9
Yẹ́zụ̃ ká anâ mãju mụdrị́lị́mbị́ ẹ̃rị̃ rĩ zẹ
1 Yẹ́zụ̃ ụngwẹ anâ mãju mụdrị́lị́mbị́ ẹ̃rị̃ rĩ ꞌbâtị kãré ãlu gá ꞌdĩ, okwẽ ãꞌi ní mọ́rị́ okpõ trõ orí ũnzí rĩ drojó vúa lãzá ijájó, 2 oko ọzẹ ãꞌi tã nzere ꞌbá ní opĩ Rũbãngã drị́ ídrị, vúa ꞌbá avú rĩi ijáre. 3 Ọꞌjọ ãꞌi ni, “Ôji tã acị́ ꞌdĩ ígá kêndré õtó áni, kũbẽngú, lonya, sítĩ kusâ bõngú ífũlé rĩ trõ ku. 4 Jõ jótị ãnyã kwire gá ganyi nã íꞌa rĩ aꞌị́ ãnyi rá, ãnyolú lâka bị̃ ãnyã ganyi nã eꞌbejó rĩ íngá. 5 Jõ ꞌbá aꞌị̃ ãnyi kurũ, ãnyụwẹ fụ́trụ̃ ãnyã pá gá rĩi náꞌa, ãꞌi ní lẹtẹ̃ drú.” 6 ꞌDĩsĩdrú iꞌdókî acílé ẹ́ꞌị́ sĩ, ẹ́ꞌị́ sĩ, kãré cị̃drú gá õfú losó rĩ nze sĩ ꞌbá ní, lãzá ijáka trõ.
Hẹ̃rọ́dẹ̃ ã drị̃ lụcị́ Yẹ́zụ̃ sĩ rĩi
7 Hẹ̃rọ́dẹ̃ ni Gãlị̃lẹ́ã ni aseꞌdi rĩi eri tã cị̃drú ridéka rĩi ꞌdĩ, drị̃ ani ọcịru rá. Ãꞌdusĩ ꞌbá zị̃ tị ọꞌjọ, Yẹ́zụ̃ ni “Yõánã bãtị́sịtã ni anâ ꞌdịlẹ́ kpó rĩ onzí nĩ.” 8 Zị̃ tị ọꞌjọ, “Ẹ̃lị́ã ịtẹꞌdẹ̃ru nĩ,” vúa tọ́, zị̃ tị kõcẽ, “Pũrũfétãgọ́ ãlu ani ꞌbẹ́rọ́ rĩi onzí nĩ.” 9 Kí Hẹ̃rọ́dẹ̃ ọꞌjọ, “Yõánã lê álị drị̃ ani pí. Kí drĩâ ãꞌdi ká tã mâ erilé ꞌdĩ ꞌbâtị idé nĩ?” ꞌDĩsĩdrú olẽ ani ndreka rá.
Yẹ́zụ̃ okwẽ lonya ꞌbá élifũ tọ̃ụ́ ní
10 Mãju ꞌdĩ engwí ꞌdĩ, onzekî Yẹ́zụ̃ ní tã ãꞌiã idélé rĩ ã drị̃bâ ni rá. Oko ọꞌdụ ãꞌi trõ ovũkî ãꞌi-ãꞌi, ganyi ụngwẹlé Bẽtĩsãídã ní gá. 11 Laki ãmgbụ́ rĩi erikî ovũkî náꞌa ꞌdĩi rĩ, okokî Yẹ́zụ̃ ã vû ni láka náꞌa trõ. Aꞌị́ ãꞌi rá, oko onze tã ãꞌi ní opĩ Rũbãngã drị̂ ídrị, vúa ijá ꞌbá avú rĩi rá.
