16
Oꞌdã ẹꞌbụ̃ꞌbágọ́ limi tã mbaꞌdi cirĩ mberũ drị̂ trõ rĩ ꞌi
1 Yẹ́zụ̃ otã oꞌdã ꞌdĩ isâ ꞌbá anâ vû ni okoka rĩ tị ní, ọꞌjọ, “Mãꞌdị́ zị̃ ãlu limi trõ rĩ ã ẹꞌbụ̃ꞌbágọ́ ni ị́sịkị̃ tịarụ́, anâ limi ani ꞌbãjó láka drị̃ ani ndrelé rĩ ivolõka sĩ. 2 ꞌDĩsĩdrú ụngwẹ ẹꞌbụ̃ꞌbágọ́ ꞌdĩi, ọꞌjọ, ‘Tã mâ erilé nyâ drị̃ gá ꞌdĩi ãꞌdu tã? Nyuꞌbã má ní tã tị ẹ̃ꞌbụ̃ nyâ idélé rĩ drị̂ rẽ, ãꞌdusĩ nyôlú mâ ẹꞌbụ̃ꞌbágọ́ ꞌi drú dị́ ku.’
3 “Ẹꞌbụ̃ꞌbágọ́ ꞌdĩ orã anâ ngá sĩ, ọꞌjọ, ‘ꞌDrĩâ ꞌdí ni má ãꞌdu idé? Mâ ãmbâ ká ma imbá ẹꞌbụ̃ mádrị́ ꞌdĩ ígá cí ꞌdĩ ꞌi. Mâ mọ́rị́ tã sõjó ị̃yọ, vúa drị̃nzá sâ ká ma ko tã aꞌị́ka sĩ kõ ꞌdĩé. 4 Ãyíwã! Tã mâ idélé rĩi drĩálê ánị̃ ọ̃tẹ, áwusĩ ní jõ ôdro ma mâ ẹꞌbụ̃ ní tị pí sâ, ꞌbá ká ma aꞌị́ ãꞌi drị́ jó gá rá.
5 “ꞌDĩsĩdrú ụngwẹ mọ̃rị́ꞌbá anâ ãmbâ drị́ rĩ tị cị̃drú evũlé aní drị́ ãluãlu. Ãtị rĩ ecá ꞌdĩ, ọzị ani, ‘Ãmbá mádrị́ rĩ ã mọ̃rị́ ni nyí drị́ sị́?’ 6 Oko aꞌị̃, ‘Ẹ́tẹ́ lũgbá ãdu drị̂ mị́ã ãrõ.’ Ẹꞌbụ̃ꞌbágọ́ ꞌdĩ ọꞌjọ aní ní, ‘Nyĩꞌdụ kãrãtásĩ nyâ mọ̃rị́ drị́ ꞌdĩi nyĩrĩ vụ̃rụ́ ẽmiẽmi oko nyẹcọ kõꞌe mị́ã sụ.’
7 “Ongo ọzị ẹ̃rị̃jóa rĩi, ‘Nyídrị́ lê mọ̃rị́ mâ ãmbâ drị́ rĩi sị́?’ Aꞌị̃, ‘Ẽvú ãnyá drị̂ élifũ ãlu.’ Ọꞌjọ láka, ‘Nyĩꞌdụ kãrãtásĩ nyâ mọ̃rị́ drị́ rĩi, nyĩsĩ láka míã ãrõ.’
8 “Ãmbá ꞌdĩi ẹcụ́ anâ ẹꞌbụ̃ꞌbágọ́ cirĩ mberu drị̂ trõ ꞌdĩi rá, ãꞌdusĩ ẹꞌbụ̃ cirĩ anâ lidrĩ andra gá rĩ ã tã mbajó áwu. Gbádru, ꞌbá lẹꞌjọ́ vũ drị ꞌdíꞌa rĩ ã vû ni okoka áwu rĩi tã ãꞌiã idélé ãꞌi ílọ̃fọ́ rĩ sĩ ondẽkî cirĩ sĩ ꞌbá Rũbãngã ã vû ni okoka áwu rĩi rá. 9 Mãꞌjọ ãnyi ní, ãnyẹꞌbụ̃ limi ẹsụ́lé vũ drị ꞌdíꞌa rĩi ãnyi ní ozí ẹsụ́jó, áwusĩ ní jõ ẹkọ́ rá, kákî ãnyi aꞌị́ lidrĩ olure tádru rĩ íꞌa wã.
