18
Lẹꞌjọ́ ékwí ãwị́zị́ andẽꞌdi ku rĩ drị́ ꞌi
1 Yẹ́zụ̃ ongo ọꞌjọ ꞌbá anâ vú okoka rĩ ní lẹꞌjọ́ ékwí ꞌdĩi, ịtẹꞌdẹ̃jóadrú kólẽ kilegĩkî andẽka ãkó. 2 Ọꞌjọ, “Ganyi zị̃ íꞌa ẹsụ́ mãꞌdị́ zị̃ lẹꞌjọ́ alịꞌdi rĩi aꞌã. Mãꞌdị́ ꞌdĩi ọrị̃ Rũbãngã ni ku, vúa oru ꞌbá sâ ku. 3 Ganyi nã íꞌa ẹsụ́ ãwị́zị́ zị̃ị sâ aꞌã, orĩ kâcị́ mãꞌdị́ lẹꞌjọ́ alịꞌdi ꞌdĩ drị́ tị onzere lẹꞌjọ́ ãꞌi ílọ̃fọ́ anâ óꞌjáꞌbâzí trõ rĩi alịjó. 4 Ãtị rĩ sĩ olẽ ku sâ, kí vúlégá orã, ‘Jõ mọrị̃ Rũbãngã ku vúa mãru ꞌbá ku sâ, 5 ãwị́zị́ ꞌdĩ ã ma icandĩka sĩ, má lẹꞌjọ́ ãꞌi ílọ̃fọ́ anâ ôꞌjáꞌbâzí trõ rĩi alị rá, áwusĩ kindẽ drú ma anâ ẹmụ́ka ọꞌdụ́ cị̃drú sĩ, sĩ ku!’”
6 Ópí Yẹ́zụ̃ ongo ọꞌjọ, “Nyeri tã mãꞌdị́ ándá ku lãlị́ alịꞌdi rĩ ã ꞌjọlé rĩ ni. 7 Gbá Rũbãngã isâ okwẽ andã ꞌbá anâ upẽlé rá, owóka aní drị́ ị́nị́ ꞌa sĩ rã, ị̃tụ́ dị́trị̃ rĩ ní ku yã? Ká rikalã ꞌbọ ãꞌi ikonyĩre gá rá yã? 8 Mãꞌjọ ãnyi ní, kóꞌbã kakî andã ẹsụ́ rá, vúa kakî ẹsụ́a ẽmíẽmí. Kí jõ Ọ́rị Mãꞌdị́ kengwí vũ drị nĩ rĩ, gbá ká ꞌbá aꞌị̃ trõ rĩi ẹsụ́ rá yã?”
Ilegĩ Fãrị̃zẹ́ị̃gọ́ rĩ tị drị́ mãꞌdị́ mụ̃sọ́rọ̃ traꞌdi rĩ trõ rĩ ꞌi
9 Ãꞌi zị̃ tị rãka ãꞌi enzĩ ãkó, vúa ꞌbá zị̃ tị edeka ede rĩ ní, Yẹ́zụ̃ otã oꞌdã ꞌdĩ ꞌi, 10 “ꞌBá ẹ̃rị̃ ovũ jó Rũbãngã drị̂ íꞌa ilegĩre, ãlu rĩi Fãrị̃zẹ́ị̃gọ́, zị̃ jó rĩi mãꞌdị́ mụ̃sọ́rọ̃ traꞌdi rĩi. 11 Fãrị̃zẹ́ị̃gọ́ rĩi omba pá sĩ, ilegĩ ꞌdí ni, ‘Rũbãngã, má nyi anzó mâ olúka ꞌbá zị̃ tị, ọgụ, enzĩꞌbá, bãte, õvidrú mãꞌdị́ mụ̃sọ́rọ̃ traꞌdi nã áni ku sĩ. 12 Má ãbị́rị́ ta sãbítĩ ãlu ꞌa vú ẹ̃rị̃, vúa má ãlu mụdrị́ drị́ mâ limi ẹsụ́lé rĩ drị̂ kwẽ pí.’ 13 Kí mãꞌdị́ mụ̃sọ́rọ̃ traꞌdi rĩ lê omba gwãꞌdã, ondre ngá ꞌbụ̃ ꞌa sâ ku, kí ká anâ ásị́tị ni dị, kộꞌjọa, ‘Rũbãngã, nyidé kizã ma enzĩꞌdị́pị ꞌdĩ ní.’ 14 Mãꞌjọ ãnyi ní, mãꞌdị́ ꞌdĩi ongwi ꞌbãrụ́ leꞌbe enzĩ drị̂ trõ oza Fãrị̃zẹ́ị̃gọ́ nã ꞌi rá. Ãꞌdusĩ mãꞌdị́ ani ꞌbãꞌdi ọrụ rĩi ịsị́a vụ̃rụ́, vúa mãꞌdị́ ani ꞌbãꞌdi vụ̃rụ́ rĩi, ịtụ́a ọrụ.”
