Õfú Losó Lụ́kã ã Sĩlé rĩi 4

Yẹ́zụ̃ ni itáka ꞌi

¹ Yẹ́zụ̃ engwí áꞌbụ́ Jọ̃rọ̃dánọ̃ ꞌa sĩ oga Éndrí Ọlẹ rĩ sĩ, ongo Éndrí ꞌdĩ oji ani kwesíkwesĩ ꞌa, ² láka náꞌa, sĩtánĩ ọꞌbị̃ ani itálé ọꞌdụ́ mụ̃dịsụ. Ọꞌdụ́ nã tị sĩ, Yẹ́zụ̃ onya tã ku, ọꞌdụ́ nã ẹkọ́ ꞌdĩ, vị́ oza ani kpó.

³ Sĩtánĩ ọꞌjọ aní ní, “Jõ nyi Rũbãngã ã Ngwápị ꞌi, nyĩꞌjọ ọ́nị́ ꞌdĩ kẹcọru línyá.” ⁴ Yẹ́zụ̃ aꞌị̃ ani, “Osĩru Bụ́kụ̃ Ọlẹ rĩ íꞌa, ‘ꞌBá kôlú lídri rĩi línyá sĩ aꞌdị́tẹ ku.’”

⁵ ꞌDĩ ívú sĩtánĩ ọnzị̃ Yẹ́zụ̃ ní ꞌbẹ́ drị ẹtẹ̃ aní ní ẽmíádru sụ́rụ́ opĩ vũ drị́ rĩ drị̂ cị̃drú. ⁶ Ọꞌjọ, “Mâ okpõ vúa ẹ̃kụ́ vũ ꞌdĩ drị̂ kwẽ cị̃drú nyí ní, ãꞌdusĩ okwẽru má ní, vúa má kwẽa mãꞌdị́ mâ lẽlé rĩ ní wã. ⁷ Jõ íwọ mâ andra gá rá ꞌi rĩ, má kwẽa kpộ nyí ní.” ⁸ Yẹ́zụ̃ aꞌị̃, “Osĩru Bụ́kụ̃ Ọlẹ rĩ íꞌa,

‘Kólẽ dũbãsĩ nyĩwọ Ópí Rũbãngã nyídrị̂ ní ándra, vúa nyidé anâ ẹꞌbụ̃ ꞌi aꞌdị́tẹ.’”

⁹ ꞌDĩ ívú, sĩtánĩ oji ani Yẹ̃rụ́sãlẹ́mẹ̃ ꞌa, ọnzị̃ ani ọrụ kẹ́ꞌdẹ́kẹꞌdẹ̃ oꞌbã ani jó Rũbãngã drị́ rĩ ã kéné gá, ongo ọꞌjọ aní ní, “Jõ nyi Rũbãngã ã Ngwápị ꞌi, nyĩmvu jó ꞌdĩ ídrị sĩ vụ̃rụ́. ¹⁰ Ãꞌdusĩ Bụ́kụ̃ Ọlẹ rĩ ọꞌjọ,

‘Rũbãngã ká anâ mãláikã ní ẹzẹ́ nyâ tã ni mbalé rá,

¹¹ vúa kákî evũ kákî nyi akọlọ̃ rá,

áwusĩ nyâ pá adrá ọ́nị́ drị ku.’”

¹² Yẹ́zụ̃ aꞌị̃, “Bụ́kụ̃ Ọlẹ rĩ ọꞌjọ, ‘Kólẽ dụ̃bãsị̃ ụ́ꞌbị̃ Ópí Rũbãngã nyídrị́ ni ku.’”

¹³ Sĩtánĩ ịkọ́ anâ litá ni ꞌdĩ, eꞌbe Yẹ́zụ̃ ni rá engwijó drị́arụ́ sâ zị̃ sĩ.

Yẹ́zụ̃ iꞌdó ꞌbá ịnị̃ka Gãlị̃lẹ́ã ꞌa

¹⁴ Nã ívú Yẹ́zụ̃ oga okpõ Éndrí Ọlẹ rĩ drị́ sĩ ndrû engwí Gãlị̃lẹ́ã ꞌa, anâ rụ́ ọkụ kãré ĩréĩré náꞌa rĩ ígá kpộdrú. ¹⁵ Anâ tã ịnị̃lé jó lemú drị̂ íꞌa rĩ sĩ ꞌbá ãmgbụ́ ẹcụ́ ani rá.

