Õfú Losó Lụ́kã ã Sĩlé rĩi 7

Yẹ́zụ̃ ijá tịluza ãmbá ãsĩkárĩ drị́ rĩ ã rụ ni rá

¹ Yẹ́zụ̃ ịkọ́ tã anâ lẽlé ꞌjọlé ꞌbá cị̃drú keri rĩi ꞌjọka ꞌdĩ, onga ọmụ Kãpẹ̃rẹ̃náọ̃ ꞌa. ² Ẹsụ́ ãmbá ãsĩkárĩ Rúmã ꞌbá drị́ náꞌa rĩ ã tịluza ni anâ lẽlé drõ réré rĩ ã rụ ni lọꞌụ́ ꞌdãsâku, ĩré kódrã. ³ Ãmbá ãsĩkárĩ drị́ ꞌdĩ kõcẽ ani keri Yẹ́zụ̃ ni Kãpẹ̃rẹ̃náọ̃ ꞌa ꞌdĩ, ọzẹ amba Yụ̃dẹ́ị̃ꞌbá drị́ zị̃ tị ani ụngwẹre keyá dru anâ tịluza ꞌdĩ ã rụ ni ijáre. ⁴ Evũkî Yẹ́zụ̃ drị́ ꞌdĩ, aꞌị́kî ani kizã sĩ, ọꞌjọkî, “Mãꞌdị́ ꞌdĩi ẹsị̃ nyâ kónyî ni ẹsụ́lé rá, ⁵ ãꞌdusĩ olẽ Yụ̃dẹ́ã ꞌbá ndrõ, vúa ọsị ãmã jó lemú drị́ rĩ isâ nĩ.” ⁶ Yẹ́zụ̃ tị onga ovũkî ãꞌi trõ, kí anâ ĩré jô ni ịtọrọ̃re rĩi, ãmbá ãsĩkárĩ drị́ ꞌdĩ ọzẹ anâ ozî tị drị́arụ́, ọꞌjọ kọ̃ꞌjọkî, “Ópí, ícandĩ nyi ẹmụ́jó má drị́ jó gá ku, ãꞌdusĩ mẹ́sị̃ nyí ní ekwíjó má drị́ jó gá ku. ⁷ Ma gbá isâ, mẹ́sị̃ eyálé nyándra ku, kí jõ nyẹꞌjọ́ tã lọ́lụ́ sĩ sâ, mgbe mâ tịluza ã rụ ni kôja rá. ⁸ Ãmbá, ma gbá isâ, ma mãꞌdị́ cárá pá rĩ ꞌi, vúa má ãsĩkãriã má pá rĩ ã drị̃ ndre, Jõ mãꞌjọ ãsĩkárĩ ãlu ní, ‘Nyị̃mụ!’, mgbe kôya, vúa zị̃ rĩ ní, ‘Nyẹmụ́!’, mgbe kệmụ́, vúa mâ ọ̃pígộ ní, ‘Nyidé tã ꞌdĩi,’ mgbe kídéa.” ⁹ Yẹ́zụ̃ eri tã ꞌdĩi ꞌdĩ, aꞌụ̃ áwusĩ okpõsĩ, ẹcọ́ tị ꞌbá ãmgbụ́ anâ vû ni koka rĩ drị́, ọꞌjọ, “Mãꞌjọ ãnyi ní lọ́kụlọ́kụ, Ị́saraị́lị̃ ni ndụtụ rĩ íꞌa sâ mệsụ́ aꞌị̃ ꞌdĩ áni ꞌdĩi kurũ.” ¹⁰ ꞌBá zẹlé õfú jire rĩ ꞌbâtị engwíkî jó gá ꞌdĩ, ẹsụ́kî tịluza nã ã rụ ni ẹꞌbwẹ rá.

