Õfú Losó Lụ́kã ã Sĩlé rĩi 19

Zãkẹ́ọ̃ ni mụ̃sọ́rọ̃ traꞌdi rĩ tị Yẹ́zụ̃ trõ

¹ Yẹ́zụ̃ okwí Jẹ̃rị́kọ̃ ꞌa oko orĩ kálị arụ́ sĩ, ² ẹsụ́ mãꞌdị́ zị̃ị náꞌa aꞌã, rụ́ ani Zãkẹ́ọ̃ ꞌi. Ani ãmbá ꞌbá mụ̃sọ́rọ̃ traka rĩ drị́ ꞌi vúa drị́arụ́ limi nzá. ³ Olẽ Yẹ́zụ̃ ni ndreka, kí anâ olúka ãlị́ vúa ꞌbâ olúka ãmgbụ́ sĩ, omã ani ndrelé kpé. ⁴ ꞌDĩ sĩ, olũ andra gá, lẹ́tị Yẹ́zụ̃ ã alịre gá sĩ rĩ ígá, oko ọtụ ẹ́lẹ́wụ́ sị́, ani kõndre drú Yẹ́zụ̃ ni wã. ⁵ Yẹ́zụ̃ oca láka ꞌdĩ, ondre ngá ọrụ, ọꞌjọ aní ní, “Zãkẹ́ọ̃, nyẹsị́ vụ̃rụ́ ezẽezẽ, ãꞌdusĩ endrũ kólẽ molú nyí drị́ jó gá.” ⁶ Mgbesâ Zãkẹ́ọ̃ ẹsị́ vụ̃rụ́ ezẽezẽ, aꞌị́ Yẹ́zụ̃ ni anzõ rẹ̃tụ́ rĩ sĩ aní drị́ jó gá. ⁷ ꞌBá kpộdrú tã ꞌdĩ ndreka rĩi iꞌdó uzúka, “Ọmụ ãmụ́ dru enzĩꞌbágọ́ rĩ drị́ jó gá.”

⁸ Zãkẹ́ọ̃ oko onga ọrụ, ọꞌjọ Ópí ní, “Nyĩ ndre drĩ, Ópí! Drĩâ má tã mádrị́ aꞌã rĩ ã nụ̃sụ̃ ni kwẽ ꞌbá tã ako rĩ ꞌbâtị ní, vúa jõ múnzu mãꞌdị́ drị́ tã rá, má tị ani ingwi nã ítí, nã ítí vú ịsụ.” ⁹ Yẹ́zụ̃ ọꞌjọ aní ní, “Endrũ lari ecá jó ꞌdĩ íꞌa rá, ãꞌdusĩ mãꞌdị́ ꞌdĩi sâ ꞌbará Ãbãrãhámũ drị́ ꞌi. ¹⁰ Ọ́rị Mãꞌdị́ eyá ꞌbá ẹgwẹ̃ka dị̃ rĩ ụndrụ̃ sĩ vúa ãꞌi arire.”

