24
Onzíka Yẹ́zụ̃ drị́ ꞌi
1 Ọꞌdụ́ ãtịjóadrú sãbítĩ drị̂ sĩa, lõvũrú, ũkûnzi ꞌdĩꞌbâtị ovũ ꞌbụ́drị̃ gá, ojikî ãdu ãꞌiã idélé ngụ̃ꞌdi drụ̃wị rĩi trõ. 2 Ẹsụ́kî ọ́nị́ ꞌbụ́drị̃ tị rĩi ólĩ pí. 3 Otõkî arụ́ ꞌdĩ sâ ẹsụ́kî Ópí Yẹ́zụ̃ ã rụ ni kurũ. 4 Drĩsó ãꞌiã aꞌụ̃re cí rĩi, mgbesâ ondrekí ꞌbá ẹ̃rị̃ bõngú sụka agụꞌdi ẹ̃yị́lõvi ani rĩ umbá ãꞌiã lãga gá.
5 Ọrị̃ sĩ ũkûnzi ꞌdĩi ọwọkî, ilukî drị̃ ndị̃tị̃ vụ̃rụ́, kí ꞌbá ꞌdĩ tị ọꞌjọ, “Ãnyí mãꞌdị́ lídri rĩ ndrụ̃ ꞌbá udrãka rá rĩ ílọ̃fọ́ ãꞌdu sĩ? 6 Ani ꞌdíꞌa ị̃yọ, onzí rá. Ãnyerã tã ándráni anâ ꞌjọlé ãnyi ní anâ olúre Gãlị̃lẹ́ã ꞌa rĩ ꞌi. 7 ‘Ọ́rị mãꞌdị́ ni kólẽ dũbãsĩ kõkwẽru enzĩꞌbá drị́, epalé kwealala drị, kôko kônzí ọꞌdụ́ inajóa rĩ sĩ rá.’” 8 Mgbe ũkûnzi ꞌdĩ oko erãkî tã ándráni anâ ꞌjọlé rĩi rá.
9 Engwíkî ꞌbụ́drị̃ gá sĩ ꞌdĩ, onzekî tã cị̃drú ridéꞌdi rĩi mãju mụdrị́lị́mbị́ ãlu rĩ ní vúa ꞌbá zị̃ tị anâ vú okoka rĩ ní sâ trõ. 10 Ũkûnzi ꞌdĩ ꞌbâtị ãꞌi, Mãrị́ã ni Mãgãdálãzị́ rĩ ꞌi, Jõánã ꞌi, Mãrị́ã ni Yãkọ́ꞌbọ̃ ã endrẽ ꞌi, vúa ꞌbá zị̃ tị ãꞌi trõ rĩi onzekî tã ꞌdĩi mãju ní nĩ. 11 Kí mãju orã rĩ sĩ tã ãꞌiã ꞌjọlé ꞌdĩi ékwi ãkó, olẽkî ãꞌi aꞌị̃ka ku. 12 Péturũ lê onga olũ ꞌbụ́drị̃ ní gá. Avụ̃ ꞌbụ̂ ní tị, ẹsụ́ bõngú ꞌbụ̂ ní ꞌa rĩ asẽ ị́lị́lị, Yẹ́zụ̃ ã rụ ĩmwâ ni ãkó, oko ongwi ꞌbãrụ́, aꞌụ̃ tã ridéꞌdi rĩ sĩ cí.
Lẹ́tị́ Ẽmáusĩ drị ꞌi gá.
13 Ọꞌdụ́ ãluá nã sĩ, ꞌbá ẹ̃rị̃ anâ vû ni okoka rĩ tị orĩkî vũre ganyi ụngwẹlé Ẽmáusĩ ní gá. Lọ̃fọ́ ani ĩré máịlị̃ tụ́dẹ̃rị̃ Yẹ̃rụ́sãlẹ́mẹ̃ trõ ꞌi. 14 ꞌBá ꞌdĩi orĩ tã izúre tã ridéꞌdi rĩ ídrị. 15 Ãꞌiã tã ꞌdĩi izúre ãꞌi ílọ̃fọ́ rĩi, Yẹ́zụ̃ ịjụmụ̃ ãꞌi oko ovũkî ãꞌi trõ. 16 Ondrekî ani rá sâ, kwá ọnị̃kî nãi Yẹ́zụ̃ ꞌi ni ku, ãꞌdusĩ oꞌbã ãꞌiã mị aꞌburu cí.
17 Yẹ́zụ̃ ọzị ãꞌi, “Ãnyévũ tébẽ sâ tã nzesĩ ãꞌdu drị yã?” Ombakî ásị́ lãzá sĩ cí. 18 Mãꞌdị́ ãlu ãꞌiã ụngwẹlé Kị̃lị̃ọ́pã rĩ, ọzị ani, “Nyi tẽ ãmụ́ olúꞌdi Yẹ̃rụ́sãlẹ́mẹ̃ ꞌa, kí tã ridéꞌdi ọꞌdụ́ ĩré ꞌdĩ sĩ rĩ nị̃ꞌdi ku rĩ ꞌi yã?”