10 “Mãꞌdị́ ịgẹnị̃lé tã gãádru rĩ sĩ wã rĩi ịgẹnị̃a tã nzá rĩ sĩ sâ wã, vúa tã gã rĩ sĩ ịgẹnị̃lé kpé rĩi tã nzá rĩ sĩ sâ áꞌdi ịgẹnị̃a kpé. 11 Kí gbá jõ ị́gẹnị̃ nyi lonyĩ vũ drị rĩ sĩ kpé rĩ, ãꞌdi ká nyi ịgẹnị̃ lonyĩ Rũbãngã drị́ lọ́kụ rĩ sĩ nĩ? 12 Vúa jõ áꞌdi nyi ịgẹnị̃ ꞌbá zị̃ ã tã ni tã mbalé kpé rĩ, ãꞌdi ká tã nyí ní rĩ kwẽ nyí drị́ nĩ?
13 “Mãꞌdị́ ãlu sâ ẹꞌbụ̃ idéꞌdi amba ẹ̃rị̃ ní ani ị̃yọ. Jõ idé rá, ká ãlu rĩ lẽ ndrõ, kôko ká zị̃ rĩi evu rá, kusâ ká lãrú kwẽ ãlu rĩ ní oko zị̃jó rĩ lê kédea edê. ꞌDĩsĩdrú nyí ẹꞌbụ̃ Rũbãngã drị̂ idé sítĩ drị̂ trõ kpé.”
Cárá ãꞌi opĩ Rũbãngã drị̂ trõ
14 Fãrị̃zẹ́ị̃ꞌbá ãꞌi lẽka sítĩ sĩ kpó rĩ tị erikî tã ꞌdĩi cị̃drú rá, oko ãꞌi Yẹ́zụ̃ ni edere edê. 15 Yẹ́zụ̃ ọꞌjọ ãꞌi ní, “Ĩꞌbã ãnyi ꞌbá andra anda, kí Rũbãngã ọnị̃ ãnyã ásị̂ ní ꞌa ãꞌdu yã ni ọ̃tẹ rĩi nĩ. Tã ꞌbá ã rãlé ondẽ nĩ rĩi, Rũbãngã ní ándra tã ékwí ãkó rĩ ꞌi.
16 “Cárá Mũzê drị́ rĩ tị tã pũrũfẽtaã ã sĩlé rĩ trõ, orĩ ẹꞌbụ̃ idére bị̃ Yõánã Bãtị́sịtã ní ngá, rijó nã íngá, õfú losó opĩ Rũbãngã drị̂ rĩ ídrị rĩi ká rũnze, oko ꞌbá ãluãlu olẽkî lẹ́tị ẹsụ́ka kwijó opĩ ꞌdĩ íꞌa okpõsĩ. 17 ꞌBụ̃ vũ trõ kệkọ́ ẽmíádru wã, kí cárá Rũbãngã drị́ rĩ ã ékwî ní gãángwá dru rĩ isâ ã ẹgwẹ̃ka ni õkpó réré.
18 “Mãꞌdị́ anâ ị́zị́ kusâ ágô ni gãꞌdi mgbẹ́, oko ọꞌdụ ị́zị́ kusâ ágó zị̃ áwu rĩ ká enzĩ asã drị́ rĩ idé, vúa ágó ị́zị́ nã ꞌdụꞌdi rĩ isâ idé enzĩ asã drị́ rĩ ꞌi.”
