọꞌjọ ãꞌi ní, “Kí drĩálê jõ nyí drị́ sãwú vúa kũbẽngú aꞌã nyĩꞌdụ trõ; vúa jõ nyídrị́ ị́lị́gọ́ ị̃yọ, nyazị nyã bõngú kãꞌbwĩ ni rá ongo nyĩ jẹ ãlu. 37 Osĩru, ‘Vúa óꞌbã ani wélí enzĩꞌbá drị̂ íꞌa,’ mãꞌjọ ãnyi ní, ꞌdĩi tã sĩlé õndo ẹmụ́re ridéꞌdi mâ rụ gá rĩ ꞌi. Õo, tã sĩlé mâ drị̃ gá ꞌdĩi cẽ ká ridé rá.”
38 Mãju ọꞌjọ, “Nyĩndre, Ópí, ꞌdíꞌa ị̃lị̃gọ́ ẹ̃rị̃.” Yẹ́zụ̃ ingwi, “Lẹ́ꞌdị̃ oca rá.”
Yẹ́zụ̃ ilegĩ ꞌbẹ́ lũgbá kwe ní drị
39 Yẹ́zụ̃ ọmụ ãngwé jõzí rĩ áni ꞌbẹ́ lũgbá kwe drị́ rĩ ígá, anâ mãju tị oko vú ani trõ. 40 Ocakî kãré ní gá ꞌdĩ, Yẹ́zụ̃ ọꞌjọ ãꞌi ní, “Ãnyilegĩ áwusĩ ní îtá dru ãnyi kpé.”
41 Yẹ́zụ̃ ọzẹru ãꞌiã lãga gá sĩ lọ́lụ́ ọ́nị́ walé ꞌdeꞌdi ĩlẽ rĩ ípí, ọwọ vụ̃rụ́ oko ilegĩ, 42 “Mâ Átâ, jõ ĩlẽ rá rĩ, nyĩꞌdụ má ní tẹ́rị́ ꞌdĩi pí, kí mâ lẽ ꞌi ku, lẽ nyídrị̂ kidéru nĩ.” 43 Mãláikã Rũbãngã drị́ ꞌbụ̃ ꞌa rĩi ịtẹꞌdẹ̃ru Yẹ́zụ̃ ní oko imbá ásị́ ani. 44 Anâ ásị́ lãzá ní ꞌa sâ ilegĩ okpõsĩ vúa ọ̃rị suꞌdia rĩi orĩ kôtĩ cõcõ vụ̃rụ́ ãrî áni.
45 Ilegĩ vú ongwi anâ mãju drị́, ẹsụ́ kákî ọꞌdụ̂ko, ãꞌdusĩ ásị́ lãzá indẽ ãꞌi rá sĩ ꞌi. 46 Oko ọzị aꞌi, “Ãnyí ọꞌdụ̂ko ãꞌdu sĩ? Ãnyĩnga ọrụ, ãnyilegĩ áwusĩ itá dru ãnyi kpé.”
Óko Yẹ́zụ̃ ni cí
47 Drĩsó Yẹ́zụ̃ olú tã anâ tị gá rĩ ꞌjọre gá, mgbe ꞌbá ãmgbụ́ Yụ́dã ni mãju mụdrị́lị́mbị́ ẹ̃rị̃ rĩ ã ãlu ã ejílé nĩ rĩi ecákî rá, Yụ́dã ọzẹru Yẹ́zụ̃ ni dũre élémvú ꞌa. 48 Kí Yẹ́zụ̃ ọzị ani, “Yụ́dã, nyí Ọ́rị Mãꞌdị́ ni azị dũka élémvú ꞌa sĩ yã?”
49 ꞌBá Yẹ́zụ̃ ã vû ni okoka rĩi ondrekî tã ꞌdĩi ꞌdĩ, ọꞌjọkî, “Ópí, ãmã gã ãꞌi ị̃lị̃gọ ãma drị́ ꞌdĩ sĩ yã?” 50 Vúa mgbe ãlu rĩi oga ọ̃pị́gọ́ ãmbá ndẽꞌdia ꞌbá tã azĩka Rũbãngã ní rĩ drị̂ rĩ ã bị́ nyãré rĩi tụ̂.
51 Kí Yẹ́zụ̃ ọꞌjọ, “Lẹ́ꞌdị́ ni ku!” Oko ẹlọ ọ̃pị́gọ́ ꞌdĩ ã bị́ ni drị́ sĩ mgbe oja rá.
52 Ongo Yẹ́zụ̃ ọꞌjọ, amba tã azĩka Rũbãngã ní ꞌdĩ tị ní, amba ãsĩkãriã jó Rũbãngã drị́ ã lãga tẹ̃ka rĩi vúa amba zị̃ tị trõ rĩ tị evũka ani koka rĩ ní, “Má mũndãrã óꞌjá ꞌdịka rĩ ã drị̃ nze yã, ãnyã evũjó ị̃lị̃gọ vúa ọ̃ndọ́ trõtrõ rĩ ꞌi? 53 Ọꞌdụ́ cị̃drú ma ãnyetrõ jó Rũbãngã drị̂ ã dịfọ ní drị, ongo kwá ĩko ma kurũ. Kí ꞌdĩi lê, ãnyã sáã ꞌi, jõ vũmũdĩ ecá rá, sĩtánĩ ká vũ ase nĩ.”