12 Ũndré ị̃tụ́ ã ꞌdere rĩi, mãju mụdrị́lị́mbị́ ẹ̃rị̃ rĩi evũ aní drị́, ọꞌjọkî aní ní, “Nyĩzẹ mũndãrã ꞌdĩi pí, kõvũkî ãꞌi ní ẹ́ꞌị́ ĩré rĩ íꞌa vúa ganyi ꞌa sĩ lonya ụndrụ̃ sĩ kãré ọꞌdụ́ kojó rĩ trõ, ãꞌdusĩ ru ꞌdíꞌa kãré ꞌbá ãkó rĩ ígá.” 13 Yẹ́zụ̃ ọꞌjọ ãꞌi ní, “Ãnyĩkwẽ ãꞌi ní tã nyalé ãnyi ꞌi.” Kí aꞌị̃kî ani, “Tã ãmadrị́ aꞌã rĩi tẽtẽ mũgãtĩ tọ̃ụ́ ẹ̃ꞌbị ẹ̃rị̃ trõ. Ílẽ ãmãvũ lonya ẹjẹ́re mũndãrã ꞌdị́ tị́ ꞌdĩ ní kpộdrú yã?” 14 Ẹsụ́ ãgo aꞌdị́tẹ rĩi atẽ ĩré élifũ tọ̃ụ́. Kí Yẹ́zụ̃ ọꞌjọ anâ mãju ní, “Ãnyĩꞌbã kõrĩkî vụ̃rụ́ múrúmúrú katẽ ꞌbá mụ̃dịtọ̃ụ́, mụ̃dịtọ̃ụ́.”
15 Mãju ꞌdĩi idékî anâ ꞌjọka rĩ áni, oꞌbãkî ꞌbá kpộ orĩ vụ̃rụ́. 16 Yẹ́zụ̃ ọꞌdụ mũgãtĩ tọ̃ụ́ vúa ẹ̃ꞌbị ẹ̃rị̃ trõ ꞌdĩi, ondĩ ngá ọrụ ꞌbụ̃ ꞌa, okwẽ anzõ Rũbãngã ní, oko atĩ ãꞌi, ọꞌjọ anâ mãju ní kanzukî ꞌbá lọ̃fọ́ sĩ. 17 ꞌBá kpộ onya tã trí trí ãꞌiã lẽka rĩ áni. Anâ mãju tị otra reꞌbeka rĩi ẽvú ndrûndrû mụdrị́lị́mbị́ ẹ̃rị̃.
Péturũ ịtẹꞌdẹ̃ Yẹ́zụ̃ ni Kị̃rị́sịtọ̃ ꞌi
18 Ọꞌdụ́ zị̃ sĩ, Yẹ́zụ̃ ã ilegĩre aꞌdị́tẹ rĩi, anâ mãju ọzẹru rụarụ́ ĩré, ọzị ãꞌi, “ꞌBá kộꞌjọa ma ãꞌdi ꞌi?” 19 Aꞌị̃kî, “Yõánã ni bãtị́sịmụ̃ kwẽꞌdi ꞌi, zị̃ tị kộꞌjọa Ẹ̃lị́ã ꞌi, vúa zị̃ tị lê kócẽ, pũrũfétãgọ́ ọ̃kụ rĩ ã ãlu onzí nĩ.” 20 Kí Yẹ́zụ̃ ọzị ãꞌi, “Ãnyi lê, ãnyíꞌjọa ma ãꞌdi ꞌi?” Péturũ aꞌị̃, “Nyi Kị̃rị́sịtọ̃ ni Rũbãngã drị́ rĩ ꞌi.”
21 Kí Yẹ́zụ̃ okwẽ ãꞌi ní cárá kọ̃ꞌjọkî tã ꞌdĩi mãꞌdị́ zị̃ ní ku.
Yẹ́zụ̃ ká tã ꞌjọ anâ icandĩ, drã vúa onzíka ní drị vú ãtịjóa rĩ sĩ
22 Yẹ́zụ̃ oko inzá ꞌdí ni, ọꞌjọ ãꞌi ní, “Ọ́rị Mãꞌdị́ ni oꞌbãru icandĩ rẹ̃tụ́ rĩi ẹsụ́lé, ãꞌdusĩ amba laki drị̂, amba ꞌbá tã azĩka jó Rũbãngã drị̂ íꞌa rĩi, lãpọ̃nyịã cárá drị̂ trõ, kákî ani gã mgbẹ́, kákî ꞌdịa kpó, kí ọꞌdụ́ inajóa rĩ sĩ kônzí lídri rá.”