Lẹꞌjọ́ ékwí ẹꞌbụ̃ꞌbá mụdrị́ rĩ drị́ ꞌi

¹¹ Ãꞌiã drĩsó Yẹ́zụ̃ ã tã ꞌjọlé rĩi erire rĩi, onze ãꞌi ní tã lẹꞌjọ́ ékwí sĩ, ãꞌdusĩ anâ ecáka Yẹ̃rụ́sãlẹ́mẹ̃ ní gá ĩré sĩ, orãkî sĩ opĩ Rũbãngã drị́ rĩi ĩré kêcá, oko ọꞌjọ ãꞌi ní lẹꞌjọ́ ékwí ꞌdĩ ꞌi ịtẹꞌdẹ̃jóadrú opĩ Rũbãngã drị̂ iꞌdó drĩádru ku. ¹² Ọꞌjọ, “Mãꞌdị́ ọ̃kụ́ trõ rĩi onga yare vũ lọ́lụ́ gá, ꞌbá ní ani eꞌbãjó ópí dru ꞌbá anídrị̂ ní. ¹³ Oca drĩsó yare ku, ụngwẹ anâ ẹꞌbụ̃ꞌbá mụdrị́ rĩ tị, okwẽ ãꞌi ní sítĩ ẹꞌbụ̃ꞌbá ukwẽꞌdi ĩmbá ina wã rĩ ꞌi ịtị́lé bị̃ kõfũ ca ọꞌdụ́ anâ engwíjó rĩ íngá. ¹⁴ Kí ꞌbá anídrị́ vũ drị rĩi olẽkî ani ku kwá, ọzẹkî ꞌbá vú arụ́ õfú ꞌdĩ trõ, ‘Ãlẽ mãꞌdị́ ꞌdĩ kolú ãmã ópî ꞌi ni ku.’ ¹⁵ Kí éꞌbã ópí dru rá, oko engwí ꞌbãrụ́. Ongo ụngwẹ anâ ẹꞌbụ̃ꞌbá anâ sítĩ eꞌbere gá rĩ ꞌbâtị, áwusĩ ani kọ̃nị̃ drú lọ́ꞌdẹ́ ãꞌiã ẹsụ́lé sítĩ nã sĩ rĩ ni. ¹⁶ Ẹꞌbụ̃ꞌbágọ́ atịjóa rĩi ẹmụ́ ọꞌjọ, ‘Ãmbá, sítĩ nyâ kwẽlé nã ẹsụ́ sítĩ nyâ kwẽlé nã ítí nã ítí vú mụdrị́.’ ¹⁷ Anâ ãmbá aꞌị̃, ‘Nyîdé cuwí, ẹꞌbụ̃ꞌbágọ́ losó rĩ! Nyâ olúka tã gãádru rĩ ígá gẹ́nị́ trõ sĩ, nyôlú ãjụ́gọ́ ganyi mụdrị́ drị̂ ꞌi.’ ¹⁸ Ẹ̃rị̃jóa rĩi ẹmụ́ ọꞌjọ, ‘Nyâ sítĩ kwẽlé rĩi ẹsụ́ lọ́ꞌdẹ́ nyâ kwẽlé nã ítí nã ítí vú tọ̃ụ́.’ ¹⁹ Anâ ãmbá aꞌị̃, ‘Nyi sâ nyôlú ãjụ́gọ́ ganyi tọ̃ụ́ drị̂ ꞌi.’

²⁰ “Ẹꞌbụ̃ꞌbágọ́ zị̃ rĩ ẹmụ́ ọꞌjọ, ‘Ãmbá, nyâ sítĩ ni ꞌdĩ, áli rụ ani bõngú sĩ, ámba tã ani cí, ²¹ ãꞌdusĩ má nyí sĩ ãdrí, nyi mãꞌdị́ anyá rĩ ꞌi, nyí tã ꞌdụ kãré nyâ tã ni tã mbare kurũ rĩ ígá, vúa nyí ãnyá lwã kãré nyâ ãnyá yĩre kurũ rĩ ígá.’ ²² Anâ ãmbâ ingwi, ‘Má lẹꞌjọ́ nyídrị̂ alị õndo nyâ tị ã vú sĩ, nyi ẹꞌbụ̃ꞌbágọ́ ũnzí ꞌdĩ, íꞌjọ ínị̃ mâ lẹꞌjộ ni õkpó ni ọ̃tẹ, má tã ꞌdụ mâ tã ni tã mbare gá kurũ, vúa má ãnyá lwã mâ õri yĩre gá kurũ rĩ ígá ku yã? ²³ Jõ ꞌdí ni rĩ, ẹsụ́ ímba mâ sítĩ ã tã ni ẽró sítĩ tã mbájó rĩ íꞌa ịtị́lé ku ãꞌdu sĩ? Ọlị mâ engwíre rĩi mệsụ́a lọ́ꞌdẹ́ trõ.’