Yẹ́zụ̃ inzí ãwị́zị́ Náinĩ gá rĩ ã ꞌbarâ ni rá

¹¹ Mgbe nã ívú, Yẹ́zụ̃ tị ꞌbá anâ vú okoka rĩ trõ ovũkî ganyi ụngwẹlé Náinĩ rĩ ígá, laki ãmgbụ́ oko vú ani trõ. ¹² Anâ ganyi nã ã kẹ́tụ́mị̃ ni ịtọrọ̃re rĩi, ecikî ru ꞌbá mãꞌdị́ drãꞌdi rá rĩi ẹnzị̃ka ãngwé selé rĩ trõ. Mãꞌdị́ drãꞌdi rá ꞌdĩi ẹsụ́ ꞌbará ãludi ãwị́zị́ nã drị́ aꞌã rĩ ꞌi, ꞌbá ãmgbụ́ ganyi nã íꞌa rĩi ịjụmọ̃kî ãwị́zị́ nãi anâ kọ̃mọcụ̃ ní ꞌa. ¹³ Ópí Yẹ́zụ̃ ondre ãwị́zị́ ꞌdĩi rĩ, kizã rẹ̃tụ́ rĩi oko aní áwusĩ cí, oko ọꞌjọ ani ní, “Ôwó ku.” ¹⁴ Mgbesâ Yẹ́zụ̃ ịzẹ́ru andra gá ẹlọ́ avurukwe ni ꞌdĩ, mgbe ꞌbá rụ ĩmwâ ni nzị̃ka rĩ tị omba ꞌdị̃. Ongo ọꞌjọ, “ꞌBarâ, áꞌjọ nyí ní, nyĩnga ọrụ!” ¹⁵ Mgbesâ mãꞌdị́ drãꞌdi rá ꞌdĩi onzí rá, oko orĩ rĩ, iꞌdó tã ꞌjọka. Yẹ́zụ̃ ongo okwẽ ani endrẽ drị́. ¹⁶ Adrĩ rẹ̃tụ́ rĩi oko ꞌbá cị̃drú cí, anzókî Rũbãngã kákî ꞌjọa, “Pũrũfétã rẹ̃tụ́ rĩi efũ ãmã lọ̃fọ́ gá rá. Rũbãngã ẹmụ́ ꞌbá anídrị́ arire rá.” ¹⁷ Tã Yẹ́zụ̃ ã idélé rĩ ã õfû ọkụ Yụ̃dẹ́ã ꞌa ndụtụ vúa vũ ĩréĩré rĩ ígá sĩ.

Lãzị́ Yõánã ni bãtị́sịmụ̃ kwẽꞌdi rĩ drị́ Yẹ́zụ̃ ní drị rĩi

¹⁸ ꞌBá Yõánã ni bãtị́sịmụ̃ kwẽꞌdi rĩ ã vú okoka rĩi onze tã Yẹ́zụ̃ ã idele rĩi cị̃drú aní ní ꞌdĩ, Yõánã ụngwẹ ꞌbá anâ vú okoka rĩi ẹ̃rị̃. ¹⁹ Ọzẹ ãꞌi Ópí Yẹ́zụ̃ drị́ ani ẹzị́re, “ꞌDị́ ẹmụ́ꞌdi rĩi nyi ꞌi yã, jõ nósĩ ãmụtẹ̃ mãꞌdị́ zị̃ áwu?”

²⁰ ꞌBá ꞌdĩ oca Yẹ́zụ̃ drị́ ꞌdĩ, ọꞌjọkî “Yõánã ni bãtị́sịmụ̃ kwẽꞌdi rĩi ẹzẹ́ ãma nyí drị́, nyi zịre, ‘Ẹmụ́ꞌdi rĩi nyi ꞌi yã, jõ nósĩ ãmụtẹ̃ mãꞌdị́ zị̃ áwu?’”

²¹ Sáã nã sĩ, Yẹ́zụ̃ ijá ꞌbá lãzá mgbị́mgbị trõ rĩ tị ãmgbụ́, lãzá ãdrãtụ́wị̃ drị́, éndrí ũnzí trõ rĩi, vúa awị́ ꞌbá ãmgbụ́ mị ako rĩ tị ã mị ni rá. ²² Yẹ́zụ̃ oko aꞌị̃ ꞌbá Yõánã ã ẹzẹ́lé rĩ tị ꞌdí ni, “Ãnyĩngwi, ãnyĩꞌjọ Yõánã ní tã ãnyã ndrelé ridéka vúa tã ãnyã erilé rĩ trõ, ꞌbá mị ako rĩ tị ká tã ndre, ꞌbá azaka rá rĩ kâcị́ wã, dõꞌbóꞌbá ni rụ kôja, ꞌbá bị́ ako rĩ ká tã erí, ꞌbá drãka rá rĩi kônzí, icandĩꞌbá ká õfú losó rĩi eri. ²³ Vúa andra adũ ꞌbá mâ lẹꞌjọ́ ni gãka kurũ rĩ ní.”

