Õfú Losó Lụ́kã ã Sĩlé rĩi 3

Yõánã bãtị́sịtã ká lẹ́tị idé Yẹ́zụ̃ ní

¹ Kĩnyã mụdrị́lị́mbị́ tọ̃ụ́jóa Tị̃bẹ́rịọ̃ Cẹ́zẹrọ̃ ã olúre opĩ gá rĩ íngá, Pọ́nzịọ̃ Pĩlátũ ká Yụ̃dẹ́ã ni ase nĩ, Hẹ̃rọ́dẹ̃ ká Gãlị̃lẹ́ã ni ase vúa anâ adrụ́pị̃ Fị̃lị́pọ̃ ká Ị̃tụ́rẹã tị ase Trãkọ̃nị́tị̃ trõ, vúa Lũsãníã ká Ãbị̃lẹ́nẹ̃ ni ase nĩ. ² Ãnásĩ tị Kãífã trõ ãꞌi amba ndẽka ꞌbá azĩ ọlẹ azĩka Rũbãngã ní rĩ drị́ ꞌi. Nã íngá lẹꞌjọ́ Rũbãngã drị̂ ecá Yõánã ni ọ́rị Zãkãrị́ã ni anâ olure kwesíkwesĩ ꞌa rĩ drị́ rá. ³ Nã ívú Yõánã acị́ kãré cị̃drú áꞌbụ́ Jọ̃rọ̃dánọ̃ lãga gá rĩ ígá, lẹꞌjọ́ Rũbãngã drị̂ ịfẹ̃re ꞌbá ní kẹsụ́kî drú bãtị́sịmụ̃, áwusĩ kẹcọkî ãꞌiã lidrĩ ni Rũbãngã keꞌbe drú ãꞌiã enzĩ ni rá. ⁴ ꞌDĩi õndo tã pũrũfétã Ĩsãíã ã ꞌjọlé Yõánã ní drị rĩ ꞌi,

“Ani ọ́lọ́ꞌbọ́ uzáꞌdi kwesíkwesĩ ꞌa rĩ ꞌi,

‘Ãnyidé lẹ́tị ándá rĩi Ópí ní eyájó!

⁵ Jụ̃lụ̃ kpộdrú kọ̃tụru rẽ,

ꞌbẹ́ ọ́tụ́ trõ kịsị́ru rẽ.

Lẹ́tị gõꞌdógóꞌdo rĩ kidũru kengwí ándá,

lẹ́tị gụ̃lị́gụ́lị rĩ kọ̃tụru rẽ.

⁶ Ongo ꞌbá cị̃drú ká lari Rũbãngã drị̂ ndre rá.’”

⁷ Yõánã ọꞌjọ ꞌbá ãmgbụ́ evũka aní drị́ bãtị́sịmụ̃ gá rĩ ní, “Ãnyí ị̃nị̃ ꞌbóro ngwanzî, ãꞌdi ọꞌjọ ãnyi ní ãnyí fẹ̃ angalã Rũbãngã drị́ lẹꞌjọ́ alịjó rĩ íꞌa sĩ pí ni nĩ? ⁸ Ãnyĩ ꞌwa ôꞌwa ịtẹꞌdẹ̃ꞌdia ĩru enzĩ ãnyi drị̂ rá rĩ ni. Ánị̃ ọ̃tẹ, ĩlẽ ãnyĩꞌjọ má ní, Ãbãrãhámũ ni ãnyã átâ ꞌi, kí léꞌdĩ ékwí ãkó. Rá rĩi ãnyĩ nị̃ ọ̃tẹ Rũbãngã ká ꞌbácírí idé Ãbãrãhámũ ní ọ́nị́ ꞌdĩ sĩ wã. ⁹ Drĩâ ꞌdí ni sâ tọ́lụ́ Rũbãngã drị́ lẹꞌjọ́ alịjó rĩi bábá kwe õꞌwa losó rĩ ꞌwaꞌdi ku rĩ gajó vụ̃rụ́ ꞌbelé ãcí ꞌa.”

