Õfú Losó Lụ́kã ã Sĩlé rĩi 5

Lụngwẹ ꞌbá ãtị Yẹ́zụ̃ ã vû ni okoka rĩi drị́ ꞌi

¹ Ọꞌdụ́ zị̃ ãlu, Yẹ́zụ̃ ã mbare ápara Gẹ̃nẹ̃sãrẹ́tị̃ gá rĩi, ꞌbá ãmgbụ́ etráru anâ lãga gá ĩré lẹꞌjọ́ Rũbãngã drị̂ erire. ² Ondre kọ́fọ́tị gá ị́ꞌbọ́ ẹ̃rị̃, ꞌbá ẹ̃ꞌbị ꞌbeka rĩ ã eꞌbelé rá ẹsụ́ kákî ãꞌiã vóyí ni jẹ̃ rĩ ꞌi. ³ Yẹ́zụ̃ ọtụ ị́ꞌbọ́ ãlu Sị̃mọ́nẹ̃ drị́ rĩ íꞌa, oko ọzị ani kõnze ị́ꞌbọ́ ni gãádru kọ́fọ́tị gá sĩ ꞌi. Ongo orĩ ị́ꞌbộ ní ꞌa vúa ịnị̃ ꞌbá rutraka rĩ tị.

⁴ Ịkọ́ ꞌbá ịnị̃ka ꞌdĩ, ọꞌjọ Sị̃mọ́nẹ̃ ní, “Nyizẹ́ ị́ꞌbộ ni ẹ̃yị́ dúwí rĩ íꞌa gãádru ãnyĩko anyĩ yĩ vóyî ní ẹ̃ꞌbị eꞌbejó.”

⁵ Sị̃mọ́nẹ̃ aꞌị̃, “Ãmbá, ãrị ẹꞌbụ̃ ị́nị́ ꞌa sĩ rã kí ãlusâ ãko ẹ̃ꞌbị kurũ. Kí lê nyâ ꞌjọka rá sĩ, ãmá vóyí tị yĩ rá.” ⁶ Idékî rá ꞌdĩi, ẹ̃ꞌbị oꞌde téréterẽ drú, ãꞌiã vóyí iꞌdó sĩka. ⁷ ꞌDĩsĩdrú ụngwẹkî ãꞌiã ꞌbâzí tị ị́ꞌbọ́ zị̃jó rĩ íꞌa rĩi ẹmụ́jó ãꞌi ikonyĩre vóyí ẹ̃ꞌbị trõ ꞌdĩi ẹkụ̃jó, ẹmụ́kî ꞌdĩ onzekî ẹ̃ꞌbị ni oga ị́ꞌbọ́ tị íꞌa sĩ ndrûndrû ĩré ị́ꞌbộ tị kóri.

⁸ Sị̃mọ́nẹ̃ Péturũ ondre tã ꞌdĩi ꞌdĩ ọwọ Yẹ́zụ̃ ní pá oko ọꞌjọ, “Nyĩ nga ꞌdíꞌa pí, Ópí, ãꞌdusĩ ma enzĩꞌdị́pị.” ⁹ Sị̃mọ́nẹ̃ tị anâ ꞌbâzí trõ ọrị̃ oko ãꞌi vúa aꞌụ̃kî ẹ̃ꞌbị wélí ãꞌiã ekólé rĩ sĩ cí. ¹⁰ Ãluá rĩ áni anâ ꞌbâzí Yãkọ́ꞌbọ̃ tị Yõánã trõ ꞌbácírí Zẹ̃bẹ̃dẹ́ị̃ drị́ rĩ isâ aꞌụ̃kî cí. Yẹ́zụ̃ ongo ọꞌjọ Sị̃mọ́nẹ̃ ní, “Ọrị̃ kõko nyi ku rijó drĩádru ndị andra gá nyí ꞌbá ꞌbe áwu.” ¹¹ ꞌDĩsĩdrú ẹkụ̃kî ãꞌiã ị́ꞌbộ tị lọgọ drị, eꞌbekî tã kpộdrú rá, ongo okokî Yẹ́zụ̃ ã vû ni áwu.

Yẹ́zụ̃ ija mãꞌdị́ dõꞌbó trõ rĩ ꞌi

¹² Drĩsó Yẹ́zụ̃ ã olúre ganyi zị̃ Gãlị̃lẹ́ã ꞌa rĩ ígá rĩi, mãꞌdị́ dõꞌbó trõ rĩi ondre ani ꞌdĩ, oꞌde vụ̃rụ́ andra arụ́ vúa aꞌị́ Yẹ́zụ̃ ni, ọꞌjọ, “Ãmbá, jõ ílẽ rá, nyí mâ rụ ni ijá kêngwí pẹ́lẹ́rẹ́ wã.”

¹³ Yẹ́zụ̃ ijũ anâ drị̂ ni ẹlọ mãꞌdị́ ꞌdĩi, ọꞌjọ, “Álẽ rá, nyârụ kõja.” Mgbesâ dõꞌbó oja rá, rụ ani engwí pẹ́lẹ́rẹ́.