²⁴ “Oko ọꞌjọ ꞌbá umbaka aní lãga náꞌa rĩ tị ní, ‘Ãnyĩꞌdụ sítĩ léꞌdĩi drị́arụ́ sĩ pí, ãnyĩkwẽ mãꞌdị́ lọ́ꞌdẹ́ idéꞌdi vú mụdrị́ rĩ drị́.’ ²⁵ Ọꞌjọkî aní ní, ‘Ãmbá, kí drị́arụ́ vú mụdrị́ aꞌã ꞌdĩ!’ ²⁶ Ãmbá aꞌị̃ ãꞌi ọꞌjọ, ‘Mãꞌjọ ãnyi ní, ꞌbá cị̃drú tã trõ rĩ ní, áꞌdi inzáa dị́, vúa ꞌbá tã ãꞌidrị́ ị̃yọ rĩ drị́ gãádru aꞌã rĩ isâ ꞌdụa pí. ²⁷ Kí óꞌjáꞌbâzí mádrị́ lẽka óꞌbã ma ãꞌi ní ópí dru ku rĩ tị lê, ãnyejí ãꞌi ꞌdíꞌa, ãnyụꞌdị́ ãꞌi mándragá rá.’”

Yẹ́zụ̃ kôkwi Yẹ̃rụ́sãlẹ́mẹ̃ ꞌa ẹ̃kụ́ trõ

²⁸ Yẹ́zụ̃ ã tã ꞌdĩ ꞌjọre rĩ ívú, oya andra gá, oꞌbã drị̃ Yẹ̃rụ́sãlẹ́mẹ̃ ꞌa. ²⁹ Anâ Bẹ̃tị̃fágẹ̃ tị ịtọrọ̃re Bẹ̃tãnị́ã trõ kãré ụngwẹlé ꞌbẹ́ lũgbá kwe ní gá rĩi, ọzẹ ꞌbá anâ vú okoka rĩi ẹ̃rị̃ andra gá, ọꞌjọ ãꞌi ní, ³⁰ “Ãnyĩvũ ganyi ãnyã andra gá nã íꞌa, ãnyã tõre arụ́ rĩi, ãnyí kãĩnõ ángwá drĩsó ꞌbá ã tụre drị̃arụ́ kurũ rĩi ẹsụ́, óꞌĩ cí. Ãnyayụ, ãnyejí ꞌdíꞌa. ³¹ Jõ mãꞌdị́ zị̃ ọzị ãnyi, ‘Ãnyí kãĩnõ ángwá ꞌdĩ ayụ ãꞌdu ní yã?’ ãnyĩꞌjọ aní ní, ‘Ópí olẽ ẹꞌbụ̃lé rá.’” ³² ꞌBá zẹlé andra gá ꞌdĩi ovũ ẹsụ́kî õndo anâ ꞌjọka ãꞌí ní rĩ áni. ³³ Ãꞌiã kãĩnõ ángwá ꞌdĩ ayụre rĩi, ꞌdị́pị tị ọzị ãꞌi, “Ãnyí kãĩnõ ángwá ꞌdĩ ayụ ãꞌdu ní?” ³⁴ Aꞌị̃kî, “Ópí olẽ ẹꞌbụ̃lé rá.” ³⁵ Oko ejíkî Yẹ́zụ̃ drị́, ulákî ãꞌiã bõngû tị drị̃arụ́ oko oꞌbãkî ani drị̃arụ́. ³⁶ Yẹ́zụ̃ ã yare rĩi, ꞌbá ãmgbụ́ ulá ãꞌiã bõngû ni lẹ́tị ní ꞌa. ³⁷ Anâ lẹ́tị kụre ꞌbẹ́ lũgbá kwe drị̂ ígá rĩi ịtọrọ̃re rĩi, ꞌbá anâ vû ni okoka rĩ tị iꞌdó Rũbãngã ni ẹcụ́ká ụ́ꞌdụ́kụ́ éré sĩ, anzoanzõ trõ, nyúmá cị̃drú rẹ̃tụ́ ãꞌiã ndrelé rĩ tị sĩ, ³⁸ kákî ꞌjọa, “Tụ̃tụ́ losó rĩi ópí eyáꞌdi rụ́ Ópí drị̂ sĩ rĩ ní!”