23 Yẹ́zụ̃ ọꞌjọ ãꞌi ní, “Jõ mãꞌdị́ olẽ mâ vû ni ekóka, kólẽ kõnga aní rụ rá, kọ̃ꞌdụ anâ kwealala ni ọꞌdụ́ cị̃drú sĩ, kõko kekó mâ vû ni. 24 Ãꞌdusĩ mãꞌdị́ lẽꞌdia anâ lidrĩ ni ariꞌdi rĩ kị́gwẹ̃a rá, kí mãꞌdị́ anâ lidrĩ ịgwẹ̃ꞌdi má sĩ rĩ ká anâ lidrĩ ni ari rá. 25 Kí jõ gbá mãꞌdị́ kẹsụ́ vũ ndụtụ áwu sâ, kịgwẹ̃ anâ lidrĩ ni áwusĩ rĩ, kónyi ani ãꞌdu? 26 Jõ drị̃nzá ká mãꞌdị́ kó má sĩ vúa lẹꞌjọ́ mâ ịnị̃lé rĩ sĩ, Ọ́rị Mãꞌdị́ isâ drị̃nzá kệmú kôkoa aní sĩ cí anâ engwijó anâ ẹ̃kụ́ vúa ẹ̃kụ́ Rũbãngã Átá drị́ anâ mãláikã ọlẹ rĩ trõ rĩ íngá ꞌi. 27 Mãꞌjọ ãnyi ní lóku drú, ãnyi zị̃ tị mbaka ꞌdíꞌa ꞌdĩi kévũ ká opĩ Rũbãngã drị̂ ndre drã ãjị́ ꞌbị̃ka ãkó ngá.”
Yẹ́zụ̃ ká rẹcọ ẹ̃kụ́ trõ
28 Ọꞌdụ́ ãrõjóa Yẹ́zụ̃ ã tã ꞌdĩ ꞌjọjó rĩ ívú, ọꞌdụ anâ mãju Péturũ ꞌi, Yõánã ꞌi vúa Yãkọ́ꞌbọ̃ ꞌi, ovũkî ãꞌi trõ ꞌbẹ́ drị ilegĩre. 29 Anâ ilegĩre rĩi, anâ andratị ã gbẽtî ẹcọru rá, vúa anâ bõngû kộsụ ẹ̃yị́lõvi ã angụka rĩ áni. 30 Ãgo ẹ̃rị̃, Mũzê tị Ẹ̃lị́ã trõ, 31 ịtẹꞌdẹ̃kî ru ẹ̃kụ́ rẹ̃tụ́ rĩ trõ tã izúre gá Yẹ́zụ̃ tị trõ. Ọꞌjọkî tã drã Yẹ́zụ̃ drị̂ asẽ gã ká ridé Yẹ̃rụ́sãlẹ́mẹ̃ ꞌa rĩ ídrị. 32 Péturũ tị anâ ꞌbâzí trõ lê oꞌdekî ọꞌdụ́ gá lí, kí ọpị̃kî mị ꞌdĩ, ãꞌiã mị awị́ru mgbọ, ondrekî anâ ẹ̃kụ̂ ni, ꞌbá anâ mbaꞌbâzi rĩ trõ ọ̃tẹ. 33 Ãgo ẹ̃rị̃ ꞌdĩ ã Yẹ́zụ̃ ni eꞌbere rĩi, Péturũ ọꞌjọ aní ní, “Ãmbá, ãnyetrõ ꞌbá ní olúka ꞌdíꞌa ni losó. Nyĩꞌbã ãmã sị ꞌdíꞌa ụ́cị́ ina, ãlu nyí ní, ãlu Mũzê ní vúa ãlu Ẹ̃lị́ã ní.” (Õzi ꞌdí ni rĩ, ọnị̃ sâ ani ká tã ꞌjọ ãꞌdu drị yã ni ku.)
34 Anâ drĩsó tã ꞌdĩ ꞌjọre rĩi, mgbe rụ́ꞌbụ rẹ̃tụ́gọ́ dru rĩi aku ãꞌi cí, vúa adrĩ rẹ̃tụ́ rĩi oko ãꞌi cí. 35 Ọ́lọ́ꞌbọ́ engáꞌdi rụ́ꞌbụ ꞌa rĩi ọꞌjọ, “ꞌDĩi mâ Ngwápị ni mâ upẽlé rĩ ꞌi, ãnyeri tị ani.” 36 Ọ́lọ́ꞌbọ́ ꞌdĩi ọvụ̃ ꞌdĩ, Yẹ́zụ̃ asẽ aꞌdị́tẹ. Anâ mãju tị ọvụ̃kî cĩrĩ, ọꞌjọkî ọꞌdụ́ nã sĩ ꞌbázị̃ ní sâ tã ãꞌiã ndrelé ridéꞌdi rĩi kurũ.
