15
Oꞌdã bị̃lọ̃ ẹgwẹ̃ꞌdi dị̃ rĩ drị́ ꞌi
1 ꞌBá ãmgbụ́ mụ̃sọ́rọ̃ traka rĩi ãꞌi enzĩꞌbá zị̃ tị trõ, orĩkî rutrare Yẹ́zụ̃ ní lãga lẹꞌjọ́ anâ ꞌjọlé rĩi erire. 2 Kí Fãrị̃zẹ́ị̃ꞌbá vúa lãpọ̃nyịã cárá drị̂ trõ uzúkî Yẹ́zụ̃ ní ọꞌjọkî, “Mãꞌdị́ ani drú ꞌdĩi kôlú vúa ká tã sâ nya enzĩꞌbá trõ.”
3 ꞌDĩsĩdrú Yẹ́zụ̃ ọꞌjọ ãꞌi ní lẹꞌjọ́ ékwí ꞌdĩ ꞌi, 4 “Jõ ãnyã ãlu drị́ bị̃lọ̃ mị́ã ãlu kí arụ́ ãlu rĩi ẹgwẹ̃ dị̃ rĩ, eꞌbe mụ̃dịdrị́cãlu lị́mbị́drị́cãlu rĩi rá ongo ọmụ ẹgwẹ̃ꞌdi rĩ ndrụ̃ sĩ bị̃ ẹsụ́jóadrú kpá ni ku yã? 5 Jõ ẹsụ́ rá rĩ, anzõ sĩ kéꞌbãa ọ́lọ́kọ́drị̃ gá, 6 kêjía ꞌbãrụ́ ongo ká anâ ozî tị wãꞌdîzí tị trõ ụngwẹ kãré ãlu gá kôko kộꞌjọa, ‘Ãnyĩꞌbã ânzókî, ãꞌdusĩ mệsụ́ mâ bị̃lọ̃ ẹgwẹꞌdi dị̃ rĩi rá.’ 7 Ãluá rĩ áni, anzó kôlú rẹ̃tụ́ ꞌbụ̃ ꞌa náꞌa, enzĩꞌbágọ́ ãlu rĩ ã anâ enzĩ ni ruka sĩ ká ꞌbá mụ̃dịdrị́cãlu lị́mbị́drị́cãlu loso rĩ drị̂ ndẽ rá, ãꞌdusĩ enzĩ ãꞌi ní rulé ị̃yọ.”
Oꞌdã sĩlíngĩ ẹgwẹ̃ꞌdi dị̃ rĩ drị́ ꞌi
8 Zị̃anígá Yẹ́zụ̃ ọꞌjọ “Jõ nósĩ ị́zị́ zị̃ drị́ sĩlíngĩa ékwíékwí rĩi mụdrị́ kí ãlu rĩi ẹgwẹ̃ dị̃ rĩ, odũ tárã, ọwẹ jóꞌa ụndrụ̃jóadrú lolwẽ sĩ bị̃ kófũ ẹsụ́a ni ku yã? 9 Jõ vúa ẹsụ́ rá rĩ ká anâ ozí vúa wãꞌdîzí tị ụngwẹ kãré ãlu gá kôko kộꞌjọa, ‘Ãnyĩꞌbã ánzókî, ãꞌdusĩ mệsụ́ mâ sítĩ ẹgwẹ̃ꞌdi dị̃ rĩi rá.’ 10 Ãluá rĩ áni, mãꞌjọ ãnyi ní, anzõ kôlú rẹ̃tụ́ mãláikã Rũbãngã drị́ rĩ ní enzĩꞌbágọ́ ãlu rĩ ã anâ enzĩ ni ruka sĩ.”
Oꞌdã ꞌbará ẹgwẹ̃ꞌdi dị̃ rĩ drị́ ꞌi
11 Yẹ́zụ̃ acị́ andra gá, ọꞌjọ, “Ágó zị̃ drị́ ꞌbõrõnzi ẹ̃rị̃. 12 ꞌBará gãgã rĩ ọꞌjọ anâ átâ ní, ‘Mâ átâ, nyekwẽ má ní limi mádrị́ lẹ́lẹ́ nyâ ẹmụ́lé kwẽlé ãma ní rĩ ni.’ ꞌDĩsĩdrú átâ aꞌị̃ rá, oko anzu limi ni anâ ꞌbõrõnzi ẹ̃rị̃ ꞌdĩ ní. 13 Ọꞌdụ́ ũꞌbíku vú, ꞌbará gãgã ꞌdĩi azị tã zị̃ tị anídrị́ lẹ́lẹ́ rĩi rá, otra asẽka rĩi cị̃drú, oya étrõ vũ lọ́lụ́ gá, ongo náꞌa ivolõ sĩlíngĩ ni tã zị̃ tị trõ lẹ́tị ũnzí sĩ cá. 14 Anâ sítĩ ẹkọ́ ꞌdĩ, ãbị́rị́ oꞌde kãré nã ígá ndụtụ, tã anâ lẽlé rĩ ꞌbâtị oꞌe ị̃yọ, eꞌbe ani kôlú ꞌa ãda sĩ. 15 ꞌDĩ sĩ ongo oya mãꞌdị́ zị̃ ãlu tã trõ vũ nã ígá rĩ drị́, oko ọzẹ ani ẹꞌbụ̃ ụ̃pẹ́gụ̃b tã mbajó rĩ idére áwu. 16 Mãꞌdị́ zị̃ ãlu sâ aní ní tã kwẽꞌdi na ị̃yọ, ãbị́rị́ sĩ lonya ọ̃pẹ́gụ̃ ã nyalé rĩ isâ kêndré aní ní nyalé losó.
