10
Yẹ́zụ̃ ọzẹ ꞌbá mụ̃dịtụ́dẹ̃rị̃ lị́mbị́ẹ̃rị̃
1 ꞌDĩ ívú Ópí upẽ ꞌbá zị̃ị mụ̃dịtụ́dẹ̃rị̃ lị́mbị́ẹ̃rị̃a oko ọzẹ ãꞌi aní ní andra gá ẹ̃rị̃ẹ̃rị̃ kõvũkî drú ẹ́ꞌị́ vúa ganyi cị̃drú anâ lẽlé yajó láka rĩ tị ígá sĩ. 2 Icarã ãꞌi ní ọꞌjọ, “Lonya pâ tralé rẹ̃tụ́, kí ẹꞌbụ̃ꞌbá ni wélí gã. ꞌDĩsĩdrú ãnyĩzị Ópí lonya pá traꞌdi rĩi, kọ̃zẹ ẹꞌbụ̃ꞌbá anâ ámvụ́ lonya drị́ rĩ íꞌa. 3 Ãnyĩvũ! Má ãnyi zẹ kêndré bị̃lọ̃ ọ́wị́ọ́wị́á lọ̃fọ́ rĩ áni. 4 Ôji ãlusâ sãwú kusâ kũbẽngú kusâ mvũka zị̃ị trõ ku, vúa íkalã sáã lẹ́tị ꞌa ꞌbá zịre gá ku.
5 “Jó cị̃drú ãnyã tõre arụ́ rĩi ãtị ãnyĩꞌjọ ‘Ẹ̃ꞌbwẹ́ kolú ãnyetrõ.’ 6 Jõ mãꞌdị́ ẹꞌbwẹ̃ lẽꞌdi rĩi náꞌa aꞌã, ẹ̃ꞌbwẹ́ ãnyidrị́ rĩi kolú drị̃arụ́, jõ ku irĩ, kêngwí ãnyi drị́. 7 Ãnyolú jó ãlu nã íꞌa, ãnyĩnya vúa ãnyĩmvụ tã cị̃drú ãꞌiã kwẽlé ãnyi ní rĩ ni, ãꞌdusĩ mãꞌdị́ ẹꞌbụ̃ idéꞌdi rĩ ã mũsárã ni kólẽ úkwẽ. Ộmụ jó ẹcọ sĩ ꞌdíꞌa ku, náꞌa ku.
8 “Jõ ĩtõ ganyi ꞌa ongo âꞌị́ ãnyi rá irĩ, ãnyĩnya tã cị̃drú ãꞌiã ꞌbãlé ãnyi ándra rĩ ni. 9 Ãnyijá ꞌbá náꞌa lãzá trõ rĩ tị vúa ãnyĩꞌjọ ãꞌi ní, ‘Opĩ Rũbãngã drị̂ ecá ãnyi ílãga ĩré.’ 10 Kí jõ ĩtõ ganyi ꞌa ongo âꞌị́ ãnyi kurũ, ãnyĩko lẹ́tị ãnyĩvũ ãꞌiã gụ̃ꞌdụ̃ ní ꞌa ãnyĩngo ãnyĩꞌjọ, 11 ‘Fụ́trụ̃ ãnyã ganyi ní ꞌa ebĩꞌdi ãma ípá rĩ isâ ãmá wẹa ãnyi írụ. Kí ãnyĩnị̃ ọ̃tẹ rĩi, opĩ Rũbãngã drị̂ ecá ĩré.’ 12 Mãꞌjọ ãnyi ní, ọꞌdụ́ nã íngá kôlú trõtrõ losó rĩi ꞌbá Sọ̃dọ́mã ꞌa rĩ ní oza ꞌbá ganyi nã íꞌa rĩi rá.”
