8
Ũkú Yẹ́zụ̃ ni ikonyĩka rĩ ꞌi
1 Nã ívú Yẹ́zụ̃ acị́ kãré ãmgbụ́ gá, ganyi vúa ẹ́ꞌị́ ꞌa sĩ, õfú losó opĩ Rũbãngã drị́ rĩ drị̂ nze sĩ ꞌbá ní. Mãju mụdrị́lị́mbị́ ẹ̃rị̃ rĩ isâ ovũkî trõ, 2 vúa ũkú zị̃ tị anâ ijálé lãzá mgbị́mgbị ꞌa rĩi anâ orí ũnzí udrójó ãꞌi írụ rĩ tị trõ, vúa Mãrị́ã ni Mãgãdálãzị́ anâ orí unzi tụ́dẹ̃rị̃ rĩ drojó rụarụ́ pí rĩ ꞌi, 3 Jõánã ni ị́zị́ Kúzã ni ẹꞌbụ̃ idéꞌdi Hẹ̃rọ́dẹ̃ drị́ celi ꞌa rĩ drị́ rĩ ꞌi, Sũzánã ꞌi, vúa ũkú ũꞌbí zị̃ tị Yẹ́zụ̃ ni ikonyĩka tã ãꞌidrị́ sĩ vúa ꞌbá anâ vû ni okoka rĩ trõ rĩ ꞌi.
Oꞌdã gọ̃lị́ꞌbágọ́ õri yĩꞌdi rĩ drị́ rĩ ꞌi
4 ꞌBá ãmgbụ́ evũka Yẹ́zụ̃ drí engáka ganyi mgbị́mgbị ꞌa sĩ rĩ tị, emúru kãré ãlu gá ꞌdĩ, Yẹ́zụ̃ otã ãꞌi ní oꞌdã ꞌdĩ ꞌi, 5 “Gọ̃lị́ꞌbágọ́ zị̃ oya õri yĩre, kí anâ õri ni yĩre gá, zị̃ tị ọzọ̃ lẹ́tị ꞌa, ꞌbá utu pá sĩ, vúa ãrînzi ote rá. 6 Õri zị̃ tị ọzọ̃ vũ ọ́nị́ trõ rĩ íꞌa, ẹsụ́ lâka ĩnyákú gãádru, onga rá, kí ị̃tụ́ ã kaka ꞌdãku sĩ, õri ni ọgwẹ rá, ãꞌdusĩ osu zọ́ álị kurũ. 7 Zị̃ tị rĩi ọzọ̃ ọ̃cị́ ꞌa, ozokî ọ̃cị́ trõ kãré ãlu gá, ọ̃cị́ ã olúka trĩî sĩ ịndụ́ õri ni rá ofũ ꞌwa sĩ kurũ. 8 Vúa õri zị̃ tị ozo vũ ãꞌdụ́ ꞌa. Oko ozo cuwí oꞌwa losó vúa oza yĩjóadrú rĩi vú mị́ã.” Ịkọ́ oꞌdã ꞌdĩ tãka ꞌdĩ, ọꞌjọ, “Ãnyi ꞌbá bị́ trõ tã erijó rĩ, ãnyeri!”
Oꞌdã ꞌdĩ ã ékwî ꞌi
9 ꞌBá anâ vû ni okoka rĩ tị ọzị ani oꞌdã ꞌdĩ ká tã nze ãꞌdu drị yã sĩ. 10 Yẹ́zụ̃ oko ọꞌjọ, “Lịnị̃ cirĩ drị́ ruzụ̃ꞌdi dị̃ opĩ Rũbãngã drị̂ íꞌa rĩi oꞌbãru ãnyi ní nị̃lé, kí ꞌbá zị̃ tị ní lê áꞌdi nzea lẹꞌjọ́ ékwí vúa oꞌdã sĩ, áwusĩ ní, ‘jõ kõndrekî be sâ kõndrekî drú ku, vúa kerikî be sâ kerikî drú ékwí ani gbá rĩi ku.’