Yẹ́zụ̃ ká tụ̃tụ́ cọ ꞌbácírí rụ
15 ꞌBá orĩ ká ꞌbácírí sâ ejí Yẹ́zụ̃ drị́ kẹlọ drú ãꞌi. ꞌBá anâ vú okoka rĩi ondre ꞌdĩ, imbákî ꞌbá ꞌbácírí ejíka rĩi cí. 16 Kí Yẹ́zụ̃ lê ụngwẹ ãꞌi aní drị́, ọꞌjọ, “Ãnyeꞌbe ꞌbácírí círíá ꞌdĩ kevũ má drị́, ígogã ãꞌi ku, ãꞌdusĩ opĩ Rũbãngã drị̂ ãꞌi ꞌdĩ áni ꞌdĩ drị̂ ꞌi. 17 Mãꞌjọ ãnyi ní lọ́kụdrú, mãꞌdị́ opĩ Rũbãngã drị̂ aꞌị̃ꞌdi ꞌbarángwá drị́ áni ku rĩi okwi arụ́ ku.”
Kwika opĩ Rũbãngã drị̂ íꞌa ni õkpó
18 Mãꞌdị́ vũ aseꞌdi zị̃ ãlu rĩi ọzị ani, ọꞌjọ, “Lãpọ́nyị́ losó rĩ, kólẽ dũbá midé ãꞌdu lidrĩ olúꞌdi tádru rĩ ẹsụ́jó ꞌi?” 19 Yẹ́zụ̃ aꞌị̃, “Nyí ma ụngwẹ losó ãꞌdu sĩ? ꞌBá losó ị̃yọ, tẽtẽ Rũbãngã ꞌi aꞌdị́tẹ. 20 Ínị̃ cárá Rũbãngã drị̂ ọ̃tẹ, ‘Îdé asã ku, ộꞌdị ꞌbá ku, ọ́gụ̃ tã ku, ộꞌjọ tã enzõ drú ꞌbá zị̃ rụ ku, nyĩru nyâ átâ tị nyâ endrẽ trõ.’” 21 Mãꞌdị́ ꞌdĩ ọꞌjọ, “Tã láꞌdĩ ꞌbâtị kpộdrú mîdé rá, iꞌdójó mâ olújó ꞌbarángwá rĩ íngá.”
22 Yẹ́zụ̃ eri tã ꞌdĩi ꞌdĩ, ọꞌjọ aní ní, “Tã zị̃ asẽ ãlu nyí ní idélé aꞌã, nyazị tã cị̃drú nyídrị́ rĩi rá, vúa nyĩko nyĩkwẽ sítĩ ani ꞌbá tã ako rĩ ní, áwusĩ nyídrị́ limi kôlú ꞌbụ̃ ꞌa aꞌã. Nã ívú, nyeyá nyekó mâ vú ni.”
23 Lẹꞌjọ́ ꞌdĩi erika sĩ, mãꞌdị́ ꞌdĩi ásị́ lãzá oko cí, ãꞌdusĩ limi drị́arụ́ rẹ̃tụ́. 24 Yẹ́zụ̃ ondre ani, oko ọꞌjọ, “ꞌBá limi nzá trõ rĩ ní tõka opĩ Rũbãngã drị̂ íꞌa ni tã õkpó rĩ ꞌi! 25 Lọ́kụdrú, nãkãnáká ã kwika lụ̃ lị́bịrã drị̂ íꞌa sĩ ni ẽmí sĩ oza mãꞌdị́ limi trõ rĩ ã kwika Opĩ Rũbãngã drị̂ íꞌa ni rá.”
26 Bá lẹꞌjọ́ ꞌdĩi erika rĩi ọzị, “Jõ ꞌdí ni rĩ, ãꞌdi ká rari wã rĩi nĩ?”a 27 Yẹ́zụ̃ aꞌị̃, “Tã ꞌbá ní õkpó ꞌbị̃lé kpé rĩi, Rũbãngã ní õkpó ku.”
