21
Ãzi ị́zị́ ãwị́zị́ rĩ drị́ ꞌi
1 Yẹ́zụ̃ ã olúre jó Rũbãngã drị́ rĩ íꞌa rĩi, ondre ꞌbá kwọ̃rọ̃nị rĩ ká ãꞌiã azĩ ni ꞌbã ẽvú azĩ drị̂ íꞌa. 2 Ongo ondré ãwị́zị́ tã ãkó rĩ oꞌbe sĩlíngĩ ékwí ẹ̃rị̃. 3 Yẹ́zụ̃ ọꞌjọ, “Mãꞌjọ ãnyi ní lọ́kụlọ́kụ, ãwị́zị́ tã ãkó ꞌdĩ ã sítĩ ꞌbelé rĩ ondẽ ꞌbá ãmgbụ́ rĩ drị́ rĩi rá. 4 Ãꞌdusĩ oꞌbekî tã ãꞌidrị́ nzá rĩ ã drị̃ ni áwu, kí ãwị́zị́ ꞌdĩ lê oꞌbe õndo tã anídrị́ aꞌã rĩi kpộdrú.”
Yẹ́zụ̃ ká tã ꞌjọ jó Rũbãngã drị́ rĩ ã rĩvolõka ní drị
5 ꞌBá zị̃ tị Yẹ́zụ̃ ã vû ni okoka rĩi orĩkî tã nzere õvi jó Rũbãngã drị̂ ꞌa losõ igirãjóadrú ọ́nị́ pẹ̃lẹ̃rẹ rĩ sĩ rĩ ã endréjó vúa azĩ kwẽlé rĩ trõ rĩ ídrị. Kí Yẹ́zụ̃ ọꞌjọ, 6 “Tã cị̃drú ãnyã ndrelé ꞌdĩ ã sáã kêcá rá. Ọ́nị́ ãlusâ eꞌberu ọ́nị́ zị̃ ídrị ku. Ọ́nị́ cị̃drú ịzọ̃a vụ̃rụ́.”
7 ꞌBá anâ vû ni okoka rĩi ọzịkî ani, “Lãpọ́nyị́, tã nyâ ꞌjọlé ꞌdĩ tị ká ridé ãꞌdungá, oko nị̃jóadrú tã ꞌdĩ tị ká ridé ni ãꞌdu kị́tẹꞌdẹ̃a nĩ?”
8 Yẹ́zụ̃ ọꞌjọ ãꞌi ní, “Ãnyĩmba õkpó, ãlusâ óꞌbã mãꞌdị́ zị̃ kunzã ãnyi ku. ꞌBá ãmgbụ́ kévũ kộꞌjọa ãꞌi ká tã nze mọ́rị́ mádrị́ sĩ, vúa kákî ꞌjọa ãꞌi Kị̃rị́sịtọ̃ ꞌi. Vúa kákî ꞌjọa sáã vũ tị ni ẹkọ́jó rĩ ecá drĩâ rá, kí ãlusâ, áꞌị̃ ãꞌiã vû ni koka ku. 9 Jõ ãnyeri óꞌjá ꞌbá sụ́rụ́ mgbị́mgbị rĩ ílọ̃fọ́ vúa óꞌjá lẹcọ drị́ trõ, kólẽ ọrị̃ kõko ãnyi ku. Ãꞌdusĩ ꞌdĩi tã kólẽ kidéru rĩ ꞌi, kí ꞌdĩi vũ tị ã ẹkọ́ka ꞌi ku.”