Yẹ́zụ̃ ni ogã Nãzẹ̃rẹ́tị̃ ꞌa mgbẹ́

¹⁶ Oca Nãzẹ̃rẹ́tị̃ ꞌa, ẹ́ꞌị́ anâ zore rĩ ígá ꞌdĩ, ọmụ Sãbátũ sĩ jó lemú drị̂ ígá, kêndré jõzí sâ anâ idéka rĩ áni. Onga ọrụ Bụ́kụ̃ Ọlẹ rĩ lãré. ¹⁷ Ókwẽ drị́arụ́ bụ́kụ̃ pũrũfétã Ĩsãíã drị́ ꞌi, awị́ bụ́kụ̃ ni tã sĩlé lâka,

¹⁸ “Éndrí Ópí drị̂ ẹsị́ má drị rá,

ãꞌdusĩ ọ́trị ma ãdu sĩ,

áwusĩ mãnze drú õfú losó rĩi ꞌbá tã ako rĩ tị ní.

Ệzẹ́ ma ꞌbá kolé cí rĩ tị ní drị̃mgbọ ịfẹ̃re, vúa ꞌbá mị ako rĩ ã mị awị́re,

ꞌbá mị zalé rá icandĩ kwẽjó ãꞌi ní rĩ ayụrẹ,

¹⁹ vúa mêyá õfú kĩnyã Ópí ã ꞌbá anídrị̂ arijó rĩ nzere.”

²⁰ Ongo aꞌbu bụ́kụ̃ ni cí, okwẽ mãꞌdị́ tã na mbaꞌdi rĩ drị́ oko orĩ vụ̃rụ́. ꞌBá kpộdrú jó lemú drị̂ íꞌa rĩi odrõ mị rụarụ́. ²¹ Ongo iꞌdó tã ꞌjọka ãꞌi ní ꞌdị́ nĩ, “Endrũ ewo Bụ́kụ̃ Ọlẹ ꞌdĩ drị́ sĩlé rĩ idéru õndo ãnyã erika rĩ áni.” ²² ꞌBá kpộ ani erika rĩi ọꞌjọ tã rụarụ́ losó, aꞌụ̃kî lẹꞌjọ́ ũtrwá efũꞌdi tị arụ́ rĩ sĩ cí. Ọzịkî, “ꞌDĩi gbá Yọ̃zẹ́fụ̃ ã ngwápị ꞌi ku yã?”

²³ Yẹ́zụ̃ ọꞌjọ ãꞌi ní, “Ãnyí má ní lẹꞌjọ́ ékwí ꞌjọꞌdia, ‘Dãkĩtárĩ, nyijá nyi nyâ ngá sĩ, nyidé nyídrị́ ganyi ꞌa ꞌdíꞌa tã ãmã erilé nyâ idélé Kãpẹ̃rẹ̃náọ̃ ní ꞌa rĩ ꞌi.’”

²⁴ Vúa ọꞌjọ, “Mãꞌjọ ãnyi ní lọ́kụlọ́kụ, pũrũfétãgọ́ aꞌị̃lé aní drị́ ꞌbãrụ́ rá ani ezẽ sâ ị̃yọ. ²⁵ Ẹ̃lị́ã ní ngá ãwị̃zị Ị́saraị́lị̃ vũ drị kónyị́ lẽka rĩi ãmgbụ́, lọ̃fọ́ ẹ̃yị́ ã ꞌdịjó vũ ndụtụ drị ku kĩnyã na nụ́sụ̃ vị́ ã ꞌdejó vũ ndụtụ drị nã sĩ, ²⁶ sâ Ẹ̃lị́ã ni ọ́zẹ ãwị́zị́ ãlu drị́ kurũ, kí ọ́zẹ ani rá rĩi, tẽ ãwị́zị́ olúre Sị̃dọ́nị̃ ꞌa Zẹ̃rãfátã gá rĩ drị́. ²⁷ Vúa pũrũfétã Ẹ̃lị̃zẹ́ọ̃ ní ngá Ị́saraị́lị̃ꞌbá dõꞌbó trõ rĩi ãmgbụ́ rụ jaka rá ani ị̃yọ, tẽ ãludi Nãámanị̃ ni Síriãgọ́ rĩ ꞌi.”

²⁸ ꞌBá jó lemú drị̂ íꞌa lẹꞌjọ́ ꞌdĩ erika rĩi cị̃drú angalã oko ãꞌi cí. ²⁹ Mgbe ongakî ọrụ, omwĩkî ani ãngwé ọkụ̃kî ani ꞌbẹ́ drị ọrụ kẹ́ꞌdẹ́kẹꞌdẹ̃ ãꞌi kelĩ drú ani gulugutũ ꞌa, ³⁰ kí Yẹ́zụ̃ enze swilí ãꞌi ílọ̃fọ́ sĩ pí.