19 Yẹ́zụ̃ ọzị ãꞌi, “Ãꞌdu tã idéru nĩ?”
Aꞌị̃kî, “Tã ridéꞌdi Yẹ́zụ̃ ni Nãzẹ̃rẹ́tị̃gọ́ rĩ írụ rĩ ꞌi. Ani pũrũfétãgọ́ nyúmá rẹ̃tụ́ rĩ idéꞌdi vúa lịnị̃ rẹ̃tụ́ rĩ kwẽꞌdi Rũbãngã ní ándra vúa ꞌbá cị̃drú andra rĩ ꞌi. 20 Kí amba tã azĩka Rũbãngã ní rĩi ãꞌi amba ãmadrị́ vũ aseka rĩ trõ, okwẽkî ani drã lịjó drị̃arụ́, ongo épa ani kwealala drị. 21 Ọlị ãrã sĩ kêyá ká Ị́saraị́lị̃ nĩ ari ãma ní nĩ. Kí tã ꞌdĩ idéru rụarụ́ alị ọꞌdụ́ ina ni ꞌdĩ ꞌi.
22 “Endrũ lõvũrú ũkûnzi ãma íꞌa zị̃ tị vũka ꞌbụ́drị̃ gá rĩ, engwíkî ãma drị́ õfú aꞌụ̃jó rĩ trõ. 23 Ọꞌjọkî, ãꞌi ẹsụ́ Yẹ́zụ̃ ã rụ ni ị̃yọ, vúa ãꞌi ondre mãláikã, kí mãláikã ꞌdĩ ọꞌjọ ãꞌi ní, Yẹ́zụ̃ ni lídri. 24 ꞌBá zị̃ tị ãma íꞌa vũka ꞌbụ́drị̃ gá rĩ isâ ẹsụ́kî lọ́kụdrú rụ ani ị̃yọ kêndré ũkûnzi ꞌdĩ ã ꞌjọka rĩ áni.”
25 ꞌDĩ ívú, Yẹ́zụ̃ ọꞌjọ ãꞌi ní, “Ãnyi ꞌbá lãli rĩ ꞌi, ĩlẽ tã ándá pũrũfẽtaã ã ꞌjọlé rĩ aꞌị̃ka ku ãꞌdu sĩ? 26 Ọꞌjọru Kị̃rị́sịtọ̃ ká icandĩ ẹsụ́ kpá odrĩ kwi anâ ẹ̃kụ̂ ní ꞌa ni kurũ yã?” 27 ꞌDĩsĩdrú Yẹ́zụ̃ iꞌdó tã nzeka ãꞌi ní lẹꞌjọ́ sĩlé Bụ́kụ̃ Ọlẹ Mũzê drị̂ íꞌa vúa pũrũfẽtaã drị̂ trõ anâ drị̃ gá rĩ ídrị.
28 Ecákî ĩré ẹ́ꞌị́ ãꞌiã vũre láka rĩ ígá ꞌdĩ, Yẹ́zụ̃ idéru kêndré ani kôya drị̃lé gá áni. 29 Kí ꞌbá ẹ̃rị̃ ꞌdĩ aꞌị́kî ani kolú ãꞌi trõ. Ọꞌjọkî, “Drĩâ ôlúkî ãnyi trõ ꞌdíꞌa, ãꞌdusĩ sáã ni oro, vũ sâ kộnị drĩádru.” ꞌDĩsĩdrú Yẹ́zụ̃ ọmụ ãꞌi trõ ꞌbãrụ́. 30 Ãꞌiã rĩre tã nyare rĩi, Yẹ́zụ̃ ọꞌdụ línyâ ni, anzo Rũbãngã, atĩ ꞌa na, okwẽ ãꞌi drí. 31 Mgbe ãꞌiã mị awị́ru vúa asụkî ani rá, ongo ẹgwẹ̃ ãꞌiã andra gá sĩ dị̃. 32 Ụzịkî ãꞌi ãꞌi ílọ̃fọ́, “Ãmã ásị́ orĩ umvúre anã tã izúre ãma trõ lẹ́tị ꞌa rĩi vúa anâ Bụ́kụ̃ Ọlẹ rĩ ã drị̃bâ ni nzere rĩ ꞌi ku yã?” 33 Mgbesâ ongakî ọrụ ongwikî Yẹ̃rụ́sãlẹ́mẹ̃ ꞌa. Náꞌa ẹsụ́kî mãju mụdrị́lị́mbị́ ãlu rĩ tị ꞌbá Yẹ́zụ̃ ã vû ni okoka rĩ trõ, otrakî ru kãré ãlu gá. 34 Kákî ꞌjọa, “Lọ́kụdrú cẽ, Ópí onzí rá! Vúa ịtẹꞌdẹ̃ru Sị̃mọ́nẹ̃ ní rá.” 35 ꞌBá ẹ̃rị̃ ꞌdĩ isâ oko onzekî tã ridéꞌdi ãꞌi ní lẹ́tị ꞌa rĩ ꞌi vúa ãꞌiã Ópí ni asụka anâ línyá atĩka sĩ rĩ ꞌi.