11 “Oꞌdã ꞌdĩ ã ékwí ni ꞌdí ni, õri ni lẹꞌjọ́ Rũbãngã drị́ ꞌi. 12 Õri zọ̃ka lẹ́tị ꞌa rĩi, ꞌbá lẹꞌjọ́ Rũbãngã drị̂ erika, kí mgbe sĩtánĩ kêyá ká lẹꞌjọ́ ãꞌiã ásị́ gá rĩi ꞌdụ pí, vúa ká ãꞌi igogã aꞌị̃ ãꞌidrị̂ ígá, kẹsụ́kî drú lari ku rĩ tị ꞌi. 13 Õri zọ̃ka vũ ọ́nị́ trõ rĩ ígá rĩi, ꞌbá lẹꞌjọ́ Rũbãngã drị́ erika anzõ sĩ, kí lẹꞌjọ́ aní osu zọ́ ãꞌi ásị́ ku. Jõ sáã lụꞌbị̃ drị́ ecá nĩ, kákî aꞌị̃ ãꞌidrị́ eꞌbe ẽmíádru rá rĩ tị ꞌi. 14 Vúa õri zọ̃ka ọ̃cị́ ꞌa rĩi, oviru ꞌbá lẹꞌjọ́ Rũbãngã drị́ erika rá, kí jõ iꞌdókî acílé lari ꞌa rá, ásị́ lãzá, losõ limi drị̂ tị losõ vũ drị́ rĩ trõ rĩ, ká ãꞌi igogã ẹꞌbụ̃ lari drị̂ idéjó ãꞌi ní zojó, mụjó andra gá ni ku rĩ tị ꞌi. 15 Õri zọ̃ka ĩnyákú losó ꞌa rĩi, oviru ꞌbá lẹꞌjọ́ Rũbãngã drị́ erika, vúa tã ani mbãka ãꞌiã ásị́ gá anzõ sĩ tádru, vúa ékwí ꞌwaka landẽ ãkó rĩ ꞌbâtị ꞌi.”
Tárã ꞌbãlé tẹ́ꞌdọ̃ drị rĩ ꞌi
16 “Mãꞌdị́ ãlusâ tárã dũꞌdi kí ꞌbãꞌdia kụ̃ꞌdọ́ ꞌa, kusâ gbọlọ ĩtí ni ị̃yọ. Rá rĩi, ká tárã ní ꞌbã tẹ́ꞌdọ̃ drị fẹrẹndẹ, áwusĩ ní jõ ꞌbá kevũ jó gá ni sâ, kákî tã ndre wã. 17 Ãꞌdusĩ tã zụ̃lé dị̃ kí nị̃lé ku ani ị̃yọ, vúa tã drị̃ aꞌbulé cí rĩ isâ ejía íngwe ꞌa rá. 18 ꞌDĩsĩdrú ãnyolú tã erire gá lolwẽ sĩ. Mãꞌdị́ tã nzá trõ rĩ ní, áꞌdi inzáa aní ní dị́, vúa mãꞌdị́ tã ãkó rĩ drị́ gãádru rĩ isâ ꞌdụa drị́arụ́ sĩ pí.”
Yẹ́zụ̃ ã endrẽ tị adrụ̂nzi trõ
19 Yẹ́zụ̃ ã endrẽ tị adrụ̂nzi tị trõ evũkî ani ndrere, kí omãkî calé andra arụ́ ĩre ni kpé. 20 Mãꞌdị́ zị̃ ọꞌjọ aní ní, “Nyâ endrẽ tị nyâ adrụ̂nzi tị trõ umbákî ãngwé olẽkî nyi ndrelé rá.” 21 Yẹ́zụ̃ ingwi, “Mâ endrẽ tị mâ adrụ̂nzi tị trõ, ãꞌi ꞌbá lẹꞌjọ́ Rũbãngã drị́ erika vúa ẹꞌbụ̃ aní idéka rĩ ꞌbâtị ꞌi.”
