17
Lịnị̃ enzĩ eꞌbejó, aꞌị̃ vúa ẹꞌbụ̃ drị rĩ ꞌi
1 Yẹ́zụ̃ ọꞌjọ ꞌbá anâ vũ ni okoko rĩ tị ní, “Tã ꞌbá jika enzĩ ꞌa rĩi aꞌã, kí andra ũnzí rĩi mãꞌdị́ ꞌbá drị̃ seꞌdi enzĩ ꞌa rĩ ꞌi. 2 ꞌDãsĩ mãꞌdị́ ani ꞌdĩi ûmbé ọ́nị́ rẹ̃tụ́gọ́ rĩi embe arụ́ ôꞌbe étrõ mẽri ꞌa, oza anâ ꞌbácírí suka enzĩ ꞌa ni rá. 3 ꞌDĩsĩdrú ãnyĩ sâ ãnyĩ sõ ãnyi ógá.
“Jõ nyã adrụ́pị̃ idé enzĩ rá, nyiꞌjá ani, vúa jõ aꞌị́ kizã rá, nyeꞌbe aní ní rá. 4 Jõ nósĩ idé nyí ní enzĩ vú tụ́dẹ̃rị̃ ọꞌdụ́ ãluá nã sĩ oko engwí nyí drị́ vúlé vũ tụ́dẹ̃rị̃ oko ọꞌjọ, ‘Mîdé enzĩ rá, kí nyidé má ní kizã,’ nyeꞌbe aní ní rá.”
5 Yẹ́zụ̃ ã mãju ọꞌjọ aní ní, “Ópí, nyinzá ãmã aꞌị̃ ni!” 6 Yẹ́zụ̃ ingwi, “Jõ anyã aꞌị̃ ni gãángwá dru ụ́wị́ ékwí pí sâ aꞌã, nyîꞌjọa mẹ́lị́ ní wã, ‘Nyĩ nzuru nyĩmụ nyĩ saru mẽri ꞌa,’ ká nyi eri oko kîdéa rá.
7 “Õvi sĩ jõ ãnyã ãlu ã ọ̃pị́gọ́ ká tã sõ kusâ ká bị̃lọ̃ ẹyị̃, gbá jõ ọ̃pị́gọ́ ꞌdĩ engwí ámvụ́ ꞌa sĩ nĩ, anâ ãmbâ kộꞌjọa ‘Nyẹmụ́ drĩá rĩre vụ̃rụ́ nyĩ nya tã’ ni rá yã? 8 Rá rĩi kộꞌjọa, ‘Nyĩꞌdi mâ línyá ũndrwé rĩi, nyĩko nyidé nyi bábá kwẽjóadrú má ní nyalé vúa tã mvụlé rĩ trõ kpá. Nã ívú ídrĩ tã nya vúa tã mvụ’ ni ku yã? 9 Gbá ká anâ ọ̃pị́gọ́ ꞌdĩ anzõ ẹꞌbụ̃ anâ ꞌjọlé kidé ꞌdĩ sĩ rá yã? 10 ꞌDĩsĩdrú ãnyi sâ jõ ãnyidé tã cị̃drú ꞌjọlé ãnyi ní ãnyidé rĩi rá, kólẽ ãnyĩꞌjọ, ‘Ãma ọ̃pị̃gọ dángá rĩ tị ꞌi, ãmẹsị̃ anzólé ku, ãꞌdusĩ ãmidé õndo ãma ẹꞌbụ̃ ni áwu.’”
Yẹ́zụ̃ ijá dõꞌbóꞌbá mụdrị́
11 Yẹ́zụ̃ ã mụre Yẹ̃rụ́sãlẹ́mẹ̃ ꞌa rĩi, ọmụ lẽci lọgọ Sãmãríã tị drị́ Gãlị̃lẹ́ã trõ rĩ ígá sĩ. 12 Anâ mụre ẹ́ꞌị́ zị̃ íꞌa rĩi, ecikî ru dõꞌbóꞌbá mụdrị́ trõ. Ombakî gwãdã, 13 oko ozakî ọ́lọ́ꞌbọ́ éré sĩ, “Yẹ́zụ̃, Ãmbá, kizã kõko nyi ãma sĩ!” 14 Yẹ́zụ̃ ocẽ ani kõndre ãꞌi ꞌdĩ, ọꞌjọ “Ãnyĩvũ ãnyịtẹꞌdẹ̃ru ꞌbá tã azĩka Rũbãngã ní rĩ tị ní.” Ãꞌiã vũre rĩi, mgbe ãꞌiã rụ oja rá.
15 Mãꞌdị́ ãlu ãꞌi íꞌa rĩi ondre anâ rụ oja rá ꞌdĩ, odã drị̃ Yẹ́zụ̃ drị́, kộmụ Rũbãngã ni ẹcụ̃ sĩ ọ́lọ́ꞌbọ́ éré rĩ sĩ. 16 Oꞌde Yẹ́zụ̃ ã pá gá, anzó ani rá, vúa mãꞌdị́ ꞌdĩi Sãmãríãgọ́. 17 Yẹ́zụ̃ ọzị, “Mîjálé rĩi ãgo mụdrị́ ku yã? Drị́cãlu rĩ tị íngwa? 18 Zị̃ tị engwíkî Rũbãngã ni ẹcụ́re ku, tẽ ãludi jụ́rụ́gọ́ ꞌdĩ ꞌi yã?” 19 Ongo ọꞌjọ Sãmãríãgọ́ ꞌdĩ ní, “Nyĩnga ọrụ, nyĩmụ, nyâ aꞌị̃ ĩjá nyi rá.”
