Õfú Losó Lụ́kã ã Sĩlé rĩi 20

Áꞌdi okpõ Yẹ́zụ̃ ã tã idéjó rĩi zị

¹ Ọꞌdụ́ zị̃ sĩ Yẹ́zụ̃ orĩ ká ꞌbá ịnị̃ jó Rũbãngã drị̂ rĩ ã dịfọ ní gá, vúa ká õfú losó rĩi nze ãꞌi ní, amba ꞌbá tã azĩka Rũbãngã ní rĩ tị lãpọ̃nyịã cárá Mũzê drị̂ ịnị̃ka rĩ trõ vúa amba vụra drị̂ trõ, evũkî drị́arụ́. ² Ọꞌjọkî aní ní, “Nyĩꞌjọ ãma ní, okpõ nyídrị́ nyâ nyúmá idéjó rĩi engá íngo, ãꞌdi okwẽ nyí ní okpõ ꞌdĩi nĩ?”

³ Yẹ́zụ̃ aꞌị̃, “Ma sâ má ãnyi ní lãzị́ zị ãlu. Ãnyĩꞌjọ má ní, ⁴ bãtị́sịmụ̃ Yõánã drị́ rĩi engá Rũbãngã drị̂, jõ nósĩ ꞌbá drị́?” ⁵ ꞌBá ꞌdĩ iꞌdókî tã amálé ãꞌi ílọ̃fọ́, ọꞌjọkî, “Jõ ọ́ꞌjọ, ‘Engá ꞌbụ̃ ꞌa’, kộꞌjọa, ‘Jõ ꞌdí ni rĩ, ãnyaꞌị̃ ani ku ãꞌdu sĩ?’ ⁶ Kí jõ ọ́ꞌjọ, ‘Engá ꞌbá drị́,’ ꞌbá ꞌdĩi kpộdrú ká ꞌbá uví ọ́nị́ sĩ rã, ãꞌdusĩ ịgẹnị̃kî Yõánã ni pũrũfétã ni rá.” ⁷ ꞌDĩsĩdrú aꞌị̃kî, “Ãnị̃ engá íngõ yã ni ku.” ⁸ Yẹ́zụ̃ isâ oko aꞌị̃, “Má sâ kwá mị́tẹꞌdẹ̃ ãnyi ní okpõ mâ tã ꞌdĩi idéjó rĩi engá íngo yã ni ku.”

Oꞌdã ꞌbá ámvụ́ ukwẽka rĩ drị́ ꞌi

⁹ ꞌDĩ ívú Yẹ́zụ̃ otã ꞌbá rutraka náꞌa rĩ ní oꞌdã ꞌdĩ ꞌi, “Mãꞌdị́ zị̃ osa ámvụ́ áꞌbáláꞌbãngá drị́ ꞌi, ꞌdĩ ívú, oko eꞌbe ámvụ́ ni ꞌbá zị̃ tị ní ukwẽlé ukwẽ, oko oya vũ lọ́lụ́ gá pí, olú láka pãrã. ¹⁰ Sáã áꞌbáláꞌbãngá ni tĩjó rĩi ecáꞌdĩ, ọzẹ tịluza ãlu ꞌbá ámvụ̂ ni ukwẽka rĩ drị́, áwusĩ ní kõkwẽkî drú aní ní anâ áꞌbáláꞌbãngá ã lê ni. Kí ꞌbá ꞌdĩ omgbakî tịluza ꞌdĩi, oko ọzẹkî ani drị́drị́ ni pí. ¹¹ Ámvụ́ꞌdị́pị ọzẹ tịluza zị̃, kí ani sâ, omgbakî, oko inywarĩkî ani oko ọzẹkî ani sâ ani drị́drị́ ni pí. ¹² Zị̃anígá ámvụ́ꞌdị́pị ọzẹ tịluza inajóa rĩ ni, idrákî ani, oko oꞌbekî ani ãngwé. ¹³ Ámvụ́ꞌdị́pị ọꞌjọ, ‘Má drĩâ ãꞌdu idé? Má mâ ꞌbarâ ni mâ lẽlé ndrõ rĩ zẹ õndo áwu, nósĩ kákî ani lê anâ tị ni eri rá.’ ¹⁴ Kí ꞌbá ámvụ̂ ní ukwẽka rĩ tị kõcẽ ãꞌi kõndre ani ꞌdĩ, ọꞌjọkî ãꞌi ílọ̃fọ́, ‘ꞌDĩi anâ ꞌbarâ ni õndo rĩ ꞌi, ãnyĩꞌbã ộꞌdịkî ani kpó, nã ívú ámvụ̂ ni kôko kôlú ꞌbá ní.’ ¹⁵ Okô oꞌbekî ani ámvụ́ áꞌbáláꞌbãngá drị̂ ꞌdĩ íꞌa sĩ ãngwé, ọꞌdịkî ani kpó.

