12
Yẹ́zụ̃ opẽ bị́ drangã drị
1 ꞌBá élifũ ũꞌbí ã retráre kãré ãlu gá rĩi, oꞌbã kakî ãꞌiã pâ ni utu-utu, Yẹ́zụ̃ iꞌdó tã ꞌjọka ãtị ꞌbá anâ vú okoka rĩ drị́, ọꞌjọ, “Ãnyĩmba ãnyã tã ni cuwí ãkụ́kwị́ Fãrị̃zẹ́ị̃ꞌbá drị̂ sĩ, ékwí ani drangã ãꞌidrị̂ sĩ. 2 Tã cị̃drú aꞌbulé cí kí drị̃ wịlé mgbọ ku ani ị̃yọ, vúa tã idélé mụ̃gụ́mụ̃gụ́ dru kí runị̃ꞌdi ku ani ị̃yọ. 3 ꞌDĩsĩdrú tã ãnyã ꞌjọlé vũmũdĩ ꞌa rĩ isâ áꞌdi eria ingwe ꞌa rá, vúa tã ãnyã ꞌjọlé jó gá kõyõkõyõ sĩ jótị aꞌbujó cí rĩi sâ áꞌdi evũ áꞌdi yua jódrị sĩ.”
Ọrị̃lé rĩi ãꞌdi ꞌi
4 “Mâ ozî, mãꞌjọ ãnyi ní, ọrị̃ kõko ãnyi ꞌbá rụ ꞌdịka áwu, kí nã ívú tã zị̃ ãꞌi ní idélé wã ani ị̃yọ rĩ sĩ ku. 5 Kí má mãꞌdị́ kólẽ ãnyọrị̃ rĩi ịtẹꞌdẹ̃ ãnyi ní ꞌdĩ, ãnyọrị̃ Rũbãngã ni rụ ꞌdịka ã vú gá aní ní okpõ nyâ éndrî ni ꞌbejó ãcí ꞌa wã rĩ ꞌi. Õꞌo, lọ́kụdrú mãꞌjọ ãnyi ní ãnyọrị̃ ani áwu. 6 Áꞌdi cụ́wã tọ̃ụ́ azị ọ̃kọ̃lọ̃ngọ́ ẹ̃rị̃ ku yã? Kí ãrînzi ꞌdĩ tị ã ãlu isâ, Rũbãngã ã drị̃ egwẽ áwusĩ ku. 7 Kí ãnyi lê, drị̃ꞌbí ãnyi ídrị rĩ isâ olãru rá. ꞌDĩsĩdrú ọrị̃ kõko ãnyi ku, Rũbãngã ní ándra ĩndẽ cụ́wã ẽkpadrú rĩ isâ rá.”
Yẹ́zụ̃ ni aꞌị̃ka kusâ gãka ꞌbá andra
8 “Mãꞌjọ ãnyi ní, ꞌbá cị̃drú ma aꞌị̃ka ꞌbá andra rĩi, Ọ́rị Mãꞌdị́ isâ kệmụ́ ká ãꞌi aꞌị̃ mãláikã Rũbãngã drị̂ ándra rá. 9 Kí mãꞌdị́ ma gãꞌdi ꞌbá andra mgbẹ́ rĩi, Ọ́rị Mãꞌdị́ isâ kệmụ́ kógãa mãláikã Rũbãngã drị̂ ándra mgbẹ́. 10 Mãꞌdị́ tã ꞌjọꞌdi Ọ́rị Mãꞌdị́ ní rụ ũnzí rĩ ní áꞌdi eꞌbea rá. Kí jõ mãꞌdị́ zị̃ ọꞌjọ tã ũnzí Éndrí Ọlẹ rĩ írụ irĩ, enzĩ ani eꞌberu aní ní ku kwá.
11 “Jõ ojikî ãnyi jó lemú drị̂ íꞌa ꞌbãlé vụra andra, kusâ ꞌbá vũ aseka rĩ ándra, kusâ nósĩ õpi andra, ãnyã ásị́ kazá, ‘ꞌDị́ má ma ipá íngóni yã,’ jõ kusâ, ‘Má ãꞌdu ꞌjọ yã sĩ ku.’ 12 Ãꞌdusĩ Éndrí Ọlẹ rĩ kêyá ká ãnyi ịnị̃ tã ãnyã ꞌjọlé rĩ sĩ sáã nã sĩ rá.”