Yẹ́zụ̃ imbá ẹ́rị́ mẽri drị rĩi rá
22 Ọꞌdụ́ zị̃ ãlu, Yẹ́zụ̃ ọꞌjọ ꞌbá anâ vû ni okoka rĩ ní, “Ãnyĩꞌbã ôzakî cálélé mẽri áꞌdó.” Mgbesâ otõkî ị́ꞌbọ́ ꞌa iꞌdókî acị́. 23 Ãꞌiã ị́ꞌbộ ni pẽre rĩi, Yẹ́zụ̃ oꞌde ọꞌdụ́ gá. Ẹ́rị́ ecé kộlwẹ okpõ sĩ, oꞌbã ẹ̃yị́ sâ kácalã ị́ꞌbộ ní ꞌa, ĩré kákî osú mẽri ꞌa.
24 ꞌBá anâ vû ní okoka rĩ ovũkî ingakî ani, ọꞌjọkî, “Ãmbá, Ãmbá, ĩré ãmá ꞌbã ọmvụ́jó.” Yẹ́zụ̃ onga ọrụ ꞌdĩ, ọꞌjọ ẹ́rị̂ tị mẽri ã kãgbãkãgbã trõ kõmba. Mgbesâ ombakî ꞌdị̃ vũ engwí ẹ̃ꞌbwẹ́. 25 Oko ọzị ꞌbá anâ vû ní okoka rĩ tị, ọꞌjọ, “Ãnyã aꞌị̃ ni íngwa?” Ọrị̃ vúa aꞌụ̃ka trõ, iꞌdókî tã ụzịka ãꞌi ílọ̃fọ́, “ꞌDĩi ãꞌdi ꞌi, tã ꞌjọꞌdi, kí ẹ́rị́ mẽri trõ sâ ã tị erilé ꞌdĩ ꞌi?”
Yẹ́zụ̃ ijá mãꞌdị́ orí unzi rĩ trõ rĩi rá
26 Ozakî lọgọ Gẹ̃rásẹ̃ꞌbáa drị́ mẽri Gãlị̃lẹ́ã drị̂ áꞌdó rĩ ígá. 27 Yẹ́zụ̃ ọtị̃ pá lọgọ drị ꞌdĩ, ecíru mãꞌdị́ orí unzi ꞌa tõre rụarụ́ engáꞌdi ganyi ꞌa rĩ trõ. Mãꞌdị́ ꞌdĩ olũ bõngú ãkó ọꞌdụ́ ũꞌbí, vúa olú jó ꞌa sâ ku, kí tẽsâ kôlú kãré ꞌbá usere rĩ ígá. 28 Ocẽ ani kõndre Yẹ́zụ̃ ni ꞌdĩ, ọdị tị rị, orí unzi rụarụ́ ꞌdĩ oꞌbe ani vụ̃rụ́ Yẹ́zụ̃ ní ándra, ọ́lọ́ꞌbọ́ éré sĩ, ọꞌjọ, “Ílẽ ãma írụ ãꞌdu, Yẹ́zụ̃, Ngwápị Rũbãngã Ọrụ Ndẽꞌdia rĩ drị̂? Ãmaꞌị́ nyi, ígwilĩ ãma ku.” 29 Ọꞌjọ ꞌdí ni rĩi, Yẹ́zụ̃ ã cárá kwẽka orí unzi ꞌdĩ kefũ rụarụ́ pí sĩ. Orí ũnzí ꞌdĩ oko rụ ani cí. Jõ ûmbé pá ani drị́ trõ mgbírilã sĩ cí sâ, kôcea kpãkpã, vúa orí unzi rụarụ́ ꞌdĩ tị kájia tẽsâ olúre kwesikwesĩ ꞌa.
30 Yẹ́zụ̃ ọzị, “Nyâ rụ́ ní ãꞌdi ꞌi?” Oko aꞌị̃, “Mũndãrã ꞌi,” ãꞌdusĩ orí unzi rĩi rụarụ́ téréterẽ drú. 31 Orí unzi ꞌdĩ tị aꞌị́ Yẹ́zụ̃ ã kizã ni ásị́ cị̃drú sĩ, kõdro drú ãꞌi ꞌbụ́ tọ̃lọ̃lọ́ ꞌa ku sĩ.