Yẹ́zụ̃ ijá ꞌbará orí ũnzí trõ rĩi rá
37 Õꞌbûzí Yẹ́zụ̃ tị ã ẹsị́re ꞌbẹ́ drị̃ sĩ vụ̃rụ́ rĩi, ꞌbá ãmgbụ́ evũkî drị́arụ́. 38 Kí mgbesâ mãꞌdị́ zị̃ ãlu ꞌbá ꞌdĩ íꞌa rĩi oza éré, “Lãpọ́nyị́, nyikonyĩ mâ ꞌbarâ ni, ani mâ ꞌbará ãlu tẹ̃ndẹ̃ rĩ ꞌi. 39 Orí ũnzí rĩi kôkoa, kóꞌbã kûzá vúa kôꞌbea vụ̃rụ́, kótĩa kẹ̃fụ́tọ̃ trõ. Eꞌbe ezẽ ku, kêndré olẽ ani kọ̃ꞌdị rá áni. 40 Mâꞌị́ nyâ mãju ni kõdrokî drú orí ũnzî ni pí sâ, omãkî kpé.” 41 Yẹ́zụ̃ aꞌị̃, “Ãnyi ꞌbá unzi aꞌị̃ ãkó ꞌdĩ, ĩlẽ molú ãnyi ílọ̃fọ́ tã mika trõ íngópí?” Oko ọꞌjọ mãꞌdị́ ꞌdĩ ní, “Nyejí nyâ ꞌbarâ ni ꞌdíꞌa.”
42 Õzi ꞌbará ꞌdĩ ká drĩsó eyá Yẹ́zụ̃ drị́ eyâ sâ, mgbe orí ũnzí ꞌdĩ oꞌbe vụ̃rụ́ kótĩa kẹ̃fụ́tọ̃ trõ. Kí Yẹ́zụ̃ oza orí ũnzí ꞌdĩ idrị, orí ũnzí eꞌbe ꞌbará ꞌdĩi rá, Yẹ́zụ̃ oko ingwi ꞌbarâ ni átâ drị́.
43 ꞌBá cị̃drú aꞌụ̃ okpõ rẹ̃tụ́ Rũbãngã drị́ sĩ cí.
Yẹ́zụ̃ ká tã ꞌjọ drã anídrị̂ ídrị vú ẹ̃rị̃jóa rĩ sĩ
ꞌBá cị̃drú ã aꞌụ̃re tã Yẹ́zụ̃ ã idélé rĩ sĩ rĩi, Yẹ́zụ̃ ọꞌjọ ꞌbá anâ vú okoka rĩ ní, 44 “Ãnyĩsõ bị́ ógá tã mâ ꞌjọlé ãnyi ní rĩ ígá ꞌi. Ọ́rị Mãꞌdị́ ni oꞌbãru kệmụ́ ká rukwẽ ꞌbá drị́ ꞌa.” 45 Kí erikî tã anâ ꞌjọlé rĩ ã ékwî ni ku. Ọzụ̃ru ãꞌi ní dị̃, áwusĩ drú kọ̃nị̃kî ku, vúa ọrị̃ oko ãꞌi ani zịre gá lẹꞌjọ́ ꞌdĩ sĩ cí.
Ãꞌdi kôlú rẹ̃tụ́ rĩi nĩ?
46 Ĩrõtá iꞌdó Yẹ́zụ̃ ã mãju ní lọ̃fọ́ ãꞌi-ãꞌi, ãꞌdi kôlú rẹ̃tụ́ rĩi nĩ yã ní drị. 47 Yẹ́zụ̃ ã ãꞌiã rã ni nị̃ka ọ̃tẹ sĩ, ọꞌdụ ꞌbarángwá ãlu oꞌbã omba aní lãga. 48 Oko ọꞌjọ ãꞌi ní, “Mãꞌdị́ ꞌbácírí ꞌdĩ áni ꞌdĩi aꞌị́ꞌdi mâ rụ́ sĩ rĩi aꞌị́ ma ꞌi, vúa mãꞌdị́ ma aꞌị́ꞌdi rĩi aꞌị́ mãꞌdị́ ma ẹzẹ́ꞌdi rĩi rá. Ãnyi ílọ̃fọ́ gãádru rĩi, ani mãꞌdị́ rẹtụ̃ sĩ ndẽꞌdia nĩ rĩ ꞌi.”