Oꞌdã ilonyĩꞌdị́pị lálí rĩ drị́ ꞌi
13 Mãꞌdị́ zị̃ ãlu ꞌbá rutraka rĩ ílọ̃fọ́ oza éré, ọꞌjọ Yẹ́zụ̃ ní, “Lãpọ́nyị́, nyĩꞌjọ mâ adrụ́pị ní kõꞌbã ãmanzu tã ãmã átâ ã eꞌbelé rĩi aní trõ.” 14 Kí ọꞌjọ aní ní, “Mâ õzî, ãꞌdi oꞌbã ma lẹꞌjọ́ ãnyi ílọ̃fọ́ rĩ alịlé, kusâ tã ãnyi ílọ̃fọ́ rĩi anzulé nĩ?” 15 Ọꞌjọ zị̃anígá, “Ãnyĩmba ãnyã tã, ãnyã mị kolú mgbọ mọmọ̃ õvi mgbị́mgbị rĩ sĩ, ãꞌdusĩ lidrĩ ꞌbá drị́ lọ́kụ rĩi ịtẹꞌdẹ̃ru tã ãmgbụ́ ꞌbá drị́ aꞌã rĩ tị sĩ ku.”
16 Ongo otã ãꞌi ní oꞌdã ꞌdĩ ꞌi, “Mãꞌdị́ zị̃ ilonyĩꞌdị́pị rĩ drị́ ámvụ́ ꞌa ãnyá olwãru nzá, 17 iꞌdó tã rãlé anâ ngá sĩ ọꞌjọ, ‘Kólẽ midé ãꞌdu? Ãꞌdusĩ ẽró mádrị́ oca mâ ãnyá ã tã ni mbajó ku.’ 18 Ongo ọꞌjọ, ‘Ánị̃ midé ãꞌdu yã ni ọ̃tẹ. Ẽró mádrị́ círícírí rĩ tị má unyõa vụ̃rụ́, mâko má gbọ̃rọ rĩ tị ucã kãré arụ́ áwu, mâko má mâ ãnyá vúa tã zị̃ tị mádrị́ loso rĩi cị̃drú utrá arụ́. 19 Mâko mâjọa mâ éndrî ní, “Mãꞌdị̂, nyí ní tã nyalé nzá kĩnyã ãmgbụ́ eyáꞌdí andra gá rĩ nî ꞌi, nyí ní tã losó rĩi ẽkpadrú kĩnyã ãmgbụ́ ní, nyijũ nyi lã! Nyovu, nyunya nyi, nyụmvụ nyi vúa nyanzó.”’ 20 Kí Rũbãngã ọꞌjọ ani ní, ‘Nyi mãꞌdị́ lálí ꞌdĩ! Ị́nị́ ꞌdĩ sĩ, nyí drã rá. Ongo tã nyídrị́ nyâ utrálé ꞌdĩ ã ꞌdị́pị̃ kôlú ãꞌdi ꞌi?’
21 “ꞌDĩi tã ridéꞌdi ꞌbá lãlí limi utráka vũ ꞌdĩ ídrị rĩ írụ rĩ ꞌi, kí Rũbãngã andra ãꞌi tã ako.”