17 “Drị̃ ani oce ꞌdĩ, iꞌdó tã rãka, ọꞌjọ, ‘Ẹꞌbụ̃ꞌbá mâ átâ drị̂ ká tã nya trítrí kásẽ aꞌã, vúa ꞌdí ni rĩ, ꞌdíꞌa má drã ãbị́rị́ sĩ! 18 ꞌDĩ sĩ lê mângwi mâ átâ drị́ mâko mâꞌjọa aní ní, “Mâ átâ, mîdé enzĩ Rũbãngã ní ándra vúa nyándra sâ trõ, 19 mẹ́sị̃ ụngwẹlé nyâ ꞌbarâ ꞌi drú ku, rá rĩi nyĩꞌbã molú kêndré nyâ ẹꞌbụ̃ꞌbágó ãlu ukwẽlé ukwẽ rĩ áni.”’ 20 Ongo iꞌdó acị́ yajó átâ drị́. Anâ care ẹ́ꞌị́ tị ĩré rĩi, átâ ondre ani ꞌdĩ, kizã oko ani áwusĩ cí, olũ anâ ngwápị drị́, amvõ ani cí, oko ọzị ani ásị́ cị̃drú sĩ. 21 ꞌBarâ ọꞌjọ láka, ‘Mâ átâ, mínzĩ rá Rũbãngã andra vúa nyándra gá. Mẹ́sị̃ ụngwẹlé nyâ ꞌbarâ ꞌi ni ku.’ 22 Kí átâ lê ọꞌjọ anâ ẹꞌbụ̃ꞌbâ tị ní, ‘Ãnyejí bõngú kãꞌbwị̃ losó réré rĩi ezẽezẽ ãnyĩsu rụarụ́. Ãnyĩsu anâ drị́ pĩꞌdí ní gá nyángitĩ vúa anâ pâ ní gá mvũka cí. 23 Ãnyejí tị́ ángwá swẹꞌdi ꞌbuluꞌbũlu rĩi ãnyĩlị rá, îdékî ị̃tụ́ ọ́gbọ́rọ́ anzõ drị́ rĩ ni, 24 ãꞌdusĩ mâ ngwápị ni ꞌdĩi odrã rá oko onzí rá, ẹgwẹ̃ dị̃ oko ẹsụ́ru rá.’ ꞌDĩsĩdrú iꞌdókî ị̃tụ́ ọ́gbọ́rọ́ ni idéka anzóka trõ.
25 “Ẹsụ́ drĩsó ꞌbará ãmbá rĩi ámvụ́ ꞌa. Anâ engwíre ꞌbãrụ́ rĩi, ecá ẹ́ꞌị́ tị ĩré ꞌdĩ, eri ụ́ꞌdụ́kụ́ longó lotú trõ rĩ drị̂. 26 Oko ụngwẹ ẹꞌbụ̃ꞌbágọ́ ãlu rĩi ọzị ani ꞌdị́ ãꞌdu tã ká ridé nĩ yã ꞌi. 27 Aꞌị̃ ani, ọꞌjọ, ‘Nyâ adrụ́pị̃ engwí rá oko nyâ átâ ọlị tị́ ángwá swẹꞌdi ꞌbuluꞌbũlu rĩi anâ engwíka ꞌbãrụ́ rũwẽ sĩ.’
28 “Adrụ́pị ni ãmbá ꞌdĩi oꞌe anyá, ogã kwika jó gá ni mgbẹ́. Ongo átâ okwi ãngwé ani itáre. 29 Kí ọꞌjọ átâ ní anyã sĩ, ‘Nyĩndre gbá, kĩnyã ꞌdítí ã kóko ꞌdĩ íꞌa árĩ ẹꞌbụ̃ idére nyí drị́ kêndré ọ̃pị́gọ́ áni vúa tã kpộdrú nyâ ꞌjọlé rĩi mîdéa, kí kwá ị̃ndrị́ ángwá gbá rĩ isâ íkwẽ má ní anzõ idéjó mâ ozî tị trõ kurũ. 30 Kí nyâ ꞌbará gọ́gọ́ nyâ limi ni ivolõꞌdi cá bãte gá ꞌdĩ engwi ꞌbãrụ́ ꞌdĩ, ílị aní ní tị́ ángwá swẹꞌdi ꞌbuluꞌbũlu rĩ ꞌi!’