Andra unzĩ ganyi aꞌị̃ ãkó rĩ ꞌbâtị ní
13 “Nyâ andra ũnzí, Kõrãzínĩ! Nyâ andra ũnzí, Bẹ̃tị̃sãị́dã! Kẹsụ́ nyúmá idélé ãnyi íꞌa rĩi kidéru Táirã vúa Sị̃dọ́nị̃ rĩ, ẹsụ́ ꞌdí ni sâ orukî ãꞌiã enzĩ ni ezẽ, kákî bõngú gụ̃tị́ã sĩ rĩi usú áwu vúa kakî urĩ úfúdró ꞌa. 14 Kí kêyá kolú trõtrõ losó rĩi Táirã tị ní Sị̃dọ́nị̃ trõ ọꞌdụ́ lãlị́ drị̂ sĩ oza nyí ní rĩi rá. 15 Ongo nyi, Kãpẹ̃rẹ̃náọ̃, áꞌdi nyịtụ́ gbá rụ́ꞌbụ ꞌa rá yã? Ị̃yọ, nyîya wã rĩi vụ̃rụ́ gulukutũ ꞌa.
16 “Mãꞌdị́ ãnyã tị ni eriꞌdi rĩi eri mâ tị ni áwu, mãꞌdị́ ãnyi gãꞌdi mgbẹ́ rĩi ogã mgbẹ́ rĩi ma áwu, kí mãꞌdị́ ma gãꞌdi mgbẹ́ rĩi, ogã mãꞌdị́ ma ẹzẹ́ꞌdi rĩi áwu.”
ꞌBá mụ̃dịtụ́dẹ̃rị̃ lị́mbị́ẹ̃rị̃ rĩ ã engwíka ꞌi
17 ꞌBá mụ̃dịtụ́dẹ̃rị̃ lị́mbị́ẹ̃rị̃ rĩ tị engwí kî anzõ trõ, ongo ọꞌjọkî, “Ópí, orí ũnzí gbá rĩ ꞌi sâ ká ãmã tị eri rụ́ nyídrị̂ sĩ ꞌi.”
18 Yẹ́zụ̃ aꞌị̃ ãꞌi, “Ándre sĩtánĩ ni kêꞌdé ꞌbụ̃ ꞌa sĩ kêndré ẹ̃yị́lõvi ã agụka rĩ áni. 19 Ãnyĩndre! Ákwẽ ãnyi ní okpõ acị́jó ị̃nị̃ drị, ị́tọnị drị, vúa okpõ ãnyã óꞌjáꞌbâzí ni sĩtánĩ ni ndẽjó rĩi rá, tã ãlusâ ãnyi idrãꞌdi ni ị̃yọ. 20 Kí ânzó orí ũnzí rĩ ã ãnyã tị ni erika sĩ ku, rá rĩi ãnyanzó ãnyã rụ́ ã rusĩka ꞌbụ̃ ꞌa rá sĩ.”
Yẹ́zụ̃ ã anzóka ꞌi
21 Sáã ãluá nã sĩ, Éndrí Ọlẹ rĩ oꞌbã Yẹ́zụ̃ ã ásị́ engwí ẹ̃ꞌbwẹ́, ọꞌjọ, “Má nyi anzó, mâ Átâ, Ópí ꞌbụ̃ drị́ vũ trõ rĩ! Nyâ tã ꞌdĩ ꞌbâtị zụ̃ka ꞌbá cĩri rĩ ꞌbâtị ní ꞌbá rịnị̃ka rá rĩ trõ dị̃, vúa nyâ ịtẹꞌdẹ̃ka na ꞌbácírí ní sĩ. Mâ Átâ, gbádru, ꞌdĩi lẽ nyídrị́ nyâ tị uꞌbãlé losó rĩ ꞌi. 22 Mâ Átâ okwẽ tã cị̃drú mâ drị́ gá. Mãꞌdị́ zị̃ị Ngwápị ni nị̃ꞌdi ọ̃tẹ ani ị̃yọ, tẽ Átá ꞌi, vúa mãꞌdị́ zị̃ị ọnị̃ Átá ni ku tẽ Ngwápị ꞌi, vúa ꞌbá anâ Ngwápị ã ịtẹꞌdẹ̃lé ãꞌi ní rĩ ꞌi.”