“Ĩrã ámvụ́ꞌdị́pị ká ãꞌdu idé ꞌbá ꞌdĩ írụ ꞌi? ¹⁶ Kêyá ká ꞌbá ꞌdĩ ụꞌdị́ rá, kôko ká ámvụ́ áꞌbáláꞌbãngá drị́ ꞌdĩ kwẽ ꞌbá zị̃ drị́.” ꞌBá ꞌdĩ kõcẽ ãꞌi keri tã ꞌdĩi ꞌdĩ, ọꞌjọkî, “Tã ꞌdí ni ꞌdĩ lê kidéru ku!” ¹⁷ Yẹ́zụ̃ ondre ngá ãꞌidrị́ cọrọkpọ oko ọzị ãꞌi, “Jõ ꞌdí ni rĩ, tã rusĩꞌdi Bụ́kụ̃ Ọlẹ rĩ íꞌa rĩ ã ékwî ni ãꞌdu?

‘Ọ́nị́ ꞌbá jó bĩka rĩ ã gãlé mgbẹ́ rĩ

engwí ọ́nị́ mbaꞌdi gbúnyú gá rĩ ꞌi.’

¹⁸ ꞌBá cị̃drú eꞌdéka ọ́nị́ ꞌdĩ ídrị rĩi kúnyõ kúꞌjúkuꞌjú, vúa jõ ọ́nị́ ꞌdĩ eꞌdé mãꞌdị́ zị̃ drị ni, kônyia fúfú.”

Mụ̃sọ́rọ̃ kwẽka Cẹ́zẹrọ̃ drị́

¹⁹ Lãpọ̃nyịã cárá drị̂ tị ãꞌi amba ꞌbá tã azĩka Rũbãngã ní rĩ trõ, orĩkî lẹ́tị ndrụ̃re okpõsĩ Yẹ́zụ̃ ni kojó mgbe sáã nã sĩ cí, ãꞌdusĩ ọnị̃kî ọ̃tẹ orĩ oꞌdã ꞌdĩ tãre ãꞌi ídrị ꞌi. Kí ꞌbá ã olúka aꞌã sĩ, ọrị̃ oko ãꞌi cí. ²⁰ ꞌDĩ sĩ orĩkî ani tị̃re, vúa sáã ándá rĩ ndrụ̃re ani kojó, ãꞌi kõkwẽ drú ani okpõ ꞌbá vũ aseka rĩ drị̂ drị́. Ọzẹkî ꞌbá ãꞌi ꞌbãka kêndré ꞌbá anda rĩ áni rĩ tị anâ bị́ ẹyịre, vúa anâ tị idolĩjó tã anâ nzelé rĩ sĩ. ²¹ ꞌDĩ sĩ bị́ꞌbá ꞌdĩ tị ovũ ọzị Yẹ́zụ̃ ni lãzị́ sĩ, ọꞌjọkî, “Lãpọ́nyị́, ãnị̃ ọ̃tẹ nyí tẽsâ tã ándá vúa cẽ rĩi ꞌjọ vúa ịnị̃ áwu, vúa nyóvi ꞌbá ku, nyí nyídrị̂ tẽ bị́ ꞌbã lẹꞌjọ́ Rũbãngã drị̂ ịnị̃re lẹ́tị ándá sĩ áwu. ²² Nyĩꞌjọ ãma ní, cárá aꞌị̃ ãmã kwẽ mụ̃sọ́rọ̃ Cẹ́zẹrọ̃ drị́ ni rá yã, jõ nósĩ ãmã kwẽ ku?” ²³ Ondre mgbe ãꞌiã rã ũnzí lunzã drị́ ꞌdĩi ndrị̃yẹ̃ ꞌdĩ, ọꞌjọ ãꞌi ní, ²⁴ “Ãnyịtẹꞌdẹ̃ má ní dị̃nárịọ̃ ékwí ãlu, rụarụ́ rĩi ãꞌdi ã drị̃ enó, vúa rụ̂ ꞌi?” ²⁵ Aꞌị̃kî, “Cẹ́zẹrọ̃ drị́ ꞌi.” Yẹ́zụ̃ oko aꞌị̃ ãꞌi, ọꞌjọ, “Ãnyĩkwẽ tã Cẹ́zẹrọ̃ drị̂ Cẹ́zẹrọ̃ drị́, vúa tã Rũbãngã drị́ ꞌi rĩi Rũbãngã drị́.” ²⁶ ꞌDĩsĩdrú ọꞌbị̃kî ani itrúlé kọ̃ꞌjọ drú lẹꞌjọ́ ũnzí efũꞌdi aní tị ꞌbá ãmgbụ́ andra rĩ sĩ ni kpé, vúa aꞌụ̃kî aꞌị̃ anâ kwẽlé rĩ sĩ cí, oko ọvụ̃kî cĩrĩ.