Mãꞌdị́ óꞌjá ꞌdịꞌdi ãnyi írụ ku rĩi, oꞌde ãnyi ní
49 Yõánã ọꞌjọ, “Ãmbá, ãmẹsụ́ mãꞌdị́ zị̃ ká orí ũnzí dro nyâ rụ́ sĩ ꞌdĩ, ãꞌbị̃ imbáléa cí, ãꞌdusĩ ani ãmã ãlu ꞌi ku.” 50 Kí Yẹ́zụ̃ ọꞌjọ ãꞌi ní, “Ị̃yọ, ígogã ani ku, ãꞌdusĩ mãꞌdị́ óꞌjá ꞌdịꞌdi ãnyi írụ ku rĩi, ani ãnyi ní.”
Sãmãríãꞌbá olẽ Yẹ́zụ̃ ni ku
51 Sáã Yẹ́zụ̃ ã tụjó ꞌbụ̃ ꞌa rĩ ã ecáre ĩré rĩi, ọꞌdụ acị́ ásị́ cị̃drú sĩ yajó Yẹ̃rụ́sãlẹ́mẹ̃ ꞌa. 52 Oko ọzẹ ọ̃kọ̃lọ̃kọ̃kệ andra gá kpá ẹ́ꞌị́ Sãmãríãꞌbá drị̂ íꞌa, ꞌbá idére bábá anâ eyáka sĩ ꞌi. 53 Kí ꞌbá náꞌa rĩ tị olẽkî ani aꞌị́ka ku, ãꞌdusĩ oꞌbã drị̃ mụjó Yẹ̃rụ́sãlẹ́mẹ̃ ꞌa.a 54 Mãju Yãkọ́ꞌbọ̃ tị Yõánã trõ kõcẽ ãꞌi kõndre tã ũnzí ridéꞌdi rĩi ꞌdĩ, ọzịkî Yẹ́zụ̃ ni, “Ópí, ílẽ ãmụngwẹ ãcí kengá ꞌbụ̃ ꞌa rĩi ãꞌi ivolõjó ni rá yã?” 55 Yẹ́zụ̃ oko ẹcọ́ ngá ãꞌi drị́, iꞌjá ãꞌi rá. 56 Oko ovũkî andra gá ẹ́ꞌị́ zị̃ íꞌa.
Icandĩ ẹsụ́lé Yẹ́zụ̃ ã vû ni okore gá rĩi
57 Ãꞌiã vũre lẹ́tị sĩ rĩi, mãꞌdị́ zị̃ ãlu ọꞌjọ Yẹ́zụ̃ ní, “Má nyâ vû ni ko kãré cị̃drú nyâ acị́re rĩ ígá trõtrõ.” 58 Yẹ́zụ̃ aꞌị̃, “Ũbá drị́ sâ ꞌbụ́ olújó rĩi aꞌã vúa ãrînzi ꞌbụ̃ ꞌa rĩ drị́ sâ jóꞌbílé aꞌã, kí Ọ́rị Mãꞌdị́ drị́ kãré anâ drị̃ ni ꞌbãjó ni ị̃yọ.”
59 Yẹ́zụ̃ ọꞌjọ mãꞌdị́ zị̃ ní, “Nyekó mâ vû ni.”
Kí mãꞌdị́ ꞌdĩ ọꞌjọ aní ní, “Ópí, nyĩꞌbã ãtịjóa rĩi mãmụ mesé mâ átâ ni kpá.” 60 Yẹ́zụ̃ ọꞌjọ aní ní, “Nyeꞌbe ꞌbá drãka rá rĩi kõse ãꞌiã wãꞌdîzí tị drãka rá rĩ ni,b kí nyi lê, nyẹmụ́ opĩ Rũbãngã drị́ rĩi ịfẹ̃re.”