¹⁰ ꞌBá ꞌdĩ ọzị Yõánã ni, “Jõ ꞌdí ni rĩ, ãmidé ãꞌdu?” ¹¹ Yõánã aꞌị̃, “Jõ mãꞌdị́ drị́ lõꞌbú ẹ̃rị̃, kólẽ kõkwẽ lõꞌbú ãlu rĩi mãꞌdị́ lõꞌbú ãkó rĩ ní, vúa mãꞌdị́ lonya trõ rĩ isâ kidé aní áni.”

¹² ꞌBá mụ̃sọ́rọ̃ traka rĩ isâ evũkî drị́arụ́ bãtị́sịmụ̃ gá ọzịkî ani, “Lãpọ́nyị́, ãma lê, ãmidé ãꞌdu?” ¹³ Ọꞌjọ ãꞌi ní, “Ôtra mụ̃sọ́rọ̃ kamvụ cárá ã ꞌjọlé rĩ ã drị̃ ni ku.”

¹⁴ Ãsĩkãriã ọzị ani, “Kí ãma lê, ãmidé ãꞌdu?” Ọꞌjọ ãꞌi ní, “Únzu ꞌbá ku, ộlị́ ꞌbá tị enzõ drú ku, vúa ãnyã mũsárã koca ãnyi ní rá!”

¹⁵ ꞌBá cị̃drú ã Kị̃rị́sịtọ̃ ã ẹmụ́ka ni ụtẹ̃ka ásị́ sĩ sĩ, orĩkî rãa ꞌdị́ Yõánã ni Kị̃rị́sịtọ̃ ꞌi ku yã ꞌi.

¹⁶ Yõánã ọꞌjọ ãꞌi ní, “Má ãnyi ní bãtị́sịmụ̃ kwẽ ẹ̃yị́ sĩ, kí mãꞌdị́ zị̃ kệmụ́ mâ vú gá, mọ́rị́ drị́arụ̂ ondẽ mádrị̂ rá, mẹ́sị̃ anâ mvũka ĩbá isâ ayụlé ku. Kêyá ká ãnyi ní bãtị́sịmụ̃ kwẽ Éndrí Ọlẹ rĩ sĩ vúa ãcí sĩ. ¹⁷ Anâ kọ́ꞌbị ni anâ drị́ gá bábá ãnyá ụ̃mụ́ ni ụꞌbị́jó pí, ịgwẹ́lé rã, ãcí ọzị́ꞌdi kpé rĩ sĩ.” ¹⁸ Yõánã onze ãꞌi ní tã drị̃bá mgbị́mgbị ẽkpadrú ãꞌiã ásị́ ní ẹcọjó, vúa õfú losó rĩ isâ onze ãꞌi ní trõ.

Ósu Yõánã ni mãꞌbụ́sụ̃ ꞌa

¹⁹ Kí Yõánã kõcẽ ani kiꞌjá Hẹ̃rọ́dẹ̃ ni anâ olúka Hẹ̃rọ̃dị́ã ni anâ adrụ́pị Fị̃lị́pọ̃ ã ị́zị̂ trõ, vúa enzĩ zị̃ tị anâ idélé rĩ trõ sĩ ꞌdĩ, ²⁰ Hẹ̃rọ́dẹ̃ inzá anâ enzĩ ni Yõánã ni suka mãꞌbụ́sụ̃ ꞌa sĩ dị́.

Yẹ́zụ̃ ã bãtị́sịmụ̃ ẹsụ́ka ꞌi

²¹ ꞌBá cị̃drú ã bãtị́sịmụ̃ ẹsụ́re rĩi, Yẹ́zụ̃ isâ ẹmụ́ bãtị́sịmụ̃ ẹsụ́re. Anâ ilegĩre rĩi, ꞌbụ̃ awị́ru mgbọ, ²² Éndrí Ọlẹ rĩ ẹsị́ drị̃arụ́ kêndré ãmámũ áni. Ụ́ꞌdụ́kụ́ engá ꞌbụ̃ ꞌa ọꞌjọ, “Nyi mâ Ngwápị ni mâ lẽlé ndrõ rĩ ꞌi, nyí sĩ mâ ásị̂ ni ẹ̃ꞌbwẹ́ tị́tị́.”