Ilonyĩꞌdị́pị tị Lázẹrọ̃ trõ
19 Zị̃anígá Yẹ́zụ̃ otã oꞌdã ꞌdĩi, ọꞌjọ, “Mãꞌdị́ zị̃ lonyi trõ bõngú lãje drị́ rĩ usúꞌdi vúa ọꞌdụ́ cị̃drú sĩ tã losó rĩ unyaꞌdi áwu rĩi aꞌã. 20 Anâ celi ã jótị ní gá, Lázẹrọ̃ ni tã ãkó rụ kpộ bí rĩi ani sâ ajia vúa uláa náꞌa. 21 Ásị́ cị̃drú sĩ olẽ ani kõnya drú lonya fúfú zọ̃ka mẹ́zã ĩtí ilonyĩꞌdị́pị ã tã nyare gá rĩ ni, vúa õcé sâ orĩ ká bí rụarụ́ rĩi umbe. 22 Sáã anâ drãjó rĩ ecá ꞌdĩ, mãláikã ọnzị̃ ani ꞌbụ̃ ꞌa Ãbãrãhámũ ã lãga gá. Ilonyĩꞌdị́pị isâ odrã ꞌdĩ, óko óse ani rá, ọmụ ãcí ꞌa. 23 Ãcí ꞌa sĩ, anâ ricandĩre rĩi, ondĩ ngá ọrụ ondre Ãbãrãhámũ ni lọ́lụ́ nãlé, oko Lázẹrọ̃ orĩ lãga arụ́ ĩré. 24 ꞌDĩsĩdrú ụngwẹ Ãbãrãhámũ ni, ‘Mâ átâ Ãbãrãhámũ, kizã kõko nyi má sĩ, nyezẹ́ Lázẹrọ̃ ní kõsu anâ drị́ pĩꞌdî ni ẹ̃yị́ ꞌa oko kõꞌbã drú ketĩ mâ áꞌbú ꞌa mâ gbórô ni ịdụ́jó, ãꞌdusĩ ãcí olúre tádru ꞌdĩ íꞌa ꞌdíꞌa, ma icandĩ rẹ̃tụ́gọ́ rĩ íꞌa.’ 25 Ãbãrãhámũ aꞌị̃, ‘Mâ ꞌbarâ, nyerã drĩ, nyâ olúre vũ drị rĩi nyi kãcụ̃ ꞌa, írĩ nyí runya losó, oko Lázẹrọ̃ lê orĩ ká icandĩ tã, kí drĩálê ani sâ ká runya, kí nyi lê nyi icandĩ ꞌa. 26 Vúa ꞌdĩ ídrị sĩ sâ, ꞌbụ́ dúwí rĩi ꞌbá ni lọ̃fọ́ gá cí, tê mãꞌdị́ kõlẽ ani kọ̃mụ ãnyi drị́ sâ, kôya kpé, vúa ãnyi sâ ãnyêvũ ãma drị́ ꞌdíꞌa kpé.’ 27 Ilonyĩꞌdị́pị oko aꞌị̃, ‘Jõ ꞌdí ni rĩ, mâꞌị́ nyi, mâ átâ, nyĩ zẹ Lázẹrọ̃ ni ãma drị́ ꞌbãrụ́, 28 ãꞌdusĩ mádrị́ adrụ̂nzi tọ̃ụ́ aꞌã olúka náꞌa rĩ ꞌi kọ̃mụ kiꞌjá ãꞌi, kidũkî drú ãꞌiã lidrĩ ni, kẹmụ́kî drú ãcí ꞌa ꞌdíꞌa ku.’ 29 Ãbãrãhámũ aꞌị̃, ‘Ãꞌi ní Mũzê tị pũrũfẽtaã trõa aꞌã, kerikî leꞌjọ́ ãꞌiã ꞌjọlé rĩ ni.’ 30 Ilonyĩꞌdị́pị ọꞌjọ, ‘Ị̃yọ, mâ átâ Ãbãrãhámũ, jõ mãꞌdị́ drãꞌdi rá rĩ kọ̃mụ ãꞌi drị́ nĩ ꞌi rĩ, kákî enzĩ ãꞌidrị̂ ru rá.’ 31 Ãbãrãhámũ oko ọꞌjọ láka, ‘Jõ aꞌị̃kî tã Mũzê tị Pũrũfẽtaã trõ rĩ ã ꞌjọlé rĩi ku, áꞌdi ãꞌi ịꞌjọ́ kpé jõ sâ mãꞌdị́ drãꞌdi rá rĩ konzí lídri nĩ ꞌi.’”