Nyịgẹnị̃ Rũbãngã ni áwu
22 Yẹ́zụ̃ ọꞌjọ ꞌbá anâ vú okoka rĩ tị ní, “ꞌDĩsĩdrú mãꞌjọ ãnyi ní, ãnyã ásị́ kazá ãnyã lidrĩ sĩ ku, ꞌdị́ ãnyí ãꞌdu nya, kusâ ãnyí ãnyã rụ gá ãꞌdu su áwu sĩ ꞌi. 23 Ãꞌdusĩ lidrĩ oza lonya rá vúa rụ oza bõngú rá. 24 Ãnyĩndre drĩ úrú, oyĩkî õri ku vúa olwãkî ãnyá sâ ku, ãꞌidrị́ ẽró sâ ị̃yọ, kí Rũbãngã ká ãꞌi ní lonya kwẽ nyalé. Vúa ãnyi lê õzi ꞌdí ni rĩ ĩza ãrînzi gbá rĩi rẹtụ̃ sĩ rá. 25 Ãnyi ílọ̃fọ́, ásị́ lãzá sĩ, anâ lidrĩ vũ drị ꞌdíꞌa rĩ ịdrị̃ꞌdi andra gá gãádru wã rĩi ãꞌdi ꞌi? 26 Jõ ãnyidrị́ mọ́rị́ tã mányíá dru rĩ idéjó ị̃yọ irĩ, ãnyã ásị́ kâzá tã ãmgbụ́ rĩ tị sĩ ãꞌdu sĩ?
27 “Ãnyĩndre drĩ õvi õfu ayị́ ꞌa rĩ ã zojó rĩ ꞌi, kákî zo ẹꞌbụ̃ idéka ãkó, oꞌbwikî bõngú ku. Kí mãꞌjọ ãnyi ní, ópí Sọ̃lọ̃mọ́nẹ̃ ni ánâ ilonyi vúa ẹkụ̃ rẹ̃tụ́ rĩ íꞌa sâ, osu bõngú ãꞌiã ãlu drị́ áni ni kurũ. 28 Jõ Rũbãngã kusú kwe círícírí ãyị́ ꞌa, endrũ aꞌã, óꞌbú kôꞌwí rá ꞌbea ãcí ꞌa rĩ tị ꞌdí ni rĩ, ondre ngá ãnyi ígá oza ãꞌi ꞌdĩi ku yã? 29 ꞌDĩsĩdrú ãnyã ásị́ kazá ku, vúa tẽsâ óꞌbã ásị́ ãnyí ãꞌdu nya vúa mvụ yã sĩ ku. 30 Ãꞌdusĩ ꞌbá vũ drị Rũbãngã nị̃ka ku rĩ tị ká ásị́ ꞌbã tã ꞌdĩ ꞌbâtị ígá nĩ. 31 Kí rá rĩi, ãti ãnyĩndrụ̃ opĩ Rũbãngã drị̂ kpá, tã zị̃ tị ꞌdĩi ká rukwẽ ãnyi ní rá.”
Ilonyĩ ꞌbụ̃ ꞌa
32 “Ọrị̃ kõko ãnyí ku mâ bị̃lọ̃ ũꞌbíku ꞌdĩ, ãnyã Átâ ásị̂ ni ẹ̃ꞌbwẹ́ ãꞌdusĩ upẽ anyi kwijó opĩ anídrị́ íꞌa. 33 Ãnyazị́ tã ãnyidrị́ aꞌã rĩi rá, ongo ãnyĩkwẽ sítĩ ani icandĩ ꞌbá ní. Ãnyẹsụ́ ãnyi ní sãú rizaꞌdi ku kwa rĩ ꞌi, ani limi ꞌbụ̃ ꞌa rindú ꞌdí ku, láka ọgụ kôca kpé vúa lọdụ̃ sâ ômbe ku rĩ ꞌi. 34 Ãꞌdusĩ ãnyã ásị́ nî kôlú õndo kãré ãnyã limi ã olújó rĩ ígá.”