Yẹ́zụ̃ ịtẹꞌdẹ̃ru anâ mãju ní rá
36 Olúkî drĩsó tã ꞌdĩi izúre gá, ẹsụ́kî mgbe Yẹ́zụ̃ omba ãꞌi ílọ̃fọ́, oko ọꞌjọ ãꞌi ní, “Ẹ̃ꞌbwẹ́ kolú ãnyetrõ.”
37 Ãꞌiã ásị́ omvu vúa ọrị̃ oko ãꞌi cí, orãkî ãꞌi ondre orílĩdri! 38 Kí Yẹ́zụ̃ ọꞌjọ ãꞌi ní, “Ãnyọ́rị̃ ãꞌdu sĩ? Vúa ãnyã drị̃ ká rụcị́ ãꞌdu sĩ? 39 Ãnyĩndre mâ drị́ tị mâ pá tị trõ, ꞌdĩi õndo ma ꞌi. Ãnyụmvị́ mâ rụ oko ãnyĩndre ma, orílĩdri drị́ ĩzá kwã trõ kêndré má drị́ ãnyã ndrelé ꞌdĩ áni ni ị̃yọ.”
40 Ọꞌjọ tã ꞌdĩi ꞌdĩ, ịtẹꞌdẹ̃ ãꞌi ní anâ drị́ tị anâ pá tị trõ. 41 Sâ aꞌị̃kî ku, ãꞌdusĩ anzõ oko ãꞌi cí kákî ji aꞌụ̃ sĩ. Oko ọzị ãꞌi, “Ãnyi drị́ ꞌdíꞌa tã nyalé aꞌã yã? 42 Ongo okwẽkî aní ní ẹ̃ꞌbị aꞌbĩꞌdi aꞌbĩ rĩ ꞌi, 43 ongo onya ãꞌiã andra gá sĩ rá.”
44 Yẹ́zụ̃ ọꞌjọ ãꞌi ní, “Tã mâ ꞌjọlé ãnyi ní mâ olúre ãnyi trõ rĩ ã ékwî ni ꞌdĩ ꞌi, tã cị̃drú sĩlé mádrị Cárá Mũzê drị̂ íꞌa, Bụ́kụ̃ Pũrũfẽtaã drị̂ íꞌa, vúa Longó Ọlẹ rĩ íꞌa rĩ tị kólẽ kpộdrú kidéru rá.” 45 Oko awị́ ãꞌiã ụ́jệ ni Bụ̃kụ̃ Ọlẹ rĩ ã ékwî ni erijó. 46 Vúa ọꞌjọ, “Osĩru Kị̃rị́sịtọ̃ ká icandĩ ẹsụ́, kódrã rá, vúa kêyá kônzí ꞌbá drãka rá rĩ íꞌa ọꞌdụ́ inajóa rĩ sĩ. 47 Ongo rụ́ drị́arụ́ sĩ lẹꞌjọ́ enzĩ rujó vúa eꞌbejó rĩ ká runze ꞌbá cị̃drú ní vũ ndụtụ drị, kîꞌdó Yẹ̃rụ́sãlẹ́mẹ̃ ꞌa. 48 Ãnyi sãdị̃nịã tã ꞌdĩ drị́ ꞌi. 49 Má Éndrí Ọlẹ mâ Átâ ã icarãlé rĩ ẹzẹ́ ãnyi ní rá, kí ãnyolú drĩ ganyi nzágọ́ Yẹ̃rụ́sãlẹ́mẹ̃ ní ꞌa ꞌdíꞌa ndị̃ okpõ ọrụ rĩ ã ẹsị́jó ãnyi ídrị rĩ íngá.”
Yẹ́zụ̃ ongwi ꞌbụ̃ ꞌa
50 Yẹ́zụ̃ oji ꞌbá anâ vú okoka rĩ tị Bẹ̃tãnị́ã gá ondĩ anâ drị̂ ni ọrụ oko aja ãꞌi ídrị, ọcọ tụ̃tụ́ ãꞌi írụ. 51 Anâ tụ̃tụ́ cọrẹ ãꞌiã rụ gá rĩi, mgbesâ eꞌbe ãꞌi rá, ọtụ ọrụ ꞌbụ̃ ꞌa ãꞌi ándra sĩ pí. 52 Okwẽkî aní ní lãrú, ongo ongwikî vúlé Yẹ̃rụ́sãlẹ́mẹ̃ ꞌa anzõ rẹ̃tụ́ rĩ trõ. 53 Ongo orĩkî olúre jó Rũbãngã drị̂ íꞌa sáã cị̃drú, anzõ kwẽre Rũbãngã ni.