28 Péturũ ọꞌjọ aní ní, “Kí ãma lê, ãmeꞌbe tã cị̃drú rá, ãmekó nyâ vû ꞌi ꞌdĩ lê!” 29 Yẹ́zụ̃ ọꞌjọ aní ní, “Mãꞌjọ ãnyi ní lọ́kụlókụ, mãꞌdị́ ẹ́ꞌị́, ị́zị́, adrụ́pị, átá vúa endre trõ, kusâ ꞌbácírí eꞌbéꞌdi opĩ Rũbãngã drị̂ sĩ rĩi, 30 kệmụ́ ká drị́de ẹsụ́ vú ẽkpadrú, lidrĩ ꞌdĩ íꞌa, vúa lidrĩ olúre tádru rĩ íꞌa sâ trõ.”
Yẹ́zụ̃ ọꞌjọ tã anâ drã vúa onzíka ní drị́ dị́
31 Yẹ́zụ̃ oji mãju mụdrị́ lị́mbị́ẹ̃rị̃ rĩi mãrã gá, ọꞌjọ ãꞌi ní, “Áꞌdikî vũ Yẹ̃rụ́sãlẹ́mẹ̃ ꞌa vúa tã cị̃drú pũrũfẽtaã ã sĩlé Ọ́rị Mãꞌdị́ ní drị rĩi kólẽ kidéru rá. 32 Áꞌdi ani kwẽ jụrụ drị́. Kakî evũ kakî ani inyaꞌdĩ, uꞌdá, tụzẽ wĩ rụarụ́, 33 ani mgba, vúa ani ꞌdị kpó, ọꞌdụ́ inajóa rĩ sĩ kônzí rá.” 34 ꞌBá anâ vú okoka rĩ ꞌbâtị eri tã ꞌdĩ ã ékwî ni ãlusâ kurũ. Lẹꞌjọ́ ã ékwî ni ọzụ̃ru ãꞌi ní dị̃, vúa ọnị̃kî ká tã ꞌjọ ãꞌdu drị yã isâ ku.
Yẹ́zụ̃ ijá mãꞌdị́ mị ãkó Jẹ̃rị́kọ̃ ꞌa rĩi rá
35 Yẹ́zụ̃ ã Jẹ̃rị́kọ̃ ni ịtọrọ̃re rĩi, mãꞌdị́ zị̃ị ãlu mị ãkó rĩi orĩ lẹ́tị mãrã, ká tã aꞌị́ ꞌbá alịka lẹ́tị sĩ rĩ drị́. 36 Eri ꞌbá ãmgbụ́ kálị ꞌdĩ, ọzị, “Ãꞌdu ká ridé nĩ?” 37 Ọꞌjọkî aní ní, “Yẹ́zụ̃ ni Nãzẹ̃rẹ́tị̃gọ́ rĩ kálị nĩ.” 38 Ozã éré ọꞌjọ, “Yẹ́zụ̃, ọ́rị Dãvị́dẹ̃, kizã kõko nyi má sĩ!” 39 ꞌBá agáka andra gá rĩ iꞌjá ani, ọꞌjọkî kọ̃vụ̃ círí, kí inzá ọ́lọ́ꞌbọ́ dị́, oza éré, “Ọ́rị Dãvị́dẹ̃, kizã kõko nyi má sĩ!”
40 Yẹ́zụ̃ omba ꞌdị̃, ọꞌjọ, “Ãnyejí mãꞌdị́ laꞌdĩi má drị́.” Ecá ĩré ꞌdĩ, Yẹ́zụ̃ ọzị ani, 41 “Ílẽ midé nyí ní ãꞌdu?” Aꞌị̃, “Ópí, álẽ mãndre tã wã!” 42 Yẹ́zụ̃ aꞌị̃, ọꞌjọ aní ní, “Nyĩndre tã, aꞌị̃ nyídrị̂ ijá nyi rá.” 43 Mgbe ká tã ndre wã! Ongo oko Yẹ́zụ̃ ã vû ni trõ, kôji Rũbãngã ẹcụ́ sĩ. ꞌBá kpộ tã ꞌdĩ ndreka rĩ ísâ ẹcụ́kî Rũbãngã ni rá.