Tịluza mị mgbọ rĩ tị ꞌi
35 “Ãnyĩsuru, ãnyolú bábá ẹꞌbụ̃ ní vúa ãnyĩꞌbã ãnyã tárã kộgwẹ, 36 kêndré tịluza ãꞌiã ãmbá yaꞌdi ị̃tụ́ ọ́gbọ́rọ́ lãꞌdụ́ drị̂ ígá rĩ ã engwíka ni ụtẹ̃ka rĩ áni. Jõ ecá opã jótị nĩ, kákî awị́a aní ní ẽmíádru. 37 Tịluza ãꞌiã ãmbá ã ẹsụ́lé mị mgbọ vúa bábá anâ engwíre rĩ tị ã andra adũ! Mãꞌjọ ãnyi ní lọ́kụlọ́kụ, ãmbá ãꞌidrị́ ꞌdĩ ká anâ lõꞌbú kãꞌbwị̃ rĩ nzi pí, kóꞌbã kákî rĩ vụ̃rụ́, kôko ká ãꞌi ní lonya kwẽ anâ drị́ sĩ, kôko ká ãꞌiã lãga ni tẽ. 38 Tịluza nã ꞌbâtị ã andra adu, jõ ãꞌiã ãmbâ kengwí kẹsụ́ ãꞌi bábá ꞌi, jõsâ kengwí ị́nị́áꞌdị́, kusâ lõvũrú sâ ꞌi! 39 Ãnyĩnị̃ ọ̃tẹ rĩi, jõ kẹsụ́ ẹ́ꞌị́ꞌdị́pị kọ̃nị̃ sáã ọ̃gụ́ ã ẹmụ́jó rĩi ọ̃tẹ ꞌi rĩ, oꞌbã mãꞌdị́ ọ̃gụ́ rĩi onyõ anâ jó ã tị ni ku. 40 Ãluá rĩ áni, ãnyi sâ kólẽ dũbãsĩ ãnyolú bábá, ãꞌdusĩ Ọ́rị Mãꞌdị́ kêyá kệmụ́ sáã ãnyã ịgẹnị̃lé ku rĩ sĩ.”
Tịluza ịgẹnị̃lé wa rĩ tị ịgẹnị̃lé kpé rĩ trõ
41 Péturũ ọꞌjọ, “Ópí, lẹꞌjọ́ ékwí ꞌdĩi íꞌjọ ãma ní yã, jõ nósĩ ꞌbá kpộdrú ní?” 42 Ópí ongo aꞌị̃, “Jõ ꞌdí ni rĩ, tịluza ịgẹnị̃lé wã vúa ciri rĩi ãꞌdi ꞌi? Ani ꞌdĩi tịluza anâ ãmbá ã ꞌbãlé, anâ éꞌị́ ã tã ni mbalé vúa lonya anzuꞌdi anâ tịluza ꞌbâzí tị ní sáã ándá sĩ rĩ ꞌi. 43 Tịluza anâ ãmbá ã ẹsụ́lé ká tã ꞌdĩi idé anâ engwíjó rĩ íngá rĩ sĩ rĩ ã andra ãdú! 44 Lọ́kụlọ́kụ mãꞌjọ ãnyi ní, ãmbá anídrị́ ꞌdĩ ká tịluza ꞌdĩ ꞌbã tã kpộ anídrị́ rĩ ã drị̃ ndrelé. 45 Kí jõ tịluza ꞌdĩ ọꞌjọ aní ní anâ ngá sĩ óma, anâ ãmbá engwí ezẽ ku, ꞌdĩsĩdrú kiꞌdó tịluza zị̃ tị ãgo rĩ tị ũkú rĩ trõ mgbaka, vúa tã nyaka, ĩrá mvụka andróka trõ ꞌi rĩ, 46 tịluza ꞌdĩ ã ãmbâ kêngwí ọꞌdụ́ anâ ịgẹnị̃lé kurũ vúa sáã anâ nị̃lé ku rĩ sĩ. Ká tịluza ꞌdĩi uga ꞌjúꞌjú kôko ká ani zẹ ꞌbá aꞌị̃ ãkó rĩ íꞌa.
47 “Tịluza anâ ãmbá ã tã lẽlé kidé rĩ nị̃ꞌdi ọ̃tẹ kí oko idéru bábá kurũ vúa idé tã anâ ãmbá ã lẽlé kidé rĩi kurũ rĩi, lãmgbá drị́arụ̂ kôlú kũrũbá ẽkpadrú. 48 Tịluza tã anâ ãmbá ã lẽlé kidé rĩ nị̃ꞌdi ku, kí oko idé tã kũrũbá ẹsụ́jó áwu sĩ wã rĩ ã lãmgbá kôlú gã. ꞌBá cị̃drú tã kwẽre gá nzá rĩ drị́ áꞌdi ãꞌi zị dũbãsĩ kingwikî nzá, vúa mãꞌdị́ tã kwẽre gá lãka nzágọ́dru tã ani mbalé rĩ drị́, áꞌdi zịa dũbãsĩ kingwi nzá réré.”