32 Ẹsụ́ õwínyí kônyá kãré nã ígá ꞌbẹ́ mãrã esi. Orí unzi ꞌdĩ aꞌị́ Yẹ́zụ̃ ni, “Nyĩzẹ ãma tõre õwínyí nã ꞌbâtị írụ.” Yẹ́zụ̃ aꞌị̃ rá. 33 Orí unzi ꞌdĩ ꞌbâtị eꞌbe mãꞌdị́ ꞌdĩi, mgbesâ otõkî õwínyí onyáka rĩ írụ, ilukî gulugutũ ꞌa sĩ, ọzọ̃kî mẽri ꞌa, oko ọmvụ́kî cị̃drú rá.
34 ꞌBá õwínyí ẹyị̃ka rĩ kõcẽ ãꞌi kôndre tã ridéꞌdi rĩi ꞌdĩ, ọfẹ̃kî ẹ́ꞌị́ ꞌa vúa ganyi ꞌa sĩ tã ridéꞌdi rĩ nzere. 35 ꞌBá evũ tã ridéꞌdi rĩ ndrere ꞌdĩ, ẹsụ́kî mãꞌdị́ Yẹ́zụ̃ ã orí unzi drore rụarụ́ pí rĩ orĩ Yẹ́zụ̃ ã pá gá, osu bõngú cí, vúa ká tã rã wa, ongo adrĩ oko ãꞌi cí.
36 ꞌBá tã ridéka ꞌdĩ ndreka rĩ onze ꞌbá zị̃ tị ní mãꞌdị́ orí ũnzí trõ rĩ ã rụ oja íngóni yã ꞌi. 37 Ọrị̃ sĩ, Gẹ̃rásẹ̃ꞌbá cị̃drú aꞌị́kî Yẹ́zụ̃ ni kólẽ keꞌbe ãꞌiã vũ ni rá. ꞌDĩsĩdrú Yẹ́zụ̃ tị otõkî ị́ꞌbọ́ ꞌa, eꞌbekî ãꞌi rá. 38 Mãꞌdị́ téꞌbẽ orí unzi drore rụarụ́ pí rĩi, aꞌị́ Yẹ́zụ̃ ní ani kolú dru ãꞌi trõ. Kí Yẹ́zụ̃ ọzẹ ani pí, ọꞌjọ aní ní, 39 “Nyĩngwi drĩâ ãnyi drị́ ꞌbãrụ́, nyĩmụ tã Rũbãngã ã idélé nyí ní rĩ nzere.” Ongo mãꞌdị́ ꞌdĩ acị́ ganyi ꞌa sĩ cị̃drú onze tã Yẹ́zụ̃ ã idélé aní ní rĩi rá.
Yẹ́zụ̃ inzí záá drãꞌdi rá rĩi, vúa ijá ị́zị́ ãrí ã rare rụarụ́ rĩi rá
40 Yẹ́zụ̃ onga vũ Gẹ̃rásẹ̃ꞌbá drị́ rĩ ígá sĩ, ongwi Gãlị̃lẹ́ã ꞌa dị́ ꞌdĩ, ꞌbá náꞌa rĩi cị̃drú aꞌị́kî ani ásị́ ẹꞌbwẹ̃ sĩ, ãꞌdusĩ orĩkî ani ụtẹ̃re. 41 Ãmbá jó lemú drị̂ drị́ ụngwẹlé Yáịrọ̃ rĩ ẹmụ́ oꞌde Yẹ́zụ̃ ní ándra, aꞌị́ ani eyájó aní drị́ ꞌbãrụ́. 42 Ẹsụ́ zâpị̃ ni ãlu tẹ̃ndẹ̃ kĩnyã mụdrị́lị́mbị́ ẹ̃rị̃ rĩi lãzá ani õkpó, ĩré kôdrã. Yẹ́zụ̃ ã yare Yáịrọ̃ drị́ ꞌbãrụ́ rĩi, ꞌbá ãmgbụ́ oko vú ani trõ, ꞌdĩ sĩ lẹ́tị ꞌa kákî ru umwĩumwĩ.