Icandĩ kwẽlé ꞌbá Yẹ́zụ̃ ã vû ni okoka rĩ ní rĩi
10 Yẹ́zụ̃ ọꞌjọ ãꞌi ní, “Sụ́rụ́ ká ruꞌdị sụ́rụ́ trõ, vúa õpi ká ruꞌdị õpi trõ. 11 Oko vũ ká royo okpõ sĩ, vị́ vúa lãzá drị̃lé mgbị́mgbị rĩ trõ kôlú kãré ãmgbụ́ gá, ongo tã ọrị̃ kwẽka ꞌbá ní rĩ tị lẹtẹ̃ rẹ̃tụ́ aꞌụ̃jó rĩ trõ rĩ ká rịtẹꞌdẹ̃ ꞌbụ̃ ꞌa rá. 12 Kí tã ꞌdĩ ꞌbâtị oca ridére ku, kakî ãnyi oko, kakî ãnyi ní icandĩ kwẽ, kakî ãnyi ji jó lemú drị̂ íꞌa lẹꞌjọ́ alịjó ãnyi ídrị, ãnyi usújó mãꞌbụ́sụ̃ ꞌa, vúa áꞌdi ãnyi aji õpi andra amba vũ drị́ trõ, mâ vû ni okoka sĩ. 13 ꞌDĩi kêyá kôlú ãnyi ní andra losõ õfú losó rĩ nzejó mádrị ãꞌi ní rĩ ꞌi. 14 ꞌDĩsĩdrú ọrị̃ kõko ãnyi ku, ꞌdị́ ãnyi ipajó ãnyévũ ãnyí ãꞌdu ꞌjọ áwu yã ꞌi. 15 Ãꞌdusĩ mêyá má ãnyi ní lẹꞌjọ́ vúa cirĩ trõ kwẽ ma ꞌi, áwusĩ ní óꞌjáꞌbâzí ãnyidrị́ kõza drú ãnyi ku. 16 ꞌBá ãnyi ílãga ĩré réré ãnyi tịka rĩ ꞌi, ãnyã adrụ̂nzi ꞌi, ãnyã kãkâ tị, vúa ãnyã ozí trõ kakî ãnyi kwẽ ãnyã óꞌjáꞌbâzí tị ídrị́ ꞌa, oko kakî ãnyi zị̃ tị isâ ụꞌdị rá. 17 Ongo ꞌbá cị̃drú kévũ ká ãnyi gã mgbẹ́ mâ vû ni okoka sĩ ꞌi. 18 Kí drị̃ꞌbí ãnyi ídrị rĩi ãlusâ ẹgwẹ̃ ku. 19 Ãnyã tã mika wã ni ká ãnyi ní lari ejí rá.”
Yẹ̃rụ́sãlẹ́mẹ̃ ni ivolõka ꞌi
20 Yẹ́zụ̃ oko ọꞌjọ, “Jõ índre Yẹ̃rụ́sãlẹ́mẹ̃ ni mũndãrã óꞌjáꞌbâzí drị̂ oce lãga ani gbí, mgbe ãnyí nị̃a sáã ivolõjóadrú rĩ ecá rá ni ọ̃tẹ. 21 Ongo ꞌbá Yụ̃dẹ́ã ꞌa rĩi kọ̃fẹ̃kî ꞌbẹ́ ꞌa, ꞌbá olúka Yẹ̃rụ́sãlẹ́mẹ̃ ꞌa rĩi dũbã sĩ kólẽ kọ̃fẹ̃kî ẽmíẽmí pí, vúa ꞌbá ãngwé ẽsi rĩi sâ kõtõkî ganyi ní ꞌa ku. 22 Ãꞌdusĩ nã ꞌbãtị ọꞌdụ́ lãmgbá ẹsụ́jó rĩ ꞌi, áwusĩ ní tã rusĩꞌdi Bụ́kụ̃ Ọlẹ rĩ íꞌa rĩi kidéru drú, õndo anâ rusĩka rĩ áni. 23 Jõ ọꞌdụ́ nã ecá nĩ ꞌi rĩ, ũkûnzi rụ anzị vúa ꞌbácírí indruka rĩ ní kôlú ũnzí. Icandĩ rẹ̃tụ́ rĩ kôꞌde vũ ꞌdĩ ídrị rá, ãꞌdusĩ lãmgbá Rũbãngã drị̂ kệmụ́ kôꞌde ꞌbá ꞌdĩ ídrị. 24 Áꞌdi evũ áꞌdi ꞌbá zị̃ tị ọlị́ ị́lị́gọ́ sĩ, vúa áꞌdi zị̃ tị ji ọ̃pị̂gọ drú sụ́rụ́ cị̃drú ꞌa sĩ rá. Jụ̃rụ kévũ ká Yẹ̃rụ́sãlẹ́mẹ̃ ni nzu pí vúa kákî olú láka ndị̃ sáã ãꞌi drị́ ã ẹkọ́jó rĩ ínga.”