¹⁴ Yẹ́zụ̃ ongo ọꞌjọ aní ní, “Ônze tã ridé ꞌdĩ rĩ ã drị̃bâ ni ku. Rá rĩi, nyĩmụ nyi ịtẹꞌdẹ̃re mãꞌdị́ tã azĩꞌdi Rũbãngã ni rĩ drị́ vúa nyazĩ tã nyârụ ã jajó rĩi kêndré Mũzê ã icarãka rĩ áni, áwusĩ ꞌbá kọ̃nị̃ drú nyâ dõꞌbó oja rá ni ọ̃tẹ.”

¹⁵ Yẹ́zụ̃ ã ọ̃kụ́ kôji rinzá sĩ okpõsĩ. ꞌBá ãmgbụ́ kôji retrá sĩ kõnze drú ãꞌi ní tã, vúa kijá dru ãꞌiã lãzá mgbị́mgbị rĩ ni. ¹⁶ Kí Yẹ́zụ̃ lê zị̃ tị sĩ, ká runze mụjó aꞌdị́tẹ kãré ꞌbá ãkó rĩ ígá ilegĩre Rũbãngã drị́.

Yẹ́zụ̃ ija mãꞌdị́ azaꞌdi rá rĩ ꞌi

¹⁷ Ọꞌdụ́ zị̃ị ãlu, Yẹ́zụ̃ ã tã ịnị̃re rĩi, Fãrị̃zẹ́ị̃ꞌbá zị̃ tị lãpọ̃nyịã cárá drị̂ trõ urĩka náꞌa rĩi engá ẹ́ꞌị́ mgbị́mgbị Gãlị̃lẹ́ã tị Yụ̃dẹ́ã trõ vúa ganyi Yẹ̃rụ́sãlẹ́mẹ̃ drị̂ ígá. Ongo okpõ Ópí Rũbãngã drị́ ꞌbá ijájó rĩi drị́arụ́ aꞌã. ¹⁸ ꞌBá zị̃ ejí mãꞌdị́ azaꞌdi rá rĩi avurukwe sĩ jilé jó gá lalé Yẹ́zụ̃ ní ándra. ¹⁹ Kí ꞌbá ã olúka ẽkpadrú sĩ omãkî lẹ́tị ẹsụ́lé ani sujó jótị sĩ kpé, ongo ọtụkî jódrị osikî jó ã drị̃ ni mgbõ ịsị́kî ĩbá sĩ avurukwe ni mãꞌdị́ azaꞌdi rá ꞌdĩ trõ vụ̃rụ́ Yẹ́zụ̃ ní ándra.

²⁰ Yẹ́zụ̃ ondre aꞌị̃ ãꞌi drị́ ꞌdĩi ꞌdĩ, ọꞌjọ mãꞌdị́ azaꞌdi rá ꞌdĩ ní, “Môzí, enzĩ nyídrị̂ eꞌberu rá.”

²¹ Fãrị̃zẹ́ị̃ꞌbá lãpọ̃nyịã cárá drị̂ trõ iꞌdókî urãléa ãꞌi ílọ̃fọ́, “Mãꞌdị́ ꞌdĩi ãꞌdi ꞌi, orã rĩ sĩ ani Rũbãngã ꞌi yã? Enzĩ eꞌbeꞌdi wã rĩi tẽ Rũbãngã ꞌi ku yã?” ²² Yẹ́zụ̃ ọnị̃ tã ãꞌiã urãlé rĩi ọ̃tẹ sĩ ọzị ãꞌi, “Ãnyí tã lẹ́ꞌdị̃ áni lẹ́ꞌdị̃ urã ãnyã ásị́ gá ãꞌdu sĩ? ²³ Ãnyĩꞌjọ má ní tã ãꞌdu rĩi íngõ ꞌi, ꞌjọka ‘Enzĩ nyídrị̂ eꞌberu rá’ ꞌi, kusâ ‘Nyĩnga ọrụ nyĩmụ’ ꞌi yã? ²⁴ Mị́tẹꞌdẹ̃a ãnyi ní, Ọ́rị Mãꞌdị́ drị́ okpõ aꞌã enzĩ eꞌbejó vũ drị ꞌi”. ꞌDĩsĩdrú ọꞌjọ mãꞌdị́ azaꞌdi rá ꞌdĩ ní, “Nyĩnga ọrụ nyĩꞌdụ nyâ avurukwe ni nyĩmụ ꞌbãrụ́.” ²⁵ Mgbesâ ãꞌi ándra sĩ mãꞌdị́ ꞌdĩ onga ọrụ, ọꞌdụ avurukwe ni ongo ọmụ ꞌbãrụ́ Rũbãngã ni anzó sĩ. ²⁶ Mãꞌdị́ ãluãlu aꞌụ̃ cí, ongo ẹcụ́kî Rũbãngã ni rá vúa ọrị̃ oko ãꞌi okpõ Rũbãngã drị́ sĩ cí, ọꞌjọkî, “Endrũ ãndre tã aꞌụ̃jó rĩi rá.”