²⁴ ꞌBá Yõánã ã ẹzẹ́lé rĩ ã ngwire rĩi, Yẹ́zụ̃ iꞌdó tã ꞌjọka laki ní Yõánã ní drị, “Ĩvũ ándráni ayị́ ꞌa, nãlé ãꞌdu endrére? Lẹ̃rẹ́ ẹ́rị́ ã oyolé rĩ ꞌi yã? ²⁵ Ị̃yọ! Kí ĩnga ĩvũ ãꞌdu endrére? Mãꞌdị́ lõꞌbú losó rĩ suꞌdi rĩ ꞌi yã? Ị̃yọ! ꞌBá lõꞌbú losó rĩ usúka vúa runyaka kãcụ̃ ꞌa rĩi áꞌdi ẹsụ́a ópí drị́ celi ꞌa. ²⁶ Kí jõ ꞌdí ni rĩ, ĩvũ ãꞌdu endrére? Pũrũfétãgọ́ yã? Õꞌo, mãꞌjọ ãnyi ní, ondẽ pũrũfétã gbá rĩ ꞌi sâ rá. ²⁷ Yõánã ni ꞌdĩi mãꞌdị́ Bụ́kụ̃ Ọlẹ rĩ íꞌa tã sĩjó drị̃arụ́, ‘Nyĩndre drĩ! Mêyá má ọ̃kọ̃lọ̃kọ̃kệ mádrị̂ zẹ nyí ní andra gá, kêyá ká nyâ lẹ́tị ni idé kpá’ rĩ ꞌi. ²⁸ Lọ́kụlọ́kụ mãꞌjọ ãnyi ní, ꞌbá ũkú ã tịlé rĩ íꞌa, mãꞌdị́ Yõánã ni bãtị́sịmụ̃ kwẽꞌdi rĩ ndẽꞌdi rá ani ị̃yọ, kí rũ sâ, mãꞌdị́ gã réré opĩ Rũbãngã drị̂ íꞌa rĩi ondẽ ani rá.”

²⁹ ꞌBá cị̃drú ani erika rĩ tị ãꞌi ꞌbá mũsórõ traka rĩ trõ, aꞌị̃kî andã Rũbãngã drị̂ rá ãꞌiã bãtị́sịmụ̃ Yõánã drị́ rĩi koka sĩ. ³⁰ Kí Yõánã ã bãtị́sịmụ̃ ni gãka sĩ, Fãrị̃zẹ́ị̃ꞌbá ãꞌi lãpọ̃nyịã cárá Mũzê drị́ ịnị̃ka rĩ trõ ivolõkî tã Rũbãngã ã tị uꞌbãlé ãꞌi ní rĩi rá.

³¹ “Kí má ꞌbá ọꞌdụ́ ꞌdĩ sĩ rĩ ã lidrĩ ni ọꞌbị̃ ãꞌdu trõ? Ãꞌi ãꞌdu áni? ³² Ãꞌiã õvi ni kêndré ꞌbácírí rutraka sọ́kọ̃ ꞌa uzáka ãꞌi ílọ̃fọ́ ꞌdí ni rĩ áni,

‘Ãvu ãnyi ní nyamụ́lẹrẹ̃, kí ĩlẽ tã tuka ku;

ãngo ãnyi ní owólarã, kí ĩlẽ owóka ku!’

³³ Ãꞌdusĩ Yõánã ni bãtị́sịmụ̃ kwẽꞌdi rĩi eyá ꞌdĩ, onya línyá ku vúa ọmvụ vị́nọ̃ ku, ĩꞌjọ, ‘Orí ũnzí rụarụ́ aꞌã.’ ³⁴ Ọ́rị Mãꞌdị̂ eyá ꞌdĩ, ká línyá nya vúa ká tã mvụ, ĩꞌjọ, ‘Ãnyĩndre gụ́lụ́vọ́, andróꞌdị́pị vúa õzí ꞌbá mụ̃sọ́rọ̃ traka rĩ drị́ enzĩꞌbá trõ rĩ ꞌi.’ ³⁵ Kí rũkwã sâ, cirĩ ã losõ ni ndréa anâ ꞌbácírí ní ru.”