“Ẹ̃ꞌbwẹ́ ꞌbụ̃ ꞌa, vúa ẹ̃kụ́ Rũbãngã ni ọrụ kẹ́ꞌdẹ́kẹꞌdẹ̃ rĩ ní.”

³⁹ Kí Fãrị̃zẹ́ị̃ꞌbá zị̃ tị ꞌbá rutraka rĩ ílọ̃fọ́ rĩ ọꞌjọ Yẹ́zụ̃ ni, “Lãpọ́nyị́, nyĩꞌjọ ꞌbá nyâ vû ni okoka rĩ tị ni kọ̃vụ̃kî cĩrĩ.” ⁴⁰ Yẹ́zụ̃ aꞌị̃ ãꞌi ọꞌjọ, “Mãꞌjọ ãnyi ní, jõ ꞌbá ꞌdĩ kọ̃vụ̃ cĩrĩ sâ, mgbe ọ́nị́ kîꞌdó uzálé éré.”

Yẹ́zụ̃ owó Yẹ̃rụ́sãlẹ́mẹ̃ sĩ

⁴¹ Yẹ́zụ̃ ã ecáre Yẹ̃rụ́sãlẹ́mẹ̃ trõ ĩré rĩi, ondre ꞌdĩ, owó áwusĩ, ⁴² ọꞌjọ, “Ọlị ãnyĩ nị̃ gbá tã ãnyi ní ẹꞌbwẹ̃ ejíꞌdi ọꞌdụ́ ꞌdĩ áni ꞌdĩ sĩ rĩi ọ̃tẹ irĩ, cuwí! Kí ọzụ̃ru ãnyi ní dị̃. ⁴³ Lọ́kụdrú ọꞌdụ́ zị̃ kêyá kêcá ãnyi ní rá, ãnyã óꞌjáꞌbâzí tị ní ãnyã lãga ni ꞌbejó vóyí sĩ, ãnyi cejó gbí, vúa ãnyi ịrụ́jó óꞌjá sĩ ẽwó cị̃drú gá. ⁴⁴ Kákî ãnyã ãbĩ ni nyõ vụ̃rụ́, vúa kákî ãnyi ụlị̃ vụ̃rụ́vụ̃rụ́, ãnyi ãnyã ꞌbácírî tị trõ ꞌi. Ọ́nị́ ãlusâ ãꞌiã eꞌbelé ọ́nị̂zí drị ani kôlú ị̃yọ, ãꞌdusĩ ĩfũ sáã Rũbãngã ã ãnyi arijó rĩ nị̃ sĩ kurũ.”

Yẹ́zụ̃ edró ꞌbá jó Rũbãngã drị̂ ígá

⁴⁵ Yẹ́zụ̃ okwi jó Rũbãngã drị́ Yẹ̃rụ́sãlẹ́mẹ̃ ꞌa rĩ ã celi ní ꞌa ꞌdĩ, iꞌdó ꞌbá tã azịka náꞌa rĩ tị edrólé ãngwé. ⁴⁶ Ọꞌjọ ãꞌi ní, “Osĩru,

‘Jó mádrị̂ kôlú jó ilegĩ drî ꞌi,’

‘kí drĩâ ĩꞌbã ẹcọru kãré ọgụ drị́ ꞌi.’”

⁴⁷ Ọꞌdụ́ cị̃drú, orĩ ꞌbá ịnị̃re jó Rũbãngã drị́ rĩ íꞌa. Amba ꞌbá tã azĩka Rũbãngã ní rĩ drị́ ꞌi, lãpọ̃nyịã cárá drị́ ꞌi, vúa amba ꞌbá drị̃ nzeka rĩ tị trõ, orĩkî lẹ́tị ụndrụ̃re ani ꞌdịjó rá. ⁴⁸ Kí ẹsụ́kî lẹ́tị kurũ, ãꞌdusĩ ꞌbá ãmgbụ́ anâ lãga gá tẽsâ aꞌã rĩi olẽ anâ lẹꞌjộ ni erika vị́cọ́ sĩ.