Yẹ́zụ̃ odro orí ũnzí rĩi pí

³¹ Yẹ́zụ̃ oya Kãpẹ̃rẹ̃náọ̃ ni ganyi Gãlị̃lẹ́ã ꞌa rĩ ígá, ongo ịnị̃ ꞌbá jó lemú drị̂ ígá Sãbátũ sĩ. ³² Tã anâ ịnị̃lé rĩ oꞌbã ꞌbá cị̃drú aꞌụ̃ okpõsĩ, ãmãlã ká tã ịnị̃ okpõ rẹ̃tụ́ rĩ sĩ. ³³ Jó lemú drị́ Yẹ́zụ̃ ã tã ịnịre rĩ íꞌa mãꞌdị́ orí ũnzí ã icálé rá rĩi aꞌã, orí ũnzí rụarụ́ rĩ iꞌdó uzáka ụ́ꞌdụ́kụ́ éré sĩ, ³⁴ kôyua, “Yẹ́zụ̃ ni Nãzẹ̃rẹ́tị̃gọ́ rĩ, ílẽ ãma írụ ãꞌdu tã? Nyêyá ãma ivolõre yã? Ãnị̃ nyi ọ̃tẹ, nyi Mãꞌdị́ Ọlẹ Rũbãngã drị́ ꞌi.” ³⁵ Yẹ́zụ̃ oza orí ũnzí ꞌdĩ tị ídrị okpõsĩ ọꞌjọ, “Ãnyĩvụ̃ cĩrĩ! Ãnyefũ rụarụ́ pí!” Mgbe orí ũnzî tị oꞌbe mãꞌdị́ ꞌdĩi vụ̃rụ́ ꞌbá andra, oko ofũ kî rụarụ́ sĩ pí, idráka ãkó. ³⁶ ꞌBá cị̃drú jó lemú drị̂ íꞌa rĩ aꞌụ̃kî okpõsĩ iꞌdókî tã ụzịka ãꞌi ílọ̃fọ́ sĩ, “Lịnị̃ ꞌdí ni ꞌdĩi íngóni rĩ ꞌi? Jõ kọ̃ꞌjọ orí ũnzí koyí pí okpõ drị́arụ́ sĩ, mgbe kôyí pí ni dĩ ꞌi!” ³⁷ Tã anâ idélé rĩ ã ọ̃kụ́tã ọkụ vũ nã ídrị acá kãré cị̃drú gá.

Yẹ́zụ̃ ijá ꞌbá ãmgbụ́

³⁸ Yẹ́zụ̃ eꞌbe jó lemú drị́ ꞌdĩi rĩ oya Sị̃mọ́nẹ̃ ni anâ májû drị́ ꞌbãrụ́. Ẹsụ́ Sị̃mọ́nẹ̃ ã andrị́zị́ã ni avũ rụ anị emi ãcí ꞌdãku. ꞌBá nã aꞌị́kî ani kikonyĩ drú ị́zị́ ꞌdĩ ꞌi sĩ. ³⁹ Yẹ́zụ̃ omba drị̃lẹ́ arụ́ ọꞌjọ, “Rụ ãcí, keꞌbe ani rá,” mgbe lãzá nã onga rụarụ́ pí. ꞌDĩ ívú Sị̃mọ́nẹ̃ ã andrị́zị́ã onga ọrụ iꞌdó ãꞌi ní lonya kwẽka.

⁴⁰ Ũndré lãgá ịtụ́ ã ꞌdere rĩi, ꞌbá kãré nã ígá rĩi etrá avúꞌbá kpộdrú Yẹ́zụ̃ drị́, oko ụtị̃ aní drị̂ avúꞌbá ãluãlu drị ꞌdĩ, rụ kí ani kpộdrú oja rá. ⁴¹ Orí ũnzí sâ oyí ꞌbá ãmgbụ́ rụ sĩ pí. Orí ũnzí oyíka ãꞌi írụ rĩ kôvũ uzá sĩ, “Nyi Rũbãngã ã Ngwápị ꞌi.” Yẹ́zụ̃ iꞌjá ãꞌi, olẽ kọ̃ꞌjọkî tã ku, ãmãlã ọnị̃kî Yẹ́zụ̃ ni Kị̃rị́sịtọ̃ ꞌi ni ọ̃tẹ.

⁴² Õꞌbûzí lõvũrú, Yẹ́zụ̃ eꞌbe ganyi nã ꞌi rá, oya kãré ꞌbá ãkó rĩ ígá, olújó aꞌdị́tẹ. ꞌBá ãmgbụ́ ovũ ani ndrụ̃ sĩ, ẹsụ́kî ani ꞌdĩ, oꞌbĩkî ani itálé keꞌbe drú ãꞌi ku. ⁴³ Kí ọꞌjọ ãꞌi ní, “Kólẽ dũbãsĩ mãnze õfú losó opĩ Rũbãngã drị̂ ídrị rĩi ganyi zị̃ tị íꞌa sâ trõ, ãꞌdusĩ Rũbãngã ẹzẹ́ ma témá áwusĩ.” ⁴⁴ ꞌDĩsĩdrú Yẹ́zụ̃ ọmụ andra gá ꞌbá ịnị̃ka trõ jó lemú drị̂ íꞌa sĩ Yụ̃dẹ́ã ꞌa ndụtụ.