Mêjí ẹꞌbwẹ̃ áwu ku kí lanzu
49 “Mêyá ãcí ejíre vũ drị ꞌdíꞌa áwu, álẽ ọlị õzóa ꞌdí ni sâ ãcí ꞌdĩ kọ̃gwẹ 50 Kí má ní drĩsó bãtị́sịmụ̃ kolé aꞌã, ꞌdĩ sĩ kọ̃mọ̃cụ̃ oko ma áwusĩ cí, pákã ndị̃ kófũ ca anâ ẹkọ́jó rĩ íngá! 51 Ĩrã rĩ sĩ mêyá vũ drị ꞌdíꞌa ẹꞌbwẹ̃ ejíre áwu yã? Ị̃yọ, kí mãꞌjọ ãnyi ní, mêjí ranzuka áwu. 52 Rijó drĩádru, mụjó andra gá, jótị ꞌbá ã olúre lâka tọ̃ụ́ rĩi kévũ ká ranzu rá, ꞌbá lâka ina rĩi ká óꞌjá ꞌdị ꞌbá ẹ̃rị̃ rĩ írụ, vúa ꞌbá ẹ̃rị̃ rĩi ká óꞌjá ꞌdị ꞌbá ina rĩ írụ. 53 Kákí evũ kákî ranzu ꞌdí ni, átá ká óꞌjá ꞌdị anâ ꞌbarâ ní rụ, vúa ꞌbará isá ká óꞌjá ꞌdị anâ átâ ní rụ, endre ká óꞌjá ꞌdị anâ zâpị̃ ní rụ vúa zâpị̃ isâ ká óꞌjá ꞌdị anâ endrẽ ní rụ, endre ká óꞌjá ꞌdị anâ ꞌbarâ ã ị́zị̂ trõ, vúa ꞌbarâ ã ị́zị̂ isâ ká óꞌjá ꞌdị anâ ãdrâ trõ.”
Tã amáka
54 Yẹ́zụ̃ ọꞌjọ laki rutraka náꞌa rĩ ní, “Jõ ĩndre rụ́ꞌbụ engá ũndrwére ẽsi, ãnyí ꞌjọa, ‘Endrũ ẹ̃yị́ kộꞌdị rá,’ lọ́kụdrú kộꞌdị rá. 55 Jõ vúa ãnyitirĩ ẹ́rị́ engáꞌdi lị́lẹ́ ẽsi rĩi nĩ, ãnyí ꞌjọa, ‘Endrũ vũ kôlú ãcí,’ lọ́kụdrú kôlú ãcí. 56 Ãnyi ꞌbá drãnga ꞌdĩ! Ĩnị̃ vũ rụ́ꞌbụ trõ amáka ọ̃tẹ. Kí ãnyí õvi ọꞌdụ́ ꞌdĩ sĩ rĩ itirĩ kpé ní íngóni?”
Ãnyeriru nyi ịsịkị̃ꞌdi trõ
57 “Ãnyí tã cẽ rĩ upẽ ãnyi ní kpé ãꞌdusĩ? 58 Ãnyã vũre mãꞌdị́ nyi ịsịkị̃ꞌdi rĩ trõ vụra andra rĩi, kólẽ ãnyị̃ꞌbị̃ okpõsĩ lẹꞌjọ́ nã ã sị́ usúlé lẹ́tị ꞌa drĩsó ĩca care vụra andra ku, áwusĩ ní ôjidrú nyi mãꞌdị́ lẹꞌjọ́ alịꞌdi rĩ ándra ku, ku irĩ, mãꞌdị́ lẹꞌjọ́ alịꞌdi rĩ ká nyi kwẽ ãsĩkãriã drị́, vúa ãsĩkãriã kôko ká nyisu mãꞌbụ́sụ̃ ꞌa. 59 Mãꞌjọ nyí ní lọ́kụlọ́kụ, nyéfũ ku kwá, pákã bị̃ nyâ ọ̃kọ̃lọ̃ngọ́ asẽꞌdi rĩi kwẽjó rĩ íngá.”