Ãꞌbị Yẹ́zụ̃ drị̂

²³ Yẹ́zụ̃ ká anâ ẹꞌbụ̃ ni iꞌdó rĩ, kĩnyã ani ĩré mụ̃dịna. ꞌBá orã ani õndo Yọ̃zẹ́fụ̃ ni ọ́rị Ẹ́lị̃ ã ꞌbarâ ꞌi. ²⁴ Ẹ́lị̃ ni ọ́rị Mãtátị̃ ꞌi, Mãtátị̃ ni ọ́rị Lẹ́vị̃ ꞌi, Lẹ́vị̃ ni ọ́rị Mẹ́lị́kị̃ ꞌi, Mẹ́lị́kị̃ ni ọ́rị Jãnáĩ ꞌi, Jãnáĩ ni ọ́rị Yọ̃zẹ́fụ̃ ꞌi, ²⁵ Yọ̃zẹ́fụ̃ ni ọ́rị Mãtátíã ꞌi, Mãtátíã ni ọ́rị Ãmọ́sị̃ ꞌi, Ãmọ́sị̃ ni ọ́rị Nãhụ́mụ̃ ꞌi, Nãhụ́mụ̃ ni ọ́rị Ẹ̃sị́lị̃ ꞌi, Ẹ̃sị́lị̃ ni ọ́rị Nãgáĩ ꞌi, ²⁶ Nãgáĩ ni ọ́rị Mãátĩ ꞌi, Mãátĩ ni ọ́rị Mãtátíã ꞌi, Mãtátíã ni ọ́rị Sẹ̃mẹ́ị́nị̃ ꞌi, Sẹ̃mẹ́ị́nị̃ ni ọ́rị Yọ̃zẹ́kị̃ ꞌi, Yọ̃zẹ́kị̃ ni ọ́rị Jódã ꞌi, ²⁷ Jódã ni ọ́rị Jõãnánĩ ꞌi, Jõãnánĩ ni ọ́rị Résã ꞌi, Résã ni ọ́rị Zẹ̃rụ̃bãbẹ́lị̃ ꞌi, Zẹ̃rụ̃bãbẹ́lị̃ ni ọ́rị Sẽãlị̃tị̃ẹ́lị̃ ꞌi, Sẽãlị̃tị̃ẹ́lị̃ ni ọ́rị Nẹ́rị̃ ꞌi, ²⁸ Nẹ́rị̃ ni ọ́rị Mẹ̃lị́kị̃ ꞌi, Mẹ̃lị́kị̃ ni ọ́rị Ádĩ ꞌi, Ádĩ ni ọ́rị Kõsámũ ꞌi, Kõsámũ ni ọ́rị Ẹ̃lị̃mãdámụ̃ ꞌi, Ẹ̃lị̃mãdámụ̃ ni ọ́rị Ẹ́rị̃ ꞌi, ²⁹ Ẹ́rị̃ ni ọ́rị Jọ́sụã ꞌi, Jọ́sụã ni ọ́rị Ẹ̃lị̃ẹ́zã ꞌi, Ẹ̃lị̃ẹ́zã ni ọ́rị Jọ̃rị́mụ̃ ꞌi, Jọ̃rị́mụ̃ ni ọ́rị Mãtátị̃ ꞌi, Mãtátị̃ ni ọ́rị Lẹ́vị̃ ꞌi, ³⁰ Lẹ́vị̃ ni ọ́rị Sị̃mẹ̃ọ́nẹ̃ ꞌi, Sị̃mẹ̃ọ́nẹ̃ ni ọ́rị Yụ́dã ꞌi, Yụ́dã ni ọ́rị Yọ̃zẹ́fụ̃ ꞌi, Yọ̃zẹ́fụ̃ ni ọ́rị Jõnámũ ꞌi, Jõnámũ ni ọ́rị Ẹ̃lị̃ãkị́mụ̃ ꞌi, ³¹ Ẹ̃lị̃ãkị́mụ̃ ni ọ́rị Mẹ̃lẹ́ã ꞌi, Mẹ̃lẹ́ã ni ọ́rị Ménã ꞌi, Ménã ni ọ́rị Mãtátã ꞌi, Mãtátã ni ọ́rị Nãtánĩ ꞌi, Nãtánĩ ni ọ́rị Dãvị́dẹ̃ ꞌi, ³² Dãvị́dẹ̃ ni ọ́rị Jẹ́sẹ̃ ꞌi, Jẹ́sẹ̃ ni ọ́rị Ọ̃bẹ́dị̃ ꞌi, Ọ̃bẹ́dị̃ ni ọ́rị Bọ̃ázị̃ ꞌi, Bọ̃ázị̃ ni ọ́rị Sãlị̃mọ́nẹ̃ ꞌi, Sãlị̃mọ́nẹ̃ ni ọ́rị Nãsọ́nị̃ ꞌi, ³³ Nãsọ́nị̃ ni ọ́rị Ãmĩnãdáꞌbũ ꞌi, Ãmĩnãdáꞌbũ ni ọ́rị Ãdĩmínĩ ꞌi, Ãdĩmínĩ ni ọ́rị Ãrínĩ ꞌi, Ãrínĩ ni ọ́rị Hẹ̃zị̃rọ́nị̃ ꞌi, Hẹ̃zị̃rọ́nị̃ ni ọ́rị Pẹ̃rẹ́zị̃ ꞌi, Pẹ̃rẹ́zị̃ ni ọ́rị Yụ́dã ꞌi, Yụ́dã ni ọ́rị Yãkọ́ꞌbọ̃ ꞌi, ³⁴ Yãkọ́ꞌbọ̃ ni ọ́rị Ĩsákõ ꞌi, Ĩsákõ ni ọ́rị Ãbãrãhámũ ꞌi, Ãbãrãhámũ ni ọ́rị Térã ꞌi, Térã ni ọ́rị Nãhọ́rị̃ ꞌi, ³⁵ Nãhọ́rị̃ ni ọ́rị Sẹ̃rụ́gụ̃ ꞌi, Sẹ̃rụ́gụ̃ ni ọ́rị Rẹ́ụ̃ ꞌi, Rẹ́ụ̃ ni ọ́rị Pẹ̃lẹ́gị̃ ꞌi, Pẹ̃lẹ́gị̃ ni ọ́rị Ẹ́bẹ̃rị̃ ꞌi, Ẹ́bẹ̃rị̃ ni ọ́rị Sélã ꞌi, ³⁶ Sélã ni ọ́rị Kãĩnánĩ ꞌi, Kãĩnánĩ ni ọ́rị Ãrĩfãkãzáꞌdĩ ꞌi, Ãrĩfãkãzáꞌdĩ ni ọ́rị Sẹ́mụ̃ ꞌi, Sẹ́mụ̃ ni ọ́rị Nóã ꞌi, Nóã ni ọ́rị Lãmékĩ ꞌi, ³⁷ Lãmékĩ ni ọ́rị Mẹ̃tụ̃sẹ́lã ꞌi, Mẹ̃tụ̃sẹ́lã ni ọ́rị Ẽnókã ꞌi, Ẽnókã ni ọ́rị Jãrẹ́dị̃ ꞌi, Jãrẹ́dị̃ ni ọ́rị Mãhãlãlẹ́lị̃ ꞌi, Mãhãlãlẹ́lị̃ ni ọ́rị Kãĩnánĩ ꞌi, Kãĩnánĩ ni ọ́rị Ẹ̃nọ́sị̃ ꞌi, ³⁸ Ẹ̃nọ́sị̃ ni ọ́rị Sẹ́tị̃ ꞌi, Sẹ́tị̃ ni ọ́rị Ãdámũ ꞌi, Ãdámũ ni ọ́rị Rũbãngã ꞌi.