13
Nyĩru enzĩ, jõ ku irĩ, nyĩ drã
1 Ọꞌdụ́ nã sĩ, ꞌbá zị̃ tị náꞌa aꞌã rĩ tị ọꞌjọ Yẹ́zụ̃ ní lẹꞌjọ́ Pĩlátũ ã Gãlị̃lẹ́ãꞌbá ꞌdịjó ẹsụ́ kákî tã azĩ Rũbãngã ní rĩ ídrị. 2 Yẹ́zụ̃ aꞌị̃ ãꞌi ọꞌjọ, “Ĩrã rĩ sĩ Gãlị̃lẹ́ãꞌbá nã ꞌdịka ná ni sĩ ondẽkî enzĩ sĩ Gãlị̃lẹ́ãꞌbá zị̃ tị rá yã? 3 Ị̃yọ! Mãꞌjọ ãnyi ní, jõ ĩru ãnyã enzĩ ni rá ku irĩ, õndo ãnyi sâ ãnyevũ ãnyí udrã ãꞌi drị̂ áni. 4 Kusâ ꞌbá mụdrị́lị́mbị́ ãrõ udrãka Sị̃lọ̃ámũ ꞌa ẹsụ́ lọrọ enyõ oꞌde ãꞌi ídrị nã tị lê, ĩrã rĩ sĩ tã ꞌdĩi ịtẹꞌdẹ̃ ꞌbá ꞌdĩ ꞌbâtị ondẽ enzĩ sĩ ꞌbá olúka Yẹ̃rụ́sãlẹ́mẹ̃ ꞌa rĩ tị rá yã? 5 Mãꞌjọ ãnyi ní, jõ ĩru ãnyã enzĩ ni rá ku irĩ, õndo ãnyi sâ ãnyevũ ãnyí udrã ãꞌi drị̂ áni.”
Lẹꞌjọ́ ékwí ẹ́lẹ́wụ́ ꞌwaꞌdi ku rĩ drị́ ꞌi
6 Yẹ́zụ̃ oko ọꞌjọ ãꞌi ní lẹꞌjọ́ ékwí ꞌdĩi, “Mãꞌdị́ zị̃ ãlu osa ẹ́lẹ́wụ́ anâ ámvụ́ áꞌbáláꞌbãngá drị̂ íꞌa, onga oya õꞌwa emíre ẹ́lẹ́wụ́ ní sị́, kí ẹsụ́ ãlusâ kurũ. 7 Ongo ọꞌjọ mãꞌdị́ anâ ámvụ́ tã mbaꞌdi rĩ ní, ‘Nyĩndre drĩ, drĩâ kĩnyã ina sâ, mâcị́ õꞌwa ndrụ̃re ẹ́lẹ́wụ́ ꞌdĩ ísị́, kí mệsụ́ ãlusâ kurũ. Nyĩ ga vụ̃rụ́! Ká ámvụ́ ꞌdĩ ã ĩnyákụ́ ni ivolõ ĩsadrú ãꞌdu sĩ?’ 8 Kí ẹꞌbụ̃ꞌbágọ́ ꞌdĩ ọꞌjọ, ‘Ãmbá, nyeꞌbe drĩ kolú kĩnyã ãlu dị́, má ꞌbụ́ ga páarụ́ gbí, má wóro sũ láka. 9 Jõ ẹ́lẹ́wụ́ ꞌdĩ õꞌwa kĩnyã õꞌbú rĩ sĩ rá, losó! Kí jõ õꞌwa ku, ídrĩ eyá gaarụ́ vụ̃rụ́ ꞌi.’”