Lụngwẹ Lẹ́vị̃ drị́ ꞌi

²⁷ ꞌDĩ ívú, Yẹ́zụ̃ ofũ ãngwé ongo ondre mãꞌdị́ mụ̃sọ́rọ̃ traꞌdi rụ́ sĩ ụngwẹlé Lẹ́vị̃ ni, orĩ kãré anâ mụ̃sọ́rọ̃ trare gá rĩ ígá. “Nyekó mâ vû ni.” Yẹ́zụ̃ ọꞌjọ ꞌi. ²⁸ Oko Lẹ́vị̃ onga ọrụ, eꞌbe tã cị̃drú rá, ongo oko Yẹ́zụ̃ ã vú ꞌi.

²⁹ Ongo Lẹ́vị̃ idé ị̃tụ́ ọ́gbọ́rọ́ anzõ drị̂ Yẹ́zụ̃ ní aní drị́ ꞌbãrụ́. ꞌBá ãmgbụ́ mụ̃sọ́rọ̃ traka rĩi ꞌbá zị̃ tị trõ onyakî tã ãꞌi trõ. ³⁰ Kí Fãrị̃zẹ́ị̃ꞌbá vúa lãpọ̃nyịã cárá drị̂ rerika Fãrị̃zẹ́ị̃ꞌbá trõ rĩi uzúkî ꞌbá anâ vú ni okoka rĩ drị́, “Ãnyi tã nya vúa tã mvụ ꞌbá mụ̃sọ́rọ̃ traka vúa enzĩꞌbá trõ ãꞌdu sĩ?” ³¹ Yẹ́zụ̃ aꞌị̃ ãꞌi, “Mãꞌdị́ rụ ẹ̃ꞌbwẹ́ mgbilimgbĩli rĩ olẽ dãkĩtárĩ ni ku, kí mãꞌdị́ rụ lọꞌụ́ rĩ lê kólẽa rá. ³² Mệmụ́ ꞌbá anda rĩ ụngwẹre áwu ku, kí rá rĩi mệmụ́ enzĩ trõ rĩ tị ní enzĩ rujó.”

Ọzịkî Yẹ́zụ̃ ni ãbị́rị́ taka drị

³³ Ọꞌjọkî aní ní, “ꞌBá Yõánã ã vû ni okoka rĩ tị isâ ká ãbị́rị́ ta vúa kákî ilegĩ, vúa ꞌbá Fãrị̃zẹ́ị̃ ni vú okoka rĩ tị isâ aní áni, kí nyí drị́ ꞌdĩ tị kâcí andra gá lonya nyaka vúa lãmvụ́ trõ ãꞌdu sĩ?.” ³⁴ Yẹ́zụ̃ aꞌị̃, “Ị̃tụ́ ọ́gbọ́rọ́ lãꞌdụ́ drị̂ ígá, nyí yaigó ã amụ tị eꞌbe kákî ãbị́rị́ ta jõ kẹsụ́ ani ãꞌi trõ ꞌi yã? ³⁵ Kí sáã kêcá yaigó ꞌdĩ ꞌdụjó ãꞌi íꞌa sĩ pí, ọꞌdụ́ ani drú nã íngá odrĩkî ãbị́rị́ ta.”

³⁶ Ọꞌjọ ãꞌi ní lẹꞌjọ́ ékwí ꞌdĩi, “Mãꞌdị́ ãludi sâ ẽwó bõngú úꞌdí rĩ drí sĩꞌdia vúa sõꞌdia ọ̃kụ rĩ írụ ani ị̃yọ. Jõ idé rá, ká bõngú úꞌdí ꞌdĩ ivolõ rá, vúa ẽwó esĩlé ꞌdĩi ọ̃kụ rĩ ị́rụ ẹsị̃ ku. ³⁷ Ongo mãꞌdị́ ãlu sâ vị́nọ̃ úꞌdí rĩ suꞌdi ụ́bị́ ọ̃kụ rĩ íꞌa ni ị̃yọ. Jõ osũ rá, vị́nọ̃ úꞌdí rĩ ká ụ́bị́ ọ̃kụ nã idrã kpérĩ vị́nọ̃ kôko kôsú vụ̃rụ́ vúa ụ́bị́ isâ kôꞌe kónyí ãkó. ³⁸ Ị̃yọ! Áꞌdi vị́nọ̃ úꞌdí rĩ sũ ụ́bị́ úꞌdí rĩ íꞌa. ³⁹ Vúa jõ mãꞌdị́ ẽnga vị́nọ̃ ọ̃kụ rĩ mvụre, ká úꞌdí rĩ lẽ ku, ãꞌdusĩ kộꞌjọa ‘Ọ̃kụ nãi cuwí.’”