23 Yẹ́zụ̃ ọcọ tị ꞌbá anâ vû ni okoka rĩ drị́, ọꞌjọ ãꞌi ní mụ̃gụ́mụ̃gụ́ dru, “Mị tã ãnyã ndrelé ꞌdĩ ꞌbâ ndreka rĩi tụ̃tụ́ Rũbãngã drị̂ kolú ãꞌi ní. 24 Mãꞌjọ ãnyi ní, pũrũfẽtaã ãmgbụ́ vúa õpi trõ olẽkî tã ãnyã ndrelé ꞌdĩ ꞌbâ ndreka, kí kwá, ondrekî kurũ, olẽkî tã ãnyã erílé ꞌdĩ ꞌbâ erika, kí kwá, erikî kurũ.”
Lẹꞌjọ́ ékwí Sãmãríãgọ́ losó rĩ drị́ ꞌi
25 Ọꞌdụ́ zị̃ị ãlu Yẹ́zụ̃ ã ꞌbá ịnị̃re rĩi, lãpọ́nyị́ cárá Mũzê drị́ nị̃ꞌdi cá vúa ịnị̃ꞌdia rĩi onga ọrụ, ọzị Yẹ́zụ̃ ni lãzị́ sĩ ani ụꞌbị̃jó, ọꞌjọ, “Lãpọ́nyị́, kólẽ dũbãsĩ midé ãꞌdu lidrĩ olúre tádru rĩi ẹsụ́jó ꞌi?” 26 Yẹ́zụ̃ aꞌị̃ ani, ọꞌjọ, “Cárá Mũzê drị̂ íꞌa osĩru íngóni, vúa nyí ékwí ani eri íngóni?” 27 Lãpọ́nyị́ cárá drị́ ꞌdĩi aꞌị̃, “Osĩru kólẽ nyĩlẽ Ópí Rũbãngã nyídrị́ nyâ ásị́ cị̃drú sĩ, nyâ éndrí cị̃drú sĩ, nyâ mọ́rị́ cị̃drú sĩ, nyâ rã cị̃drú sĩ vúa nyĩlẽ nyâ wãꞌdîzí ni nyâ nyi lẽka nyângá sĩ rĩ áni.” 28 Yẹ́zụ̃ ọꞌjọ aní ní, “Nyáꞌị̃ cẽ, nyĩya nyidé lẹ́ꞌdị́ áni, nyí lidrĩ olúre tádru rĩi ẹsụ́ rá.” 29 Ani ꞌbãjó ándá, ọzị Yẹ́zụ̃ ni lãzị́ sĩ dị́, “Mâ wãꞌdîzí ni ãꞌdi ꞌi?”
30 Yẹ́zụ̃ aꞌị̃ ani oꞌdã tãka sĩ, ọꞌjọ, “Mãꞌdị́ zị̃ ãlu engá Yẹ̃rụ́sãlẹ́mẹ̃ ꞌa kôya Jẹ̃rị́kọ̃ ꞌa, kí lẹ́tị ꞌa okwi ávọ́rọ ọgụꞌbá drị̂ íꞌa. Unzukî tã anídrị̂ bõngú trõ, omgbakî ani, ongo ọfẹ̃kî pí, eꞌbekî ani ĩré kpó ní tị. 31 Ẹsụ́ andra losõ drú lẹ́tị ãluá nã sĩ mãꞌdị́ tã azĩꞌdi Rũbãngã ní rĩ orĩ kálị. Kõcẽ ani kõndre mãꞌdị́ ọgụ ã mgbalé ꞌdĩi ꞌdĩ, alị lãga arụ́ sĩ pí. 32 Zị̃ aní gá mãꞌdị́ ãlu sụ́rụ́ Pa-Lẹ́vị̃ drị̂, ẹꞌbụ̃ idéꞌdi jó Rũbãngã drị̂ íꞌa rĩ isâ orĩ kálị lẹ́tị ãluá nã