Yẹ́zụ̃ ijá ị́zị́ ãdrângúrũ trõ rĩi Sãbátũ sĩ
10 Sãbátũ zị̃ sĩ Yẹ́zụ̃ orĩ ká ꞌbá ịnị̃ jó lemú drị̂ íꞌa, 11 ẹsụ́ ị́zị́ zị̃ị aꞌã orí ũnzí rĩi oꞌbã ãdrângúrũ oko cí ká ridũ ándá kpé, olú lãzá ꞌdĩ trõ kĩnyã mụdrị́límbị́ ãrõ. 12 Yẹ́zụ̃ ondre ani ꞌdĩ, ụngwẹ ani andra gá, ọꞌjọ aní ní, “Ị́zị́ ꞌdĩ, nyáyụru, nyâ lãzá ní ꞌa sĩ rá.” 13 Yẹ́zụ̃ oko aja anâ drị̂ ni ị́zị́ ꞌdĩ ídrị, mgbesâ ị́zị́ ꞌdĩ idũ ani ọrụ, oko ẹcụ́ Rũbãngã ni rá. 14 Angalã oko ãmbá jó lemú drị́ rĩ íꞌa rĩi okpõsĩ Yẹ́zụ̃ ã ꞌbá ijáka Sãbátũ sĩ sĩ, oko ọꞌjọ ꞌbá náꞌa rĩ ꞌbâtị ní, “Ọꞌdụ́ ãnyi ní ẹꞌbụ̃ idéjó wã rĩi ázíá. Kólẽ ãnyevũ lijá gá ọꞌdụ́ ꞌdĩ ꞌbâtị sĩ, kí ọꞌdụ́ Sãbátũ drị̂ sĩ ku.”
15 Yẹ́zụ̃ aꞌị̃ ãꞌi, “Ãnyi ꞌbá drãnga rĩ! Ãnyi íꞌa ꞌbá ãluãlu ãꞌiã kãĩnõ kusâ mọ̃nị̃gọ tị ayuka vúa droka Sãbátũ sĩ ẹ̃yị́ gá ni ị̃yọ yã? 16 Ị́zị́ ꞌdĩi záá Ãbãrãhámũ drị́ ꞌi, sĩtánĩ umbé ani kĩnyã mụdrị́lị́mbị́ ãrõ, ani ijáka Sãbátũ sĩ ní gá enzĩ aꞌã yã?”
17 Anâ tã ꞌjọlé rĩ sĩ anâ óꞌjáꞌbâzí tị drị̃nzá oko cí, kí ꞌbá ãmgbụ́ rĩi lê anzókî tã cị̃drú anâ idélé losó rĩ sĩ anzô.
Lẹꞌjọ́ ékwí kwọ̃rọ̃ ékwí drị́ ꞌi
18 Yẹ́zụ̃ oko ọꞌjọ, “Opĩ Rũbãngã drị̂ káruvi ãꞌdu trõ? Mọ́ꞌbị̃a wã rĩi ãꞌdu trõ? 19 Opĩ Rũbãngã drị̂ kêndré kwọ̃rọ̃ ékwí mãꞌdị́ zị̃ ã ꞌdụlé, oko osa anídrị́ ámvú ꞌa rĩ áni. Ozo oꞌe kwe rẹ̃tụ́ rĩi, ongo ãrînzi ꞌbụ̃ ꞌa rĩ tị kpộdrú evũ otra sị́ arụ́ rĩ trõ.”
Lẹꞌjọ́ ékwí ãkụ́kwị́ drị rĩ ꞌi
20 Zị̃anígá Yẹ́zụ̃ ọzị ãꞌi, “Má opĩ Rũbãngã drị́ rĩ ọꞌbị̃ ãꞌdu trõ? 21 Opĩ Rũbãngã drị́ rĩi oviru ãkụ́kwị́ ị́zị́ ãlu ã ꞌdụlé gãádru, oko ondaꞌdia ngánõfú nzágọ́dru, atẽꞌdi lọị́jó ina, ꞌbãꞌdia mũgãtĩ kọ́pị̃ nzágọ́dru rĩ trõ vị̃.”