Lãzị́ onzíka drị rĩ ꞌi

²⁷ Sãdụ̃cẹ́ị̃ꞌbá ꞌjọka ꞌbá drãka rá rĩi onzí ku rĩ ã zị̃ tị evũ Yẹ́zụ̃ drị́ lãzị́ zịre. ²⁸ Ọꞌjọkî, “Lãpọ́nyị́, cárá Mũzê drị̂ íꞌa osĩru, jõ mãꞌdị́ ã adrụ́pị̃ odra rá, kí eꞌbe anâ ị́zị̂ ni ꞌbácírí ãkó irĩ, kólẽ mãꞌdị́ ꞌdĩ kõkwi anâ adrụ́pị̃ ã ãwị́zị̂ ni, áwusĩ ní kákî ꞌbácírí tị adrụ́pị̃ ní õri drú rá. ²⁹ Ándráni ẹsụ́, adrụ̂nzi zị̃, ãꞌi tụ́dẹ̃rị̃, kãyọ́ rĩi ọꞌdụ ị́zị́ kí odrã drị̃ ãkó. ³⁰ Ẹ̃rị̃jóadrú rĩi okwi ãwị́zị́ ꞌdĩi ꞌdĩ sâ ọtịkî aní trõ ꞌbácírí kurũ, ³¹ vúa inajóa rĩ isâ okwi ị́zị́ ꞌdĩi, oko ãluá rĩ áni, ãꞌi tụ́dẹ̃rị̃ trúwá dru udrãkî ꞌbácírí tịka ãkó. ³² Nã ívú ị́zị́ ꞌdĩ isâ eyá odrã rá. ³³ Kí tôjõ ọꞌdụ́ onzíjó rĩ sĩ, ị́zị́ ꞌdĩ kôlú ãꞌdi drị́ ꞌi, adrụ̂nzi tụ́dẹ̃rị̃ ꞌdĩi kpộ ọꞌdụkî ani rá ꞌdĩ ꞌi?”