Ị́zị́ enzĩꞌdị́pị rĩ ã enzĩ eꞌberu rá

³⁶ Fãrị̃zẹ́ị̃gọ́ zị̃ ãlu ụngwẹ Yẹ́zụ̃ ni aní drị́ jó gá lonya gá. Oca Fãrị̃zẹ́ị̃gọ́ ꞌdĩ drị́ jó gá ꞌdĩ, orĩ vụ̃rụ́ tã nyare. ³⁷ Ị́zị́ zị̃ị ãlu ganyi nã íꞌa rụ́ kụꞌdi enzĩ idéka sĩ ꞌdãku rĩi náꞌa, eri Yẹ́zụ̃ ẹmụ́ ãmụ́ dru Fãrị̃zẹ́ị̃gọ́ ꞌdĩ drị́ jó gá ꞌdĩ, ọmụ náꞌa ejí ãdu ngụ̃ꞌdi drũwĩ rĩi ẹ́tẹ́ ꞌa trõ. ³⁸ Ọwọ Yẹ́zụ̃ ní pá, kôwó, mị́ndra ani kọ́zọ̃ Yẹ́zụ̃ ní pá trãtrã, oko ole pá ani anâ drị̃ꞌbí sĩ, ká Yẹ́zụ̃ ã pâ ni udũ tị sĩ, oko ọtrị ãdu sĩ. ³⁹ Fãrị̃zẹ́ị̃gọ́ Yẹ́zụ̃ ni ụngwẹꞌdi aní drị́ jó gá rĩ ã tã ꞌdĩ ndreka sĩ, orĩ tã urãre ásị́ ásị́ ni, “Kẹsụ́ mãꞌdị́ ꞌdĩ kolú pũrũfétã rĩ, kónị̃a mãꞌdị́ ani ẹlọ́ꞌdi ꞌdĩi ꞌdị́ ãꞌdi ꞌi yã ni nị̃ ọ̃tẹ, vúa rụ́ ani kọ́ꞌụ̃ batẽ sĩ ꞌdãku isâ nị̃ cá.” ⁴⁰ Yẹ́zụ̃ ụngwẹ ani, ọꞌjọ, “Sị̃mọ́nẹ̃, má ní tã ꞌjọlé nyí ní aꞌã.” Sị̃mọ́nẹ̃ ingwi, “Lãpọ́nyị́, nyĩꞌjọ má nyi eri.”

⁴¹ Yẹ́zụ̃ ọꞌjọ, “ꞌBá ẹ̃rị̃ oko mọ̃rị́ mãꞌdị́ ãlu drị́, mãꞌdị́ ãlu rĩ ní ókwẽ dị̃nárịọ̃ mị́ãtọ̃ụ́, zị̃ rĩ ní ókwẽ dị̃nárịọ̃ mụ̃dịtọ̃ụ́. ⁴² ꞌBá ꞌdĩi ẹ̃rị̃ trúwá ọꞌbị̃kî mọ̃rị́ ꞌdĩ ã tị ni ingwilé kpé, oko eꞌbe ãꞌi ní rá. ꞌBá ẹ̃rị̃ ꞌdĩ íꞌa nyítirĩ mọ̃rị́ꞌdị́pị ni lẽꞌdi pãlãndã rĩi íngõ ꞌi?” ⁴³ Sị̃mọ́nẹ̃ ingwi, “Árã mãꞌdị́ kizã rẹ̃tụ́ rĩ ẹsụ́ꞌdi rĩ ꞌi.” Yẹ́zụ̃ ọꞌjọ, “Nyáꞌị̃ cé.” ⁴⁴ Ẹcọru ị́zị́ ꞌdĩ drị́, ọꞌjọ, “Sị̃mọ́nẹ̃, índre ị́zị́ ꞌdĩi rá yã? Mệmụ́ nyí drị́ jó gá sâ, ísũ ẹ̃yị́ má pá kurũ, kí ị́zị́ ꞌdĩ lê, osũ anâ mị́ndra ni má pá, oko ole anâ drị̃ꞌbí sĩ. ⁴⁵ Nyúdũ mâ élémvû ni kurũ, kí ị́zị́ ꞌdĩ lê mêkwí nyí drị́ jó gá ꞌdĩ, andẽ mâ pâ ni udũka sĩ kurũ. ⁴⁶ Ísũ má drị lũgbá ãdu kurũ, kí ị́zị́ ꞌdĩ lê ọtrị mâ pá ni ãdu sĩ rá! ⁴⁷ Mãꞌjọ nyí ní lọ́kụlọ́kụ, lẽ rẹ̃tụ́ anídrị́ ꞌdĩi ịtẹꞌdẹ̃ enzĩ ãmgbụ́ anídrị́ rĩ eꞌberu rá. ꞌDĩsĩ, mãꞌdị́ lẽ anídrị̂ ịtẹꞌdẹ̃ꞌdi gã rĩi, áꞌdi enzĩ anídrị̂ eꞌbe gã, vúa mãꞌdị́ lẽ anídrị̂ ịtẹꞌdẹ̃ꞌdi nzá rĩ ní, anâ enzĩ ká reꞌbe nzá.” ⁴⁸ Yẹ́zụ̃ ọꞌjọ ị́zị́ nã ní, “Enzĩ nyídrị́ rĩ eꞌberu rá.” ⁴⁹ ꞌBá rĩka Yẹ́zụ̃ tị trõ lonya gá rĩ tị iꞌdókî uzúka, ãꞌi ílọ̃fọ́ kákî ꞌjọa, “Mãꞌdị́ ani drú enzĩ sâ eꞌbeꞌdi wã ꞌdĩi ãꞌdi ꞌi?” ⁵⁰ Kí Yẹ́zụ̃ ọꞌjọ ị́zị́ ꞌdĩ ní, “Nyĩmụ ásị́ ẹꞌbwẹ̃ sĩ, nyâ aꞌị̃ ari nyi rá.”