Jọ́tị ꞌbíríá rĩ ꞌi
22 Yẹ́zụ̃ oko oya ẹ́ꞌị́ ꞌa sĩ, ganyi ꞌa sĩ ꞌbá ịnị̃ sĩ, anâ drị̃ ꞌbãre Yẹ̃rụ́sãlẹ́mẹ̃ ꞌa rĩ ꞌi. 23 Mãꞌdị́ zị̃ ọzị ani, “Ópí, ꞌbá rarika rĩi kôlú tẽ gãádru yã?” Yẹ́zụ̃ aꞌị̃, 24 “Ãnyĩꞌbị̃ mọ́rị́ cị̃drú sĩ kwilé jótị ꞌbírí rĩ sĩ, ãꞌdusĩ mãꞌjọ ãnyi ní, ꞌbá ãmgbụ́ kọ́ꞌbị̃a tõlé nĩ, kí kákî mãa kpé. 25 Jõ jóꞌdị́pị kengá ọrụ nĩ, kôko ká jótị ni aꞌbu cí, ãnyímba ãngwé, ãnyí ꞌjọa, ‘Ópí, nyawị́ ãma ní jótị.’ Kí káꞌị̃a, ‘Ánị̃ ãnyi ku, vúa ãnyengá íngõá yã isâ ánị̃ ku.’ 26 Ãnyîko ãnyí ꞌjọa, ‘Ónya tã vúa ọ́mvụ tã ãnyi trõ rá, nyị́nị̃ ꞌbá ãmadrị́ ganyi ꞌa sâ rá.’ 27 Kí ká zị̃anígá sâ aꞌị̃a, ‘Ánị̃ ãnyi ku, vúa ãnyengá íngõá yã isâ ánị̃ ku. Ãnyĩnga mâ andra gá pí, ãnyi enzĩꞌbá ꞌdĩ.’
28 “Ãnyîko ãnyowó vúa ãnyí sị́ ci, ãnyã olúre ãngwé rĩi, jõ ĩndre Ãbãrãhámũ tị, Ĩsákõ, Yãkọ́ꞌbọ̃ vúa pũrũfẽtaã trõ opĩ Rũbãngã drị̂ íꞌa ꞌi. 29 ꞌBá kêngá ãꞌjíre, ũndrwére, lị́lẹ́ ẽsi vúa ọrụ́ ẽsi, kákî evũ kákî rĩ ị̃tú ọ́gbọ́rọ́ nyare opĩ Rũbãngã drị̂ íꞌa. 30 Lọ́kụlọ́kụ ꞌbá sáã ꞌdĩ sĩ vúlé rĩi kévũ kôlú ãtị, vúa ꞌbá sáã ꞌdĩ sĩ ãtị rĩi kévũ kôlú ꞌbá vúlé rĩ ꞌi.”
Yẹ́zụ̃ ã ásị́ lãzá Yẹ̃rụ́sãlẹ́mẹ̃ sĩ rĩ ꞌi
31 Sáã nã sĩ, Fãrị̃zẹ́ị̃ꞌbá zị̃ tị evũkî Yẹ́zụ̃ drị́, ọꞌjọkî aní ní, “Nyĩnga ꞌdíꞌa pí. Nyĩya kãré zị̃ ígá, ãꞌdusĩ Hẹ̃rọ́dẹ̃a olẽ nyi ꞌdịlé kpó.” 32 Yẹ́zụ̃ aꞌị̃ ãꞌi, ọꞌjọ, “Ãnyĩvũ ãnyĩꞌjọ ũbá nã ní, ‘Má orí ũnzí udró, má ꞌbá rụ ijá endrũ vúa õꞌbú, kí drụ́zị́ má mâ ẹꞌbụ̃ ni ịkọ́ rá.’ 33 Kí rá rĩi, endrũ, õꞌbú, vúa drụ́zị́ kólẽ macị́ andra gá, ãꞌdusĩ lọ́kụlọ́kụ pũrũfétãgọ́ ãlu sâ drãꞌdi kãré zị̃ gá ani ị̃yọ, tẽ kákî drã wã rĩi Yẹ̃rụ́sãlẹ́mẹ̃ ꞌa!
34 “Yẹ̃rụ́sãlẹ́mẹ̃, Yẹ̃rụ́sãlẹ́mẹ̃, nyi pũrũfẽtaã ụꞌdịꞌdi kpókpó, vúa ꞌbá ẹzẹ́lé nyí drị́ õfú losó trõ rĩ uwáꞌdi ọ́nị́ sĩ rĩ! Ọlị álẽ mãtõ nyâ ꞌbácírî tị kpộdrú mâ vóró gá, kêndré ãꞌụ́ endre lúkúndre rĩ ã anâ ngwanzî ni tõka aní ĩtí rĩ áni, sâ ílẽ ku! 35 Nyĩndre drĩ, nyâ kãré ká reꞌbe ándrú. Áꞌjọ nyí ní, nyêyá índre ma dị́ ku, ndị̃ nyífũ ꞌjọa, ‘Rũbãngã kọ̃cọ tụ̃tụ́ mãꞌdị́ eyáꞌdi rụ́ Ópí drị̂ sĩ rĩ írụ!’ ni kpá.”