³⁴ Yẹ́zụ̃ aꞌị̃ ãꞌi, ọꞌjọ, “ꞌBá ọꞌdụ́ ꞌdĩ sĩ rĩ tị ká rụꞌdụ wã, vúa kákî rukwẽ lãꞌdụ́ gá wã. ³⁵ Kí ꞌbá upẽlé rá ọꞌdụ́ nã ní rĩ tị vúa onzíka vú rĩ tị trõ evũ ọꞌdụkî ũkú ku, vúa évũ ókwẽ ãꞌi ãgo gá sâ ku, ³⁶ vúa evũ udrãkî dị́ sâ ku, ãꞌdusĩ kákî evũ kákî olú mãláikã áni. Ãꞌi ꞌbácírí Rũbãngã drị́ ꞌi, ãꞌiã onzíka drã gá rá sĩ ꞌi. ³⁷ Kí kwesíkwesĩ ꞌa sâ Mũzê ịtẹꞌdẹ̃ pẹ́lẹ́rẹ́ ꞌbá drãka rá rĩ kônzí rá. Ãcí ã gwẹre rụ̃dụ́ ꞌa, kí rụ̃dụ́ ã gwẹre ku nã ꞌi, Mũzê ụngwẹ Rũbãngã ni, ‘Rũbãngã Ãbãrãhámũ drị̂, Ĩsákõ drị̂ vúa Yãkọ́ꞌbọ̃ drị̂.’ ³⁸ Ãꞌdusĩ Rũbãngã ni Rũbãngã ꞌbá lĩdri rĩ drị́ ꞌi, ꞌbá drãka rá rĩ drị́ ꞌi ku, ãꞌdusĩ aní sĩ, ꞌbá kpộ kôlú lĩdri.”

³⁹ Lãpọ̃nyịã cárá drị́ zị̃ tị ọꞌjọ, “Nyáꞌị̃ pẹ́lẹ́rẹ́, lãpọ́nyị́.” ⁴⁰ Nã ívú, mãꞌdị́ zị̃ ani zịꞌdi lãzị́ zị̃ sĩ dị́ ani ị̃yọ.

Kị̃rị́sịtọ̃ ni ãꞌdi ã ngwápị ꞌi?

⁴¹ Yẹ́zụ̃ ọꞌjọ ãꞌi ní, “Ãnyîꞌjọa Kị̃rị́sịtọ̃ ni ọ́rị Dãvị́dẹ̃ ꞌi ni ãꞌdu sĩ? ⁴² Ãꞌdusĩ Dãvị́dẹ̃ ni gbá rĩ isâ ọꞌjọ bụ́kụ̃ Longó drị́ rĩ íꞌa,

‘Ópí ọꞌjọ mâ Ópî ní,

“Nyĩrĩ mâ drị́ nyãré rĩ ígá

⁴³ pákã bị̃ mâ nyâ óꞌjáꞌbâzí ni ꞌbãjó

nyâ págáda gá kpọmgbọ drú pá tị̃jó rĩ drú rĩ ígá.”’

⁴⁴ Dãvị́dẹ̃ kụ́ngwẹa anâ ‘Ópí’ ꞌi, jõ ꞌdí ni rĩ kôlu anâ ngwápị ꞌi ni íngóni?”

Yẹ́zụ̃ ã tã lãpọ̃nyịã cárá drị́ ã idélé rĩ gãka ꞌi

⁴⁵ Laki ã anâ lẹꞌjọ́ ni erire rĩi, Yẹ́zụ̃ ọꞌjọ ꞌbá anâ vú okoka rĩ ní, ⁴⁶ Ãnyolú mị trõ lãpọ̃nyịã cárá drị̂ tị sĩ ꞌi. Kákî bõngú kãꞌbwị̃ rĩi usú áwu, áwusĩ drú sọ́kọ̃ ꞌa sĩ sâ ộzị drú ãꞌi lãrú sĩ, vúa kákî kãré lãrú drị́ ꞌdụ jó lemú drị̂ íꞌa vúa ị̃tụ́ ọ́gbọ́rọ́ gá sĩ, sâ tẽ áwu. ⁴⁷ ꞌBá ãꞌi ꞌdĩi ká ãwị̃zị ni tã ipá vúa kákî ilegĩ ꞌjọ ãzo, áwusĩ ní ꞌbá kõndre drú ãꞌi. ꞌBá ꞌdĩ áni ꞌdĩi ká lãmgbá rẹ̃tụ́ réré rĩ ẹsụ́ áwu.