Opĩ Rũbãngã drị́ rĩ ã ẹmụ́ka ꞌi
20 Zị̃ rĩ sĩ, Fãrị̃zẹ́ị̃ꞌbá ã Yẹ́zụ̃ ni zịre opĩ Rũbãngã drị́ rĩ kêcá ãꞌdungá rĩ ídrị rĩi, Yẹ́zụ̃ aꞌị̃ ãꞌi, “Opĩ Rũbãngã drị́ anâ ꞌbá asejó rĩi ãnyi nị̃a ndreka mị sĩ ku.a 21 ꞌBá kộꞌjọa kpé, ‘Ani ꞌdíꞌa’ kusâ ‘Ani náꞌa ꞌi,’ ãꞌdusĩ opĩ Rũbãngã drị̂ drĩâ ꞌdí ni sâ ãnyetrõ.”
22 Yẹ́zụ̃ ongo ọꞌjọ ꞌbá anâ vû ni okoka rĩ ní, “Sáã kệmụ́ kêcá kệsụ́a ĩlẽ ọꞌdụ́ Ọ́rị Mãꞌdị́ ã engwíjó vũ asere ni ndreka, kí ãnyí ndrea kpé. 23 ꞌBá kộꞌjọa ãnyi ní, ‘Ãnyi ndre, ani nãlé nã!’ kusâ ‘Ani ꞌdíꞌa ꞌdĩ!’, kí ôdro ãꞌiã vû ni ku. 24 Ãꞌdusĩ Ọ́rị Mãꞌdị́ ã ẹmụ́ka ã ọꞌdụ̂ kágụ kêndré ẹ̃yị́lõvi áni, ká ꞌbụ̃ ꞌa ãꞌjíre vúa ũndrére rĩ ꞌjĩ táwũ. 25 Kí ãtịjóa rĩi kólẽ kõta icandĩ drị̃lé mgbị́mgbị rĩi vúa ꞌbá ọꞌdụ́ ꞌdĩ sĩ rĩ ísâ kõgã ani mgbẹ́ kpá.
26 “Õndo kêndré Nóã ní ngá ẹ̃yị́ oca vũ mvụre kurũ rĩ áni, ọꞌdụ́ Ọ́rị Mãꞌdị́ drị́ rĩ isâ kôlú aní áni. 27 ꞌBá orĩ tã unyare tã mvụka trõ, vúa lãꞌdụ́ ꞌdụre, vúa ãꞌiã ĩzõnzi ni kwẽre lãꞌdụ́ gá ndị̃ ọꞌdụ́ Nóã ã tụjó ị́ꞌbọ́ ꞌa rĩ sĩ. Mgbe ẹ̃yị ẹmụ́ ọꞌdị ọmvụ vũ oko ịmvụ́ ꞌbá kpộdrú rá.
28 “Lọ́tị̃ ní ngá sâ õndo aní áni. ꞌBá orĩkî tã unyare, ụmvụre, azịre, ụjẹka trõ oko tã usõre, vúa jó ụsị́ka trõ áwu. 29 Kí ọꞌdụ́ Lọ́tị̃ ã Sọ̃dọ́mã ni eꞌbejó rĩ sĩ, ãcí kọ̃lọ ẹzọ̃ trãtrã ꞌbụ̃ ꞌa sĩ ãꞌi ídrị, ụꞌdị ãꞌi kpộdrú rá.
30 “Ọꞌdụ́ Ọ́rị Mãꞌdị́ ã engwíjó rĩ isâ kôlú õndo mũsí dru léꞌdĩ áni. 31 Ọꞌdụ́ ani drú nã íngá, mãꞌdị́ jódrị rĩi kộsị vụ̃rụ́ kôkwi jó ꞌa anâ jómõno ẹꞌdụ́re kpé. Ãluá rĩ áni, mãꞌdị́ ámvụ́ ꞌa rĩ isâ kôngwi ꞌbãrụ́ tã ẹꞌdụ́re kpé. 32 Ãnyerã ꞌdị́ ãꞌdu tã idéru Lọ́tị̃ ã ị́zị̂ ní rụ nĩ yãb ꞌi! 33 Mãꞌdị́ anâ lidrĩ ni rãꞌdi áwu Rũbãngã rãꞌdi ku rĩi lidrĩ drị́arụ́ kôlú Rũbãngã trõ tádru ni kpé, kí mãꞌdị́ anâ lidrĩ ni azĩꞌdi má sĩ rá rĩi ká lidrĩ tádru rĩ ẹsụ́ rá. 34 Mãꞌjọ ãnyi ní, ị́nị́ mâ engwíjó rĩ sĩ, ꞌbá ẹ̃rị̃ ọꞌdụ́ koka kãré ãlu gá rĩi, ãlu rĩ ꞌdua pí, ãlu rĩi eꞌbea rá. 35 Ũkú ẹ̃rị̃ ãnyá ꞌịka rĩi, ãlu rĩ ꞌdua pí oko ãlu rĩi eꞌbea rá. 36 Ãgo ẹ̃rị̃ ẹꞌbụ̃ idéka ámvụ́ ꞌa rĩi, ãlu rĩi ꞌdua pí, ãlu rĩi eꞌbea rá.”c
37 ꞌBá anâ vû ni okoko rĩ ọzịkî ani, “ꞌDĩ ká ridé íngõá, Ópí?” Ongo ingwi ãꞌi lẹꞌjọ́ ékwí sĩ, ọꞌjọ, “Kãré rụĩmwá láka aꞌã rĩ ígá rõká kôtra rá.”