sĩ, kõcẽ ani kõndre mãꞌdị́ ọgụ ã mgbalé ꞌdĩi ꞌdĩ, ani sâ alị lãga arụ́ sĩ pí. 33 Kí Sãmãríãgọ́ jụ́rụ́gọ́ rĩi, ani sâ eyá lẹ́tị nã sĩ, kõcẽ ani kõndre mãꞌdị́ ọgụ ã mgbalé ꞌdĩi ꞌdĩ, kizã oko ani áwu sĩ cí. 34 Ẹsị́ anâ kãyĩnõ ní drị sĩ vụ̃rụ́, ondre ágó ꞌdĩi, ẹsụ́ olú lídri ꞌdĩ, osũ vị́nọ̃ ãdu trõ anâ bí tị ị́mị oko umbé cí. Ọnzị̃ mãꞌdị́ ꞌdĩi oꞌbã anâ kãyĩnõ ní drị, oji ani kãré ꞌbá ã ọꞌdụ́ okore vúa tã unyare sítĩ sĩ rĩ ígá, omba tã ani láka. 35 Õꞌbûzí anâ yare rĩi ọꞌdụ dị̃nárịọ̃ ẹ̃rị̃ okwẽ jóꞌdị́pị drị́, ọꞌjọ, ‘Nyĩmba má ní mãꞌdị́ ꞌdĩ ã tã ni, mêyá má tã cị̃drú nyâ ivolõlé aní sĩ rĩ ã tị ni ingwi ọꞌdụ́ mêngwíjó rĩ sĩ rá.’”
36 Yẹ́zụ̃ oko ọzị lãpọ́nyị́ cárá Mũzê drị́ ịnị̃ꞌdi ꞌdĩi, “ꞌBá ina ꞌdĩ ílọ̃fọ́, írã mãꞌdị ꞌdĩ ã wãꞌdîzí ni ãꞌdi ꞌi?”
37 Mãꞌdị́ ꞌdĩ aꞌị̃, “Kizã ã kolé aní sĩ cí rĩ ꞌi.”
Yẹ́zụ̃ ọꞌjọ aní ní, “Nyĩ sâ nyĩya nyidé aní áni.”
Ẹ́ꞌị́ Máritã tị drị́ Mãrị́ã trõ rĩ ígá
38 Yẹ́zụ̃ tị ã vũre anâ mãju trõ Yẹ̃rụ́sãlẹ́mẹ̃ ꞌa rĩi, ocakî ẹ́ꞌị́ zị̃ ígá ꞌdĩ, ẹsụ́ náꞌa ị́zị́ zị̃ị ãlu ụngwẹlé Máritã rĩ aꞌị́ Yẹ́zụ̃ ní ãmụ́ dru aní drị́ jó gá. 39 Máritã drị́ amvọ́tị aꞌã, rụ́ ani Mãrị́ã ꞌi, orĩ Ópí Yẹ́zụ̃ ã pá gá ẽsi ká lịnị̃ eri. 40 Máritã ã drị́ atrã ẹꞌbụ̃ ãmgbụ́ anâ idélé amụ ní rĩ sĩ rá. Onga ọmụ Yẹ́zụ̃ drị́ ọꞌjọ, “Ópí, índre tébẽ sâ mâ amvọ́tị eꞌbe má ẹꞌbụ̃ idé aꞌdị́tẹ ni kuyã? Nyĩꞌjọ aní ní kẹmụ́ ma ikonyĩre.” 41 Yẹ́zụ̃ aꞌị̃, ọꞌjọ, “Máritã, Máritã, nyí tã urã vúa nyâ ásị́ kâzá tã ãmgbụ́ sĩ. 42 Tã rulẽꞌdi rĩi ãlu aꞌdị́tẹ. Mãrị́ã upẽ tã ándá rĩi áwu, tã anâ pẽlé rĩi ká rụꞌdụ drị́arụ́ sĩ pí ni kpé kwá.”