Ọ́rị Mãꞌdị́ ã eyáka ꞌi
25 “Tã aꞌụ̃jó rĩ kêyá ká rịtẹꞌdẹ̃ ị̃tụ́ ꞌa, ĩmbá ꞌa, vúa lẽlẽgó ꞌa rá. Sụ́rụ́ cị̃drú vũ drị́ rĩi kévũ ká icandĩ ta rá, adrĩ rẹ̃tụ́ rĩ kêyá ká ãꞌi ko ụ́ꞌdụ́kụ́ mẹ̃rị ꞌa kãgbãkãgbã drị́ sĩ cí. 26 Ọrị̃ sĩ tã ká ꞌbá uꞌbé, tã unzi eyáka ridéka andra gá rĩ sĩ, ãꞌdusĩ tã cị̃drú ꞌbụ̃ ꞌa rĩ tị ká royo rá. 27 Nã íngá ꞌbá kôndréa Ọ́rị Mãꞌdị́ kêsí rụ́ꞌbụ ꞌa sĩ, okpõ vúa ẹ̃kụ́ rẹ̃tụ́ rĩ trõ. 28 Jõ tã ãꞌi drú ꞌdĩ ꞌbâtị iꞌdó ridéka nĩ, ãnyĩmba pá sĩ vúa ãnyidũ ãnyã drị̃ tị ọrụ, ãꞌdusĩ lari ãnyi drị̂ ĩré.”
Lẹꞌjọ́ ékwí ẹ́lẹ́wụ́ drị́ ꞌi
29 Yẹ́zụ̃ ọꞌjọ ãꞌi ní lẹꞌjọ́ ékwí ꞌdĩ ꞌi, “Ãnyĩndre drĩ ẹ́lẹ́wụ́ vúa kwe cị̃drú trõ. 30 Jõ mgbe ĩndre bị́ úꞌdí rĩ kúrũ, ãnyí nị̃a drĩâ áyi ĩré ni ọ̃tẹ. 31 Ãluá rĩ áni, jõ ĩndre tã ꞌdĩ ꞌbâtị ká ridé ꞌi rĩ, ãnyĩnị̃ ọ̃tẹ opĩ Rũbãngã drị̂ rĩi ĩré. 32 Mãꞌjọ ãnyi ní lọ́kụlọ́kụ, ꞌbá drĩádru ꞌdĩi oca drãre kpộ ku, kệsụ́a tã ꞌdĩ ꞌbâtị idéru rá. 33 ꞌBụ̃ vũ trõ kệkọ́ rá, kí lẹꞌjọ́ mádrị̂ lê ãlusâ ẹkọ́ ku.”
Ãnyolú bábá
34 “Ãnyã mị kolú mgbọ, áwusĩ ãnyã lidrĩ ni tã vũ drị ꞌdíꞌa rĩi ipá ku, õvidrú andróka, vúa ũrãtá lidrĩ vũ drị ꞌdíꞌa rĩ drị́ trõ rĩ ꞌi, ku irĩ ọꞌdụ́ nã ká ãnyi ọrọ kêndré mãtẹ́gọ̃ áni. 35 Ãꞌdusĩ ọꞌdụ́ ani nã ẹmụ́ka ni ká ꞌbá cị̃drú vũ drị rĩ oyo rá. 36 Ãnyã mị kolú tẽsâ mgbọ, vúa ãnyilegĩ sáã cị̃drú sĩ mọ́rị́ ẹsụ́jó tã cị̃drú ẹmụ́ka ridéka rĩ unájó, áwusĩ ãnyĩmba drú Ọ́rị Mãꞌdị́ ní ándra wã.”