Péturũ ogã Yẹ́zụ̃ ni mgbẹ́
54 Ongo okokî Yẹ́zụ̃ ni ꞌdĩ, ojikî ani ãmbá ndẽꞌdia ꞌbá tã azĩka Rũbãngã ní rĩ drị́ ꞌbãrụ́. Péturũ oko ãꞌiã vû ni trõ. 55 Odũkî ãcí dịfọ drị ágágá orĩkî kãré ãlu gá láka, Péturũ isâ orĩ ãꞌi trõ náꞌa. 56 Záángwá ẹꞌbụ̃ idéꞌdi náꞌa rĩi ondre Péturũ orĩ ani sâ ãcî ní tị. Ondre ani lílí, oko ọꞌjọ, “Ágó ꞌdĩi mãꞌdị́ ãlu ani Yẹ́zụ̃ ã vû ni okoꞌdi rĩ ꞌi.”
57 Kí Péturũ ogã mgbẹ́, ọꞌjọ, “Ị̃zị̃ ꞌdĩ, ánị̃ mãꞌdị́ lẹ́ꞌdị̃i ku.”
58 Nã ívú mãꞌdị́ zị̃ isâ ondre ani ọꞌjọ, “Nyi sâ nyi ãꞌiã ãlu ꞌi.” Péturũ ingwi, “Ẹ́gọ́rị́, ma ani ꞌi ku.”
59 Sáã ĩré ãlu vú, zị̃ isâ ọꞌjọ mọ́rị́ sĩ, “Gbádru ágó ꞌdĩi õndo ãꞌi Yẹ́zụ̃ tị trõ, ãꞌdusĩ ani Gãlị̃lẹ́ãgọ́.”
60 Péturũ ingwi, “Ágó ꞌdĩ, ánị̃ nyi tã ꞌjọ ãꞌdu drị yã ni ku!” Mgbe anâ tã ꞌjọre rĩi, ãꞌụ́lọ́gọ́ osõ cĩrá rá.
61 Ópí ẹcọru ondre tã mgbe réré Péturũ drị́. Mgbesâ Péturũ erã tã Ópí ã ꞌjọlé aní ní rĩi rá, “Ãꞌụ́lọ́gọ́ kolú cĩrá sõre lõvũrú sâ, kệsụ́a ígã ma mgbẹ́ vú ina.” 62 Ongo Péturũ ọzẹru mãrã gá ãngwé ẽsi oko owó okpõsĩ ásị́ lãzá sĩ ꞌi.
Edekî vúa omgbakî Yẹ́zụ̃ ni
63 ꞌBá Yẹ́zụ̃ ã lãga ni ụtẹ̃ka rĩi edekî ani vúa omgbakî ani trõ. 64 Umbékî anâ mị ni cí, omgbakî ani, oko ọzịkî, “Pũrũfétã, nyĩꞌjọ ãma ní, ãꞌdi omgba nyi nĩ?” 65 Oko uꞌdákî ani liri lãꞌdá ẽkpadrú sĩ.
Yẹ́zụ̃ ní vụraꞌbá andra
66 Vũ ọwị́ ꞌdĩ, vụra amba Yụ̃dẹ́ị̃ꞌbá drị̂, amba tã azĩka Rũbãngã ní rĩi vúa lãpọ̃nyịã cárá Mũzê drị́ ịnị̃ka rĩ trõ, otrakî ru kãré ãlu gá, ongo ejíkî Yẹ́zụ̃ ni ãꞌi ándra. 67 Ọꞌjọkî, “Jõ nyi Kị̃rị́sịtọ̃ ꞌi rĩ, nyĩꞌjọ ãma ní.” Kí Yẹ́zụ̃ aꞌị̃, “Jõ maꞌjọ ma Kị̃rị́sịtọ̃ isâ, ãnyaꞌị̃ ma ku. 68 Vúa mãzị ãnyi lãzị́ sĩ sâ, ãnyaꞌị̃ ma ku. 69 Kí ngajó drĩádru ndị̃ andra gá, Ọ́rị Mãꞌdị́ kórĩ Rũbãngã Õkpóꞌdị́pị ã drị́ nyãrê ní gá.” 70 ꞌBá ꞌdĩi cị̃drú ọꞌjọkî, “Nyi Rũbãngã ã Ngwápị ꞌi yã?” Yẹ́zụ̃ aꞌị̃, “Ĩꞌjọ ma ani ꞌi.” 71 Ọꞌjọkî, “Áꞌdi sãdĩnĩ zị̃ ndrũ ãꞌdu sĩ? Éri tã anâ ꞌjọlé rĩi ãmã bị́ sĩ!”