43 Ị́zị́ zị̃ ãlu ꞌbá lọ̃fọ́ ãrí ã urare rụarụ́ kĩnyã mụdrị́lị́mbị́ ẹ̃rị̃ rĩi aꞌã, icandĩru õjo mgbị́mgbị gá, ivolõ limi aní drị̂ cị̃drú sâb õjo omã ani ijálé kpé. 44 Ị́zị́ ꞌdĩ epĩru Yẹ́zụ̃ ã ọ̃gụ gá ẽsi, ꞌbá ãmgbụ́ lọ̃fọ́ sĩ sâ ẹlọ Yẹ́zụ̃ ã bõngú kãbwị̃ rĩ ã tị ni, mgbe ãrí uraꞌdi rụarụ́ rĩ omba dị̃ trõ. 45 Yẹ́zụ̃ ọzị, “Ãꞌdi ẹlọ ma nĩ?” ꞌBá cị̃drú ucí cí. Péturũ ọꞌjọ, “Ãmbá, ꞌbá ãmgbụ́ ká ru umwĩumwĩ!” 46 Kí Yẹ́zụ̃ ọꞌjọ, “Mãꞌdị́ zị̃ ẹlọ ma rá, ãmãlã okpõ ꞌbá ijájó rĩ efũ má rụ rá ni ánị̃ ọ̃tẹ.” 47 Ị́zị́ ꞌdĩ ondre tã anâ idélé mũsídru rĩ ká ruzụ̃ kpé ꞌdĩ, ẹmụ́ rụ abị́ka trõ oꞌde Yẹ́zụ̃ ã andra gá, oko onze lẹꞌjọ́ ꞌbãꞌdia ani kẹlọ Yẹ́zụ̃ ã bõngú ni rĩ ã ékwí ni, vúa anâ jajó rĩ trõ cị̃drú. 48 Yẹ́zụ̃ ọꞌjọ aní ní, “Mâ zápị, aꞌị̃ nyídrị̂ ari nyi rá, nyĩya ásị́ ẹꞌbwẹ̃ sĩ!”
49 Drĩsó Yẹ́zụ̃ ã olúre anâ lẹꞌjọ́ tịyá rĩ ꞌjọre rĩi, mãꞌdị́ zị̃ engáꞌdi Yáịrọ̃ drị́ ꞌbãrụ́ rĩ ọꞌjọ Yáịrọ̃ ní, “Nyâ zápị odrã rá, ícandĩ lãpọ́nyị́ ni ku.” 50 Yẹ́zụ̃ eri tã anâ ꞌjọlé rĩi rá, oko ọꞌjọ Yáịrọ̃ ní, “Nyimbá ásị́, nyâ aꞌị̃ kolú õkpó, nyâ zâpị̃ ã rụ kôꞌe ꞌdã rá.” 51 Yẹ́zụ̃ tị ocakî ꞌbãrụ́ ꞌdĩ, olẽ ꞌbázị̃ kõwi jó gá trõ ni ku, rá rĩi Péturũ ꞌi, Yõánã tị Yãkọ́ꞌbọ̃ trõ, vúa záá drãꞌdi ꞌdĩ ã átá tị endrẽ trõ. 52 ꞌBá kpộ kôwó ásị́ lãzá záá ꞌdĩ ã drã drị́ sĩ owô, kí Yẹ́zụ̃ ọꞌjọ ãꞌi ní, “Ãnyeꞌbe owóka, záá ꞌdĩ odrã kurũ, kí ká ọꞌdụ̂ ko.” 53 Ọgụkî ani gụ̃, ãmãlã ọnị̃kî odrã rá ni ọ̃tẹ. 54 Yẹ́zụ̃ oko záá ni drị́ ꞌa, ụngwẹ ani ọꞌjọ, “Záángwá, nyĩnga ọrụ.” 55 Mgbesâ záá ꞌdĩ ã orí lĩdri engwí rá, onga ọrụ. Yẹ́zụ̃ ọꞌjọ, “Ãnyĩkwẽ aní ní lonya nyalé.” 56 Záá ꞌdĩ ã átá tị endrẽ trõ aꞌụ̃kî okpõsĩ. Yẹ́zụ̃ icarã ãꞌi lîlí kộꞌjọkî tã ridéꞌdi rĩ ãlusâ ꞌbá zị̃ ní ku.